MATIUS 22 - Allah Wene Fano Wene Hupla Inane

”He iti logolik isago na wesuageluk inayonggo fesikhe,” iluk oba lirogo yagaisasikhe wene

¹ Yesus ebe fakfigi'lek herakfesukwama re, hobuk aren wene ekhe oba lirogo afuni omanogo mel yagaisasikhe:

² ”Allah nen awe a'ma fisikhere'ma andoma emberek higit he, ap kain enupogot ekhe amlogo agwe igeti logolik pesta seni isatukwa hagaro.

³ Isati logolik afuni inayonggo fesikhe mene na wesuageluk, at amingmingengge mene ekhe mel yagaisasikhe: Afuni inayonggo figi omanogo wesuagen woginabi lani o, iluk, yagaisasikhe meneat he, it inayonggo fesikhe mene andi inabiren wagi'lek kamo isukwa.

⁴ Wagi'lek kamo isukwama re, hobuk amingmingengge mene ekhe mel yagaisasikhe: Afuni inayonggo figi mene omanogo wesuagen he, woginabi lani o. Lambik he, ninoe nen mel ikhe ino: Wam sapi oe mene inom, wam fena hokhondek mene inom, mondok felelenghogo warogo arat isakfigirik, yi mene ti mene felelenghogo tegelogo figirik arat nogoin higit aga o. Halok he, wesuagen yagaisa lani, ikhemo wago, iluk lakfisasikhemo lagaukwa.

⁵ Lagaukwa meneat he, it inayonggo fesikhe mene andi inendawimo puk-puk hilingiti logolik he, it ekhe ineabu kwe lagik, it ekhe yi mene ti mene awasigeluk lagik.

⁶ It ekhe nen, at kain amingmingengge lakfisasikhe mene omanogo inebe fakfisaluk yei inoatikhesik he, inebe mondok inoatik, isukwa.

⁷ A'nogo hilingitukwama re, at ap kain enupogot a'nogo esanggo holhikhesik, a'mage lagalik agoromi tentara mene lakfisasikhemo lagaukwasik, at ap kain amingmingengge inoatukwa mene omanogo inebe mondok warogo potfisasukwasik, inawi kota wurik andoma endu mondok fatukwa.

⁸ A'nogo arat hilingitukwama re, at ap kain enupogot a'nogo nen amingmingengge mene omanogo mel yagaisasikhe: Seni arat isati meneat he, it afuni inayonggo figi mene andi nanggo isago na wesugun legagama. Nabiro.

⁹ Halok he, hit kwe hokho handogalma a'lima lambik were'ma re, afuni ekhe lagu halok, seni isago na luogo, iluk, inayonggo feino, iluk yagaisasikhemo re,

¹⁰ it amingmingengge mene omanogo hobuk kwe hokho handogalma andoma lagaukwasik were'ma, afuni inobabut weak mene fano mene, lagunem inom ambi agaukwa mene mondogat inayonggo fesukwama wagaukwama re, oloba inebe mondok pete isikhe.

¹¹ Arat peterogo kwisukwama re, at ap kain enupogot a'nogo eilenggen isageluk oloba kwisikhe re, ap misigat ekhe su hemi iginafi logolik seni isago nuogeluk itarek mene ugu lek were'ma eilenggen yethasikhesik he, mel yagatikhe:

¹² Eige, nagot! Hat he, su hemi iginafi logolik seni nuogeluk itarek mene andi iti'lek kwi wagen yi, ninggi'nogo kwi wagen, iluk yagatikhe meneat he, ap a'nogo ane mondok igi'lek kamo isikhe.

¹³ Ane mondok igi'lek kamo isikhemo re, at ap kain enupogot a'nogo amingmingengge mene omanogo mel yagaisasikhe: Ap andi enggi eisok mondok hele homagaisogo re, enda'ma inaik himbirogo li ago le ago welagaikharek oba o mondok mummo andoma wulakfisani o, iluk yagaisasikhe.

¹⁴ Andi hangge, Allah nen afuni inebe mondok hokhorogo inayonggo fikherek meneat he, inebe endebat enek wenagaisogo inobagagin o,” iluk yagaisasikhe.

