MATIUS 26 - Allah Wene Fano Wene Hupla Inane

Yesus ebe wasuogeluk weim abok isukwa wene

¹ At Yesus nen wene andi mondok arat yagaisasikhesik he, hobuk agoromi ane wanhi lagaukwa mene omanogo mel yagaisasikhe:

² ”Ninenggi pire logombigen seni Paskah hilingisugun andi hit hineluaro. A'nogo hilingitu kwelek, an abat ta'lasi wagagi a'nogo, aben yonggo lambik, it ekhe nen eba mennobagambik noasuageluk inenggiba nobagagun o,” iluk yagaisasikhe.

³ Andi sambul he, it ap Allah eisewerek mene inogogwi kaindek mene inom, inaluendek omanogo inom, at ap Allah eisewerek mene inoe kain enu Kayafas a'nogo aiba andogotukwasik he,

⁴ Yesus eil lagalogo fakfuluk wasuogeluk weim abok ikhi lagaukwa.

⁵ Weim abok ikhi logolik he, mel isukwa: ”Pesta hokho isago nunggunem andi re, wene wo'lasimbik wurep oba weagasinogo nen he, fakfigi'lek logombik, o we sambul halok fakfouwogo,” iluk weim abok isukwa.

He ekhe nen amusu amben fano mene Yesus unggul oba kweisalhikhe wene

⁶ A'nogo isukwasik werek kwelek, at Yesus o Betania ap Simon oumo henanggo hangge inailo mene attagaren ebene welagaikhe mene andi aiba andoma kwisikhesik were'ma,

⁷ he ekhe amusu amben fano onggo hokho mene onggo palogo iwak helep enu pualam mene hilingitarek meneba elema hinagaisogo waluk Yesus sumburu nunggunem oba kwisikhesik he, unggul oba kweisalogo pelafikhe.

⁸ A'nogo pelafikhemo, at Yesus agoromi ane wanhi lagaukwa mene omanogo ineilenggen hasukwasik he, ”Amusu we tulemat alemarogo kweisalhe yi, nenahalok,” iluk, ina'mage lagasukwasik he a'nogo wenageti logolik,

⁹ ”Amusu andi onggo mondok hokho mene hilingi'mo re, it inagarek lek mene sumburisa mene o,” iluk isukwa.

¹⁰ A'nogo isukwama re, at Yesus nen inobabut enegat futfisasikhesik he, mel yagaisasikhe: ”He yi nen fano hilingnafe meneat he, nenahalok wenageti lagep.

¹¹ It afuni inagarek lek mene andi hit hinom mondok logogun meneat he, an enek he, hit ninom mondok logogun lego.

¹² At he yi nen amusu pelaknobagaikhe andi re, an hobuk noatunem nebe wa'lasumo re, warek salnabuogeluk watnobagau hagat arat watnobagai waga o.

¹³ Nane eberogoat yagahisak. He yi eberek logouwageluk afuni wene fano wene a'nogo, o yi awi ti awi yagaisilik nikhi logolik he, ’He andi yi'nogo hilingitikhe,’ iluk abok fano ikhi logogun o,” iluk yagaisasikhe.

Yudas nen Yesus wasuageluk yonggo lagaikhe wene

¹⁴ At Yesus nen wene a'nogo yagaisasikhemo re, at agoromi ane wanhi lagaukwa mene inebe 12 omanogo mene, ekhe enu Yudas Iskariot a'nogo, it ap Allah eisewerek mene inogogwi kaindek omanogo inoba lagaikhesik he, aren ikhi logolik,

¹⁵ ”An nen Yesus andi wokhisigi halok he, hiren onggo nena mene wo'nesugun anggegep,” iluk yagaisasikhemo, it ap omanogo nen he, ”Onggo uang perak mene 30 nen wokhesugun o,” iluk yagatukwasik he, wogetukwa.

¹⁶ Onggo arat fesukwama re, at Yudas Iskariot a'nogo nen he, ”Yesus ebe fanoasuak ninggi'nogo were'ma inenggiba fagain he,” iluk weim abok endawimo logolik menenei ebeti lagaikhe.

