MATIUS 5 - Allah Wene Fano Wene Hupla Inane

YESUS PUNUBA LAGASIKHESIK WENE YAGAISASIKHE WENE Inendawimo inagaiyek hikhi logogun wene

¹ Afuni hokhorogo wagunem, Yesus eilenggen yerisasikhesik he, punuba lagasikhesik hurek were'ma, it at ane wanhi lagaukwa mene oba wagaukwa.

² Wagaukwama re, wene it inom yagaisikhi logolik he:

³ ”Afuni inendawimo nen, An he, Allah eilhanem elo'lek welagi, we Allah oba nek tibet fuluk logogin iluk anggagarek mene andi, Allah awe a'ma fisikherek oba andoma eisewerek irat agaikhasik werek andi nen he, inendawimo inagaiyek hikhi logouwak.

⁴ Nen, afuni inendawimo wiik- weakhogo welagaikharek mene andi, Allah nen inendawinggen sebeligin andi nen he, inendawimo inagaiyek hikhi logouwak.

⁵ Nen, afuni inobabut enago mene andi, Allah nen o abok yaganisasikhe mene andi irat eise asugun andi nen he, inendawimo inagaiyek hikhi logouwak.

⁶ Nen, afuni sumburu inom, i inom, nele anggagarek hak, Allah endawimo anggikherek mene esinet fuluk hilingisu inamolo mene andi, sumburu inalabut ninghogo nenggarek hak, hobuk Allah nen inendawimo fanorogo ebe mene wogisagain andi nen he, inendawimo inagaiyek hikhi logouwak.

⁷ Nen, afuni inebe inendawirogo welagaikharek mene andi, nineisena nen it endawirinabigin andi nen he, inendawimo inagaiyek hikhi logouwak.

⁸ Nen, afuni inendawinggen fano tegelek welagaikharek mene andi, hobuk Allah ebe ineilenggen hogoin andi nen he, inendawimo inagaiyek hikhi logouwak.

⁹ Nen, afuni inom weagat were'ma, it ekhe nen lambulogo fisagarek mene andi, at Allah nen he, yi an nagainafuri o, iluk yagaisagain andi nen he, inendawimo inagaiyek hikhi logouwak.

¹⁰ Nen, afuni nen Allah endawimo anggikherek mene esinet fagarek mene faget he, it ekhe nen weagerinafu kwelek logogun mene andi, Allah awe a'ma fisikherek oba andoma eisewerek irat agaikhasik werek andi nen he, inendawimo inagaiyek hikhi logouwak.

^11-12 Hit oan werek kwelek, attagat it ap Allah ane yagaisikhi lagaukwa mene weagerinafi lagaukwa hagat, hit an nebe faget, it afuni ekhe nen wenakhisigik, weagethinafik, ineranenat hinabok ikhi logolik, yi weak ti weak hinoba figik, ugu halok he, hinendawimo hinagaiyek hikhi logoino o. Hobuk nineisena pogoroba mene nen onggo hokho mene wo'nisagain iluk, hinendawimo fano agik, hinagaiyek higik, hokhorogo ikhi logoin o,” iluk yagaisasikhe.

Mayu faget inom, o selek faget inom yagaisasikhe wene

¹³ A'nogo yagaisasikhesik he, ”Afuni yoma mondogat faget, mayu hangge hirat welagebo. Mene re, mayu andi aik lek aga halok he, nena meneba aik wereget asugun anggegep? Lego. Aik wereget asugun mondok legen he, kweisalogo lakfisugunem afuni ineisogen sebelisagarek andi.

¹⁴ Nen, afuni kweangma selegerinafarek menere, hirat welagep. O sili ekhe punu ebeba wurik mene hinakfoumo re, elo'lek.

¹⁵ Nen, esage ibilogo sebelogo fagarek legat. We, eisok telik oba fugunem afuni oloba welagaikharek mene inebe mondogat selegerinaferek.

