MATIUS 23 - Allah Wene Fano Wene Hupla Inane

”It ap Allah ane lisu palek eisewerek mene inom, ap Farisi mene inom, inobabut waganogo hilingiti logogup,” iluk yagaisasikhe wene

¹ At Yesus nen a'nogo yagaisasikhesik he, hobuk afuni hokhorogo andogorek welagaukwa mene omanogo inom, at ane wanhi lagaukwa mene omanogo inom,

² mel yagaisasikhe: ”It ap Allah ane lisu palek eisewerek mene inom, ap Farisi mene inom, inomen he, at Musa nen wene Allah nen komotninafikhe wene a'nogo yagaisikhi lagaikhe andi hak, obali'mo re, iren yagahisili'lagwi andi nen he,

³ iren yi mene ti mene hilingisuageluk yagahisugu halok he, andiat fisogo logolik hilingiti logoino o. Meneat he, it hilingiti'lek logolik, iren he, ”Hit enek hilingi'ni,” iluk yagahisili'lagwi andi re, it hilingiri'lagwi andi hak inobabut waganogo hilingiti logogup.

⁴ Sungge enggin mene hele homagaisogo inonggwarek inenggi fakhigi'lek logolik afuni ekhe inomoloba wanuageluk yagaisagarek andi hak, it andi nen inonggwarek hilingiti'lek logoligat, it ekhe nen hilingisuageluk wene enggin mene inoba fili'lagwi andi.

⁵ Iren ekhe mene ekhe mene hilingiri'lagwi andi mondogat he, ”Afuni nen ineil nisoageluk inendawimo anggikhi logolik hilingiri'lagwi o. Iren he, samban ikhi lagi,” iluk, Allah ane suesinggaba lisu palogo inelhaba homatarek a'nogo, iren hokhorogo homatik, su endakwe mene hunogoat labetarek a'nogo, iren su ogo'lu uanhogo igisogo labetik,

⁶ nen, afuni seni hokho isago nunggunem, it ap kaindek hu'lagaikharek oba hu'lagik, o afuni Yahudi mene samban agarek oba andoma tulem healogo hu'lasi kwigik, afuni nen, guru neisena, iluk hai warinafik,

⁷ pasar onggo wanharek oba andoma afuni nen inane agaukhogo yagaisigik, ikhi logouwageluk andoma lagik, ikhi logou inamolo welagaikharek andi.

⁸ Meneat he, hit hineisena re, guru wene yagahisikherek mene misigat enek werek andi nen he, hinerugwi hinagaila'lak hinom higit halok, it ekhe nen, Guru noe, iluk yagahisagain mondok lego.

⁹ Nen, hineisena pogoroba mene misigat welagarek andi nen he, ap kweangma mene ekhe yagati logolik, Neisena, iluk yagasugun mondok lego.

¹⁰ Nen, hinoe wene komothinafirek he, an Kristus nalegat halok he, it afuni ekhe nen, Kain noe, iluk, hit yagahisagain mondok legaro.

¹¹ Halok he, hit ya re, sa nen ekhe kain werek halok, at andi hinamingmingengge asuago.

¹² Ap sa nen onggwaregen, an kain, iluk menlasigin halok he, Allah nen ebe sebelogo inawe a'ma fagain o. Nen, at sa onggwaregen it ekhe inawe a'ma hak logogin halok he, Allah nen ebe legeisogo fagain o,” iluk yagaisasikhe.

¹³ A'nogo yagaisasikhesik, it Allah ane lisu palek eisewerek mene inom, Farisi mene inom, inom mel yagaisasikhe: ”Hit ap Allah ane lisu palek eisewerek mene yi inom, hit Farisi mene yi inom, hinagap oba nek fano hangge logolik hinendawinggen pire mene yi ri! Hit andi afuni Allah awe a'ma kwinogo iluk he, hirenat kwe yagati lagep yoma ri! Hit hinonggwarek kwigi'lek logolik he, it ekhe kuogeluk ugunem, hiren he, ”Kugun lego,” iluk wene palhi lagep yoma ri!

¹⁴ Hit ap Allah ane lisu palek eisewerek mene inom, Farisi mene inom, hinagap oba nek fano logolik hinendawinggen pire mene yi ri! Allah nen weagethinabigin o. Hit he, hemi sogwe mene inawi wurik inom, inagarek inom, sebelikhi logoligat he, afuni nen, inesanggo holiluk, it fano anggoageluk samban uan-awan lithilik laga lagep a'nogo hilingiti'lek logoilepma re, Allah nen wene endebat hinoba feilepsik logoilep. Mene re, a'nogo hilingiti lagep andi nen he, wene enggin mene hinoba fembik weagethinabigin o.