Yesus agoromi inom, seni Paskah nasukwa wene

¹⁷ Yudas a'nogo endawimo ebetu kwelek he, it afuni Yahudi mene Linggene Roti Fiterek Lek Mene inenggi attak lilu werago nenggarek mene nouwogeluk ikhi logolik, at Yesus agoromi ane wanhi lagaukwa mene omanogo oba wagaukwasik he, mel yagatukwa: ”Noe. Hat wam domba seni Paskah faget nanogen he, niren yi mene ti mene o koma tegelogo fei logoin hamolo anggegen,” iluk oba heinok wanhukwama,

¹⁸ at Yesus nen he, ”O kota a'nogo lambik he, ap ekhe a'nogo wene mel yaga'no. At ninoe wene yaganisikherek mene a'nogo nen he, ”An hilingisigin mene arat horogasi wagama re, an nagoromi nane wili'lagwi mene ninom, at aiba andoma seni Paskah werago nouwogen he, yagasi lani o, iluk yaganisikhemo yagahesi wago, iluk yaga'no,” iluk yagaisasikhemo re,

¹⁹ it omanogo, aren isikhe hagat lagaukwasik he, yi mene ti mene seni Paskah a'nogo faget mondok tegelogo fesukwa.

²⁰ O arat hubagaikhemo re, at Yesus agoromi ane wanhi lagaukwa mene ekhe inom lagaukwasik he, inebe 12 omanogo hu'lagaukwa,

²¹ hu'lagaukwasik seni Paskah a'nogo ninggi logolik mel yagaisasikhe: ”Hit ap ya mene ekhe nen, an nebe noasuageluk yonggo lagain o, iluk, eberogoat yagahisigi,” iluk yagaisasikhe.

²² A'nogo yagaisasikhemo, it omanogo inendawimo mondok weak agaukwasik mel yagatukwa: ”Noe! An he a? An lek anggigi,” iluk, inebe lombogen ayo wurik ilik lagaukwa.

²³ A'nogo ilik lagaukwama re, at Yesus nen he: ”Hat ekhe an nemberek ninenggi ambineat piring elema pelakfuluk amusu yugulogo nonggo mene andi nenat noasuageluk yonggo lagain o.

²⁴ An abat ta'lasi wagagi a'nogo, hilingisigin mene lisu palek werek higithogoat hilingisigin meneat he, at ap nebe noasuageluk yonggo lagain mene andi nek he, Eigo. Mondok weagat asigin o. At ap andi ta'la'lep le'ma re, fanoat logoilep mene,” iluk yagaisasikhemo,

²⁵ at Yudas, Yesus wasuageluk yonggo lagaikhe a'nogo nen he, ”Halok he, noe. An he a? An lek anggigi,” isikhemo at Yesus nen he, ”Ebe harenat hilingisigin,” iluk yagatikhe.

Sumburu inom, enggen amusu inom, wurep kofokhogo nasukwa wene

²⁶ At Yesus nen wene a'nogo yagaisasikhesik, sumburu ninggi logolik, roti mene enggim wanhikhesik he, Allah hai warogo, ebe kurogo it omanogo sumburisikhi logolik he, mel yagaisasikhe: ”Yi an nebe aro. Wanimbik he nani o,” iluk yagaisasikhesik,

^27-28 hobuk iwak enggen amusu hinago mene enggim wanhikhesik, Allah hai warogo it omanogo wogisikhi logolik he, mel yagaisasikhe: ”Yi re, an namebaro. Allah nen wene warogo wokhinabigin isikhe a'nogo, an namep wulagaisogo noasugun andiba afuni hokhorogoat yi weak ti weak hilingiri'lagwi mene sebelogo legetfisagain andiba ebe asigin o. Halok, hinebe mondogat nani.

²⁹ Wene ekhe yi yagahisak. Anggur enggen amusu yi naluk he, an hobuk ekhe ninggi'lek logombigen, huli neisena nen awe a'ma inobagagin andi huli hit ninom amusu ket mene nogoin o, iluk, eberogoat yagahisigi,” iluk yagaisasikhe.

³⁰ Wene a'nogo yagaisasikhesik he, wuni Allah awuni ekhe wa'luk wulifukwasik he, punu Zaitun oba lagasukwa.

”Haren Yesus nonggot, iluk, labeligin o,” iluk, Petrus yagatikhe wene

³¹ Punu Zaitun oba lagasukwasik, at Yesus nen agoromi yagaisikhi logolik, ”At Allah nen, At ap wam domba kwalogo welagarek mene andi ebe An nen watunem he, anggo misi'mo andogorek welagarek mene andoma re, heise pugulugun o, iluk isikhemo, lisu palogo fesukwama werek andi nen, yogondak hubanggo yi, hit mondogat an heraknobagaluk heise pugulugun o.

