MATIUS 15 - Allah Wene Fano Wene Hupla Inane

”Hinambu hinombalak hilingiti lagaukwa higithogo hilingiti lagep,” iluk yagaisasikhe wene

¹ A'nogo hilingitu were'ma, it ap Farisi mene fena inom, it ap Allah ane lisu palek inelu mene fena inom, o Yerusalem en Yesus oba wagaukwasik he, wene yi'nogo yagatukwa:

² ”It ap hat hagoromi hane wili'lagwi mene yoma nen, ninambu ninombalak hilingiti lagaukwa higithogo hilingiti'lek sebelogo herakfisaluk inenggibene sobalhi'lek sumburu nili'lagwi andi nenahalok,” iluk yagatukwa.

³ A'nogo yagatukwama, at Yesus nen he, ”Halok he, hit ogo re, Allah nen yi'nogo hilingi'no ti'nogo hilingi'no, iluk komotninafikhe wene sebelogo herakfisaluk, hinambu hinombalak hilingiti lagaukwa higithogo hilingiti lagep andi nenahalok.

⁴ At Allah nen ikhi logolik he, hineisena hinagaisalak agaugwerinafi logoino o, iluk isikhesik he, ekhe mel isikhe, ’Sa nen eisena agaisa abok weak palhe halok he, at andi ebe mondok wasugun o,’

⁵ iluk komotninafikhe meneat he, hiren he mel yagaisikhi lagep: Sa nen eisena hea, agaisa hea, yagaisikhi logolik he, ’An mene yi mene ti mene hat wokhesugun meneat he, Allah faget fisigimo o,’ iluk yagaisikhi logouwageluk yagaisikhi lagep andi.

⁶ A'nogo yagaisikhi lagep andi nen he, it a'nogo hilingitunem, it ineisena inagaisalak agaugwerinabi'lagwi lek andi o. A'nogo ikhi lagep andiba, hit hinambu hinombalak hilingiti lagaukwa wene andi fisogo logolik he, Allah ane sebelogo herakfisikhi lagep andi.

⁷ Hit hinagap oba nek fano hangge logolik hinendawinggen pire yi ri! At Yesaya nen Allah ane yagaisikhi logolik wene mel isikhe andi, hit faget higithogo isikhe higi:

⁸ ’Allah nen he, it afuni yoma re, we, inambeba nen an fogetnafi logolik, inendawinggen oba nen he an noba ebeti'lek ale'ma meneba ebesi lili'lagwi.

⁹ Wene afuni inane meneat he, an nen yagaisugu mene hakhogo yagaisili'lagwi andi nen he, we tulemat fogetnabi'lagwi o, iluk isikhemo, Yesaya nen lisu palogo fesikhemo werek andi, hit faget higithogoat isikhe,’ ” iluk yagaisasikhe.

”Afuni wene inendawimo nen kagalogo lagai wagunem agarek andi, weagerinaferek ebe andi aro,” iluk yagaisasikhe wene

¹⁰ A'nogo yagaisasikhesik he, hobuk at Yesus nen afuni hokhorogo omanogo wolisasikhemo wagaukwama re, ekhe mel yagaisasikhe:

¹¹ ”Wene igin yi hit futfobagaigen he, hinesanggo fanorogo holini o. Yi mene ti mene inambe nenggarek mene andi nen inebe weagerinaferek lego. Mene re, inambeba nen wene agarek andibaat weagerinaferego,” iluk yagaisasikhe.

¹² A'nogo yagaisasikhemo, at agoromi ane wanhi lagaukwa mene omanogo oba wagaukwasik he, mel yagatukwa: ”Wene yaganisegen a'nogo, it ap Farisi mene nen inesanggo holhasik he, ”At weak ikhe, iluk inabiret hobagaga andi futfisegen a? Lega,” iluk yagatukwa.

¹³ A'nogo yagatukwama at Yesus nen he, ”Yi mene ti mene an neisena pogoroba mene nen awi yati'lek mene halok he, mondogat henegeisogo lakfisagain aro.

