MARKUS 9 - Allah Wene Fano Wene Hupla Inane

¹ A'nogo yagaisasikhesik he, wene ekhe mel yagaisasikhe: ”Hit ninom mendek welagep yoma mene ekhe wa'lagi'lek logolik, Allah omamerogo awe a'ma fisugunem hineilenggen arat hogoin o, iluk eberogoat yagahisigi,” iluk yagaisasikhe.

At Yesus tom oba lagasikhesik were'ma elokhonggen hunogoat hilinglagaikhe wene

² At Yesus nen wene a'nogo yagaisasikhesik he, nogo inenggi 6 en iluk he, Petrus inom, Yakobus inom, Yohanes inom, inalegat woginarek tom uan ekheba lagasikhe. Lagasikhesik were'ma, at ebe it ineilhanem hunogoat hilinglagik,

³ asu elokhonggen hunogoat kut amulit hokhorogo hilinglagik, isikhe. A'nogo hilinglagaikhe andi, afuni kweangma yoma su sobalhu inelu mene nen sobalhunem amulit hilinglagarek hak lek. We, hunogoat amulit kurabelang hilinglagaikhe andi.

⁴ A'nogo hilinglagunem ineilenggen yethasukwa re, at Elia Musa emberek weinam agaukwasik Yesus inom wene ane ugunem isasukwa.

⁵ A'nogo isasukwasik, at Petrus nen he, Yesus mel yagatikhe: ”Noe. Nit o yoma fano welago higi. Halok, niren o sabu henagan, hat faget ekhe, Musa faget ekhe, Elia faget ekhe, wuthinobagagun o,” iluk yagatikhe.

⁶ A'nogo yagatikhe andi re, Petrus agaila'lak inom inailo agaukwasik he, aren wene ninggi'nogo u heat, futfigi'lek logolik yagatikhe andi.

⁷ A'nogo ugunem he, ohena sebelinabi wagaikhesik, at Allah ane ohena a'nogo anggele'ma nen, mel yagaisasikhe: ”An namlogo nendawinggen hundik mene ebe ari aro. Halok, at ane holek logoino o,” iluk yagaisasikhemo re,

⁸ it Petrus lak ineilenggen weak-weak nayo-hayo isukwa mene re, it ekhe inom le'ma. We, Yesus alegat enek were'ma hasukwa.

⁹ A'nogo hilingi'luk he, tom oba nen pi waga logolik, at Yesus nen he, mel yagaisasikhe: ”An abat ta'lasi wagagi a'nogo nebe noatunem wa'lasimbigen, hobuk neluk agi'lek werek kwelek, an nebe hilinglagunem hineilenggen neegep a'nogo, afuni ekhe mondok yagaisagubo. We, hobuk neluk agi halogen, yagaisogoin o,” iluk komorinabik, woginarek pi wagaikhe.

¹⁰ Komorinafikhemo re, wene inendawimo wanhukwa meneat he, it-it ikhi logolik mel isukwa: ”Noatunem hobuk neluk asigin iluk ikhe andi ninggi'nogo hilingisigin mene faget ikhe,” iluk wene ero herarik-herarik pi wagaukwa.

¹¹ A'nogo ilik pi waga logolik, Yesus oba heinok mel iluk wanhukwa: ”It ap Allah ane lisu palek eisewerek mene omanogo nen he, Elia tak wesigin o, iluk ili'lagwi andi ninggi'nogo nen nogo,” iluk heinok wanhukwa.

¹² Heinok wanhukwama, aren he, mel yagaisasikhe: ”At Elia tak wesimbik he, yi hilingitik ti hilingitik tegeli wesigin, ili'lagwi andi eberogoat meneat he, an abat ta'lasi wagagi a'nogo faget wene lisu yi'nogo palogo fesukwama werek: At ebe ninabit, iluk, herakfisaluk, yi enggin ti enggin mondok weak hilingisogo fogoin o, iluk lisu palogo fesukwama werek andi nena mene faget isukwa anggegep.

¹³ A'nogo isukwama werek meneat he, an nen ekhe yagahisak. At Elia ebe arat wagaikhe meneat he, at faget, ”Yi'nogo hilingisugun, iluk lisu palogo fesukwa higithogo it afuni nen a'nogo hilingisu inamolo nenat weagetfesukwa,” iluk yagaisasikhe.

