MAZMUR 10 - Allah Wene Fano Wene Hupla Inane

Katokhogo hilingninobagain iluk samban isikhe wene

¹ Tuhan neisena, nenahalok Hat hebe nit ninom yathogo welagen, Nen nit ninendawinggen nonghonghogo were'ma Hat hebe hina'laga lagen?

² It afuni weak hilingitarek mene nen he wonoget fakhikhi logolik afuni inenggi lek mene omanogo enggin-fenggin inoba fikhi logolik sebelisugu werek omari! We it andi inonggwaregen hele webet fakhili'lagwi hilingi'mo re it inebe elema ke'nok ikhi logouwak.

³ It ap weak hilingitarek mene nen he iren weak hilingisugun iluk anggagarek mene omanogo nek legeisogo fakhagarek, ap an enek anggagarek mene andoma nen he inane hombuk palogo Tuhan ninabit iluk herakhobagali'lagwi.

⁴ It ap weak hilingitarek mene nen he Tuhan faget inafe wonget fisaluk inobakhe nigik hilingirik lagaikharek, a'nogo hilingitarek andi re iren foget fakhikhi logolik Allah re ebe lego, iluk hilingitarek.

⁵ It afuni weak hilingiri'lagwi mene andi re iren hilingiri'lagwi mene omanogo mondogat ambisangma fano nek agarek, oba nen he, iren At Tuhan ebe inom Awene melalek inom inonggot logolik fut figi'lek welagik, it inagaila'lak inaselei mene omanogo seramet fisigik, agarek.

⁶ It inendawimo nen anggikhi logolik he, ”An nen hilingisigin mene andoma re ambisangma ekhe weagasigin lek, nen hobuk logogun huli andoma ogore ap weak hilingiti'lek welagaikharek hakhogo logogun,” iluk anggagarek.

⁷ A'nogo anggikhi logolik he, iren afuni homan fisigik, inailo mene kwelafik, ineranen wene lalinafik, agarek. It inane agarek mene andoma re mondok weak mene afuni inoba wusu fuk mene nek agarek.

^8-9 Ap weak hilingitarek mene omanogo nen he it afuni weak hilingitu inonggot mene omanogo inoasugun iluk he, o sili endepkwe omanogo hina'lasi laluk werek. Iren he mene singa nen at ninggerek mene senggeligiluk engga a'ma kuluk hinago welagarek hakhogo re, omanogo hinago logolik, afuni inonggwaregen tela elo'lek mene omanogo ineil peninafi logolik werek. Iren he afuni le'ma omanogo nen it inenggi lek mene omanogo inanggwe palfuluk he, inebe fakfisaluk woginarek lagaikharek.

¹⁰ Iren he it afuni omanogo senggelinafik, inomameba warogo pelaginabugun iluk, inebe housal fuluk werek.

¹¹ Iren anggikhi logolik he, ”Allah re mondogat onggot were'ma re fut ninobagali'lago lek, hobuk andoma ogore Aren ekhe nisagain legat!” iluk anggikhi logolik hilingitarek.

¹² Tuhan neisena hebe menla'luk he ap weak hilingiri'lagwi mene andoma wene inoba fein o! Afuni sebelogo fisugunem enggin-fenggen hugu werek mene andoma inoba eberisikhi logoin o, neisena!

¹³ Nenahalok it afuni weak hilingiri'lagwi mene andoma nen Allah inendawimo seramet fuluk, nit Allah nen wene ninoba fagain lek iluk hilingiri'lagwi nogo?

¹⁴ Ariginik oba nen he, Haren heilenggen mondogat isikhi lagen, Haren he afuni enggin-fenggin hugu werek mene inom, anggolorogo hikhi logolik werek mene inom, futfisikhi logolik, leberisagain iluk fik-foukhogo nek welagen. Afuni it inamu nen hilingisu elo'lek mene re inebe Hat hoba wokhetarek, nen Haren he afuni inenggi lek mene hundik handik leberisikhi lagen.

¹⁵ Afuni weak hilingiri'lagwi mene inom, Hat hane sagalogo fuluk hilingiri'lagwi mene inomen, inomame werek iluk hilingiri'lagwi mene andi re Haren it inomame lebeleget fisan o. It inobabut hilingiri'lagwi andiba Haren wene inoba foumo re it inebe ekhe weinam asugun lego.

¹⁶ At Tuhan ebe Raja lego mene logolik ninhup nanhup melalinafu mondok were'ma re, it inunggulenu ekhe mene-ekhe mene At ebe inonggot mene omanogo re it inanggweang oba andoma nen inebe mondogat leget fisagain o.

¹⁷ Tuhan neisena, Haren he it afuni weaget fisagarek mene omanogo nen samban ugu mene re inane hesanggo holfuluk it inendawinggen hambuget fisikhi lagen.

¹⁸ It yenggerugwi suarek mene inom, afuni sebelogo fisagarek mene inom inawene re, afuni nen it inoba inailo mene hilingfisanogoluk he Harenat inebikhit aga lagen.