MATIUS 18 - Allah Wene Fano Wene Hupla Inane

Hit hinobabut yenggerugwi inobabut hangge asugun, isikhe wene

¹ Andi sambul he, at Yesus agoromi ane wanhi lagaukwa mene omanogo oba wagaukwasik he, mel yagatukwa: ”Allah awe a'ma fisikhere'ma andoma, kain enu werek he, sa logogin,” iluk yagatukwa.

² A'nogo yagatukwama re, aren yenggerek mage mene ekhe wolhasikhemo oba wagaikhemo re, it omanogo inanggele'ma menfikhi logolik he, mel yagaisasikhe:

³ ”Hit afuni yi re, hinebe hebelasimbik hinobabut yenggerugwi yi inobabut hangge hilinglasugun lek halok he, Allah nen awe a'ma fisikhere'ma andoma kugun mondok lego, iluk eberogoat yagahisigi.

⁴ Sa nen, an elo'lek mene, iluk obabut yenggerek yi obabut hangge endawinggen onggwaregen sebelfakhaluk logogin halok he, at andi Allah awe a'ma fisikhere'ma andoma kain enu werek logogin o.

⁵ Nen, sa nen yenggerek yi hangge an faget wanhe halok he, an nebeat wo'nabigin o,” iluk yagaisasikhe.

Afuni nen it ekhe weak hilingisuageluk inendawimo kagalharek wene

⁶ A'nogo yagaisasikhesik he, ekhe mel yagaisasikhe: ”Sa nen yenggerugwi magendek yi hangge endawinggen an noba himbirik were'ma obokhogo heraknobagauwageluk endawimo kagaligin oba an obokhogo heraknobagaikhe halok, at endawimo kagalhe mene andi helep hokho mene alonggopma kelogo i laut yenggele'ma enggen tulem andoma tamakhogo pelakfisamo fano o.

⁷ It afuni kweangma mene yoma, it ekhe nen an obokhogo heraknobagauwageluk inendawimo kagalumo mondok weak asugun andi nen, nendawilage. An obokhogo heraknobagauwageluk inendawimo kagalhi logogun meneat he, it inendawimo kagalugun mene andi, Allah nen mondok weagerinabigin werego.

⁸ Hinenggi nen a? Hineisogen a? Weagethinabu hak hilinglaga halok he, fena palogo lakfisaluk, fena nek logolik, ineluk mondok logogun oba andoma kumo fano o. Mene re, hinenggi hineisok andi wurat were'ma endu nagulagarek le'ma andoma lakhinobagaumo weago. Halok he, fena palogo lakfisano.

⁹ Nen, hineilenggen nen weagethinabu hak hilinglaga halok he, fena hemelogo lakfisaluk, hineilenggen fena nek logolik ineluk mondok logogun oba andoma kumo fano. Hineilenggen pireat were'ma endumo lakhinobagaumo weago. Halok he, fena hemelogo lakfisano,” iluk yagaisasikhe.

Wam domba longgo isikhe mene herasugun iluk oba lirogo yagaisasikhe wene

¹⁰ A'nogo yagaisasikhesik he, ekhe mel yagaisasikhe: ”Malaikat Allah pogoroba yonggo pelakfisa wagarek mene nen yenggerugwi yi hangge kwelaginarek logolik neisena eilhanem mondok welagaikharek andi nen he,” yenggerugwi andi hinendawimo nen sebelfisagubo.

¹¹ An abat ta'lasi wagagi a'nogo re, afuni nong ari'lagwi mene andi heragaisogo telinabigeluk wagagi o.

¹² Hinendawimo ninggi'nogo anggegep. Ap ekhe anggo domba ebe 100 nen were'ma, 99 enek tom oba lagaluk fano werek kwelek, misik ekhe longgo ikhe halok hobuk herasi logoin lek nogo? Herasi logoin aro.