¹⁵ Hit ap Allah ane lisu palek eisewerek mene yi inom, hit Farisi mene yi inom, hinagap oba nek fano hangge logolik hinendawinggen pire mene yi ri! Hit hinane wanhi logouwageluk afuni heraginabik, i laut yenggelek aik eliba wulipluk, o yi awi ti awi nikhi lagep mene andi, Allah nen wene hit hinoba fembik endu ai'mo lakhinobagagin andi hak he, it hinane holi'lagwi mene andi Allah nen wene a'nogoat enggi pireba inoba fouwageluk ikhi lagep andi nen, weaget hinabigin o.

¹⁶ Afuni ineilenggen mum mene nen it ekhe yagaisikhi logolik: Kwe yikwe louwok! Iluk u hak, hiren he, ”Allah awi wurik enu hombuk palhep halok andi se hak anggegep? Meneat he, emas Allah awi wuri'mo welagarek mene andi nek he, enu hombuk palumo re, eberogoat sugwi asigin lego,” iluk yagaisikhi lagep mene andi re weaget hinabigin o.

¹⁷ Hinendawinggen mondok lek logolik hineilenggen mum yoma ri! Ki mene esin anggegep? Emas andi mene esin anggegeba? Allah awi wurik andi emas Allah faget fesukwa mene, iluk, awi wurik andiat esin anggegeba.

¹⁸ Hiren he, wene ekhe yi ikhi lagep: Allah awi wuri'mo yi mene ti mene e talogo Allah faget fisagarek oba, obuluk enu hombuk palhu halok he, se hago. Mene re, Allah ebe fisagarek andi mene enu hombuk palhu halok he, sugwi asigin lego, iluk yagaisikhi lagep andi weago!

¹⁹ Hineilenggen mondok mum yoma ri! Yi mene ti mene Allah faget fisagarek andi esin anggegeba? I a, athe, yi mene ti mene e talek andiba fisagarek andi nen, Allah mene aro, iluk, agarek andi nen, e andi esin hangge anggegeba.

²⁰ Sa nen e talek yi mene ti mene Allah faget fisagarek oba andi enu hombuk palhu halok he, e talek ebe andi inom, yi mene ti mene oba fisagarek mene andi inom, lambukhogo enu hombuk pali'logo o.

²¹ Nen, sa nen Allah awi wurik andi enu hombuk palhu halok he, o wurik andi inom, Allah ebe o wurik eisewerek welagarek andi inom, inomat enu hombuk pali'logo o.

²² Nen, sa nen pogot enu hombuk palhu halok he, Allah kain welagarek oba obuluk andi inom, at ebe inom, inomat enu hombuk pali'logo o. Hit weak ikhi lagep andi nen, Allah nen weaget hinabigin o.”

²³ ”Hit ap Allah ane lisu palek eisewerek mene inom, Farisi mene inom, hinagap oba nek fano hangge logolik hinendawinggen pire mene yi ri! Allah faget hilingiti logogun esin hangge re, higithogo hilingitarek andi inom, afuni ekhe inendawinggen hundik welagaikharek andi inom, inobabut lenurogo welagaikharek andi inom, werek kwelegat he, a'nogo hilingiti'lek logolik, hiren larengga hangge inom, heinde hangge inom, su'lingga hangge inom, hinenggi wenagaisogo hinomoloba asi wagunem, misigat ekhe Allah faget fisikhi lagep andi fikhi lagep meneat he, wene ebe esanggoma mene andi fano hilingiti lagep meneat he, wene esin mene hilingiti'lek herakfisikhi lagep andi weago!

²⁴ Afuni ineilenggen mum mene nen he, it ekhe yagaisikhi logolik, Kwe yikwe louwok, iluk u hak, hiren he, elugengge endep mene i hinagaisogo fakhikhi lagep oba elonggoma kugunem enegat haluk wulakfisikhi lagep meneat he, wam unta ebe hokho mene hinaik sagalhi'lek haumhogo ninggi lagep andi nen, Allah nen weaget hinabigin o.”

²⁵ ”Hit ap Allah ane lisu palek eisewerek mene yi inom, Farisi mene inom, hinagap oba nek fano hangge hinendawinggen pire mene yoma ri! Hinagaiwak inom, hinampiring inom, endakwe nek he fanorogo sobalhi lagep meneat he, elonggoma re, afuni inagarek hinenggi abisak helikhi lagep mene andi inom. An enek wo'ne'lep, iluk anggikhi lagep mene andi inom, mondok peterek welagep andi weago!

²⁶ Hit ap Farisi mene hineilenggen mondok mum mene yi ri! Hinagaiwak andi elonggoma tak fanorogo sobalinio. A'nogo hilingitep halok he, endakwe elok sobalasigin aro. Hit weak hilingiti lagep mene andi Allah nen weaget hinabigin o.”

