MATIUS 20 - Allah Wene Fano Wene Hupla Inane

”Ap ekhe yabu anggur yabumo hilingiti lagaukwa,” iluk oba lirogo yagaisasikhe wene

¹ At Yesus nen hobuk mel yagaisasikhe: ”Allah nen awe a'ma fisikhere'ma andoma emberek higit he, mel hangge. Ap kweang eisewerek mene ekhe eabu anggur yabumo hilingisuageluk ap heraginabik huberat yonggo wulifikhe.

² Wulifikhesik, ap inayonggo fesikhe mene inom wene mel yagaisasikhe: Hinenggi misigam faget hilingitep halok he, onggo uang inenggi misigam faget hilingitunem wogisagarek hagat hinebe lombok misiktek wokhisagain o, iluk yagaisasikhemo, iren he, ”Elok,” iluk yagatukwama re, at eabumo lakfisasikhe.

³ Lakfisaluk he, o mo yegelogo lagai wagaikhemo lagaikhe hak he, it ap ekhe hunogoat mene pasar andoma weat were'ma eilenggen isasikhe.

⁴ Isasikhesik he, ”Ap yi sani. Hit he, an neabu anggur yabumo andoma hinomat hilingisi lano o. Hilingisumo re, an nen onggo higithogoat wokhisagain o,” iluk yagaisasikhe.

⁵ A'nogo yagaisasikhemo it a'nogo lagaukwama re, ap kweang eisewerek a'nogo attak hilingitikhe hagat he, hobuk a'nogoat linggene jam 12 oba it ekhe inayonggo figik, hu'mokwe jam 3 oba it ekhe inayonggo figik, fikhi lagaikhe.

⁶ Hobuk o hubasigeluk ugu kwelek jam 5 wulifikhesik he, it ekhe weat mendek were'ma eilenggen isasikhesik he, ”Hit hubet enat weat mondok mendek welagep yi nenahalok,” iluk yagaisasikhemo re,

⁷ it ap omanogo nen he, ”Yabu ekhe wanuageluk ninayonggo figi'lek andi nen welago o,” iluk yagatukwa. A'nogo yagatukwama re, at ap eabu eisewerek a'nogo nen he, ”Halok he, hit hinomat an neabumo anggur yabumo andoma hilingisi lano o,” iluk inayonggo fesikhe.

⁸ A'nogo inayonggo fesikhemo lagaukwama, o arat hu'mo agaikhemo re, ap eabu eisewerek a'nogo nen, it ap omanogo yabu hilingitu kwelek kwelaginarek welagaikhe mene ekhe mel yagatikhe: Ap yabu hilingiri'lagwi mene omanogo wolisa lan o. Wagaikha halok he, it hobuk kwaga mene andi tak onggo wogisaluk he, it attak kwaga mene andi onggo hobuk wogisanogo, iluk yagatikhe.

⁹ A'nogo yagatikhemo, it hobuk jam 5 oba hilingisi lagaukwa mene omanogo tak wagaukwama re, onggo uang yabu inenggi misigam faget hilingitunem wogisagarek a'nogo mene misiktek wogisasikhe.

¹⁰ Nen, hobuk he, it attak hilingiti lagaukwa mene omanogo we, inendawimo nen, ”Nit hokhorogo hak oba loukhogo ekhe wo'nisagain o,” anggaluk wagaukwa meneat he, onggo uang a'nogo meneat misiktek-misiktek it ekhe attak wogisasikhe hagat wogisasikhe.

¹¹ A'nogo wogisugu kwelek he, it omanogo uang wanhi logolik inobabut uarek-puarek hilingiti logolik he, ap kain eabu eisewerek mene a'nogo mel yagatukwa:

¹² It hobuk wagaikha mene yi re, we, satu jam hangge endebat hilingiti lagaikha meneat he, nit huberat lagosik, mo aik ambik oba ninoba weak-peakhogo wanho mene ninom higirat wo'nisegen andi nenahalok, iluk yagatukwama re,

¹³ ap eabu eisewerek a'nogo nen, ap it mene ekhe mel yagatikhe: Nagore. An kwanirogo wokheti'lego. Onggo uang misiktek wokhisagain igimo re, io, iluk egep a'nogoat wokheti.

¹⁴ Halok, helaluk lan o. An nendawinggen enat it hobuk hilingiti lagaikha mene yi hat wokheti hagat wogisagain o, iluk

¹⁵ an nonggwarek eiseweregen igin mene nenat igi andi elo'lek anggegen? An nonggwaregen nendawi fanorogo wogisigi andi nen hat wene palhen, iluk yagatikhe.

¹⁶ A'nogo yagatikhe andi hak he, it hobuk mene andi attak asugun o. Nen attak mene andi hobuk asugun o,” iluk yagaisasikhe.

At Yesus nen, ”An noasugun o,” iluk, enggi pireba yagaisasikhesigen, hobuk ekhe yagaisasikhe wene

¹⁷ At Yesus nen a'nogo yagaisasikhesik at ebe o Yerusalem pigeluk he, at ane wanhi lagaukwa mene inebe 12 nen omanogo wolisasikhesik woginarek inalegenek ebekhalem pikhi logolik he, mel yagaisasikhe:

¹⁸ ”Nagoromi. Nit yogondak he, o Yerusalem pikhi lago. Arat pimbigen he, an abat ta'lasi wagagi a'nogo, aben yonggo lambik an nebe it ap Allah eisewerek inogogwi kaindek inom, it ap Allah ane lisu palek inelu mene inom, inenggiba nobagaumo, iren ap ekhe nen noasuageluk wene noba fogoin o.