¹³ Ap andi anggo arat herakhikhesigen, 99 welaga mene andi faget he, endawimo agaiyek endep hak asigin meneat he, misik longgo i laga mene andi ebe herasimbik enek he, endawimo mondok agaiyek hokhorogo asigin o, iluk eberogoat yagahisigi.

¹⁴ Andi hak he, hineisena pogoroba mene a'nogo mene anggikhi logolik, Yenggerugwi magendek andi higit ekhe longgo uageluk anggikherek mondok lego,” iluk yagaisasikhe.

Hinerugwi hinagaila'lak weak hilinginafunem komorinabugun wene

¹⁵ At Yesus nen a'nogo yagaisasikhesik ekhe mel yagaisasikhe: Hat ekhe herei hagaila'lak ekhe nen weak hilinghafe halok he, hat at oba lambik hemberek hinalegat logolik he, ”A'nogo hilingi-sugun elo'lego,” iluk fakhogoat komo'no. A'nogo komotunem esanggo holhe halok he, fakhogo legetfisambik hemberek fano asugun.

¹⁶ Meneat he, esanggo holhi'lek halok he, yi'nogo hilingisugun. Allah aneba lisu palogo fikhi logolik he, ”Wene inoba fouwogeluk halok, afuni ekhe inebe pire a, henagan a, weak hilingitunem ineilenggen haga mene nen, Eberogoat nineilenggen hogo,” iluk ugu halok eberogoat anggogoin, iluk isikhemo lisu palogo fesukwa andi nen he, afuni inebe pire hea? henagan hea, inayonggo fuluk hinom oba lano.

¹⁷ Lamo re, it andi inane esanggo holhi'legat halok he, Allah againafuri inebe andogorogo were'ma yagaisano. Yagaisamo re, it Allah againafuri inebe mondogat omanogo inane esanggo holhi'legat halok he, at andi hinerei hinagaila'lak meneat he, it uang pemerintah faget kino iluk wanharek mene inabit mene hangge enda'ma mene hilinglaga o, iluk anggano,” iluk yagaisasikhe.

Hilingisugun mene inom, hilingisugun lek mene inom faget isikhe wene

¹⁸ At Yesus nen a'nogo yagaisasikhesik he, ekhe mel yagaisasikhe: Wene ekhe yi yagahisak. Hiren he, kweangma yoma mene faget, ”A'nogo hilingisugun lek,” iluk wene palhep halok he, Allah pogoroba mene nen wene palhe hagat ugun o. Nen, hiren he, kweangma yoma mene faget, ”A'nogo hilingisugun he, fano,” iluk egep halok he, andi Allah pogoroba mene nen fano ikhe hagat ugun o,

^19-20 ”Nen, wene ekhe yi yagahisak. Hit hinebe pire a? Henagan a? An nenuba andogosugun halok he, an nebe hinanggele'ma andoma ninom logogun, andi nen he, hit hinebe pire mene nen kweangma yoma logolik, hinendawinggen misigat a'luk, hiren, ”Ekhe wo'nisan, iluk nena mene Allah kino yagasugun halok he, kino ugun mene andi an neisena pogoroba mene nen hinane esanggo holimbik he, wokhisagain aro,” iluk yagaisasikhe.

”Weak hilinghinafunem sebelogo herakfisikhi logogun,” iluk yagaisasikhe wene

²¹ At Yesus nen a'nogo yagaisasikhemo at Petrus oba wagaikhesik he, mel yagatikhe: ”Noe. An nagaila'lak ekhe nen weagetnafa halok he, wene andi ambumet figi'lek he, nenggi miren oba sebelogo legetfisagain nogo. Huli nenggi 7 ba nen sebelogo legetfisagain a? Elo'lega,” iluk yagatikhemo,

²² at Yesus nen he, ”Henggi 7 ba nek sebelogo legetfisagain fuk. Athe teng kobokhogo wenasu lek hagaro, weaget hobagagu kwelek honggoraphogo herakfisikhi logoino o”.

