MATIUS 21 - Allah Wene Fano Wene Hupla Inane

Yesus fogeratu kwelek o Yerusalem kwisikhe wene

¹ At Yesus afuni inom lagaukwa mene omanogo inom kota Yerusalem kuogeluk horokhogo asi lagasukwasik he, punu Zaitun a'ma o sili Betfage higit asi lagasukwasik he, Yesus nen it at ane wanhi lagaukwa mene omanogo ekhe inebe pire attagat lakfisasikhe.

² Lakfisikhi logolik he, ”O sili hinelokhoma a'li lani o. Arat lagep halok, oan kwikhi logolik hineilenggen yethogoin he, wam keledai eak emberek kombi kelik were'ma hineilenggen hogoin a'naga o. Nen, arat hineilenggen hegep halok he, kombi kelik andi fikhalogo re, noba waluk we'no.

³ A'nogo hele fikhalhunem, it afuni andoma mene ekhe nen he, ”Nenahalok kombi fikhalhi lagep iluk wene palha halok he, mel yagaisano: Ninoe Enupogot a'nogo nen wam yi mene legen he, waluk louwogeluk kombi fikhalhi lago, iluk yagatunem aren he, weak-weak lakfei wesigin a'naga,” iluk, wene warogo lakfisasikhe.

⁴ A'nogo lakfisasikhe andi re, at ap Allah ane yagaisikhi lagaikhe mene ekhe nen he:

⁵ ”Afuni o Sion mene yagaisikhi logolik he, Hinoe Enupogot hinoba weri'logo o. Obabut enago logolik, wam keledai amboroba hu'lagasik, keledai eak mene nen waluk weri'logo, iluk yagaisan o,” iluk isikhe andi emberek higithogo hilinglasuageluk, at Yesus nen a'nogo lakfisasikhe andi.

⁶ Lakfisasikhemo re, it agoromi a'nogo lagaukwasik, at Yesus nen yagaisasikhe higithogoat hilingiti logolik,

⁷ wam keledai a'nogo eak emberek waluk wagaukwasik he, inasu endakwe laberek mene nonggologo wam aremnogo inamboloba talogo fesukwama re, at Yesus ebe hu'lagaikhe.

⁸ Hu'lagaikhesik lagunem, it afuni hokhorogo omanogo inebe hokhokwe inasu endakwe laberek mene nonggologo kwe ebekwe talogo fesukwasik lagik, it fena re, engga mene eroba nen palogo ebekwe talogo fesukwasik lagik, isukwa.

⁹ A'nogo fesukwasik laga logolik he, at Yesus ebe tulemet fesukwasik, it ekhe attak agik, it ekhe ombo'ne agik, laga logolik he, inane hokhorogo mel ilik lagaukwa: Daud en tagongge mene, noe wa! noe wa! noe wa!” iluk u hak,” Hosana Nineisena Enupogot Allah nen lakhobagai wagama wagen yi, arenat fanothabuago. Allah Lego mondok welagendek mene neisena wa!” u hak, ”Hosana” iluk a'mit suphogo ilik-ilik, o Yerusalem kwisukwa.

¹⁰ Kwisukwama re, it afuni andoma mene mondogat aleik wati logolik he, ”Egi! Ap yi sa anggegep,” iluk isukwama re,

¹¹ it afuni hokhorogo omanogo nen he, ”Yi Yesus Allah ane yagaisikherek mene, awi o Galilea tonggwe kota Nasaret mene a'nogo waga yi o,” iluk, yagaisasukwa.

Yesus nen Allah awi wuri'mo kwisikhesik tegelhikhe wene

¹² A'nogo isukwama, at Yesus Allah awi wuri'mo kwisikhesik he, it afuni Allah awi wuri'mo kwisukwasik logolik, yi mene ti mene onggo wanhik, palhik, ikhi lagaukwa mene felelenghogo mugusogo-magaisogo enda'ma wulakfisigik, it ekhe uang e talek oba fesukwasik onggo wanhi lagaukwa mene inom, it ekhe e talogo inebe hurek logolik sue pel hangge mene onggo wanhi lagaukwa mene inom, e talek mene andi abel enden-fendenhogo potfisigik, ilik lagaikhesik he,

¹³ mel yagaisasikhe: Lisu palek oba re, at Allah nen ikhi logolik, ”An nawi wurik yi faget afuni nen ikhi logolik he, o samban ikhi logogun oba, iluk ikhi logogun o, iluk isikhemo lisu palek werego. Meneat he, hiren he, it ap afuni inagarek inenggi abisak telogo helagarek mene inawi hak wurogo fisikhi lagep yi ri!” iluk wenagisasikhe.