” Uang pemerintah faget kino ugunem, wogisogoin a? Lega,” iluk heinok Yesus oba wanhukwa wene

¹⁵ Hobuk he, it ap Farisi mene nen, ”Nit Yesus eil warogo wene oba heinok wanhunem ane igin oba enggin oba fembik wene oba fouwok,” iluk abok palhi lagaukwa.

¹⁶ Abok palhi lagaukwasik he, ap it inagoromi inane wanhi lagaukwa mene inom, it ap Herodes werekwe mene inom, Yesus oba wene heinok wanuageluk lakfisa wagaukwama it andi wagaukwasik he, mel yagatukwa: ”Yesus noe. Hat hobabut he, wene eberogoat enek ikhi logolik, Allah endawimo nen, Afuni yi'nogo hilingiti logouwak, iluk anggikherek mene eberogoat yaganisikhi lagen andi nit ninelu o. Afuni inebe hailo legat logolik inelokhonggen oba nek isaluk he, ekhe helokhoma fisigik, ekhe hambotma fisigik, hilingisu lek hak hiikhi lago o.

¹⁷ Halok he, hat hendawimo ninggi'nogo anggegen. Nit Yahudi mene hilingitorek higithogo re, uang pemerintah faget kain enupogot Kaisar wogosugun a? Lega,” iluk yagatukwama re,

¹⁸ at Yesus nen it ap andi inobabut weak enegat palhikhesik he, ”Hit hinagap oba nek fano hangge logolik, hinendawinggen pire mene yi ri! Nenahalok nobabut paluogeluk ikhi lagep.

¹⁹ Uang pemerintah faget fogoin mene a'nogo neilenggen hagen inu'neani,” iluk isikhemo uang a'nogo ekhe wogetukwama re,

²⁰ aren he, ”Yi sa ebe hilingi'mo enu lisu palek werek,” iluk yagaisasikhemo,

²¹ iren he, ”Ari Kaisar aro,” iluk yagatukwama, at Yesus nen he, ”Kaisar mene halok he, Kaisar at wogetik, Allah mene halok he, Allah at wogetik, ikhi logoino o,” iluk, yagaisasikhemo re,

²² it omanogo inesanggo holhukwasik he, ”Eige! Nailo e,” iluk, fogera'luk he, Yesus herakfisaluk o ekhema lagaukwa.

Ap Saduki mene nen, afuni wa'la'lugen ineluk asugun mene faget Yesus oba heinok wokhasukwa wene

²³ It omanogo arat lagaukwama nen, o andi sambulat, it ap Saduki mene nen, ”Afuni wa'la'luk ineluk asugun mondok lek,” iluk agarek mene ekhe Yesus oba wagaukwasik he, mel yagatukwa:

²⁴ ”Noe. At Musa nen mel iluk yaganisasikhe: Ap ekhe againafuri oan taginafi'le'ma ebe wa'laga halok he, obali'mo omalik ekhe taginabuageluk he, he sogwe andi ap andi agorat wanigin o,” iluk yaganisasikhe.

²⁵ A'nogo isikhe mene were'ma re, nit were'ma yoma ap inebe 7 nen ineisena misigaren tago welagaukwa. Logolik, inoe manggusa mene andi agwe wanhikhesik againafuri taginafi'le'ma wa'lagaikhemo agot ombo'ne mene andi nen, ”He yi noe agwe sogwe an nobagaluk laga mene,” iluk, wanhikhe.

²⁶ Wanhikhe meneat he, at andi againafuri taginafi'le'ma wa'lagaikheat. Hobuk he sogwe mene a'nogo inagot inombo'ne mene andi nen wanhikhe mene re, a'nogoat againafuri taginafi'le'ma wa'lagaikheat. Inebe 7 nen omanogo inagainafuri taginafi'le'ma mondogat wa'lagaukwa andi.

²⁷ A'nogo wa'lagaukwasi'mo nen, hobuk he andi ebe wa'lagaikheat.

²⁸ Halok he, it ap inebe 7 nen andi, he misigat mene andi waganek welagaukwasi'mo re, hobuk Allah nen afuni warek mene inelugerinabigin andi sambul he, he andi sa hak agwe asigin anggegen,” iluk heinok wokhasukwama,

²⁹ at Yesus nen he, mel yagaisasikhe: ”Hit he, Allah ane lisu palek andi inom, Allah omame andi inom, hinonggot logolik, hinane weak egep andi.

