MATIUS 17 - Allah Wene Fano Wene Hupla Inane

Yesus tom oba lagasikhesik were'ma elokhonggen hunogoat hilinglagaikhe wene

¹ At Yesus nen a'nogo yagaisasikhesik he, hup inenggi 6 en nogo iluk, Petrus inom, Yakobus inom, agot Yohanes inom, inamu nek woginarek tom uan meneba lagasikhe. Lagasikhesik were'ma

² at ebe it ineilhanem, hunogoat hilinglaga logolik he, elokhonggen mo eil hangge hilinglagik, asu laberek mene kut mondok amulit hokhorogo hilinglagik isikhe.

³ A'nogo hilinglagunem, at agoromi aremnogo nen ineilenggen yethasukwa re, Musa inom, Elia inom, weinam agaukwasik Yesus inom weneane ugunem isasukwa.

⁴ A'nogo isasukwasik he, at Petrus nen Yesus mel yagatikhe: ”Noe. Nit o yoma fano welago higi. Haren elok anggegen halok he, yoma o sabu henagan hat faget ekhe, Musa faget ekhe, Elia faget ekhe wuthinobagagun o,” iluk yagatikhe.

⁵ A'nogo yagatunem aremnogoat, ohena kut mene sebelinabi wagaikhesik, Allah ane ohena a'nogo anggele'ma nen mel yagaisasikhe: ”Namlogo nendawi e, noba liok ikhe. At ane nek holek logoino o,” iluk ane pogoroba pelabi wagaikhemo,

⁶ At Yesus agoromi inom lagasukwa mene omanogo inesanggo holhukwasik, inailo nen he, ineindep awi yagaisogo inelokhe kweangma sagaum isukwasik were'ma

⁷ at Yesus inoba wagaikhesik he, inebe enggi fagisikhi logolik he, ”Hinailo lekhogo menla'ni o,” iluk yagaisasikhemo,

⁸ inot legeisogo ineilenggen yethasukwa re, it ekhe inom lek. We, at Yesus amu nek were'ma hasukwa.

⁹ A'nogo hilingi'luk he, tom oba a'nogo nen pi waga logolik, at Yesus nen mel yagaisasikhe: ”An abat ta'lasi wagagi a'nogo re, nebe noatunem wa'lasimbik were'ma, Allah nen neluget nafi'lek werek kwelek, an nebeba hilinglagunem hineilenggen neegep a'nogo afuni ekhe mondok yagaisagubo. We, hobuk Allah nen nelugetnafe halogen, yagaisagain o,” iluk komorinabik pi wagaikhe.

¹⁰ Komorinafikhemo, it agoromi omanogo nen he, mel yagatukwa: Halok he, it ap Allah ane lisu palek inelu mene omanogo nen he, ”Elia tak wesigin iluk ili'lagwi andi ninggi'nogo nen,” iluk heinok wanhukwama,

¹¹ At Yesus nen he, mel yagaisasikhe: ”Elia tak wesimbik he, aren yi hilingitik, ti hilingitik, tegeli wesigin, ili'lagwi andi, eberogoat meneat he,

¹² an wene eberogoat yagahisak. At Elia ebe arat wagaikhe meneat he, it afuni nen mondok futfigi'lek logolik he, a'nogo hilingisu inamolo nen, at ebe weagetfesukwa hagat, an abat ta'lasi wagagi a'nogo re, nebe a'nogo weagetnabugun aro,” iluk yagaisasikhemo re,

¹³ it agoromi omanogo nen he, mel isukwa: ”Andi re, at Yohanes ima pelaginafi lagaikhe mene a'nogo faget yaganisikhe o,” iluk futfesukwa.

Yesus nen munggwarengge obabut weak mene yenggerek ekhe endawimo kwisikhesik were'ma henegeisogo wulafikhe wene

¹⁴ A'nogo hilingi'luk he, afuni hokhorogo omanogo inoba pi wagaukwama re, ap ekhe Yesus oba wagaikhesik awe a'ma eindep awi yagaisogo hai wati logolik he, mel yagatikhe:

¹⁵ ”Noe. An namlogo yi hendawirasin o. Eil furuk fikhi logolik, ebe wa'lagik, eluk agik, hilingiti logolik, hundik-handigat endumo kwigik, i lagik, ikhi logolik weak mondok werek andi nen he,

¹⁶ hat hagoromi hane wili'lagwi mene inoba waluk wagi meneat he, iren hilingisu re, elo'legagama o,” iluk yagatikhe.