¹⁴ Ineilenggen mum logoligat he, kwe lit haluk laga halok herakfisani o. At ekhe eilenggen mum mene nen, at ekhe a'nogo eilenggen mumat mene yagati logolik he, Kwe yi kwe lou o, iluk enggi fagaisogo waluk lagain halok he, emberegat foluksek i kalok wagane'ma pile hela pugun o,” iluk yagaisasikhe.

¹⁵ A'nogo yagaisasikhemo, at Petrus nen he, mel yagatikhe: ”Noe. Wene oba lirogo yaganisegen andi, ebe fakhogo yaganisan o,” iluk yagatikhe.

¹⁶ A'nogo yagatikhemo, at Yesus nen he, ”Hit ogo re, it hinom higirat wene andi oan futfigi'lek welageba?

¹⁷ Yi mene ti mene nunggunem, inambelekwe nen he pikhit inalabut elonggoma puluk, hobuk inamise wusi lagaikharek iluk, hit futfikhi lagep lega?

¹⁸ Mene re, wene inambeba nen wulafarek andi re, inendawimo nen kagalogo lagai wagarek andi nenat inebe weagerinaferego.

¹⁹ Inendawimo nen wene weak mene ebetik, afuni inoatik, hemi ap inagagwi mene pailak fakfisigik, helimenggerugwi pailak fakfisigik, yogot wanhik, ineranenat it ekhe wene inoba figik, inabok wiik-weakhogo palhik, agarek andi re, inendawimo nenat kagalogo lagai wagunem wulafarego.

²⁰ Wene inendawimo nen kagalogo lagai wagarek andi nen inebe weagerinaferek. Mene re, inenggibene sobalhi'lek sumburu nenggarek andi nen weagerinaferek lego,” iluk yagaisasikhe.

He o Kanaan mene nen endawinggen Yesus oba eberogoat iluk himbiret fesikhe wene

²¹ At Yesus nen wene a'nogo yagaisasikhesik he, o andoma hebisaluk o Tirus Sidon andoma lagai wagaikhe.

²² Lagai wagunem he, he ekhe o Kanaan andoma awiwerek mene Yesus oba wagaikhesik ane hokhorogo mel yagatikhe: ”Daud en tagongge mene noe. An neak helenggerek mene munggwarengge obabut weak mene endawimo kwikhesik weak werek. Halok he, hendawi nean o,” iluk yagatikhe meneat he,

²³ at Yesus nen onggo mondok yagati'lek kamo isikhemo re, it ap at ane wanhi lagaukwa mene omanogo wagaukwasik he, ”He yi ninombo'ne waga logolik ane mondok hokho ninoba sagalik weri'logo yi re, wele'ma hela loagen lakfisan o,” iluk yagatukwa.

²⁴ A'nogo yagatukwama, at Yesus nen he, mel yagaisasikhe: ”Allah nen it afuni Israel mene inebe re, wam domba longgo i lagarek andi hak werek andi nen, it enek isa lan iluk laknobagai wagama o,” iluk yagaisasikhe.

²⁵ A'nogo yagaisasikhemo werek kwelek, at he a'nogo Yesus oba wagaikhesik he, eindep awi yagaisogo hai wati logolik mel yagatikhe: ”Eigo! Noe. Fano higitne'nogeno,” iluk ane elagaik ane yagatikhemo,

²⁶ at Yesus nen he, ”Yenggerugwi inamburu mene telogo waluk, mene noageluk hugisamo elo'lego,” iluk yagatikhe.

²⁷ A'nogo yagatikhemo, at he a'nogo nen he, ”I Noe. Eberogoat egen meneat he, at amene eisewerek andi sumburu e meja talek oba nunggunem, enggen weagarogo kweangma pikhe halok he, mene andi nen ninggeregaro,” yagatikhe.

