MATIUS 27 - Allah Wene Fano Wene Hupla Inane

Yesus ebe enggi hele warogo ap Pilatus wogosi wagaukwa wene

¹ A'nogo hilingitukwasik were'ma, o arat wei isikhemo ohealekwe it ap Allah eisewerek mene inogogwi kaindek mene omanogo inom, inaluendek omanogo inom, mondogaren he, Yesus wasuogeluk weim abok isukwasik he,

² enggi hele warogo at Pilatus ebe Gubernur kain were'ma oba waluk wagaukwasik he, wogetukwa.

Yudas onggwaregen ebe pinggi warasikhe wene

³ Yesus a'nogo wene oba fesukwasik eberogoat wasuogeluk ugu kwelek he, at Yudas nen wasuageluk yonggo lagaikhe mene a'nogo eilenggen isaluk he, endawimo nen he, ”An weak hilingiti o,” iluk endawimo weak agaikhe. Endawimo weak agaikhesik he, onggo uang perak mene 30 nen wogetukwa a'nogo hobuk oak waluk he, it ap Allah eisewerek mene inogogwi kaindek mene omanogo inom, inaluendek omanogo inom, were'ma wagaikhesik wogisikhi logolik, mel yagaisasikhe:

⁴ ”Eige! Ap andi weak hilingiti'le'maat wasubagaigeluk yonggo wagimo o. Halok he, weagat hilingitimo higi o,” iluk, yagaisasikhemo, it omanogo nen he ”Wene andi nit ninoba agama anggegen? Lego. Andi hat hoba lombogaro,” iluk yagatukwama re,

⁵ at Yudas nen uang perak mene 30 nen wogetukwa a'nogo Allah awi wuri'mo woukhogo kwelakfisaluk he, onggwaregen alonggop hele kelogo ebe pinggi waralagaikhe.

⁶ A'nogo hilingitikhemo, it ap kaindek Allah eisewerek mene omanogo nen uang perak mene 30 nen a'nogo wanhukwasik he, ”Uang yi ap amep onggo palagama Allah faget uang fagarek oba andoma fogoin mondok lego,” iluk isukwasik he,

⁷ afuni ap pok mene wa'lagunem kweang salinafi logogun oba, ap ekhe iwak kweang meneba hilingiterek mene anggweang ma re, at oba onggo fesukwa.

⁸ A'nogo hilingitukwa andi nen he, kweang andi enure, ap amep pisikheba iluk, salagaikhemo o yogondagen a'nogo ili'lagwi.

^9-10 Andi hilingitukwa andi re, ap Yeremia Allah ane yagaisikhi lagaikhe mene a'nogo nen ikhi logolik he: ”Nineisena Tuhan nen yaganetikhe higithogoat, it afuni Israel mene nen, ap a'nogo ebe onggo yi o, iluk isukwasik he, uang perak mene 30 nen wanhukwasik, ap iwak kweang mene hilingiterek mene a'nogo anggweang onggo wogetukwa,” iluk lisu palogo fesikhe mene a'nogo ebe andi sambul higit agaikhe.

Ap Pilatus nen Yesus anema wanhikhe wene

¹¹ At Yesus ap Pilatus Gubernur kain mene a'nogo oba waluk wagaukwama elokhoma menlasi lagaikhemo re, aren heinok oba wokhikhi logolik mel yagatikhe: ”Afuni Yahudi mene inoe enupogot a'nogo hat faget aga?” iluk yagatikhemo, at Yesus nen he: ”Hat egen andi aro,” iluk yagatikhe meneat he,

¹² it ap Allah eisewerek mene inogogwi kaindek omanogo inom, inaluendek omanogo inomen, wene Yesus oba hokhorogo fesukwa mene re, aren he, hobuk wene ekhe onggo yagaisigi'lek kamo isikhe.

¹³ Onggo igi'lek kamo isikhemo, at Pilatus nen he: ”Yi enggin ti enggin hokhorogo hoba fili'lagwi yoma hesanggo holhi lagen lega?” iluk yagatikhe meneat he,

¹⁴ onggo ekhe mondok igi'lek kamo isikhemo re, at Gubernur a'nogo nen he, ”Nailo e!” iluk fogeratikhe.

Yesus ebe mondok wasuageluk wene oba fesukwa wene

¹⁵ It afuni Yahudi mene seni Paskah hokhorogo isago ninggi logolik, iren he: ”Afuni inenggi hele warek mene andi hak fikhalogo wo'nisano o,” iluk kino ugunem he, at Gubernur en fikhalogo wogisikhi lagaikhe.