Yesus nen munggwarengge obabut weak mene yenggerek ekhe endawimo kwisikhesik were'ma henegeisogo wulafikhe wene

¹⁴ Yesus nen wene a'nogo yagaisilik agoromi ane wanhi lagaukwa mene fena omanogo inoba pi wagaukwa hak he, afuni hokhorogoat inera'lu fena-fena andogorek logolik, it ap Allah ane lisu palek eisewerek mene omanogo inom wene palhunem ineilenggen isasukwa.

¹⁵ Ineilenggen isugunem he, it afuni hokhorogo omanogo nen ineilenggen aremnogoat isasukwasik he, Yesus fogerarik fungusegat hai wasi wagaukwa.

¹⁶ Hai wasi wagaukwama, at Yesus nen he, agoromi mel yagaisasikhe: ”Hit it hinom wene palhi lagep andi nena mene faget palhi lagep,” iluk yagaisasikhemo re,

¹⁷ it afuni hokhorogoat andogotukwa mene omanogo ap ekhe nen he, mel yagatikhe: ”Noe. An namlogo yi munggwarengge obabut weak mene endawimo kwikhesik logolik anenggut lugulugwi agama nen hoba waluk wagi o.

¹⁸ Munggwarengge obabut weak mene andi endawimo kuluk he, ebe kweangma tamakhogo pelafunem ambelekwe wesilagap peterogo aik himbirogo, enggi eisok ning pururumhogo wa'lari'logo. Andi nen he, hat hagoromi hane wanharek mene yoma nen henegeisogo wulabuageluk inayonggo figi mene re, iren ninggi'nogo henegeisogo wulabu heat hilinglaga,” iluk yagatikhe.

¹⁹ Yagatikhemo re, aren it afuni omanogo mel yagaisasikhe: ”Hit afuni o yogondak welagep mene yi re, hinendawinggen noba himbiret figi'lek welagep yi ri! An nafe morogo nenggi miren oba ninom logogun nogo. Yenggerek ari an noba waluk we'ni o,” iluk yagaisasikhemo oba waluk wagaukwa.

²⁰ Waluk wagaukwama re, munggwarengge obabut weak mene a'nogo eilenggen Yesus hasikhesik he, aremnogoat yenggerek a'nogo enggi eisok mondok ning pururumhogo hilingisogo tamakhogo kweangma pelafikhemo re, wesilagap ambelekwe wulibi wagu kwelek, ebe limbik-lambagengge hilingiti lagaikhe.

²¹ A'nogo hilingiti lagaikhemo re, at Yesus nen yenggerek a'nogo eisena oba heinok wanhi logolik mel yagatikhe: ”Yenggerek yi huli ki huli nen hilingite,” iluk isikhemo, aren he, mel yagatikhe: ”Huli ebe yenggerek oba nen hilingiterek mene aro.

²² At munggwarengge obabut weak mene andi nen, yenggerek yi ebe wasigeluk he, endumo kwelafik, ima pelafik, hundik-handigat masabetu welagarego. Mene re, haren elok hilingisigin halok he, hendawi asimbik ou ari higitnisan o,” iluk yagatikhe.

²³ A'nogo yagatikhemo re, at Yesus nen he, mel yagatikhe: ”Haren he, elok hilingisigin halok he, hilingisin, iluk yaganeten andi nenahalok. Afuni inendawinggen Allah oba eberogo himbiret fuluk yi mene ti mene elok hilingisigin enego,” iluk yagatikhemo,

²⁴ aremnogoat, yenggerek a'nogo eisena nen he: ”I noe. Nendawinggen fena Allah oba ebetirek meneat he, nendawinggen fena oba ebetirek lek andi re, haren hilingnabin o,” iluk ane hokhorogo yagatikhe.

²⁵ Yagatunem, afuni ekhe fungusek oba andogosi wagunem, at Yesus eilenggen yerisasikhesik he, munggwarengge obabut weak mene a'nogo wenagetikhe. Wenageti logolik he: ”Hat munggwarengge hobabut weak mene yi nen, yenggerek yi ane lugulugwit figik, esanggo tagumet figik, ikhi lagen andi, endawimo nen henegeisogo wulibi lan. Wulibi lambik he, hobuk endawimo kwi wesigin mondok lego, iluk yagaheti andi aro,” iluk wenagetikhemo re,

²⁶ munggwarengge obabut weak mene a'nogo ane hokhoat ilik-ilik yenggerek a'nogo endawimo kwisikhesik welagaikhe mene oak lei'leiget hikhi logolik henegeisogo wulifikhemo re, yenggerek a'nogo warek mene hangge hilinglagaikhemo, it afuni hokhorogo omanogo inendawimo nen wa'laga iluk, mel isukwa: ”Ebe wa'laga yi,” isukwa.

