MATIUS 25 - Allah Wene Fano Wene Hupla Inane

Wene helimenggerugwi inendawinggen wenggelek mene inom, wenggelek lek mene inom, inoba lirogo yagaisasikhe wene

¹ At Yesus nen a'nogo yagaisasikhesik he, wene ekhe mel yagaisasikhe: ”Nineisena Allah nen awe a'ma fisikhere'ma andoma emberek higit he, helimenggerugwi inebe 10 nen lampu ibilogo waluk ap ekhe agwe ikhageluk wagunem elokhoma lagaukwa andi hangge aro.

² It inebe 10 andi, 5 fena re, inendawinggen wenggelek mene nen, 5 fena re, inendawinggen wenggelek lek mene welagaukwa.

³ It inendawinggen wenggelek lek mene andi lampu waluk lagaukwa meneat he, minyak legagunem faget ekhe keralogo waluk lagi'lek.

⁴ Nen, it inendawinggen wenggelek mene aremnogo nek he, lampu inom, iwak ekhe minyak keralogo inom, waluk lagaukwa.

⁵ Meneat he, at agwe ikhikhe mene andi ebe wagi'lek mondok aninurogo weregen he, it omanogo inebe mondogat nogo ineil agaikhemo andoma nogo isukwa.

⁶ A'nogo nogo ugu kwelek hup tulem, it afuni nen he, ”Ap agwe ikhike mene a'nogo ebe waga a'li. Elokhoma we'ni o,” iluk, inane hokhorogo isukwama,

⁷ it helimenggerugwi omanogo ineluk agaukwasik he, lampu fanorogo halfesukwasik ibilik lagaukwa.

⁸ It inendawinggen wenggelek lek mene omanogo nen, it inendawinggen wenggelek mene omanogo yagaisikhi logolik he,” Lampu nit mene nagulari'logo. Halok he, minyak hit mene ekhe wo'nisani o,” iluk, kino yagaisasukwama,

⁹ it helimenggerugwi inendawinggen wenggelek mene omanogo nen he, ”Lego. Fena minggilogo hit wokhisigik, ekhe nit heligik, umo re, legasigin o. Halok he, onggo pali'lagwiba andoma ekhe onggo pala lani o,” iluk yagaisasukwama,

¹⁰ onggo pala lagaukwama re, at ap agwe ikhikhe mene a'nogo arat wagaikhesik he, it inendawinggen wenggelek mene tegelogo fakhaluk welagaukwa mene omanogo inom pesta hilingiti logolik seni isago nuogeluk woginarek oloba kwisikhesik kwe yagatikhe.

¹¹ Kwe yagarogo kwisukwasik were'ma, it helimenggerugwi fena omanogo wagaukwasik he, ”Neisena, nit kwe hu'nisan o,” iluk yagatukwama,

¹² aren he, ”Hit andi sani. Hinebe an nonggoro, iluk, eberogoat yagahisigi,” iluk yagaisasikhe.

¹³ Yesus nen a'nogo yagaisasikhesik he, ”Andi hak, an wesigin andi, hiren, o yi sambul, jam yiba wesigin iluk, hinonggot andi nen he, nenangotnarek logolik hinebe hebelogo logoino o,” iluk yagaisasikhe.

”Ap ekhe nen, uang inenggiba fuluk lagaikhe,” iluk, oba lirogo yagaisasikhe wene

¹⁴ At Yesus nen a'nogo yagaisasikhesik he, ekhe mel yagaisasikhe: ”Allah nen awe a'ma fisikhere'ma andoma, emberek higit he, ap ekhe o ekhema yatma lageluk ikhi logolik, at amingmingengge mene wolisasikhemo wagaukwama re, at agarek yi mene ti mene it fisogo logouwageluk inenggiba fuluk lagaikhe andi hangge aro.

¹⁵ It inobabut palogo inebe lombok wogisogoin higithogoat wogisilik lagaikhe. Uang hokho emas mene ap ekhe 5.000 nen wogetik, nen, ap ekhe 2.000 nen wogetik, nen, ap ekhe 1.000 nen wogetik, isikhe. A'nogo wogisaluk he, o ekhema yatma lagaikhe.

¹⁶ Lagaikhemo re, ap 5.000 nen wanhikhe mene a'nogo uang andiba awarogo yi mene ti mene wanhi logolik, hobuk 5.000 ekhe inom mangorogo fesikhe.