³² Meneat he, an noatunem Allah nen hobuk neluget nafunem he, an attak o Galilea lambik hinelokhoma logogin,” iluk yagaisasikhemo,

³³ at Petrus nen he, ”It mondogat herakhobagaluk pugulha halok an enek he, herakhobagaluk heise wulibigin mondok lego,” iluk yagatikhemo,

³⁴ at Yesus nen he, ”Yogondak hubanggo sue ayam ane oan igi'lek werek kwelek, haren he,” Yesus andi an nonggoro, iluk, henggi henagan oba labeligin a'naga, iluk, eberogoat yagaheti,” iluk yagatikhemo,

³⁵ at Petrus nen he, ”Lego. An nemberegat ninoasumo re, fano aro. An nen, Hat nonggoro, iluk, labeligin lego,” iluk ugunem he, it Yesus agoromi ane wanhi lagaukwa mene omanogo inebe mondogaren he, a'nogoat ilik lagaukwa.

Yesus Getsemani yabumo nen Allah ayonggo fesikhe wene

³⁶ A'nogo isukwasik he, at Yesus ebe inom, agoromi ane wanhi lagaukwa mene omanogo inom, inom Getsemani yabumo lagaukwasik agoromi mel yagaisasikhe: ”An horok ya lambik samban ugu kwelek, hit yoma hurek logoni o,” iluk yagaisasikhe.

³⁷ A'nogo yagaisasikhesik he, Petrus inom, Zebedeus againafuri inebe pire aremnogo inom, woginarek lagaikhesik he, endawimo weak agaikhesik endawinggen heiselhikhemo re, mel yagaisasikhe:

³⁸ ”An nendawinggen mondok weak agasik wa'lasigin hangge hilingnabi'logo o. Halok, hit ya logolik he, ninomat ninebe hebelogo logouwok,” iluk yagaisaluk he,

³⁹ at ale'ma horogat lagaikhesik elokhe sagaum weing lagaikhesik he, Allah ayonggo fikhi logolik, mel yagatikhe: ”Neisena! An weagetnabugun andi telnabigin halok he, telnabino,” iluk u hak, ”Amusu hinago noageluk wo'nesugun andi, wokhagain halok he, wokhano. Nen, lek halok he, an nendawimo anggigi mene andi lego. We, hat hendawimo anggegen mene andiat hilingnabino o,” iluk samban isikhe.

⁴⁰ Samban a'nogo iluk agoromi omanogo inoba wagaikhe re, it nogo mondok ikhi logolik were'ma nen he, at Petrus mel yagatikhe: ”Hit he, hubanggo yi satu jam misigam faget an ninom ninebe hebelogo logogun he, elo'lek he a.

⁴¹ Weak hilingisuageluk hinendawimo kagali wesinogo iluk, hinebe hebelogo logolik he, sambanat ikhi logoni o. Hinendawimo nen elok hilingisigin iluk anggikhi lagep meneat he, hinebe nen a'nogo hilingisugun he, elo'lego,” iluk yagaisasikhesik he,

⁴² samban attak isikhe hagat, hobuk ambotkwe lagaikhesik he, mel isikhe: ”Neisena a! An weaget nabugun yi re, telnabigin elo'lek halok he, hat hendawimo anggegen andi higithogoat hilinglasuago,” iluk, samban isikhe.

⁴³ Samban iluk hobuk wagaikhe re, it agoromi omanogo nogo ineil agaikhemo nogo ikhi logolik were'ma isa wagaikhesik,

⁴⁴ samban attak enggi pireba isikhesik, hobuk ekhe inom igeluk lagaikhesik he, attak isikhe hagat isikhe.

⁴⁵ Arat iluk agoromi inoba wagaikhesik he, mel yagaisasikhe: ”Hit set walogo nogo ikhi logolik mondok logogun a? Ap ekhe nen ap weak hilingitarek mene nen an abat ta'lasi wagagi a'nogo noasuageluk inenggiba nobagagin andi arat nobagagin yi yethani!

⁴⁶ Halok, nit he louwogen menla'ni o. Ap an noasuageluk yonggo laga mene a'nogo re, arat horogat waga ari,” iluk yagaisasikhe.