²⁷ ”Hit ap Allah ane lisu palek eisewerek mene inom, Farisi mene inom, hinagap oba nek fano hangge hinendawinggen pire mene yi ri! Hit he, hinebe mel hangge. Afuni wa'lagaikharek mene kweangma salinafarek oba andoma endakwe nek he, mondok tegelek fano werek kwelegat he, elonggoma re, afuni inoak amben sang-pang ikherek andi hangge welagebo.

²⁸ Andi hak he, afuni nen hit hinagap endakwe yi yethisugunem he fano anggili'lagwi meneat he, hinendawinggen pire logolik, hinendawimo yi weak ti weak hilingiti lagep andi mondok peterek werek andi nen he, Allah nen weaget hinabigin o!”

²⁹ ”Hit ap Allah ane lisu palek eisewerek mene inom, Farisi mene inom, hinagap oba nek fano hangge hinendawinggen pire mene yi ri! Hiren he, ap attak Allah ane yagaisikhi lagaukwa mene inebe warek salinafuba amboloba o wurogo fisigik, it ap attak inobabut higit hilingiti lagaukwa mene warek salfisaluk afuni ekhe inendawimo eberek logouwogeluk ibal wanhi lagaukwaba hobuk wanhi logolik, hiren he,

³⁰ nit ninebe yi re, it ninambu ninombalak attak welagaukwa andem ninom logoiloma re, nit ninomen he, it ap Allah ane yagaisikhi lagaukwa mene andi inoa'lo lego, iluk,

³¹ hinonggwaregen ikhi lagep andi, ”Nit ninebe re, it ap endamat Allah ane yagaisikhi lagaukwa mene nit ninambu-ninombalagen inoatukwa andi nen tagongge welago o,” iluk u hagat ikhi lagebo.

³² Halok he, hinambu-hinombalak eroba nen hilingiti lagaukwa andi hak, hit wurep oba a'nogoat hilingiti logoni o!

³³ Hit kisu nen tagongge mene hinebe kisuat welagep yoma ri! Afuni Allah nen wene inoba fembik endu ai'mo hokhorogo lakfisugunem hit heise wulibugun nogo? Elo'lego.

³⁴ Halok hinesanggo fanorogo holini. An nen ap Allah ane yagaisagarek mene inom, inendawimo kagalek mene inom, Allah ane lisu palek eisewerek mene inom, lakfisa wesigin mene andi, hiren fena eba menfisaluk inoatik, fena o hit samban ikhi lagep kwe kuluk yei wiik-weakhogo inoatik, fena mugusogo-magaisogo o kota ekhema-ekhema lakfisigik, hilinginabugun o.

³⁵ Andi halok he, it ap inobabut higit hilingiti lagaukwa mene, inamep wulagaisogo inoarik wagaukwa andi, huli ero Habel obabut higithogo hilingiti lagaikhe mene oe nen watikhe andiba nen pikhit, huli wurep oba, at Berekia amlogo Zakharia andi Allah awi wurik honggolek, Allah anggo warogo endu noleti lagaukwaba honggolek, tulem watigip andi huli, it mondogat inamep hit hinoba lombok hinenggiba werego.

³⁶ Hit yogondak welagep mene yi re, wene yi mondogat he hirat hinoba enggin logogin, iluk, eberogoat yagahisigi o,” iluk yagaisasikhe.

Yesus nen afuni o Yerusalem mene endawirinafikhe wene

³⁷ At Yesus nen a'nogo yagaisasikhesik he, ekhe mel yagaisasikhe: ”Eigo! Hit afuni o Yerusalem mene yi nendawilage! Hirenat ap Allah ane yagaisagarek mene inebe inoatik, ap Allah nen inayonggo fuluk lakfisa wagarek mene heleben tamuk-tamakhogo inoatik, ikhi lagep andi nendawilage. Sue ayam eagwi ogolabi a'ma andogorogo fisikherek andi hak, an nen hundik-handigat hit o yoma welagep mene mondogat a'nogoat andogorogo hinobagagin iluk anggikhi lagi meneat he, hiren, ”Ninabit,” ikhi lagep andi, nendawilage.

³⁸ Andi nen he, Allah nen hit hinebe herakhinobagaumo, hinawi wurik andi folugat logogin o.

³⁹ Huli yogondagen he, an nebe hineilenggen niigi'lek logombigen, hobuk hiren he, Nineisena Tuhan Allah nen lakhobagai wagama wagen yi arenat fanothabuago, iluk hobuk yaganesugun andi huli hineilenggen neogoin o,” iluk yagaisasikhe.