MATIUS 28 - Allah Wene Fano Wene Hupla Inane

Yesus ebe eluk agaikhe wene

¹ A'nogo hilingitukwasik inenggi sabit oba weat welagaukwasigen, hubet hari Mingguba o hil mogolhu kwelek, at he Maria awi Magdalena mene a'nogo inom, he Maria ekhe a'nogo inom, Yesus warek fesukwaba ineilenggen houwogeluk wagaukwa.

² Wagu kwelek aremnogoat he, lugul hokhoat langet hugu kwelek malaikat pogoroba yonggo nikherek mene ekhe pi wagaikhesik, kwe helep mene to'morogo yagatukwa a'nogo lenggakhogo lakfesikhesik he, oba hu'lagaikhe.

³ At malaikat a'nogo elokhonggen he, eilabut hangge hilingiti logolik he, asu laberek mene elokhonggen oanggup hangge mondok yararet hasikhe.

⁴ A'nogo hilingitikhemo re, it ap kagalek welagaukwa mene omanogo inailo nen inoagelekwe lei'leik ikhi logolik he, afuni warek mene hangge mondok liongorogo hilinglagaukwa.

⁵ Nen, at malaikat a'nogo nen it hemi omanogo yagaisikhi logolik he: ”Hinailo agubo. Hit he, Yesus eba menfuluk wata mene a'nogo hineilenggen houwogeluk wagep andi, an nelu o.

⁶ Mene re, ebe yoma lek. Aren yagahisasikhe hak, Allah nen elugetfikhemo werego. At welagaba yoma obalik enek yi hineilenggen hani.

⁷ Yethaluk he, Yesus a'nogo wa'lagasi'mo nen Allah nen elugetfikhemo o, iluk, at agoromi ane wanhi lagaukwa mene omanogo weak-weak yagaisa lani o. Hit o Galilea oan lagi'lek werek kwelek, at tak lagasik were'ma hineilenggen ha logoin o. Nane yagahisigi andi eberek logoino,” iluk yagaisasikhemo,

⁸ it hemi omanogo oumo andoma nen laga logolik inailo agaukwa meneat he, hobuk inendawimo inagaiyek hokhorogo hilik-hilik, at agoromi ane wanhi lagaukwa mene omanogo inoba fungusegat yagaisa lagaukwa.

⁹ Yagaisa louwogeluk lagunem ebekhalem at Yesus inom ambi agaukwasik he, mel yagaisasikhe: ”Nerugwi e!” iluk yagaisasikhemo, it hemi omanogo horokhogoat lagaukwasik he, eisok inenggi fakhikhi logolik he, hai warogo ineindep awi yagaisogo fogeratukwa.

¹⁰ Fogeratukwama, at Yesus nen he: ”Hinailo agubo. An nagoromi omanogo o Galilea loagen, yagaisa lani o,” iluk yagaisasikhe.

Ineranenat: ”Yesus warek hina'luk wulifama iluk yagaisano,” iluk yagaisasukwa wene

¹¹ A'nogo yagaisasikhemo, it hemi aremnogo oan lagu kwelek, it ap kagalek welagaukwa mene omanogo ekhe o silimo kwisukwasik he, wene mondogat hilinglagaikhe mene omanogo: ”Yi'nogo hilinglaga,” iluk he, it ap Allah eisewerek mene inogogwi kaindek omanogo mondok piling-palanghogo yagaisasukwa.

¹² A'nogo yagaisasukwama re, it inom, it ap inaluendek omanogo inom andoget fesukwasik wene palhukwasik he, it ap tentara mene omanogo uang perak mene hokhorogoat wogisikhi logolik mel yagaisasukwa:

¹³ ”Hiren he, hubanggo nit nogo ugu kwelek, at Yesus ane wanhi lagaukwa mene omanogo wagaikhasik Yesus warek hina'luk wulifama, iluk yagaisikhi logoino.

¹⁴ Wene hilinglaga mene andi faget he, at gubernur esanggo holhe halok, hiren wene ninoba asinogo iluk, niren at endawimo kagalugun o,” iluk isukwama re,

¹⁵ it ap tentara mene uang omanogo helasukwasik he, it ap omanogo nen isukwa higithogoat hilingitukwa. Wene a'nogo wialfesukwama nen, it afuni Yahudi mene nen he yogondak huli nen ikhi logoligat werego.

Yesus nen he, ”Fano wene yagaisilik laga logoino,” iluk yagaisasikhe wene

¹⁶ At Yesus nen agoromi ane wanhi lagaukwa mene inebe 11 nen omanogo yagaisikhi logolik: ”O Galilea lambik tom andiba lagambik logoino,” iluk, wene warisasikhe higithogoat lagaukwasik lagasukwa.

¹⁷ Lagasukwasik were'ma at Yesus ebe ineilenggen hasukwasik he, hai warogo ineindep awi yagaisogo fogeratu kwelegat he, it fena nek he: ”At ebe a? Hunogo mene he a,” iluk anggasukwa.

¹⁸ A'nogo anggugu kwelek, at Yesus ebe inera'lu wagaikhesik he, mel yagaisasikhe: ”Allah nen he, pogoroba mene inom, kweangma mene inom mondogat he, an eisewerek nobagaikhemo o.

^19-20 Halok he, yi afuni ti afuni inunggulenu lombok mondogaren An nagoromi hilinglasuageluk, neisena Allah enuba, An Amlogo nenuba, Areagun enuba, ninenu hombuk palogo ima pelaginafik, An nen wene komothinafi mene andi mondogat higithogo hilingiti logouwageluk yagaisigik, laga logoino. Yet hani! Hit a'nogo hilinginabik lagunem, An nebe ninom mondok-mondogat were'ma huli wurep oba hilinglasigin o,” iluk yagaisasikhe.