MATIUS 16 - Allah Wene Fano Wene Hupla Inane

Ap Farisi mene nen he, ”Niren futhobagauwogen elalin mene ekhe hilingisin he,” iluk Yesus yagatukwa wene

¹ Wulibi wagaikhesik were'ma, it ap Farisi mene inom, it ap Saduki mene inom, Yesus obabut paluogeluk oba wagaukwasik, mel yagatukwa: ”Hat hebe heisena Allah pogoroba mene nen pelakhobagai wagaikhemo wagen halok he, niren futhobagauwogen nineilhanem elalin mene ekhe hilingisin he,” iluk yagatukwa.

² A'nogo yagatukwama at Yesus nen he, ”O mo hea i lagu kwelek, pogoroba o moba fikhe halok, hiren he, o hibi asigin, ikhi lagep anggigi.

³ Nen, ohealekwe o olokhe mum aga halok hineilenggen yethaluk he, andi meiso hokho mene nagain, iluk ikhi lagep andi. Pogot elokhonggen hineilenggen pene'luk he, ”A'nogo hilinglasigin,” iluk hinendawinggen wenggelek logolik, obabut enegat palu hinelu meneat he, yi mene ti mene o yogondak hilinglari'logo andi, hit hinelu asuageluk hilinglari'logo meneat he, futfigi'lek welagep yoma ri!

⁴ Hit afuni o yogondak welagep mene yoma re, hinobabut mondok weak hilingirik nikhi logolik, Allah hinom lomborogo welagi'lek yoma ri! A'nogo logolik, hiren he, ”Niren futhobagauwogen he, haren elalin mene ekhe hilingisin he,” iluk yaganeti lagep meneat he, an nebe futnobagauwageluk an nen elalin hunogoat mene ekhe hilingisigin mondok lego. We, at Yunus nen afuni ekhe futfouwageluk elalinat hilingitikhe andi hak enek an nen hobuk ekhe hilingitunem hineilenggen neogoin o,” iluk a'nogo yagaisasikhesik, it ap omanogo andoma herakfisaluk he, o ekhema lagaikhe.

”Ap Farisi mene inom Saduki mene inom inawene re, enggen sumburu roti mene fisuageluk elonggoma pelafarek andi hangge,” iluk yagaisasikhe wene

⁵ At Yesus agoromi ane wanhi lagaukwa mene omanogo inom i yenggelek a'nogo aik elikwe arat wulifukwasik, agoromi ineilenggen yethasukwa re, sumburu roti mene inonggot a'luk lagaukwama nen,

⁶ at Yesus nen mel yagaisasikhe: ”It ap Farisi mene inom, ap Saduki mene inom, enggen sumburu roti fisuageluk anggelekwe pelafarek andi hangge mene fisogo werek andiba weagethinabinogo iluk, hinebe hebelogo logoino o,” iluk yagaisasikhe.

⁷ A'nogo yagaisasikhemo, it-it ikhi logolik mel isukwa: ”Sumburu roti mene ekhe waluk wagi'lek andi nen ikhe higi,” iluk ugunem

⁸ at Yesus nen enegat futfisasikhesik he, mel yagaisasikhe: ”Hinendawinggen noba himbiret figi'lek welagep yi ri! Hit-hit ikhi logolik he, ”Sumburu roti mene lek, iluk ikhi lagep andi nenahalok?

⁹ Hinendawinggen furogo futfigi'lek yoma ri! Sumburu roti mene ebe 5 meneat he, ap inebe 5.000 mene nengga a'nogo hinonggot agep? A'nogo nenggasik tindelogo fagama, mul ugu mene miren elonggoma kwalogo fegep nogo.

¹⁰ Nen, ekhe sumburu roti mene ebe 7 meneat he, ap inebe 4.000 mene nenggasik tindelogo faga mene, mul ugu mene miren kwalogo fegep nogo. Hinendawimo futfigi'lek welagep?

¹¹ An nen sumburu roti mene faget yagahisigi lek meneat he, nenahalok futfigi'lek welagep. Enggen sumburu roti mene fisuageluk elonggoma pelafarek andi hak mene, it ap Farisi mene inom, Saduki mene inom, fisogo werek andi nen hinebe hebelogo logobagaigeluk yagahisigi o,” iluk yagaisasikhe.

¹² A'nogo yagaisasikhemo, it omanogo futfesukwasik he, mel yagatukwa: ”I o. Wene ikhe andi re, we, enggen sumburu roti fisuageluk elonggoma pelafarek andi mene faget yaganisikhe lek. At he, it ap Farisi mene inom, Saduki mene inom, inawene yagaisagarek mene a'nogo weagetninabinogo iluk, ninebe hebelogo logouwageluk yaganisikhe higi,” iluk futfesukwa.

At Petrus nen, ”Hat hebe Kristus aro,” iluk fakhogo Yesus yagatikhe wene

¹³ O andoma nen, at Yesus o sili Kaisarea ap Filipi nen hokhotfesikheba andoma lagai wagaikhesik he, at agoromi ane wanhi lagaukwa mene omanogo heinok wogisikhi logolik, mel yagaisasikhe: ”It afuni nen, an abat ta'lasi wagagi a'nogo an nebe faget ikhi logolik he, sa iluk ili'lagwi nogo,” iluk yagaisasikhemo,

¹⁴ iren he, mel isukwa: ”Afuni ekhe nen he At ebe re, Yohanes ima pelaginafi lagaikhe mene a'nogo igik, it ekhe nen he At ebe re Elia igik, it ekhe nen he At ebe re, Yeremia hea, ap Allah ane yagaisikhi lagaukwa mene omanogo ekhe hea, igik, ili'lagwi,” iluk yagatukwa.