¹⁷ Nen, ap ekhe 2.000 nen wanhikhe mene a'nogo, a'nogoat hobuk 2.000 ekhe inom mangorogo fesikheat.

¹⁸ Meneat he, ap ekhe 1.000 nen wanhikhe mene a'nogo waluk lagaikhesik he, uang oe kain mene andi kweang habulogo salogo hinakfei lagaikhe.

¹⁹ A'nogo kweangma salfesikhesik were'ma nen he, inoe a'nogo welagaikhesigen hobuk wagaikhesik,” Uang wogisigi omanogo, iren hobuk miren mangorata,” iluk, wolisasikhemo wagaukwama re,

²⁰ ap uang 5.000 nen wanhikhe mene a'nogo hobuk 5.000 nenat mangoratikhe mene waluk wagaikhesik he, ”Noe. Haren 5.000 nen wo'netigin a'nogo re, yethan. An nen hobuk 5.000 nen ekhe inomat oba mangorogo figimo yi o,” iluk yagatikhemo,

²¹ at oe a'nogo nen he, ”Nagot wa! Hat he, fano mondok. Hobabut humbun andi nen he, higithogo mondok hilingiti lagenma higi o. Endebat meneat he, wokheti mene humbunhogo fisogo welagen andi nen he, hobuk mondok hokhorogo fisogo logoinogeluk, menhobagambik wokhesigin o. An hoe nendawimo nagaiyek hikhi lagi andi hak, nemberegat ninendawimo ninagaiyek houwogeluk, kwi me o,” iluk yagatikhe.

²² A'nogo yagatikhesik were'ma, hobuk ap uang 2.000 nen wanhikhe mene a'nogo oba wagaikhesik he, ”Noe. Haren uang 2.000 nen wo'netigin a'nogo re, yethan. An nen hobuk 2.000 nen ekhe inomat oba mangorogo figimo yi o,” iluk yagatikhemo,

²³ at oe a'nogo nen he, ”Nagot wa! Fano mondok. Hat hobabut humbun andi nen he, higithogo hilingiti lagenma higi o. Endebat wokheti mene, hobabut humbunhogo fisogo welagen andi nen he, hobuk mondok hokhorogo fisogo logoinogen iluk, menhobagambik wokhesigin o. An hoe nendawimo nagaiyek hikhi lagi andi hak nemberegat ninendawimo ninagaiyek huogen he, kwi me o,” iluk yagatikhe.

²⁴ A'nogo yagatikhesik were'ma, ap ekhe uang 1.000 nen wanhikhe mene a'nogo oba wagaikhesik he, ”Noe. Hat he, hobabut mondok weak andi nen he, it ekhe nen awi feik lakfaga meneat he, enggen henggi abisagat paligik, it ekhe awi yata meneat he, enggen henggi abisagat folhik, egendek a'nogo re, an hobabut nelu o.

²⁵ A'nogo hilingiti lagen andi nen, an nailo nen he, uang hat mene 1.000 a'nogo kweang habulogo hinakfei lagi o. Wo'netigin mene a'nogo ebe yi! Helan o,” iluk yagatikhemo,

²⁶ at oe a'nogo nen he, ”Hat he haberali logolik hobabut mondok weak welagen yi ri! An nen he, it ekhe feik lakfagarek mene enggen paligik, it ekhe yatarek mene enggen foligik, igirek nobabut andi hat heluat anggigi.

²⁷ A'nogo helu halok he, an narupiah andi it afuni ekhe uang fisogo logolik awarogo, ekhe inom oba loukhogo fili'lagwi mene wogiselenma re, an nambotkwe wesimbik he, narupiah ebe mene inom, oba laberogo mangorari'lagwi mene inom, hela wesuageluk wogisawem hilingiten o,” iluk yagatikhesik he,

^28-29 at agoromi ekhe mel yagaisasikhe: It afuni ekhe inagarek werek mene andi, hobuk ekhe inom oba loukhogo wogisugunem inagarek hokhorogo hilinglasigin o. Nen, it ekhe inagarek lek mene endebat logogin mene andi inenggimo nen telogo helogoin andi nen he, ap ari a'nogo hilingitesi'mo andi re, uang 1.000 andi enggimo nen telogo ap ekhe 10.000 wanhe mene ari wogo'ni o.

