MATIUS 1 - Allah Wene Fano Wene Hupla Inane

Yesus Kristus ambu-ombalak taginabik wagaukwa wene

¹ At Yesus Kristus Abraham en, Daud en, tagongge a'nogo ambu ombalak eroba nen taginabik wagaukwa mene inenu yi.

² At Abraham en Ishak tatik, Ishak en Yakub tatik, Yakub en Yehuda agoromi inom taginafik,

³ Yehuda nen he, he Tamar wanhikhesik he, ap Peres inom, Zerah inom, emberek taginafik, Peres nen Hezron tatik, Hezron en Ram tatik,

⁴ Ram en Aminadab tatik, Aminadab en Nahason tatik, Nahason en Salmon tatik,

⁵ Salmon en he, he Rahap wanhikhesik he, Boas tatik, Boas nen he, he Rut wanhikhesik he, Obed tatik, Obed en Isai tatik,

⁶ Isai nen he, ap Daud enupogot a'nogo tatik, a'nogo taginabik wagaukwa. Nen, andi nen he, at Daud en ap Uria agwe telogo waluk wulifikhesik he, Salomo tatik,

⁷ Salomo nen he, Rehabeam tatik, Rehabeam en Abia tatik, Abia nen Asa tatik,

⁸ Asa nen Yosafat tatik, Yosafat en Yoram tatik, Yoram en Uzia tatik,

⁹ Uzia nen Yotam tatik, Yotam en Ahas tatik, Ahas nen Hizkia tatik,

¹⁰ Hizkia nen Manasye tatik, Manasye nen Amon tatik, Amon en Yosia tatik,

¹¹ Yosia nen ap Yahudi mene o Babel woginarek lagaukwa andem higit, at Yekhonya agaila'lak inom taginabik, a'nogo taginabik wagaukwa.

¹² Nen, afuni Yahudi mene o Babel woginarek lagaukwama logolik he, hobuk at Yekhonya nen he, Sealtiel tatik, Sealtiel en Zerubabel tatik,

¹³ Zerubabel en Abihud tatik, Abihud en Elyakim tatik, Elyakim en Azur tatik,

¹⁴ Azur en Zadok tatik, Zadok en Akhim tatik, Akhim en Eliud tatik,

¹⁵ Eliud en Eleazar tatik, Eleazar en Matan tatik, Matan en Yakub tatik,

¹⁶ Yakub en Yusup he Maria agun a'nogo, tatik, he Maria nen he, Yesus, niren Kristus ikhi lago a'nogo tatik, eroba nen taginabik wagaukwa.

¹⁷ A'nogo taginabik wagaukwa andi re, ap Abraham ta'lagaikhe huli nen he, ap Daud ta'lagaikhe andi huliba inambu inombalak inebe 14 huli nen taginabik wagaukwa. Nen, Daud ta'lagaikhe huli nen he, afuni Yahudi mene woginarek o Babel lagaukwa andi huliba inambu inombalak 14 huli nen hobuk taginabik wagaukwaat. Nen, ap Yahudi mene o Babel woginarek lagaukwa huli nen he, Kristus ta'lagaikhe andiba, inebe 14 huli nen hobuk taginabik wagaukwaat andi.

Yesus Kristus ta'lagaikhe wene

¹⁸ At Yesus Kristus ta'lagaikhe andi ebe yi'nogo ta'lagaikhe. Agaisa Maria andi, ap Yusuf ebe wanhi'lek, we, wenago were'ma re, Allah Areagun en omalik a'mat fesikhe.

¹⁹ A'mat fesikhemo re, at Yusuf obabut fano andi nen he, endawimo nen, ”An he andi afuni ineilhanem herakfisamo enggali asinogo nen he, hinagaisogo herakfisagain,” iluk, anggikhi lagaikhe.

²⁰ A'nogo anggikhi logolik, hubanggo nogo ugunem he, at malaikat Allah pogoroba nen yonggo pelakfisa wagarek mene ekhe oba wagaikhesik he, mel yagatikhe: ”Yusuf Daud omba yi. Hat he, hele Maria andi wanigin nabit, iluk hendawimo anggagun o. Omalik andi Allah Areagun en at a'mat fikhemo. Halok he, wanin o.

²¹ Omalik andi ebe abat tasigin o. Tasumo re, aren oe agot weak hilingiri'lagwi mene korogo wokhambik telinabigin o, iluk enu Yesus salin o,” iluk yagatikhe.

²² A'nogo hilingisugun iluk he, nineisena Tuhan Allah nen he, ap ekhe attagat ayonggo fesikhemo wene yagaisikhi logolik he, lisu palogo fesikhe mene higithogoat hilinglasuageluk isikhe andi.

²³ At andi nen he: ”Hele silerik ekhe omalik a'ma asimbik he, eak abat takhagain o. Ta'laga halok he, nit ninaneba, Allah ninom welago, u hak, enu Imanuel ikhi logogun,” iluk lisu palogo fesikhe mene higithogoat hilinglagaikhe andi.

²⁴ Andi re, at Yusuf eluk agaikhesik, malaikat Allah nen lakfei wagaikhemo, abiba yagatikhe mene a'nogo higithogoat, agwe a'nogo wanhikhesik

²⁵ emberek nogo igi'lek were'ma, eak abat takhasikhemo re, enu Yesus salhikhe.