MAZMUR 1 - Allah Wene Fano Wene Hupla Inane

BUKU ATTAK MENE: MAZMUR 1–41 Afuni inobabut fano hilingitarek mene inom weak hilingitarek mene inomen hilingitarek wene

^1-2 Afuni ekhe inobabut he, it ekhe weak hilingitarek mene nen, komorinafunem inane holhi'lek, weak hilingitarek mene inobabut wanhi'lek, Allah inendawimo serametfisagarek mene inom huniti'lek herakfisaluk Tuhan nen ”Yi'nogo hilingiti logoino ti'nogo hilingiti logoino,” iluk komorinafikhe wene andi inendawimo inagaiyekhogo hilingiti logolik hup hundik lingge hundik, wene andi enu salogo oba ebetu mondok welagaikharek mene andi, hobuk Allah nen fanorinafunem inendawimo inagaiyek asugun o.

³ It andi inebe re, e awi i elesimo yakfugunem, engga sawet agi'lek, ket mondok logolik enggen itu sambul itu mondok welagarek hak, iren yi mene ti mene faget hilingitunem he higithogo nek hilinglagarego.

⁴ A'nogo meneat he, it afuni inobabut higithogo hilingiti'lek weak kwanirogo nek hilingitarek mene re a'nogo ekhe hilinglagarek mondok lek. It inebe re, yi mene ti mene afulfulengge sogoi en funhogo waluk lagarek andi hangge werego.

⁵ Allah nen he wene afuni inoba figik kotik ikhi logolik, it inobabut higithogo hilingiti'lek kwanirogo nek hilingitarek mene andi wene inoba fuluk weagerinafik, nen Allah againafuri mene inanggele'ma nen lisogo wulak fisigik igin o.

⁶ Andi re, At Tuhan he afuni at ane hologo hilingitarek mene andi, at awe a'ma fisaluk ferinarek welagarek. A'nogo meneat he it inobabut weak hilingitarek mene andi, alomat lasugun oba andoma louwogeluk hilingitarego.