MATIUS 24 - Allah Wene Fano Wene Hupla Inane

”Allah awi wurik afuni ekhe nen mondok meisalugun o,” iluk yagaisasikhe wene

¹ At Yesus Allah awi wuri'mo nen wulifikhesik lagunem he, at agoromi ane wanhi lagaukwa mene omanogo oba wagaukwasik he, mel yagatukwa: ”Allah awi wurik ari heilenggen yethan,” iluk yagatukwa.

² A'nogo yagatukwama, aren he, ”Hit o wurik andoma mondogat hegeba? Helep oba lou'louk wurik andoma ekhe herakfisigi'lek, we, mondok felelenghogo meisalogo lakfisogoin o, iluk, eberogoat yagahisigi,” iluk yagaisasikhe.

”Attagat yi'nogo weak hilinghinabugun,” iluk yagaisasikhe wene

³ A'nogo yagaisasikhesik he, punu Zaitun oba lagasikhesik hurek were'ma, at ane wanhi lagaukwa mene omanogo oba wagaukwasik inalegenek logolik he, mel yagatukwa: ”Haren yaganisegen a'nogo re, mera nen hilinglasigin. Hat hebe wagik, o wurep oba hilinglagik, igeluk ugu kwelek he, ki mene tak hilinglagunem nit ninendawinggen wenggelasigin. Wene furogo yaganisan o,” iluk yagatukwama,

⁴ at Yesus nen he, ”Afuni nen lalhinabinogoluk he, hinobabut hebelogo logoino o.

⁵ Afuni inebe hokhorogo wesimbik iren ikhi logolik inenu an nenu mene salogo mel ilik wesugun: Kristus a'nogo an nebe wagi yi aro, iluk, inane eberogoat hangge afuni hokhorogoat lalinabi wesugun o.

⁶ A'nogo hilingitu kwelek, weim horogat yafunem inane hinesanggo holhik, yatma yafunem inabok holhik, ikhi logolik he, hinendawinggen abolok ugubo. A'nogo hilinglasigin meneat he, o wurep oba hilinglasigin mene andi oan aro.

⁷ Yi afuni ti afuni inunggulenu lombok weim kagalhik, ap inenupogot inagoromi inawe a'ma mene lombok weim kagalhik, o yi awi ti awi sumburu ouwak agik, lugul langet higik, igin o.

⁸ Meneat he, andi re, hemi omalik taginabuogeluk inambot heinet watarek andi hak, attagat hogoin he, andi aro.

⁹ Andi sambul he, afuni inunggulenu lombogen, an nenu iluk, ”Hit he, at agoromi,” iluk hinebe inabit mondok hilinghinabimbik he, hinebe fakhinobagaluk, it ekhe nen yei hinoatik, hinebe pinggi hinoatik, uageluk inoba wokhinarek laga logogun o.

¹⁰ Ariginhu kwelek, it afuni ekhe inendawinggen Allahba himbiret fesukwa meneat he, inebe hokhorogo nenat inendawimo pugasimbik herakfisaluk wilibimbik he, at ekhe nen at ekhe wasuageluk waluk lagik, ekhe nen ekhe anini oba figik, ugun o.

¹¹ Nen, it ekhe ineranenat Allah ane yagaisagarek mene hak kanggorogo hinoba wesimbik he, afuni mondok hokhorogoat lalinabugun o.

¹² A'nogo mondok hilinglasimbik waga logoumo re, it afuni inobabut mondok weak hilinglasimbik he, it-it inendawirogo logogun mene andi hobuk inendawinggen min arik wesigin o.

¹³ Meneat he, sa nen afe morogo mondok logogin halok he, o wurep oba Allah nen teligin o.

¹⁴ Nen, Allah nen awe a'ma inobagagin wene fano wene yi, yi afuni ti afuni mondok inelu asuageluk o yi awi ti awi fakhogo yagaisilik lagep halok he, o wurep oba arat hilinglasigin o,” iluk yagaisasikhe.

”Mondok weakhogoin,” iluk yagaisasikhe wene

¹⁵ A'nogo yagaisasikhesik he, hobuk ekhe mel yagaisasikhe: Hiren lisu palek yi enu salhi logolik he, fanorogo futfikhi logoino o. Ap Daniel Allah ane yagaisikhi lagaikhe mene a'nogo nen ikhi logolik, Allah aiba fano hore'ma omanogo menlasi wagunem hineilenggen hambik he,

¹⁶ afuni o Yudea tonggwe werek menere heise tom oba andoma lagauwago.

¹⁷ Heise lagauwogeluk halok, afuni ekhe o tum oba lagambik logombigen inambotkwe pi wesimbik he inangge yi mene ti mene oloba wani kwigi'lek heise pikhirat lagauwago.

¹⁸ Nen, it ekhe yabukwe nen, inambotkwe oloba inasu wani wagi'lek andoma nenat heise pikhirat lagauwago.

¹⁹ A'nogo lagakhi logolik, it hemi omalik ina'ma mene andi inom, ineagwi ketago ineilak wogisili'lagwi mene andi inom, weakhogoin andi o, eigo! Nendawilage!