Yesus ebe fakfesukwa wene

⁴⁷ Yesus nen, ”Horogat waga ari,” iluk ugu kwelek aremnogoat he, at Yudas, ebe Yesus agoromi inebe 12 omanogo mene yonggo lagaikhemo, it ap Allah eisewerek mene inogogwi kaindek omanogo inom, inaluendek omanogo inomen, it ap inebe esa hokhorogo inayonggo fesukwasik lakfisa wagaukwama, karok inom, yei inom, waluk inebe mondok esa fologo wagaukwa.

⁴⁸ At Yudas Yesus wasuageluk yonggo lagaikhe mene a'nogo nen, wene mel yagaisasikhesigen wagaukwa: ”Ebe futfobagaigen he, an tak lambik hai nambe saluk wati halok, hiren he, yogo ap ebe andiat higi, iluk, fakfei lano o,” iluk wene arat yagaisasikhemo andi nen he, ineluat were'ma,

⁴⁹ at tak Yesus oba wagaikhesik he, ”Noe halabok,” iluk, hai ambe saluk watunem he,

⁵⁰ at Yesus nen, ”I nagot! Hat nenahalok wagen,” iluk yagatikhemo, it ap omanogo Yesus era'lu wagaukwasik he, ebe mondok fakfesukwa.

⁵¹ Fakfugunem he, ap ekhe Yesus inom welagaukwa mene a'nogo nen karok awingga elonggoma kwelabek mene oua'ma nen lisogo re, ap Allah eisewerek inoe kain mene amingmingengge ekhe wasigeluk fugethasikhe re, esanggo nek sabelogo lakfesikhe.

⁵² A'nogo lakfesikhemo, at Yesus nen he, ”It ap karok oba inoatunem onggo karok obaat inoatarek enek andi nen, henggarok ari houa'ma obali'mo kwelabin o.

⁵³ Yogondak an nebe elele wo'nabuageluk he, neisena kino yagasumo, aren it malaikat Allah nen pogoroba yonggo pelakfisa wagarek mene omanogo inebe esa 12 nen endebat meneat he, esa mondok hokhorogo inayonggo foumo, folfuluk telnabi wesugun elo'lek anggegen?

⁵⁴ Telnabi wesigin elok meneat he, telnabilepma re, Allah nen, ”A'nogo hilinglasigin, iluk isikhemo lisu palek werek a'nogo re, ninggi'nogo emberek higit a'lep anggegen. Lego. Higit asuageluk a'nogo yagati'lek kamo igi andi,” iluk, yagatikhesik he,

⁵⁵ it ap hokhorogo wagaukwa omanogo mel yagaisasikhe: ”Ap yogot wanhunem fakfisa wagaikharek andi hak, hiren a'nogoat an faknobagauwageluk karok inom, yei inom, mondok waluk wagep yi ri! An hundik-handik Allah awi wuri'mo hurek logolik wene yagaisugunem, hiren an yi'nogo faknobagagi'lek welagepsigat he,

⁵⁶ it ap Allah ane yagaisikhi lagaukwa mene nen lisu palhukwa a'nogo emberek higit asuageluk hilingnafebo,” iluk, yagaisasikhemo re, it ap at ane wanhi lagaukwa mene omanogo, at ebe hebisaluk heise mondok pugulhukwa.

Yesus wasuogeluk wene oba fesukwa wene

⁵⁷ Heise a'nogo pugulhukwama re, at Yesus ebe fakfesukwasik he, ap Allah eisewerek mene inoe kain Kayafas oba waluk lagaukwa. Lagaukwa re, andoma it ap Allah ane lisu palek eisewerek mene inom, inaluendek inom, andogorek were'ma lagaukwa.

⁵⁸ Yesus a'nogo waluk lagu kwelek, at Petrus a'nogo hobuk inombo'ne igam-hegam laga lagaikhesik he, ap kain Kayafas a'nogo awililu kwisikhesik, ”Yesus ebe ninggi'nogo hilingisugun,” iluk eilenggen isageluk he, at Kayafas agoromi Allah awi wurik kwalogo welagaikharek mene ekhe inanggele'ma hu'lagaikhe.