¹⁶ Andi hak he, hit fano hilingitunem, it ekhe nen he: It fano hilingiri'lagwi, iluk hineisena pogoroba mene a'nogo fogerasuagen he, hit afuni ineilhanem andi hanggeat selekhogo logoino o,” iluk yagaisasikhe.

Allah nen komotninafikhe wene a'nogo faget yagaisasikhe wene

¹⁷ A'nogo yagaisasikhesik he, ekhe mel yagaisasikhe, ”An wagi andi re, Allah ane komotninafikhe wene a'nogo inom, it ap Allah ane yagaisikhi lagaukwa mene inane andi inom sebeligeluk wagi lego. We, eberogoat hilinglasuageluk esinet feigeluk wagi o.

¹⁸ An nane eberogoat yagahisak. Pogot inom, kweang inom, oan lek agi'lek werek kwelek ya re, wene Allah nen komotninafikhe mene andi, lisu endebat sobon al hangge inom, inesinggen misigat hangge inom, lek agi'lek mondok felelenghogo eberogoat hilinglasigin o.

¹⁹ Halok he, sa nen Allah nen isikhe wene endep mene misigat halok sebelogo fuluk, it ekhe nen a'nogo hilingiti logouwageluk yagaisugu halok he, Allah awe a'ma fisikherek oba andoma, at andi enu yenggerugwi hak inendawimo seramet fikhi logogun o. Mene re, sa nen Allah ane andi higithogo hilingiti logolik, it afuni ekhe nen a'nogoat hilingiti logouwageluk yagaisikhi logogin halok he, Allah awe a'ma fisikherek oba andoma, at andi enu weregat were'ma esinet fikhi logogun o.

²⁰ Allah endawimo anggikherek mene higithogo hilingisuogeluk he, it afuni nen Allah ane lisu palek eisewerek mene omanogo inom, ap Farisi mene inom, inobabut hilingiri'lagwi andi hagat hilingiti logogun halok he, Allah awe a'ma fisikherek oba andoma kugun lego. Eberogoat Allah endawimo anggikherek mene higithogo hilingiti logogun mene halok enek kugun o,” iluk yagaisasikhe.

Ina'mage lagaikherek andi faget yagaisasikhe wene

²¹ A'nogo yagaisasikhesik he ekhe mel yagaisasikhe, ”Wene Allah nen nit ninambu ninombalak yagaisikhi logolik he: Afuni inoasugun lego,” iluk isikhe mene, inoatep halok he, wene hinoba fagain werego, iluk isukwa a'nogo hinesanggo holhi lagebaro.

²² Mene re, an nen wene ekhe yi yagahisak. Hat sa nen hagailak faget ha'mage lagagu halok he, wene ekhe hoba fagain werego. Nen, hat sa nen hagailak ekhe yagati logolik he: Hat he, hebe kembu yi re! iluk ugu halok he, it ap wene ero pilingitare'ma andoma wokharek laluk, wene hoba fogoin aro. Nen, hat sa nen: Hat he, hendawinggen mondok lek yi ri! Iluk ugu halok he, wene hoba fuluk endu amuilo'ma andoma lakhobagagin o.

²³ Halok he, hat sa nen hangge fano mene waluk Allah awe a'ma fei laga logolik, hendawimo nen he, ”Nagailak a'nogo nen, at weak hilingitemo, wene noba fili'logo, iluk honggwaregen hendawinggen ebetlasi waga halok he,

²⁴ waluk lagain mene andi Allah faget fisagarek oba andoma weat fuluk, hobuk hambotkwe sugulogo hagailak a'nogo oba wesimbik, wene sebelogo leget fisaluk he, Allah faget fugunogo o.

²⁵ Nen, ap ekhe hemberek weak mene nen hat wokharek ap wene ero pilingitare'ma lagunem he, it ap andoma nen hobuk wokharek polisi inoba lagunem he, it polisi lagen hobuk wokharek he, inenggi hele warogo fisagarek oba lanogo iluk, hemberek weak mene andi re, ebekwe oan laga logolik andemat wene sebelogo legetfeino o.

