MATIUS 6 - Allah Wene Fano Wene Hupla Inane

Inagarek afuni ekhe wogisagarek wene

¹ A'nogo yagaisasikhesik he, ekhe mel yagaisasikhe: ”Allah nen yi'nogo hilingiti logoino, iluk isikhemo, hiren higithogo hilingiti lagep mene andi, afuni nen ineilenggen hisikhi logouwageluk sele'ma hilingiti logogubo. Ineilenggen hisikhi logouwageluk hilingitep halok he, hineisena pogoroba mene nen onggo wokhisagain mondok lego. Hit hinendawimo ebe'ni!

² Nen, hit ekhe hinagarek werek mene nen, it lek mene leberisouwogeluk halok: An yi'nogo hilingiti lagi, iluk hinane a'mit suphogo hilingiti logogubo. It ekhe inendawinggen pire logolik inagap oba nek fano hangge logolik, o samban agarek oba kuluk inom, ebekwe laga logolik inom, it ekhe nen: It fano, iluk fogerinabuageluk hilingiri'lagwi andi, hit a'nogo hilingiti logogup. It andi onggo hela hak he, we fogerinabi'lagwi andi aro.

³ Halok he, hit hinagarek afuni inagarek lek mene wogisuogeluk halok he: An yi'nogo wogisagain, iluk, it hinerugwi hinagaila'lak inom, it ekhe inom, mondok yagaisagubo.

⁴ Hinagaisogo wogisamo re, hineisena Allah pogoroba mene afuni hinagaisogo hilingitarek mene eilenggen isikherek andi nen onggo wokhisagain o,” iluk yagaisasikhe.

”Samban yi'nogo ikhi logoino,” iluk yagaisasikhe wene

⁵ A'nogo yagaisasikhesik ekhe mel yagaisasikhe: ”Halok he, hit samban ikhi logolik, afuni ekhe inagap oba nek fano hak logolik inendawinggen pire mene nen he, samban ikhi lagi andi afuni nen futnobagauwageluk, Allah awi wuri'mo kwagaresik he, inebe menla'luk samban igik, kwe handogalma menla'luk samban igik, agarek andi hak he, ikhi logogubo. It andi onggo hela hak he, we fogerinabi'lagwi andi aro, iluk eberogoat yagahisigi o.

⁶ Meneat he, hit samban uogeluk halok he, hinaiba kwe yagarogo kuluk, hineisena Allah pogoroba mene ebe ineilenggen hagarek lek mene a'nogo nen wokhisoageluk kino yagati logoino. Hiren hinagaisogo kino yagasugun mene andi, at eilenggen hinago mene hikherek andi nen he, wokhisagain o.

⁷ Halok he, hiren samban ikhi logolik, it afuni endakwe mene nen agarek hak ikhi logogubo. It andi samban ikhi logolik, inendawimo nen he, Uan-awan ikhi lagi andi nen, nineisena pogoroba mene esanggo holigin o, iluk, lithilik-lathilik lagaikharek andi.

⁸ Hit he, it inobabut wanhubo. Hineisena Allah pogoroba mene andi oan kino yagati'lek werek kwelek he, hit hinamolo mene andi, at Allah fageat elu welagarego.

^9-10 Halok he, samban ikhi logolik he, yi'nogo ikhi logoino: Nineisena pogoroba mene honggwarek henu esinet fikhi logouwageluk, hilingninabime o. Ninebe hawe a'ma logouwageluk ninobagaime o. It pogoroba hat hendawimo anggegendek mene hilingitarek hak, nit kweangma a'nogoat hilingiti logouwageluk, hilingninabime o.

¹¹ Nit ninamburu yogondak nogoin mene higithogoat wo'nisame o.

¹² Afuni nen nit weaget ninafa mene, niren sebelogo legetfisogo andi hak, nit weak hilingito mene haren sebelogo legetfisano o.

¹³ Weak hilingisuageluk ninendawimo kagaligin oba andoma herakninobagagi'lek, pikhirat wo'ninarek laga logoino. Obabut weak mene andi nen enggi fa'nisikhe halok, haren telninafi logoino. [Nineisena Henupogot harat logolik, yi mene ti mene hilingisu hak enek andi nen he, harat fogethafo mondok logogun o. Ebe asuak u hak, Amin,] iluk samban a'nogo ikhi logoino.

¹⁴ Nen, afuni nen hit weagethinafa mene, hiren sebelogo legetfisegep halok, hineisena Allah pogoroba mene nen hit weak hilingitep mene andi sebelogo legetfisagain aro.

¹⁵ Meneat he, it ekhe nen hit weak hilinghinafa mene, hiren sebelogo legetfisigi'lek halok he, hineisena pogoroba mene nen hit weak hilingitep mene sebelogo legetfisagain legaro,” iluk yagaisasikhe.

Sumburu ninggi'lek sambanat ugu mondok logou wageluk yagaisasikhu wene

¹⁶ A'nogo yagaisasikhesik he, ekhe mel yagaisasikhe: ”Hit sumburu ninggi'lek sambanat ugu mondok logouwogeluk halok he, it afuni ekhe inagap oba nek fano hak logolik, inendawinggen pire mene nen, Afuni ekhe nen enegat futninobagaluk inelokhonggen ofuselogo welagaikharek andi hak, logogun lek. It andi onggo hela hak he, we, afuni nen enegat yerisagarek andiat iluk, eberogoat yagahisigi o.

^17-18 Menere, hit enek he, sumburu ninggi'lek sambanat ugu logouwogeluk halok, afuni nen enegat futhinobagainogo. Hineisena Allah afuni nen ineilenggen hagarek lek mene a'nogo alegaren enegat futhinobagauwageluk hinagap sobalogo re, hinesi feisalogo logolik, samban ikhi logoino o. A'nogo hinagaisogo hilingitep halok he, hineisena Allah afuni ineilenggen hagarek lek mene andi eilenggen hisambik onggo wokhisagain o,” iluk yagaisasikhe.