¹⁶ A'nogo wogisugunem andi nen he, andi sambul he, ap ekhe enu Yesus Barabas, Weak hilingiterek, iluk abok mondok saga isikhe mene enggi hele warek andoma were'ma,

^17-18 afuni hokhorogo andogotu kwelek, at Pilatus a'nogo eilenggen hasikhesik he, ”It yoma re, Yesus oba wene palogo nenat waluk wagaikha anggigi,” iluk, futfesikhesigat he, mel yagaisasikhe: ”Hit hinendawimo nen he, ap enu sa fikhalogo wo'nisoak anggikhi lagep. Yesus Barabas? I a, athe, Yesus enu ekhe Kristus agarek a'nogo a?” iluk, yagaisasikhesik he,

¹⁹ wene ero pilingitare'ma aremnogo hurek were'ma, at Pilatus agwe nen ap ekhe wene warogo lakfei wagaikhe. Lakfei waga logolik he, mel isikhe: ”An hubanggo nogo ugunem ap andi fagerat nabi mondok weak higirigo. Halok he, at obabut fano mene andi hat hinomen wene oba fugubo,” iluk isikhemo yagasi wagaukwa meneat he,

²⁰ it ap Allah eisewerek mene inogogwi kaindek omanogo inom, inaluendek omanogo inom, inomenat, afuni hokhorogo omanogo inendawimo kagalhi logolik, ”Barabas andi enggi hele fikhalnisikhi logolik he, Yesus andi nek he, wa'no o, iluk yagasubagaik,” iluk yagaisasukwama re,

²¹ at Gubernur a'nogo nen, ”Ap inebe pire ya re, at sa hak hele fikhalnisoageluk anggikhi lagep,” iluk yagaisasikhemo iren he, ”Barabas andi hele fikhalnisan o,” iluk yagatukwa.

²² A'nogo yagatukwama, at Pilatus a'nogo nen he, ”Halok he, Yesus enu ekhe Kristus yi ninggi'nogo hilingisik,” iluk yagaisasikhemo, it omanogo nen he: ”Eba menfuluk wa'no o!” iluk yagatukwa.

²³ A'nogo yagatukwama, aren he, ”Aren weak ebe ki mene hilingitemo,” iluk yagaisasikhemo re, iren inane ninghogoat yagati logolik, ”Eba menfuluk wa'no o!” iluk yagatukwa.

²⁴ A'nogo yagatukwama, at Pilatus nen he, ”It afuni yoma nen, wasugunat, iluk inane ninghogoat ikhi logolik wurep oba weak asigin meneat, an nane tulemat alemarogo ikhi lagi higi,” iluk, i hinago ekhe wanhikhesik he, afuni omanogo ineilenggen werek kwelek enggibene sobalhi logolik he, mel yagaisasikhe: ”Ap yi amep he, an noba asigin lego. Hirat hinoba asigin o,” iluk, yagaisasikhemo,

²⁵ it omanogo inane ninghogoat ikhi logolik he, ”At amep andi re, nit ninagainafuri ninomat ninoba logouwago!” iluk yagatukwama re,

²⁶ at Barabas a'nogo enggi hele fikhalogo wogisikhi logolik he, at Yesus enek he, yei lambisok warogo re, eba menfuluk wasuageluk wogisasikhe.

It ap tentara mene nen Yesus inane asegen wokhasukwa wene

²⁷ Pilatus nen Yesus ebe wogisasikhemo re, it agoromi tentara mene omanogo nen wene ero pilingitare'ma waluk kwisukwasik he, at ebe tulem aremnogo fesukwasik, inagaila'lak esa misigat inom andogoti lagaukwa mene inebe mondogat era'lu walingisogo andogorek logolik he,

²⁸ at asu nonggologo fesukwasik su elokhonggen kibi-kibi warek hangge mene labetfigik,

²⁹ ap kaindek mene inonggware-kware ikfisagarek andi hak, alok weak mene maserogo unggul oba ikfigik, mul palek oba enggi ebekwe wogetik, ikhi logolik inebe ineindep awi yagaisogo, endo hokhorogo aga logolik he, ”Wi! Afuni Yahudi mene inoe enupogot a'nogo harat higi o,” iluk inane asegen wokhikhi logolik he,

³⁰ wesi oba suphogo lakfigik, mul palek a'nogo telogo re, ungguloak pakhogo watik, isukwa.

³¹ A'nogo hilingiti lagaukwasik he, su elokhonggen kibi-kibi warek hangge mene a'nogo nonggologo re, at onggwarek asu mene labetfigik, isukwasik he, eba menfuluk wasuogeluk waluk wulibi wagaukwa.

