MAZMUR 101 - Allah Wene Fano Wene Hupla Inane

Ap raja ekhe nen wene watikhe mene

¹ Daud Awuni. Tuhan neisena, an he Haren hendawi hundik hilingnapluk, tiphogo hilingitik, katokhogo hilingitik, hilingiti lagen mene andi faget, wuni Hat fogethafu awuniba ikhi logogin o!

² An he nebeba weaget fakhigik legengge ogal fakhaluk werek mene andi faget futfikhi lagi o, Hat he ki sambul an nambit wesigin nogo? An he nailoba andoma nebe enogo fakhaluk logogin namolo.

³ Weak hilingitarek mene andi re ekhe logouwageluk herakfagain mondok lek, wene weak mene inoba fuluk hilingitarek mene andi re an he mondogat nabit, Wene ariginik mene andi re an noba ekhe logogin mondok lek.

⁴ An he henarogo hilingitarek mene andi re nabit welagi, weak mene hilingitunem nabit isigirek andi nen he agaiseratirek.

⁵ Ap ekhe nen wene ero le'maat linglong engge are ekhe abok palogo weaget fagain mene andi re, an nen eiloak leget fagain. It ap inendawimo leget fakhikhi logolik wonoget fakhagarek mene re, An nen ekhe fisikhi logogin mondok lek.

⁶ Afuni Allah ba tiphogo hilingitarek mene nek he an nen nendawirinafirek, it ariginik mene nek he An naiba ninom logogun fano. It afuni inebe weak hilingiti lek werek mene nek he, An nobaget hilingiti logogun fano.

⁷ Ap ineranen wene agarek mene re An nailoba logogun mondok lek, afuni inane nomo-nomo mene re An nelokhoma aninurogo logou lek hak.

⁸ Yi sambul ti sambul he o kweang yiba afuni weak enek hokhorogo hilingitu welagaikharek mene andoma re, An nen felelenghogo legetfisagain. Afuni inaniniba hilingiri'lagwi mene andoma re, At Tuhan awi kota ba andoma nen mondogat legetfisagain o, iluk wene watikhe.