¹⁹ Wene noba fembik he, it ap endakwe mene nen inane asegen yaganetik, yei lambisogengge noatik, imbik he, nebe eba mennobagambik noasuageluk wogisogoin o. Nen, arat noatunem, nenggi pire warek logombik he, henaganek he neisena Allah nen neluget nabigin o,” iluk, yagaisasikhe.

Yakobus Yohanes emberek, inagaisa nen Yesus oba ekhe kino yagatikhe wene

²⁰ At Yesus nen a'nogo yagaisasikhesik were'ma, at Zebedeus agwe nen eagwi woginarek Yesus oba wagaikhesik eindep awi yagaisogo hai wati logolik he, ”Nit ekhe kino yagahesuogeluk hoba wago,” iluk yagatukwama

²¹ aren he, ”Hat hendawimo ninggi'nogo anggegendigen egen,” iluk yagatikhemo, he a'nogo nen he, ”An neagwi pire ya re, afuni mondogat hat hawe a'ma inobagagin oba andoma hera'lu, at ekhe henggi ebekwe, nen ekhe henggi harekwe, kain logouwageluk he, menfisanogeluk yagaheti o,” iluk yagatikhe.

²² A'nogo yagatikhemo, at Yesus nen he, ”Hat kino yaganeten andi re, wene ebe honggorat logolik yaganeten o. An yi enggin ti enggin hilingnabugun andi re, hat a'nogo hilinghinabugun elok anggegen?” iluk u hak he: An nagai hinago nagain andi re, hit elok nogoin anggegep? iluk yagaisasikhemo, iren he, ”Elok nogoin aro,” iluk yagatukwa.

²³ A'nogo yagatukwama, at Yesus nen he, ”An yi enggin ti enggin hilingnabugun andi hak, hit a'nogoat hilinghinabugun meneat he, hat ekhe an nenggi ebekwe, nen ekhe nenggi harekwe ninom kain logouwogeluk, andi nek he, an nen menhinobagagin elo'lego. We, an neisena nen endamaren logouwageluk wenagaisogo fisasikhe meneat inobagagin o,” iluk yagaisasikhe.

²⁴ A'nogo yagaisugunem, it at agoromi fena inebe 10 nen mene inesanggo holhukwasik he, ina'mage it ap inebe pire oe agot emberek aremnogo inoba fesukwa.

²⁵ Ina'mage a'nogo inoba fesukwama re, at Yesus nen inebe mondogat andogosuageluk wolisasikhemo andogotukwama mel yagaisasikhe: ”It afuni endakwe mene inogogwi pemerintah mene nen wiik-weakhogo hilinginafik, nen it ap kaindek andi nen, set kwil-kwalhogo yagaisigik, agarek andi hinelu o”.

^26-28 Mene re, hiren it hilingitarek andi hak, a'nogo hilingiti logogun mondok lego. An abat ta'lasi wagagi a'nogo re, hit afuni nen lebe'niikhi logobagaigeluk wagagi lego. Athe, an nen hit lebethisikhi logolik, hit hinebe hele homago hak welagep mene andi, hinebe hokhorogoat fikhalhinabigeluk, anat noasuageluk wagagi andi. Andi hak he, hit ekhe sa nen, ”An inoe kain asigin,” anggikhe halok he, hinagorat asuak. Nen, hit ekhe sa nen, ”An he, nenu werek asigin,” iluk, anggikhe halok he, hinamingmingenggeat asuago, iluk yagaisasikhe.

Ap inebe pire ineilenggen mum mene higirinafikhe wene

²⁹ Yesus inom a'nogo hilingirik lagaukwasik he, o Yeriko nen wulifunem he, afuni mondok hokhorogo ombo'ne lop hundik lagaukwa.

³⁰ Lagunem he, ap inebe pire ineilenggen mum mene ebekhalem hurek were'ma, afuni nen he, ”Yesus weri'logo,” iluk isukwama inesanggo holhukwasik, inane hokhorogoat he, Yesus mel yagatukwa: ”Daud en tagongge mene Ninoe a! Hendawitninabin o,” iluk yagatukwama re, it afuni hokhorogo omanogo nen he, ”Hinane o,” iluk, wenagisasukwa.

³¹ A'nogo wenagisasukwa meneat he, it a'nogo nen inane hobuk hokhorogoat yagati logolik he, ”Daud en tagongge mene Ninoe a! Hendawitninabin o,” iluk yagatukwa.

³² Yagatukwama re, at Yesus ebe menlagaikhesik wolisasikhemo, wagaukwama re, mel yagaisasikhe: ”An nen ninggi'nogo hilinghinabuageluk yaganetep,” iluk heinok wogisasikhemo,

³³ iren he, ”Ninoe. Nit nineilenggen mum yi fano higitninabinogeluk yagaheto o,” iluk yagatukwa.

³⁴ A'nogo yagatukwama re, at Yesus nen endawirinafikhesik he, enggi ineilenggen oba fagisasikhemo re, aremnogoat fano agaukwasik, Yesus ombo'ne lagaukwa.