Yesus ebe eba menfuluk watukwa wene

³² Yesus ebe wasuogeluk waluk, o silimo nen arat wulibi wagaukwasik wagunem, ap ekhe enu Simon, aiba o Kirene mene inom ambi agaukwasik he, inane ninghogoat mel yagatukwa: ”Yesus eba menfembik wasugun mene e yi hat woginabin o,” iluk yagatukwa.

³³ A'nogo yagatukwama, wanhikhemo re, tom enu nit ninaneba inungguloak palek fisagarek oba u hak, it inaneba Golgota ungguloba andoma wagaukwa.

³⁴ Wagaukwasik he, anggur enggen amusu inom, wam amise hangge ale weak mene amusu inom, inom misikwe hilingisogo, at noageluk wogetukwama mikhasikhesik he, nabit iluk ninggi'lek, herakfesikhe.

³⁵ A'nogo hilingitukwasik he, at ebe eba menfuluk asu nonggolek omanogo, ”Sani asugun,” iluk, oagengge lakfigik, wakfigik, isukwasik he, oagengge inoba agaikhe mene halok sumburogo helasukwa.

³⁶ Arat sumburogo helasukwasik he, Yesus era'lu aremnogo kagalek welagaukwa.

³⁷ Logolik he, ”Ap yi wene ero yi oba fogosigen wato o,” iluk u hak, ”Yesus afuni Yahudi mene inoe kain enupogot ebe yi aro,” iluk lisu palogo eba unggul higithogo te'merogo fesukwa.

³⁸ Yesus ebe eba tulem a'nogo menfesukwasik, it ap inebe pire afuni inagarek inenggi abisak wanhi lagaukwa mene ekhe enggi ebekwe, ekhe enggi harekwe, menfisaluk inom inoatukwaat.

³⁹ A'nogo menfisasukwama were'ma, it afuni kwe andi kwe lagik, wagik, ikhi logolik Yesus mel yagati lagaukwa:

⁴⁰ ”Wi! Haren he, mel isigin anggigi: Allah awi wurik yi meisalogo fembik he, nenggi pireba wuti logombik ekhe henaganek meneba katokhogo wusigin, iluk isigin a'nogo re, hebe Allah amlogo halok he, honggwarek hebe e ariba nen telogo pi me ta!” iluk inunggul kwanit hikhi logolik inane asegen wokhikhi lagaukwa.

⁴¹ A'nogo ugu kwelek he, it ap Allah eisewerek mene inogogwi kaindek omanogo inom, Allah ane lisu palek eisewerek mene omanogo inom, inaluendek omanogo inom, inomen inane asegen wokhikhi logolik he,

⁴² ”Aren it afuni ekhe elok telinafi laga meneat he, onggwaregen telagain elo'lek higi. E ariba nen telogo pi waga halok he, nineilenggen hambik, at andi nit afuni Israel mene ninoe enupogot eberogo aro, iluk, anggouwogen he, pi we'nik he!

⁴³ Endawinggen Allah oba himbirik logolik, ”An Allah amlogo o, iluk ikhi laga a'nogo re, at Allah nenat teligin anggikhe halok he, telinik he,” iluk isukwa.

⁴⁴ Nen, it ap inenggi abisak wanhi lagaukwama inoatukwa mene aremnogo nen ogo re, Yesus inane asegen a'nogo wokhasukwaat.

Yesus ebe wa'lagaikhe wene

⁴⁵ A'nogo yagatu were'ma re, o lingge tulem jam 12 oba o mum agaikhesik he, o andoma mondogat huli jam 3 mumat welagaikhe.

⁴⁶ Mum werek kwelek, jam 3 arat asi lagaikhemo re, at Yesus nen, Eisena Allah yagati logolik, nit ninaneba re, ”Allah Neisena! Allah Neisena! An nenahalok heraknobagegen,” iluk u hak it inaneba ”Eli eli lama sabakhtani,” iluk ane hokhorogoat yagatikhe.

⁴⁷ A'nogo yagatunem, it afuni fena andoma welagaukwa mene inesanggo holhukwasik he, ”Ap yi Elia woleri'logo,” iluk isukwama

⁴⁸ ap it mene ekhe fungusek lagaikhesik he, hali esinggen hangge mene anggur enggen amusu ale weak mene magaisogo nen noageluk esunggwat oba fo'lokhogo wogetikhe mene re,

⁴⁹ it fena ekhe nen he, ”Po'logoni! At Elia nen teli wesigin a? Lega. Nineilenggen logouwok,” iluk isukwa.