¹⁴ A'nogo yagaisasikhesik he, afuni ineilenggen mum mene inom, ineisok wut warek mene inom, Yesus oba Allah awi wuri'mo andoma wagaukwama re, aren fano higirinafikhe.

¹⁵ A'nogo higirinafikhemo re, it ap Allah eisewerek mene inogogwi kaindek omanogo inom, Allah ane lisu palek eisewerek mene omanogo inomen he, Yesus nen hilingisu lek mene elalin mene hilingitunem ineilenggen higik, nen, yenggerugwi magendek mene nen, ”Noe wa!” iluk u hak, ”Hosana! Daud en tagongge mene noe,” iluk, Allah awi wuri'mo inane hokhorogo Yesus elokhe wanhunem inesanggo holhik, isukwasik ina'mage nen

¹⁶ Yesus mel yagatukwa: ”It yenggerugwi ili'lagwi andi hesanggo holhi lagen a?” iluk, yagatukwama, aren he, ”I o. Holhi lagi o. Nen, wene mel iluk lisu palek werek a'nogo hiren enu salhi'lek welagep nogo? Iren Allah fogerati logolik he, ”Hat hebe katokhogo fogethafi logouwageluk, yenggerugwi ketago mene inom, eilak oan nili'lagwi mene inom, mondok yagaisegenma higi, iluk isukwama, lisu palek andi hiren enu salhi'lek welagep nogo?” iluk yagaisasikhesik,

¹⁷ it afuni omanogo hebisasikhesik, o sili hokhoma andoma nen wulibi wagaikhesik he, o Betania nogo i wagaikhe.

Yesus nen e ara ero ekhe homan fesikhe wene

¹⁸ Nogo iluk hup siakhogo re, at Yesus o kota a'nogo ambotkwe kwikhi logolik, ebekhalem sumburu nele agaikhe.

¹⁹ Sumburu nele agaikhemo re, e ara ero ekhe kwe esanggoma were'ma eilenggen yethaluk eroma lagaikhesik kwelakhasikhe mene re, enggen ekhe iti'lek, we, engga muli nek weregen he, mel yagatikhe: ”Hat e yi, huli yogondagen pikhit hobuk henggen mondok iti'lek logoino,” iluk homan fugu kwelek aremnogoat he, e ara a'nogo mondok pugagaikhe.

²⁰ A'nogo hilingitunem, at agoromi ane wanhi lagaukwa mene omanogo ineilenggen hasukwasik he, ”Egi!” iluk ikhi logolik, ”E ara yi misigamat pugaga yi ninggi'nogo nen,” iluk isukwama,

²¹ at Yesus nen he, ”Wene eberogoat yagahisak. An nen e ara yi hilingiti hak, hiren a'nogo hilingisugunat mene re, andi nek hilingisugun fuk. Hinendawinggen menenei uan horok ebeti'lek, we hinendawinggen Allahba eberogoat himbiret fembik, hiren he, tom yi yoma nen sanokhogo i laut yenggele'ma a'lima pokhogo lan o, iluk yagatep halok he, hilinglasigin aro.

²² Nen, hit yi mene ti mene Allah kino yagati logolik hinendawinggen at oba eberogoat himbiret fegep halok he, wokhisagain aro,” iluk yagaisasikhe.

”Yesus, hat nena mene eisewerek agendik hilingiti lagen,” iluk anema wanhukwa wene

²³ At Yesus nen wene a'nogo yagaisasikhesik he, at ebe Allah awi wuri'mo kwisikhesik logolik wene yagaisugunem he, it ap Allah eisewerek mene inogogwi kaindek inom, it ap inaluendek inom, Yesus oba wagaukwasik he, mel yagatukwa: ”Hat he, nena mene eisewerek agendik yi hilingitik, ti hilingitik, ikhi lagen. Nen, ap sa nen eisewerek logouwageluk menhobagaikhemo hilingiti lagen,” iluk yagatukwama,

²⁴ at Yesus nen he, ”An ogo re, heinok misigat ekhe wokhisagat. Heinok wanhunem, hiren furogo yaganetep halok he, an nen ogo re, andi mene eisewerek agarik hilingiti lagi, iluk, nane fakhogo yagahisagain aro.