²⁰ Hit heise logoin andi, o weak oba he a? Samban ugu kwelek he a, lanogo iluk he, samban ikhi logoino o.

²¹ O andi sambul weagat asigin andi re, omanggum Allah nen yi mene ti mene elalhikhe andi huli nen pikhit, o yogondak ya huli re, andi hangge ekhe hilinglagi'lek. Nen, hobuk ekhe mondok hilinglasigin lek meneat he, misik sambul faget andiat weak hokho hilinglagunem hogoin o.

²² Weak hilinglagunem hogoin andi re, at Allah nen he, ”Huli yi huli araro,” iluk igi'lek kamo ilepma re, afuni mondogat felelenghogo telinafi'lek weagat a'lep. Meneat he, At againafuri wenaginafikhe mene faget enek he, ”Weak arat hegebo,” iluk, huli wasigin werego.

^23-24 Andi sambul he, it afuni ekhe ineranenat ikhi logolik he, ”Kristus a'nogo nebe an aro,” igik, nen it ekhe nen he, ”Allah ane yagahisigirek mene a'nogo nebe an aro,” igik, i wesugun o. Wesimbik he, ”Afuni Allah nen wenaginafikhe mene omanogo lalinabugun he a? Lek he a, iluk lalinabuogeluk he, inane eberogoat hangge anggoageluk hilingisu lek mene elalin mene hilingirik wesugun o. It ekhe nen, ”Kristus a'nogo yi waga yi hani,” igik, it ekhe nen he, ”Kristus a'nogo a'li waga a'li yethani,” igik, ugunem hit hinendawimo nen he, eberogoat iluk anggagubo.

²⁵ Wene andi oan hilinglagi'lek werek kwelek husumbi tak yagahisigi andi fanorogo futfikhi logoino o.

²⁶ It afuni ekhe nen yagahisik hi logolik he, ”Yethani! At a'nogo o leimo a'lima werego,” ugu halok he, hineilenggen yetha lagubo. Nen, it ekhe nen, ”Yethani! At a'nogo oloba aburare'ma hinago werego,” ugu halok he, hinendawimo nen eberogoat iluk anggagubo.

²⁷ Andi re, an abat ta'lasi wagagi a'nogo, wesigin he, eilabut o mo liabi wagarek a'lima nen misigam yegelogo, o mo ubuk ikherek higit wagarek andi hak wesigin o,” iluk a'nogo yagaisasikhesik he,

²⁸ ”Sue warek werek halok he, sue warek ninggerek meneat andi andoma andogosi lagarego,” iluk yagaisasikhe.

”An abat ta'lasi wagagi a'nogo hobuk wesigeluk ugu kwelek, yi'nogo hilinglasigin,” iluk yagaisasikhe wene

²⁹ At Yesus nen a'nogo yagaisasikhesik, hobuk ekhe mel yagaisasikhe: ”Weak hokhorogo a'nogo hambik oba nen inenggi hokhorogo welagi'legat he,” O mo mum agik, tugi yati'lek kamo igik, hesagal pogoroba nen lologo pi wagik, pogoroba inomame hokho mene andi Allah nen inabologet higik igin o.”

³⁰ A'nogo hilingitu kwelek, an abat ta'lasi wagagi a'nogo arat wesigin iluk, afuni inendawinggen wenggelogo futfouwageluk pogoroba ekhe hilinglasigin oba nen, afuni inunggulenu lombok le agu kwelek nomamerogoat ohena anggele'ma pi wagunem, ineilenggen neambik hokhorogo foge'nabugun o.

³¹ A'nogo waga logolik he, an nen it malaikat Allah pogoroba nen yonggo lakfisa wagarek mene omanogo yonggo lakfisikhi logolik he, nambinggong ane hokho mene pak ugunem he, iren afuni an nen wenaginafigi mene omanogo, o unggut elikwe, yikwe, po'likwe, ma'likwe, yi awi ti awi o pogot ero-ero a'lima nen mondok andogerinabugun o,” iluk yagaisasikhe.

Wene e ara oba lirogo yagaisasikhe wene

³² At Yesus nen a'nogo yagaisasikhesik he, hobuk ekhe mel yagaisasikhe: ”Wene yi e ara oba lirogo yagahisagain yi futfeni o. Engga sabeligeluk ikherek a'nogo meneba lirogo yagahisak. E ara andi engga lologo pikheresik hobuk asimit fulelhik, engga sabelhik, ugunem he, hineilenggen hambik hinendawimo nen he, ”Yogo. O arat hibi asigin higi,” iluk hinendawimo futfikhi lagep andi hak, an nen,

³³ yi'nogo hilinglasigin, iluk yagahisigi a'nogo, ebe mondogat hilinglagunem hineilenggen hambik he, ”Yogo. O wurep oba hilinglasigin a'nogo horogasi waga higi,” iluk, hinendawimo anggano o.