Inagarek andogorogo fakhogoin wene

¹⁹ A'nogo yagaisasikhesik he, ekhe mel yagaisasikhe: ”Afuni nen yi mene ti mene kweangma yoma andogorogo fugunem he, elugengge nen palhik, kulumage figik, ap ineil masi weak mene nen yogot wani kwigik, hilingitare'ma yoma re, yi mene ti mene andi andogorogo fogoin lego.

²⁰ Meneat he, pogoroba mene nek he, elugengge nen palhik, ip yugul lagik, ap ineil masi weak mene nen yogot wani kwigik, agarek mondok lek. Halok he, pogoroba andomaat fano mene andogorogo lakfakhogoin o.

²¹ Hit hinagarek hinendawinggen hundik mene andoma andogorek were'ma, hinendawinggen andomaat logogin o,” iluk yagaisasikhe.

Inebe fano selekhogo welagaikharek wene

²² A'nogo yagaisasikhesik he, ekhe mel yagaisasikhe: ”Hinebe selekhogo esage ibilik hangge, hineilenggen andiat werego. Halok he, hineilenggen fano halok, hinebe abirengge mondok selegat logogun o.

²³ Meneat he, hineilenggen weak halok he, hinebe abirengge o mum hangge logogun o. Mene re, hinendawimo o selek hangge mene andi mum aga halok he, eigo! Mondok ebenagai'mo mumat welagebo,” iluk yagaisasikhe.

Allah inom, inangge yi mene ti mene inom faget, isikhe wene

²⁴ A'nogo yagaisasikhesik he, ekhe mel yagaisasikhe: ”Andi hak he, ap misigat mene ap kaindek inebe pire mene inamingmingengge logolik ineabu hilingiti logogun mondok elo'lego. A'nogo logogin halok he, at inamingmingengge andi nen: Neisena ekhe yi fano nendawi. Nen, ekhe andi weak nabit, iluk ikhi logolik he, endawi mene andi emberek lomborogo logolik he, ekhe abit mene andi aberalit fikhi logogin o. Andi hangge, hit he, Allah amingmingengge logolik, uang amingmingengge logogun elo'lego.

²⁵ An nen a'nogo yagahisigi andi nen, hit hinendawimo nen he, Nineluk logouwogeluk he, sumburu inom, i inom, nangge nogoin. Nen, ninebe su ki mene laberogoin, iluk hinendawinggen firogo menenei uan horok ebeti logoinogo iluk yagahisigi. Nenggarek mene andi esin nogo? Hineluk welagep andi esin anggigi. Su labetarek mene andi esin nogo? Hinebe andi esin anggigi.

²⁶ Sue pogoroba kwe tarogo nikherek mene andi hineilenggen yethikhi logolik hinendawimo ebe'ni. It sue andi yi mene ti mene awi yatik, enggen itunem palogo obali'mo fagarek oba figik, agarek lek meneat he, Hineisena pogoroba mene nen hinamburu wogisikherego. Mene re, Allah nen it sue andi endawirinaferek nogo? Lego. We, hit hinebeat endawithinafi logolik, hinamburu wokhisagain lek nogo? Wokhisagain aro.

²⁷ Nen, hit ekhe hinendawimo nen, An nebe wa'lasigin andi sambul he, tekhogo wa'lagi'lek, hobuk endephogo ekhe neluk logoile e, iluk, menenei uan horok ebesigin andiba, heluk ekhe inom logogin nogo? Elo'lego.

²⁸ Hit he, su hinagap oba labesugun andi fagerat nenahalok hinendawi fiti lagep. Enggen mulinggen-molanggen o leikwe iterek a'nogo futfeni. Enggen andi oan isigeluk he, set kwil-kwalhogo hilingitik, yo lalogo su hak itik, ikherek mondok lek.

²⁹ Mene re, at ap Salomo ebe kain logolik alilingge wagane'ma fogerati lagaukwa andi elo'lek hangge, oba nen enggen andi nek he eilamulit mondok fano!

³⁰ Engga helengga o leikwe welagarek andi re, yogondak hak fano welagaresi'mo nen, ohealek hak endumo nolfisagarek meneat he, Allah nen inasu labetfisa hak fano mene hilingisogo fisikherek andi nek he, hinebe faget fanorogo labethinobagagin lek nogo? Labethinobagagin o. Hinendawinggen Allah oba himbiret figi'lek yi ri!

³¹ Halok he, hit hinendawinggen firogo menenei uan horok ebeti logolik, Ninamburu inom, ninagai inom, nangge nogoin? Nen, ninasu nangge laberogoin, ikhi lagep andi ugun mondok lego.

³² A'nogo hilingitarek andi mondogat he, it afuni endakwe mene nen andi mene esinet fuluk herarik nikharek meneat he, hit yi nek he, yi mene ti mene legen hinelagaik hak welagep andi, at hineisena Allah pogoroba mene elu welagarego.

³³ Halok he, hineisena Allah nen awe a'ma logolik hilingiti logogun andi faget inom, nen aren, yi'nogo ti'nogo hilingi'no, iluk yagahisugunem hilingiti logogun andi faget inom, esinet fikhi logogun halok, yi mene ti mene andi oba loukhogo wokhisagain aro.

³⁴ Halok hit he, ohealek faget hinendawinggen firogo menenei uan horok ebetubo. Yogondak weak ari'logo mene werek kwelegat he, ohealek weak asigin mene ebesugun lego,” iluk yagaisasikhe.