²⁵ Menere, at Yohanes nen afuni ima pelaginafi lagaikhe a'nogo re, Allah pogoroba mene nen yagatikhemo pelaginafi lagaikhe a? I a, athe, afuni kweangma mene nen yagatukwama pelaginafi lagaikhe a. Yagane'ni ta!” iluk yagaisasikhemo, it-it ikhi logolik he, mel isukwa: Pogoroba mene nen yagatikhemo pelaginafi lagaikhe, iluk yagasumo re, aren he, ”Halok he, hiren Yohanes ane eberogoat iluk futfigi'lek welagagip andi nenahalok,” iluk, yaganisanogo.

²⁶ Nen, afuni nen yagatukwama pelaginafi lagaikhe, iluk yagasumo re, it afuni yoma mondogaren he, ”Yohanes andi Allah aneat yaganisikhi lagaikhe iluk agarek andi nen he, nit ninailo,” iluk isukwasik,

²⁷ hobuk Yesus yagati logolik he, ”Wene andi nit ninonggoro,” iluk yagatukwama re, at Yesus nen he, mel yagaisasikhe: Halok he, an nen ogo re, ”Andi mene eisewerek agarik hilingiti lagi, iluk, hit yagahisagain legaro,” iluk yagaisasikhe.

Ap ekhe againafuri inebe pire inom inoba lirogo yagaisasikhe wene

²⁸ At Yesus nen a'nogo yagaisikhi lagaikhesik hobuk mel yagaisasikhe: ”Wene igin yi re, hit ninggi'nogo anggikhi lagep mene igin. Ap ekhe againafuri inebe pire welagaukwa. Were'ma, amlogo manggusa mene andi oba lagaikhesik he, mel yagatikhe: Namlogo. Yogondak hat he, anggur yabumo a'nogo yabu hilingisi lan, iluk yagatikhe.

²⁹ Yagatikhemo, at amlogo a'nogo nen he, Nabiro neisena isikhesigen he, hobuk endawinggen ebetikhesik yabu ebe hilingisi lagaikhe.

³⁰ Lagaikhemo re, at eisena a'nogo amlogo hobuk mene andi oba lagaikhesik a'nogoat yagatikhe mene re, aren he, I, o, neisena iluk, yagatikhe. Meneat he, hobuk endawimo ebetikhesik, yabu a'nogo hilingisi lagaikhe lek, kamo isikhe.

³¹ Halok he, hit hinendawimo nen he, it ap inebe pire andem sa hagen ineisena endawimo anggasikhe higithogo hilingitikhe anggegep,” iluk, yagaisasikhemo, iren he, ”Andi amlogo attak mene andi nen hilingitikhe,” iluk yagatukwama, at Yesus nen he, ”Halok he, an nen wene ekhe eberogoat yagahisak. Hit oan werek kwelek he, it ap uang pemerintah faget kino iluk andogotarek mene inom, hemi hesangge yanini hilingirik nikharek mene inom, it andi tak Allah awe a'ma fisikhere'ma andoma kugun o.

³² At Yohanes a'nogo Allah endawimo anggikherek mene higithogoat hilingiti logouwageluk yagahisa wagaikhe meneat he, hit hinendawimo nen he, at ane andi eberogoat iluk, futfigi'lek welagep. Mene re, it ap pemerintah faget uang kino iluk andogotarek mene andi inom, hemi hesangge yanani hilingirik nikharek mene andi inom, inomen, At ane andi eberogoat ili'logo, iluk, futfesukwa. Iren a'nogo hilingitunem hineilenggen isikhi lagep meneat he, hit enek he, hinobabut hebelarik futfigi'lek welagep yi ri!” iluk, yagaisasikhe.

”Ap ekhe anggur yabu kwalogo welagaukwa,” iluk, oba lirogo yagaisasikhe wene

³³ At Yesus nen wene a'nogo oba lirogo arat yagaisasikhesik he, ”Hobuk wene ekhe yi oba lirogo yagahisak. Ap ekhe anggweang eisewerek mene nen eabumo anggur awi yakfesikhesik he, leget wanhik, enggen perelogo amusu keralhi logogun oba kweang habulhik, ineilenggen logogun oba sasangge talhik, isikhesik he, ap ekhe kwalogo logouwageluk fisaluk he, o ekhema andoma lagaikhe.