³⁴ Yi'nogo hilinglasigin, ti'nogo hilinglasigin, iluk yagahisigi andi, afuni o yogondak werek mene inebe ekhe legagi'lek oan werek kwelegat ebe mondogat hilinglasigin o, iluk, eberogoat yagahisigi.

³⁵ Pogot inom, kweang inom, legasigin meneat he, an nane andi legasigin mondok lego,” iluk yagaisasikhe.

”Mera hilinglasigin nit mondogat ninonggot andi nen, hinobabut hebelogo logoino” iluk, yagaisasikhe wene

³⁶ At Yesus nen a'nogo yagaisasikhesik he, wene ekhe mel yagaisasikhe: ”An wesigin he, o ti sambul jam tiba wesigin iluk, afuni mondok inonggot. Nen, malaikat Allah pogoroba nen yonggo pelakfisa wagarek mene omanogo inonggorat. Nen, an nebe Allah amlogoat meneat he, nonggorat. We, an neisena Allah amuat elu o.

³⁷ It afuni ap Nuh werek oba andem hilingiti lagaukwa higirat he, an abat ta'lasi wagagi a'nogo hobuk inobabut a'nogoat hilingitunem wesigin o.

³⁸ I hokhorogo nabung-habung isikhe andi, oan hilingiti'lek werek kwelek, it afuni andoma nen sumburu ninggik, enggen amusu ninggik, aben hemi ikhigik, it ekhe igisigik, ugu kwelek he, at Nuh a'nogo e so elema kwisikhe.

³⁹ E so elema kwisikhesik werek kwelek, it afuni omanogo inonggorat were'ma, i arat nabung-habung ikhi logolik mondok inoatikhe. Andi hak he, an abat ta'lasi wagagi a'nogo hobuk wesigin higithogo re, a'nogoat hilinglasigin o.

⁴⁰ Andi sambul he, ap inebe pire yabu wanhunem ekhe wanhi logolik he, ekhe herakfisagain o.

⁴¹ Nen, hemi inebe pire sumburu gandum mene werasuogeluk sagalhunem, ekhe wanhi logolik he, ekhe herakfisagain aro.

⁴² A'nogo hilinglasigin andi nen hiren he, Ninoe Enupogot mera wesigin, hinonggot andi nen he, hinebe hebelogo logoino o.

⁴³ Nen, ap awi eisewerek mene ekhe endawimo nen he, ”O yogondak hubanggo re, jam tiba an naiba yoma ap ekhe yogot wanigeluk kwi wesigin,” iluk, elu logoilepma re, at ebe aiba andi kagalek mondok were'ma, o pin talogo yogot wani kwilep lek, iluk, hineluat anggigi.

⁴⁴ Andi hak he, hit hinendawimo nen he, ”At ti sambul wesigin, iluk anggigi'lek hinonggorat werek kwelek, an abat ta'lasi wagagi a'nogo re, arat wesigin andi nen he, hinebe hebelogo logoino,” iluk yagaisasikhe.

Ap kain mene nen amingmingengge mene obabut higit mene inom, weak mene inom hilingitarek mene oba lirogo yagaisasikhe wene

⁴⁵ At Yesus nen a'nogo yagaisasikhesik he, hobuk ekhe mel yagaisasikhe: ”Ap kain mene ekhe againafuri kwelaginarek logolik inamburu wogisogoin higithogoat wogisikhi logouwageluk, at amingmingengge mene ayonggo fugunem, at endawimo kagalek logolik obabut oe ane igin mene higithogo hilingiterek andi sa anggegep. At andi oe andi nen menfuluk lagarego.

⁴⁶ Menfuluk lagunem, amingmingengge a'nogo at a'nogo higithogo hilingitunem eilenggen ha waga halok, amingmingengge a'nogo endawimo agaiyek hokhorogo hagain o.

⁴⁷ A'nogo fano hilingitunem, ha wesimbik he, oe a'nogo nen ”An nagarek yoma mondogat felelenghogo hat henggiba logouwagaluk menfagain o,” iluk, eberogoat yagahisigi.

⁴⁸ Meneat he, at amingmingengge mene andi, obabut weak halok he, endawimo nen, ”Noe a'nogo weak-weak weri'logo lek. Logombigen wesigin higi,” iluk,

⁴⁹ agaila'lak inoe kain a'nogo amingmingengge mene ekhe yei inoatik, it ap anggur amusu lugulugwi paluogeluk nenggarek mene inom lambukhogo logolik, sumburu inom, anggur amusu inom, ninggik,

⁵⁰ ikhi logolik he, aren he, ”Noe a'nogo o yi sambul, jam kiba wesigin,” iluk, mondok onggorat were'ma oe kain a'nogo ferekhogoat wesigin o.

⁵¹ A'nogo were'ma wesimbik he, at amingmingengge a'nogo ebe yei mondok warogo re, it afuni inagap oba nek fano hangge inendawinggen pire logolik hilingitarek mene lakfisikherek oba andoma lakfisamo, andoma logolik he, aik himbirogo li ago, le ago, ikhi logogin o,” iluk yagaisasikhe.