⁵⁰ A'nogo isukwama, at Yesus hobuk ane misik oba hokhorogo isikhesik he, arat lebekhogo wa'lagaikhe.

⁵¹ Wa'lagunem, Allah awi wuri'mo su kain mene o senggelek ti'mokwe palek welagaikhe mene a'nogo tulem heirogo pelangerik pi wagik, lugul langethigik, helep heirogo kagalagik, isikhemo re,

⁵² afuni warek mene kweangma salinafarek mene omanogo erabisagat kwe hu'larik laga logolik he, Allah againafuri wa'lagaukwa mene inebe hokhorogoat salinafukwa kwe nen ineluk agaukwasik menlarik lagaukwa.

⁵³ At Yesus ebe eluk agaikhemo re, it ineluk agaukwa mene andi, o kota Yerusalem Allah onggwarek aiba a'nogo kwisukwama re, afuni inebe hokhorogo nenat ineilenggen isasukwa.

⁵⁴ Nen, ap tentara mene inoe kain mene inom, agoromi fena Yesus era'lu kagalek welagaukwa mene omanogo inom, lugul langethigik, yi elalin mene hilinglagik, isikhe omanogo ineilenggen hasukwasik inailo hokhorogo agaukwasik he, ”Ap yi re, Allah amlogo eberogoat higi o,” iluk isukwa.

⁵⁵ A'nogo hilingitu kwelek, it hemi Yesus lebethikhi lagaukwa mene o Galilea nen pisukwasik Yesus ebe eba menfesukwama ineilenggen yatma nen yerogo welagaukwa.

⁵⁶ It hemi andem he, ekhe Maria o Magdalena mene. Nen, ekhe re, he Maria Yakobus inom, Yusuf inom, inagaisa a'nogo. Nen ekhe re, Zebedeus againafuri inagaisa a'nogo inom, hemi ekhe inomat welagaukwa.

Yesus ebe warek oumo fesukwa wene

⁵⁷ O arat hubagaikhemo re, ap enggi werek mene aiba Arimatea mene enu Yusuf, at Yesus awe a'ma kwisikhesik ane wanhi lagaikhe mene nen,

⁵⁸ Pilatus oba lagaikhesik, Yesus warek kino yagatikhemo re, at Pilatus a'nogo agoromi nen wogosuageluk, yagaisasikhe.

⁵⁹ Nen, arat wogetukwama re, su kain kut sobalek meneba yinggilogo re,

⁶⁰ oumo at mene onggwaregen kerat anggwe folelhikheba andi fei lagaikhesik he, kwe helep sabia hokho mene limbilogo fei wagaikhesik te'merogo yagatfuluk lagaikhe.

⁶¹ Mene re, at he Maria aiba Magdalena mene a'nogo inom, he Maria ekhe a'nogo inom, hurek logolik Yesus warek fugunem ineilenggen welagaukwa.

Ap ekhe Yesus warek fesukwaba kagalek welagaukwa wene

⁶² It afuni Yahudi mene samban hubet oba ikhi logolik weat logouwogeluk he, yogondak hak yi mene ti mene andogorogo fuluk, it ap Allah eisewerek mene inogogwi kaindek omanogo inom, Farisi mene inom, inebe andogorogo Pilatus oba lagaukwasik he,

⁶³ ”Ninoe. Afuni lalinabik nikhi laga mene a'nogo, eluk logolik yagaisikhi logolik he, nenggi pire warek logombik, henaganek neluk asigin o, iluk isikhe a'nogo nen he,

⁶⁴ at agoromi omanogo nenat warek andi hinasi lagaikhasik afuni yagaisikhi logolik he, At Yesus andi wa'lagaikhemo nen hobuk Allah nen eluget fikhemo o, iluk ikhi logoinogo. At attak afuni lalinabik nikhi laga andi endebat hak. Meneat he, hobuk ariginumo re, afuni hokhorogoat lalinabinogo nen he, ninenggi henagan ya faget kagalek logouwogen he, ap ekhe inayonggo fein o,” iluk yagatukwama,

⁶⁵ at Pilatus nen he, ”Kagalek logogun mene inebe yi. Halok he, warek fagaba andoma fanorogo kagalek logouwageluk, woginarek lani o,” iluk yagaisasikhe.

⁶⁶ A'nogo yagaisasikhemo, it omanogo woginarek wagaukwasik he, afuni nen he kwe husinogo iluk he, warek salek oba kwe helep te'merogo fesukwa a'nogo oba silo fagarek andi hak amusu watfuluk, it ap kagalek logogun mene omanogo kagalek logouwageluk fisaluk lagaukwa.