³⁰ Halok he, at ebe an namingmingengge logogin lek mene yi re, enda'ma o mondok mummo inaik himbirogo li ago, le ago, welaikhare'ma andoma wulakfisani o, iluk yagaisasikhe,” iluk Yesus nen yagaisasikhe.

Afuni inunggulenu lombok wene inoba figik, kotik, igin wene

³¹ At Yesus nen a'nogo yagaisasikhesik he, wene ekhe mel yagaisasikhe: ”An abat ta'lasi wagagi a'nogo, afuni nen fogetnafu kwelek it malaikat pogoroba mene andi mondogat ninom wesimbik, an fogetnafu kwelek kain nenupogot welagirek oba logolik,

³² ap ekhe anggo eisewerek mene nen, domba mene halok ale'ma tegelogo figik, kambing mene halok ale'ma tegelogo figik, tegelinaferek andi hak, it malaikat andi nen afuni inunggulenu lombok an neilhanem andogorogo fisa wagunem he, an nen a'nogoat tegelinabigin o.

³³ Tegelinafi logolik he, domba mene halok he, nenggi ebekwe fisigik, nen, kambing mene halok, nenggi harekwe fisigik, igin o.

^34-36 A'nogo tegelogo fisambik he, an nebe kain nenupogorat andi nen he, it nenggi ebekwe fisagain mene andi, wene mel yagaisagain: An neisena nen fanothinafemo welagep mene andi we'ni o. An sumburu nele were'ma hiren mela'netik, i nele were'ma hiren wo'netik, an ap pogat were'ma hiren wo'nafik, nasu laberek lek were'ma hiren labetnobagagik, ou warek were'ma hiren nea wagik, nenggi hele warek were'ma nea wagik, isigip andi nen he, an neisena nen pogot kweang oan elalhi'lek logolik, hit kain hinenu werek logobagaigeluk wenagaisogo hinobagasikhe mene yi hela we'ni o, iluk yagaisugunem,

³⁷ it Allah ane hologo hilingiti logogun mene andi nen he,” Eige, noe!” Niren hat sumburu nele were'ma melakhetik, i nele were'ma wokhetik, isugu andi re, mera nen isugu nogo.

³⁸ Nen, hat ap pogat were'ma wokhafik, hasu laberek lek were'ma labethobagagik, isugu andi, mera nen isugu nogo.

³⁹ Nen, hat ou warek were'ma, hea lagik, henggi hele warek were'ma, hea lagik, isugu andi re, mera nen isugu nogo, iluk yaganetunem,

⁴⁰ an ap kain nenupogot andi nen he, it afuni omanogo mel yagaisagain: Hiren an nagoromi inenu lek mene ekhe were'ma a'nogo hilinginafi lagagip andi, anat hilingnafi lagagibo, iluk, eberogoat yagahisigi, iluk yagaisagain.

^41-43 Nen, it nenggi harekwe fisagain mene andi mel yagaisagain: An neisena nen hit homan hinobagaikhe mene yi ri! An sumburu nele were'ma, hiren mela'neti'lek, i nele were'ma, hiren wo'neti'lek, ap pok were'ma hiren wo'nafi'lek, su laberek lek were'ma hiren ekhe labetnobagagi'lek, ou warek were'ma inom, nenggi hele warek were'ma inom, nea lagi'lek hilingiti lagagibo. Halok he, an neisena nen, at Iblis agoromi inebe hokhorogo inom, endu aik hokhoma nagulagarek le'ma andoma logouwageluk inobalik halogo fisasikhemo andoma hela lani o, iluk yagaisagain.

⁴⁴ A'nogo yagaisugunem, iren he, ”Eige! Noe! Hat sumburu nele were'ma, i nele were'ma, ap pogat were'ma, hasu laberek lek were'ma, ou warek were'ma, henggi hele warek were'ma, o mera nen lebethiigi'lek kamo ikhi lagagu nogo,” iluk, yaganetunem,

⁴⁵ an nen he, ”Hiren afuni ekhe inenu lek mene halolot fisikhi lagagip andi re, anat halolot nobagakhi lagagibo, iluk yagaisasikhesik he,

⁴⁶ it afuni andi yi enggin ti enggin hikhi logogun oba mondok logouwageluk lakfisagain o. Meneat he, it Allah ane hologo hilingiti logogun mene andi ineluk mondok logogun oba andoma inobagagin o,” iluk, yagaisasikhe.