³⁴ Lagaikhesik werek kwelek, enggen itunem palharek oba higit asi agaikhemo re, ap eabu eisewerek mene a'nogo nen, amingmingengge mene ekhe it ap kwalogo logouwageluk fisasikhe mene omanogo nen anggur enggen ekhe wogosuageluk, inoba lakfisa wagaikhe.

³⁵ Mene re, it ap kwalogo welagaukwa mene omanogo nen, ap anggweang eisewerek mene amingmingengge enggen wani wesuageluk lakfisa wagaikhe mene omanogo inebe fakfisaluk he, fena yei inoatik, fena inebe mondok inoatik, fena helep oba inoatik, isukwa.

³⁶ A'nogo hilingitukwama re, at ap anggweang eisewerek mene a'nogo nen he, attak he, inebe wenago hak lakfisa wagaikhesik, hobuk enek he, mondok hokhorogo lakfisa wagaikhe meneat he, attak hilingitukwa hagat hilinginafukwa.

³⁷ A'nogo hilingitukwama re, at ap kain a'nogo nen mel isikhe: Halok he, yogondak an nonggwarek namlogo yi nek he, inane agaukhogo hai warogo wanugun o, iluk anggasikhesik, amlogo a'nogoat lakfei wagaikhe.

³⁸ Lakfei wagaikhemo wagunem, it ap yabu kwalogo welagaukwa mene omanogo nen, ineilenggen yethasukwasik he, it-it ikhi logolik, ”Ap ari eisena obali'mo yabu eisewerek asigin mene a'nogo ebe waga a'li. Halok, yabu yi nirat eisewerek asuogen he, ebe wasuogo,” iluk,

³⁹ ebe fakfuluk yabumo nen leget enda'ma wulak fesukwasik, ebe mondok watukwa.

⁴⁰ A'nogo hilingitukwa andi nen, hobuk ap anggweang eisewerek andi wesimbik, it ap kwalogo welagaukwa mene andi ninggi'nogo hilinginabigin anggegep?” iluk yagaisasikhemo,

⁴¹ iren he, ”Ap anggweang eisewerek mene andi wesimbik he, it inobabut weak mene andoma mondok felelenghogo inoasimbik he, yabu anggur yabu andi kagalek logolik, enggen arat wurik agunem palogo wogosi laga logouwageluk he, ap hunogoat mene ekhe inayonggo fagain aro,” iluk yagatukwa.

⁴² A'nogo yagatukwama, at Yesus nen he, ”Hiren, Allah ane yi'nogo lisu palogo fesukwama enu salhi'lek welagep nogo? Iren he, It ap tukang o helep meneba wutarek mene nen o ebe wuti logolik, Helep yi weak, iluk herakfisasukwa mene andi obuleat ya'lagama o. A'nogo hilinglaga andi re, nineisena Allah Enupogot enat hilingite o, iluk nineilenggen hogosik he, Ohuk! iluk fogerati lago, iluk lisu palogo fesukwa mene andi enu salhi lagep lek nogo? Enu salhi lagebaro.

⁴³ Hit he, Allah nen awe a'ma hinobagau hagat welagagip meneat he, awe a'ma hinobagagin lego. We, hit hinobali'mo re, e enggen fano mene isu hak, it afuni inunggulenu hunogoat mene nen, Allah endawimo anggikherek mene higithogo hilingiti logogun mene halok inobagagin o.

⁴⁴ [Sa nen ebe pile helep andiba pi waga halok, ebe mondok wolelenggen tagalasigin o. Nen, helep andi sa oba sebeli waga halok he, ebe mondok alperelogo wasigin o,”] iluk,

⁴⁵ yagaisasikhemo, it ap Allah eisewerek inogogwi kaindek mene inom, it ap Farisi mene inom, inomen he, ”Wene oba lirogo ikhe andi, nit fagerat yaganisikhe higi,” iluk, futfesukwasik,

⁴⁶ Yesus ebe fakfouwogeluk isukwa meneat he, afuni inebe hokhorogo aren, ”At Yesus andi Allah ane yaganisikherek mene o,” iluk, agarek andi nen he, inailo nen herakfesukwa.