²³ Andi hangge re, Allah nen awe a'ma fisikhere'ma andoma emberek higit he, ap kain enupogot ekhe agarek agoromi nen fisogo welagaukwa mene wolisasikhe. An enek saburogo nobagagama a? It ekhe inoba palek werega, iluk enggi wenasigeluk wolisasikhemo wagaukwama re,

²⁴ agarek omanogo enggi wenatunem he, agoromi omanogo ekhe uang jutaan mondok hokhorogo oba palek welagaikhe mene oba waluk wagaukwa.

²⁵ Waluk wagunem, yethasikhe mene, aren onggo wogosigin he, elok legagaikhemo re, at ap kain a'nogo nen agoromi fena mene mel yagaisasikhe: Ap yi ebe inom, agwe inom, againafuri inom, agarek yi mene ti mene inom, mondok felelenghogo onggo palimbik he, onggo paligin mene andi an wo'nesi we'no, iluk yagaisasikhe.

²⁶ A'nogo yagaisugunem, at agot a'nogo nen eindep awi yagaisogo hai wati logolik he, mel yagatikhe: Noe. Hendawi neambik he, endebat logoino. Mondok wokhesigin aro, iluk yagatikhemo re,

²⁷ at kain a'nogo nen, at agot lebethugu mene a'nogo endawi agaikhesik he, ”Halok he, an nagarek hat hoba palek mene andi weat hat akhano,” iluk wene sebelogo legetfisasikhesik lakfesikhe.

²⁸ A'nogo lakfesikhemo re, at agot lebethugu mene a'nogo olulu wulifikhe hak he, at agailak ap kain a'nogo agot lebethugu mene ekhe, at wulifikhe a'nogo arupiah 1.000 mene endebat wogetikhe mene a'nogo oba palek were'ma emberek ambi agaukwa. Ambi agaukwasik ebe fakfesikhesik he, alonggop perelogo fisogo logolik ”Nagarek hoba palek werek a'nogo onggo wo'nom o,” iluk yagatikhemo re,

²⁹ at agailak a'nogo awe a'ma soma isikhesik hai wati logolik he, ”Nagailage. Hendawi neambik endebat po'logoino. Wokhesigin aro,” iluk yagatikhe meneat he,

³⁰ agailak a'nogo nen, ”Nabiro,” iluk ap andi oba palek mene onggo oan wogeti'lek werek kwelek, ap inenggi hele warogo fisagarek mene nen o inenggi hele warek fisagarek oba kwelakfembik logouwageluk wogisasikhe.

³¹ A'nogo hilingitunem, ap kwelakfesikhe mene andi agaila'lak fena nen ineilenggen hasukwasik inendawimo mondok weak agaukwasik, iren hobuk yonggo ap kain a'nogo wene mondogat yagasi wagaukwa.

³² Yagasi wagaukwama re, ap kain a'nogo nen ap andi wesuageluk isikhemo, wagaikhemo re, mel yagatikhe: Hat hobabut mondok weak yi ri! An nagarek hat hoba palek welaga mene re, hat hane helagaik ane yaganeti lagenma, ”Weat a'no,” iluk yagaheti anggigi.

³³ Meneat he, an hat nendawithafi andi hak, hat a'nogoat hagailak andi hendawira'len he, iluk yagatikhesik,

³⁴ a'mage nen he, ap a'nogo oba palek mene mondogat felelenghogo wogeti'lek werek kwelek he, it ap inenggi hele warek ferinarek welagaikharek mene omanogo nen yei wati logolik fisogo logouwageluk wogisasikhe.

³⁵ Andi hagat, hit hinerugwi hinagaila'lagen weaget hinabi'lagwi mene andi hinendawinggen enat sebelogo legetfisigi'lek halok he, an neisena pogoroba mene nen a'nogo hilinghinabigin aro,” iluk yagaisasikhe.