²⁶ A'nogo legerati'lek halok he, henggi hele warogo hobagaumo, ap andi agarek palegengge hat hoba werek mene andi onggo katokhogo oan wogeti'lek werek kwelek, wulibi wesigin mondok lego, iluk eberogoat yagahisigi,” iluk yagaisasikhe.

”Pailak fakfisogoin lek,” iluk yagaisasikhe wene

²⁷ A'nogo yagaisasikhesik ekhe mel yagaisasikhe, ”At Allah nen ikhi logolik he: Hemi pailak fakfisogoin lego, iluk isikhe andi, hinesanggo holhi lagebaro.

²⁸ Meneat he, an nen wene yi yagahisak. Ap sa nen, he ekhe eilenggen yethaluk endawimo nen he, ”Eige. An he andi pailak hilingi'le e,” iluk anggikhe halok, endawimo nen pailak eberogoat hiliingite o.

²⁹ Halok he, heilenggen ebekwe nen weagethabu hak hilinglaga halok he, hemelogo lakfisano. Hebe abirengge endu ai'mo lakhobagainogo nen he, hemelogo lakfisaluk fenakwe nek logoumo fano.

³⁰ Nen, henggi ebekwe nen weagethabu hak hilinglaga halok he, henggi ebekwe andi tekhogo lakfisano. Hebe abirengge endu ai'mo lakhobagainogo nen he, tekhogo lakfisaluk fenakwe nek logoumo fano,” iluk yagaisasikhe.

”Hemi lologo herakfisogoin lek,” iluk yagaisasikhe wene

³¹ A'nogo yagaisasikhesik, ekhe mel yagaisasikhe: ”Nen, wene ekhe fageat yagaisikhi logolik he, Ap ekhe agwe lologo herakfisageluk halok he, An he yi herakfisigi o, iluk, lisu palogo re, he andi wogosuagaro, iluk isukwaat.

³² A'nogo meneat he, an nen wene ekhe yi yagahisak. Ap ekhe agwe waganek mene, it ap ekhe nen pailak fakfigi'le'maat, he a'nogo lologo herakfisikhe halok, he andi pailak hilingisuageluk herakfisikhe o. Nen, at ap ekhe nen he lologo fagain mene andi wanhe halok, pailagat wanigin o,” iluk yagaisasikhe.

”Hombuk palugun lek,” iluk yagaisasikhe wene

³³ A'nogo yagaisasikhesik, ekhe mel yagaisasikhe: ”Nen, wene ekhe yi, Allah nen ninambu ninombalak omanogo yagaisikhi logolik he: Hit hinera nen an Allah nenu hombuk palhubo. An yi'nogo hilingisigin o, iluk an nenu hombuk palhep halok he, hineisena Allah neilhanem egen hagat hilingi'no, iluk isikhe wene hinesanggo holhi lagebaro.

³⁴ Meneat he, an nen ekhe yi yagahisak. Hiren he, at ekhe yagati logolik: Yi mene ti mene enu hombuk palogo yagaheti o, iluk, yagasugun mondok lego. Allah ebe pogoroba hurek welagarek andi nen he, pogot andi enu hombuk palugun mondok lego.

³⁵ Nen, nineisena Allah eisok kweang yiba yago welagarek andi nen he, kweang yi enu hombuk palogo yagaisogoin mondok elo'lego. Nen, o Yerusalem hokho silimo andi an hineisena Nenupogot nebe kain mene andoma welagirek hilingi'mo, o andi enu hombuk palugun legaro.

³⁶ Nen, yogondak he, nesi mola asuak igik, yogondak he, nesi muli asuak igik, ugunem hinane hologo mola agik, muli agik, ikherek mondok lego. Halok he, hinungguloak andi enu hombuk palogo ugun legaro.