³⁰ Afuni warek mene Allah nen inelugerinabigin oba nen, hemi ikhigik, it ekhe igisigik, ikhi logogun mondok lego. We, it malaikat pogoroba mene welagaikharek andi hanggeat logogun o.

^31-32 Nen, afuni wa'lasugun mene Allah nen inelugerinabigin andi nek he, aren, Abraham inom, Ishak inom, Yakub inom, ineisena Allah an aro, iluk isikhemo, at ane lisu palek werek a'nogo enu salhi'lek welagep nogo? Enu salhi lagebaro. At Allah re, afuni warek mene ineisena lek. Athe, afuni ineluk mene ineisena o,” iluk yagaisasikhemo re,

³³ it afuni hokhorogo omanogo inesanggo holhukwasik he, ”Egi! Nailo e,” iluk fogeratukwa.

”Allah nen komotninafikhe wene esin he, pire andem aro,” iluk yagatikhe wene

³⁴ At Yesus nen wene a'nogo yagaisasikhemo, afuni nen he, ”Yesus nen it ap Saduki mene wene yagaisasikhemo, iren onggo ugun elo'lek aga,” iluk isukwama, it ap Farisi mene inesanggo holhukwasik he, inebe andoget fuluk,

³⁵ ap ekhe Allah ane yagaisikhi lagaikhe mene nen, Yesus obabut paligeluk oba heinok wanhi logolik he, mel yagatikhe:

³⁶ ”Yesus noe. Wene Allah nen komotninafikhe wene a'nogo, wene ebe esin mene ki isikhe anggegen,” iluk yagatikhemo,

³⁷ at Yesus nen, ”Wene esin he, at Musa nen, hinendawinggen inom, hinobabut inom, hinebe inom misigat a'luk, nineisena Allah Enupogot ebe andiat hinendawinggen hundik logoino o, iluk isikhe andi,

³⁸ wene ebe hokho esin mene andi o.

³⁹ Nen, wene andi emberek higit he, ekhe yi: Hit hinonggwarek hinebe hinendawinggen hundik welagep andi hak he, it afuni ekhe hinom welagep mene andi hinendawinggen hundik logoino o, iluk isikhe mene esin he andi.

⁴⁰ Wene at Allah nen, yi'nogo hilingi'no, ti'nogo hilingi'no, iluk komotninafikhe wene mondogat inom, wene it ap Allah ane yagaisikhi lagaukwa mene nen isukwa wene mondogat inom, wene esin pire andem oba hundik werego,” iluk yagatikhe.

”At Kristus andi, ebe sa anggegep,” iluk yagaisasikhe wene

⁴¹ At Yesus nen a'nogo yagaisasikhesik he, it ap Farisi mene omanogo andogorek were'ma, aren heinok inoba wanhi logolik he,

⁴² mel yagaisasikhe: ”Hit hinendawimo nen he, Kristus Allah nen ayonggo fesikhesik lakfei wesigin isikhe a'nogo, ebe sa anggikhi lagep. Nen, omba sa nen tagongge mene anggikhi lagep,” iluk yagaisasikhemo, iren he, ”At andi Daud en tagongge mene o,” iluk yagatukwa.

⁴³ A'nogo yagatukwama, at Yesus nen he ”Halok he, Allah Areagun en Daud endawimo kagalhikhemo, aren he,

⁴⁴ Allah Enupogoren an noe Enupogot yagati logolik he, Afuni hat hinom weak mene omanogo heisogen alperelogo fisanogen he, an nen hoba fisa wagi'lek werek kwelek, hat an nera'lu nenggi ebekwe hebe kain logoinogoluk, Allah nen Kristus yagatikhe, iluk isikhe andi re, nenahalok isikhe anggegep.

⁴⁵ At Daud onggwaregen Kristus ebe faget, An noe Enupogot, isikhe halok he, hiren, Kristus andi Daud en tagongge mene o, iluk, ninggi'nogo ugun anggegep. A'nogo ugun elo'lego,” iluk yagaisasikhemo re,

⁴⁶ iren wene onggo ninggi'nogo yagasu heat hilinglagaikhemo, huli andi huli nen he, hobuk afuni mondogaren wene ekhe heinok wanu inailo agaikhe.