⁵⁹ Hurek werek kwelek, it ap Allah eisewerek inogogwi kaindek inom, wene ero pilingitarek mene mondogat inomen, at Yesus wasuogeluk, mel isukwa: ”Afuni at weak hilingitunem ineilenggen haga mene uagen heraginabini,” iluk, ineranenat wene oba fouwageluk heraginafukwa mene re,

⁶⁰ inebe hokhorogoat ineranen wene oba fouwogeluk wagaukwa meneat he, legagaikhemo, hobuk ap inebe pire mene wagaukwasik he,

⁶¹ ”At yi nenat, ”Allah awi andi meisalogo lakfembik he, obali'mo, hobuk nenggi pireba wuti logombigen ekheba arat wurep kobokhogo wusigin o, iluk isikhe mene,” isukwama re,

⁶² at ap Allah eisewerek mene inoe kain a'nogo menlagaikhesik he, ”It ap yoma wene hokhorogo yagaheri'lagwi yoma, haren onggo ekhe yagaisagain lega? Onggo yagaisamo re,” iluk yagatikhe meneat he,

⁶³ at Yesus ane igi'lek kamo isikhemo re, at ap kain Allah eisewerek mene a'nogo nen he, ”Allah amlogo Kristus lakfei wesigin isukwa a'nogo, ebe hat halok he, yaganisanok iluk, at Allah eluk mondok welagarek mene enu hombuk palogo yagaheti o,” iluk yagatikhemo,

⁶⁴ at Yesus nen he, ”Haren egen andi aro. Menere, an wene yi an nen hit mondogat yagahisak. Huli yogondagen he, an abat ta'lasi wagagi a'nogo, at Allah omame hokho yi mene ti mene hilingisigin enek a'nogo nemberek era'lu enggi ebekwe kainat logombik he, hobuk pogoroba andoma nen ohena anggele'ma pi wagunem hineilenggen neogoin o, iluk yagahisigi,” iluk yagatikhemo,

⁶⁵ it ap Allah eisewerek inoe kain a'nogo asu tiliphogo lakfisikhi logolik he, mel yagaisasikhe: ”Allah endawimo sebelfikhesik enu weagetfikhe andi hegeba? Afuni nen at weak hilingitunem ineilenggen haga mene wene furogo uageluk nenahalok yerinarek logogun. Aren Allah endawimo sebelfikhesik enu weagetfikhe andi arat hinesanggo holhep.

⁶⁶ Halok he, hit ninggi'nogo anggikhi lagep,” iluk yagaisasikhemo, iren he, ”Ebe mondogat wasugun o,” iluk yagatukwa.

⁶⁷ A'nogo yagatukwasik he, wesi oba figik, yei watik, inenggi yinggilogo tung-tanghogo watik, ikhi logolik he,

⁶⁸ ”Hat hebe Kristus a! Sa nen hoate nogo. Yaganisan ta,” iluk, yagati lagaukwa.

Petrus nen, ”Yesus nonggot,” iluk labelhikhe wene

⁶⁹ A'nogo yagatu kwelek, at Petrus a'nogo olulu o honggole'ma hurek were'ma, helenggerek inamingmingengge mene ekhe oba wagaikhesik he, mel yagatikhe: ”Harogo re, Yesus Galilea mene andi hinom nikhi lagep mene anggigi,” iluk yagatikhemo,

⁷⁰ at Petrus nen afuni hokhorogo ineilhanemat he, mel yagatikhe: ”Hat egen andi an nonggoro,” iluk,

⁷¹ kwe hokho ambe pale'ma wulifarek oba wulibi wesigeluk ugunem he, at helenggerek ekhe inamingmingengge hunogoat mene eilenggen yethasikhesik, afuni hokhorogo omanogo mel yagaisasikhe: ”Ap yi Yesus Nasaret mene a'nogo inom nikharek mene aro,” iluk yagaisasikhemo,

⁷² at Petrus nen attak isikhe hagat hobuk Allah enu hombuk palhi logolik he, ”Ap andi an nonggoro,” iluk, yagaisasikhesik,

⁷³ aremnogoat were'ma, it afuni hokhorogo omanogo Petrus oba wagaukwasik he, mel yagatukwa: ”Hat hebe eberogoat it mene aro. Hane enegat futfikhi lago,” iluk yagatukwama,

⁷⁴ at Petrus nen he, ”Ap andi ebe an nonggoro, Neisena Allah oak! Nera nen igi halok, aren noasuago,” iluk, hombuk palhu kwelek aremnogoat sue ayam ane arat isikhe.

⁷⁵ Sue ayam ane arat isikhemo, at Petrus nen he, ”I o. Yesus nen an yaganeti logolik, Sue ayam ane igi'lek werek kwelek, haren he, Yesus nonggoro, iluk henggi henagan oba labeligin, iluk yaganete mene a'nogo ebe arat labelhi yi higi,” iluk, endawimo ebetfuluk wulifikhesik he, le mondok hokhorogo endawi fit-fit le agaikhe.