³⁷ Hiren, Io, uogeluk halok, Ioat ino. Nen, Lego, uogeluk halok he, Legat ugun. Wene hunogoat mene ekhe mangorati lagep halok he, Iblis obabut weak mene a'nogo nen hinendawimo kagalhu kwelek ugun o,” iluk yagaisasikhe.

”Hit weagethinafu halok onggo fogoin lek,” iluk yagaisasikhe wene

³⁸ A'nogo yagaisasikhesik, wene ekhe mel yagaisasikhe, ”Attagat wene ekhe mel isukwa: Hineilenggen hemelhu halok he, onggo ineilenggenat hemelugun. Nen, hinaik langgulhu halok he, onggo inaigat langguluguno, iluk isukwa mene andi hinesanggo holhi lagebo.

³⁹ A'nogo meneat he, an nen wene ekhe yi yagahisak. Weagethinafa halok onggo fugubo. Hinelokhonggen ebekwe lambukhogo hinoatu halok he, harekwe inomat hoasuageluk, wogisano aro.

⁴⁰ Nen, it afuni ekhe nen, it ap wene ero pilingitarek mene omanogo inoba wokhinarek laluk: Hasu elonggoma laberek mene wo'nom, iluk ugu halok he, andi inom, hasu sogoi su endakwe laberek mene andi inomat mangorogo wogisano o.

⁴¹ Nen, ap ekhe nen ane omamerogoat ikhi logolik: Sungge yi horok andem nobagai lan o, ugu halok he, hiren taganhogoat fisa lano.

⁴² Nen, at ap ekhe nen: Hagarek andi an wo'nom, iluk kino ugu halok he, hinabit igi'legat wogosugun o. Nen, at ekhe nen: Hat mene andi hobuk wokhesigen, elama faget wo'nom, iluk ugu halok he, nabit, igi'lek wogosugun aro,” iluk yagaisasikhe.

”Afuni hinom weak mene hinendawirogo logogun,” iluk yagaisasikhe wene

⁴³ A'nogo yagaisasikhesik he ekhe mel yagaisasikhe, ”Attagat it ekhe nen wene mel yagaisasukwa: Hiren afuni hinom welagep mene halok hinendawinggen hundik logolik he, it ekhe hinom weak mene halok he, hinapsiri inabugun o, iluk isukwa mene andi hinesanggo holhi lagebo.

^44-45 A'nogo meneat he, an nen wene ekhe yi yagahisak. At nineisena Allah pogoroba mene mo eisewerek logolik kweangma selekhogo afuni inobabut weak mene inom, fano mene inom, mondogat faget yaginafik, nen, meiso pelakfei wagarek andi re, it higit hilingiri'lagwi mene inom, weak hilingiri'lagwi mene inom, mondogat faget pelakfisa wagik, ikherek andi hak, hit hineisena Allah pogoroba mene againafuriat asubagaigeluk, afuni hinom weak mene andi hinendawirinafi logolik he, it weagethinabi'lagwi mene andi, Allah nen fanorinabuageluk it faget samban ikhi logoino.

⁴⁶ Nen, it afuni ekhe nen, hit inendawit hinafarek mene andi nek hiren hinendawirinafi lagep halok he, Allah nen onggo wokhisagain nogo? Lego. Andi hak he, it ap pemerintah mene faget uang kino iluk andogotarek mene nen inobabut a'nogoat hilingitarego.

⁴⁷ Nen, hinerugwi hinagaila'lak halok enek hai warinafi lagep halok he, hit enek hinobabut a'nogo hilingiti lagep fuk. It afuni endakwe mene inobabut a'nogoat hilingitarek lek nogo? A'nogoat hilingitarego.

⁴⁸ Halok he, nineisena Allah pogoroba mene obabut fano mondok higithogo logolik endawirinaferek hak, hit a'nogoat hinendawirinafi logoino o,” iluk yagaisasikhe.