¹⁷ A'nogo yagatikhemo, at Yesus nen he, mel yagatikhe: ”Hit afuni o yogondak welagep mene yi re, hinendawinggen an noba eberogoat iluk himbiret figi'lek logolik nong akhikhi lagep yoma ri! An hit ninom nenggi miren oba logogun nogo. Hit yi'nogo hilingitu kwelek nafe morogo nenggi miren logogin,” iluk yagaisasikhesik he, ”Yenggerek ari an noba waluk we'ni o,” iluk yagaisasikhemo.

¹⁸ Yenggerek a'nogo waluk wagaukwama munggwarengge obabut weak mene endawimo were'ma Yesus nen wenagetikhemo henegeisogo wulifikhemo re aremnogoat fano agaikhe.

¹⁹ Fano agaikhemo re, it Yesus agoromi ane wanhi lagaukwa mene omanogo oba wagaukwasik inom inamunek logolik he, mel yagatukwa: ”Niren he, at munggwarengge obabut weak mene andi henegeisogo wulabugun elo'lek aga andi ninggi'nogo nen,” iluk oba heinok wokhasukwama,

^20-21 at Yesus nen he, ”Hit hinendawinggen furogo noba himbiret fikhi lagep lek andi nen o. Kibi-kibi enggen magenggelak mene feik lakfagarek andi hak, hinendawinggen an noba endebat enek himbiret fembik he, tom ari yagati logolik, Aroma nen higilogo ekhema andoma asi lan o, iluk yagasugun halok he, andoma nen ekhema andoma asi lagain aro. Hiren yi mene ti mene hilingisumo re, ekhe elok legagi'lek fano nek asigin, iluk eberogoat yagahisigi. Mene re, munggwarengge obabut weak mene yi hangge inendawimo were'ma re, sumburu ninggi'lek samban umo nek he, elok henegeisogo wulibigin o,” iluk yagaisasikhe.

Yesus nen, ”An noasugun aro,” iluk attak yagaisasikhesigen, hobuk yagaisasikhe wene

²² Hobuk he, at Yesus agoromi inom o Galilea andoma andogotukwasik logolik he, mel yagaisasikhe: ”An abat ta'lasi wagagi a'nogo re, aben yonggo lambik it ekhe inenggiba nobagaumo

²³ noasugun o. Noasumo, nebe warek he nenggi pire logombik o henaganek meneba Neisena Allah nen neluget nabigin o,” iluk yagaisasikhemo inendawimo mondok weak agaukwasik lagaukwa.

Yesus nen Allah awi wurik faget onggo uang fesikhe wene

²⁴ A'nogo hilingitikhesik, o Kapernaum wagaukwama re, it Allah awi wurik faget onggo uang kino iluk wanhi lagaukwa mene nen, at Petrus oba wagaukwasik he, mel yagatukwa: ”Hinoe Allah ane yagahisikherek mene andi nen Allah awi wurik faget onggo uang fagarek a'nogo mene ekhe fikherega? Lega,” iluk yagatukwama re,

²⁵ at Petrus nen he, ”Fikheregaro,” iluk yagaisasikhe. Yagaisaluk oloba kwisikhesik he, aren igi'lek werek kwelek, Yesus nen tak mel yagatikhe: ”Simon. Hat he, ninggi'nogo anggegen. It ap kweangma mene inenupogot andi faget, afuni sani nen uang fili'lagwi. Inonggwarek inagoromi nen fili'lagwi anggegen a? I a, athe, it hunogoat mene nen fili'lagwi anggegen a,” iluk yagatikhemo,

²⁶ at Petrus nen he, ”It ap hunogoat mene nen fili'lagwi o,” iluk yagatikhemo, at Yesus nen he, ”Halok he, it inonggwarek inagoromi andi nen he, fogoin lek higi.

²⁷ Mene re, iren inabiret ninobagainogo nen he, i yenggele'ma laluk ikan watarek mene hele a'nogo ima pelafunem attak wanigin mene a'naga henggimo waluk ambe langet fugunem he, uang ambelema were'ma hagain o. Halok he, andiat waganogo re, nit nemberek faget it ap andi wogisano o,” iluk yagatikhe.