²⁸ A'nogo yagatikhemo, at Yesus nen he, ”He yi nerei e. Haren he, Aren higitnabigin, iluk hendawinggen noba mondok himbiret fegen andi nen he, hendawimo anggegen andi higithogo higithesigin o,” iluk ugu kwelek aremnogoat, eak a'nogo fano agaikhe.

At Yesus nen afuni hokhorogoat ou higirinafikhe wene

²⁹ Yesus nen a'nogo hilingitikhesik, o andoma nen pisikhesik, i Galilea yenggelek a'nogo esanggokwe laga lagaikhesik he, punuba lagaikhesik andoma hu'lagaikhe.

³⁰ Hu'lagaikhesik were'ma re, afuni inebe hokhorogo at oba waga logolik, ineisok wut warek mene inom, ineilenggen mum mene inom, inenggi ineisok hambelek mene inom, inane lek mene inom, it fena inoba ou mene hokhorogoat inom, woginarek Yesus oba wagaukwama re, aren fano higirinafikhe.

³¹ A'nogo higirinafikhemo re, it afuni omanogo inane lek mene houwak igik, inenggi ineisok hambelek mene fano agik, ineisok wut warek mene fano a'luk kwe lagik, ineilenggen mum mene fano a'luk yerisigik, ugunem ineilenggen hasukwasik he, ”Egi! Nit afuni Israel mene nineisena Allah andi re ninailo e,” iluk, fogeratukwa.

Yesus nen afuni hokhorogoat abenek inebe 4.000 nen sumburu sik-pikhogo wogisasikhe wene

³² A'nogo hilingitukwasik oba re, at Yesus nen at ane wanhi lagaukwa mene omanogo wolisasikhe. Wolisasikhemo wagaukwama re, aren he, ”Nagoromi yi sani. It afuni hokhorogo yoma re, ninom mondok logolik ninenggi henagan oba nogogosi'mo andi nen he, inamburu mondok legagama re, nena mene nogoin heat werek andi nen, nendawi nen nendawinggen heiselhe. Sumburu mondok ninggi'le'ma andi nen he, ebekwe lagunem ya koigik ta koigik lanogo iluk, an nen lakfisagain nabit hak,” iluk yagaisasikhemo re,

³³ at agoromi ane wanhi lagaukwa mene omanogo nen he, mel yagatukwa: ”O leimo afuni inawi wurik le'ma yoma afuni hokhorogo andogorek werek yoma sumburu roti mene inalabut ninghogo noageluk, ebe koma mene melagisogoin,” iluk yagatukwa.

³⁴ A'nogo yagatukwama at Yesus nen he, ”Hit sumburu roti werago mene miren fisogo welagep,” iluk heinok wogisasikhemo re, iren he, ”Lego. We, ebe 7 nen. Nen, ikan magendek mene we endebat enek werego,” iluk yagatukwa.

³⁵ A'nogo yagatukwama aren he, afuni hokhorogo andogorek welagaukwa mene omanogo kweangma hu'lasuageluk yagaisasikhe.

³⁶ Yagaisasikhesik he, sumburu roti mene 7 nen aremnogo inom, ikan aremnogo inom, enggim wanhikhesik, Allah hai warogo re, enggi nen sumburu roti mene aremnogo kurogo afuni hokhorogo omanogo sumburisoageluk, at agoromi ane wanhi lagaukwa mene omanogo wogisasikhemo, sumburisasukwa.

³⁷ Sumburisasukwama inalabut ninghogo nasukwasik he fena tindelogo fesukwama re, mul ugu 7 nen ambem peterogo kwalogo fesukwa.

³⁸ It sumburu nasukwa andi re, hemi yenggerugwi inom inenggi wenaginafi'lek. We, it ap inaluendek enek he, inebe 4.000 nen wenaginafukwa.

³⁹ Nen, sumburu nasukwasik he, at Yesus a'nogo afuni hokhorogo andogotukwa mene omanogo inawilokwe lombok lakfisaluk he, at ebe e so elema kwisikhesik warogo o Magadan wulibi wagaikhe.