¹⁵ A'nogo yagatukwama, at Yesus nen he, ”Iren a'nogo ili'lagwi meneat he, hit enek he, an nebe faget sa ikhi lagep nogo,” iluk yagaisasikhemo,

¹⁶ at Simon Petrus a'nogo nen he, ”Hat hebe re, Kristus Allah eluk mondok welagarek mene amlogo, nit telninabuageluk aren lakfei wesigin iluk abok yaganisasikhe a'nogo aro,” iluk yagatikhe.

¹⁷ A'nogo yagatikhemo, at Yesus nen he, ”Simon Yona amlogo nagore. Afuni nen yagahetama egen lego. We, an neisena pogoroba mene nen yagahetemo egen higi o. Halok he, hendawimo hagaiyek hikhi logoino.

¹⁸ Nen, ekhe inom yagahesik. Hat henu helep u hak Petrus o. Nen, helep isa yiba himbirogo re, an nagoromi andogorogo fisaluk o hak wurogo inobagagi halok he, at kweang a'ma eisewerek a'nogo nen ninghogo ferinarek logogin lego.

¹⁹ O Allah awe a'ma hinobagagin oba mene a'nogo kwe hutu mene enggen hat wokhesigin o. Haren kweangma yoma mene faget hilingisigin lek, iluk wene palhen halok he, pogoroba mene nen wene palhe hagat igin o. Nen, haren kweangma yoma fano hilingisigin iluk egen halok he, pogoroba mene nen ogo fano ikhe hagat igin o,” iluk Petrus yagatikhe.

²⁰ A'nogo yagatikhesik, agoromi omanogo mondogat mel yagaisasikhe: ”Hiren an nebe faget he, At andi Kristus, Allah nen telninabuageluk lakfei wesigin iluk abok yaganisasikhe a'nogo aro, iluk afuni ekhe mondok yagaisagubo,” iluk komorinafikhe.

At Yesus nen he, ”Yi wene ti wene noba fembik noasugun o,” iluk attak yagaisasikhe wene

²¹ Huli andi huli nen he, at Yesus nen agoromi ane wanhi lagaukwa mene omanogo at hobuk hilingisigin mene fakhogo mel yagaisasikhe: ”An o Yerusalem a'lima lagain welagi o. Lamo re, it ap inaluendek omanogo inom, Allah eisewerek mene inogogwi kaindek inom, Allah ane lisu palek inelu mene inomen, yi enggin ti enggin hokhorogoat hilingnabimbik nebe noasugun o. Noasumo, nebe warek nenggi pire logombik he, nenggi ekhe henaganek meneba re Allah nen neluget nabigin o,” iluk fakhogo yagaisasikhe.

²² A'nogo yagaisasikhemo at Petrus nen he, Yesus waluk ale'ma lagaikhesik he, mel yagatikhe: ”Hat wene egen andi hilinghabinogo nen he, Allah nen telhabuago,” iluk komotikhe.

²³ Komotikhemo, at Yesus elokhe hebekhogo Petrus kwelakhasikhesik he mel yagatikhe: ”Hat he, Iblis higi. Allah endawimo anggikherek higithogo ebeti'lek, we afuni nen anggagarek hak higithogo ebetfuluk nanggwe palhi lagen yi, nelokhoma yoma logogin lego. Hela lan o,” iluk yagatikhe.

²⁴ A'nogo yagatikhesik he, at agoromi ane wanhi lagaukwa mene omanogo ekhe mel yagaisasikhe: ”Ap sa nen an nombo'ne nikhi logoigeluk halok he, obabut onggwarek faget endawinggen tulem logolik hilingiterek mene andi, Nabit, iluk herakfisaluk, e nunggulik oba menfisaluk inoatarek mene andi meneat waluk nombo'ne nikhi logoigeluk wesuago.”

²⁵ Nen, ap sa nen onggwaregen, an nebe neluk logogin namolo, iluk ebe elele helagain halok he, wa'lasimbik nong akhagain o. Mene re, sa nen ebe elele heligi'lek An faget wa'laga halok he, ebe elele helagain o.

²⁶ Ap sa nen yi mene ti mene kweangma mene mondogat eise asigin meneat he, hobuk ebe eluk faget nong asigin halok, aren he, ”An ekhe elok saburogo fakhigi ugun nogo?” Mondok lego. Ebe nong asigin andi obali'mo re, nena mene oba oasigin nogo. Elo'lego.

²⁷ An abat ta'lasi wagagi a'nogo re, hobuk neisena fogeratu mondok welagaikharek andi hagat hilingla'luk, it malaikat Allah pogoroba nen yonggo pelakfisa wagarek mene omanogo ninom wesimbik, andi sambul he, afuni mondogat inobabut lombok hilingitarek mene higithogoat onggo wogisa wesigin o.

²⁸ Nen, hit mendek welagep yoma mene ekhe wa'lagi'lek logolik, an abat ta'lasi wagagi a'nogo kain nenupogot logoigeluk afuni mondogat nawe a'ma inobagai wagunem hineilenggen neogoinaro, iluk eberogoat yagahisigi, iluk yagaisasikhe.