²⁷ A'nogo isukwa meneat he, at Yesus nen yenggerek a'nogo enggi fagaisogo menfesikhemo menlagaikhe.

²⁸ Menlagaikhemo re, at Yesus oloba kwisikhesik were'ma, at agoromi ane wanhi lagaukwa mene omanogo oba kwisukwasik, inom inalegat logolik he, mel yagatukwa: ”Niren he, at munggwarengge obabut weak mene andi henegeisogo wulabugun elo'lek andi ninggi'nogo nen,” iluk oba heinok wanhukwa.

²⁹ Heinok wanhukwama, aren he, mel yagaisasikhe: ”Munggwarengge obabut weak andi mene re, yiba walhigik, tiba walhigik, umo re, henegeisogo wulabigin elo'lego. We, sambanat umo nek he, elok henegeisogo wulibigin o,” iluk yagaisasikhe.

Yesus nen, ”An noasugunaro,” iluk attak yagaisasikhesigen hobuk yagaisasikhe wene

^30-31 A'nogo yagaisasikhesik, at Yesus nen wene agoromi ane wanhi lagaukwa mene omanogo nek, kwe o Galilea tonggokwe laga logolik yagaisilik lageluk, mel yagaisasikhe: ”Yesus a'nogo yi waga o, iluk, afuni ekhe inelu asinogo nen he, yagaisagup. Nabit,” iluk yagaisasikhesik, wene mel yagaisilik lagaikhe: ”An abat ta'lasi wagagi a'nogo re, aben yonggo lambik it ap ekhe inenggiba nobagaumo noasugun o. A'nogo noatunem he, nenggi pire warek logombigen, nenggi ekheba neluk asigin o,” iluk yagaisilik lagaikhe meneat he,

³² iren wene andi wongetfesukwasik he, heinok wokha inailo nen kamo isukwa.

Yesus agoromi nen, ”Kain he, hat nogo? An o,” igik, inane sagalik lagaukwa wene

³³ At Yesus nen agoromi wene a'nogo yagaisilik laga lagaikhesik he, o Kapernaum lagaukwasik oloba kwisikhesik agoromi omanogo yi'nogo yagaisasikhe: ”Hit he, kwe ebekwe waga logolik, wene nena wene palik wagep,” iluk heinok wogisasikhe. A'nogo heinok wogisasikhe mene re,

³⁴ it ebekwe laga logolik, ”Kain henuwerek, hat nogo? An o,” igik, inane sagalik lagaukwasik andi nen he, inane igi'lek kamo isukwa.

³⁵ Kamo isukwama re, at hu'lagaikhesik, agoromi inebe 12 nen omanogo, ”Horokhogo ya we'ni o,” iluk yagaisasikhemo wagaukwama re, mel yagaisasikhe: ”Hat ekhe it ap yoma inoe henupogot asigin hamolo halok he, inebe mondogat inagot asimbik inamingmingengge asigin o,” iluk yagaisasikhe.

³⁶ A'nogo yagaisasikhesik, yenggerek mage mene ekhe inanggele'ma tulem menfesikhesik he, agoumo wanhikhesik mel yagaisasikhe:

³⁷ ”Sa nen yenggerek yi hangge mene misigat ekhe an faget wanhe halok he, an nebeat wo'nabigin o. Nen, sa nen an nebe wo'nabigin halok he, an nebe wo'nabigin fuk. Neisena laknobagai wagaikhe mene a'nogo ebeat wanigin o,” iluk yagaisasikhe.

Yesus nen, ”Sa nen, nit wena'nisili'logo lek halok he, at ebe nit werekwe mene aro,” iluk yagaisasikhe wene

³⁸ A'nogo yagaisasikhemo at Yohanes nen he, mel yagatikhe: ”Yesus noe. Ap ekhe nit kilik ninom nikhi lago lek mene nen munggwarengge obabut weak mene afuni inendawimo kwisukwasik were'ma hat henu hombuk palogo henegeisogo wulakfisugunem nineilenggen hogosik he, at ebe nit ninom nikhi lago lek mene andi nen he, Hat a'nogo hilingitu lego, iluk wenageto,” iluk yagatikhe.

^39-40 A'nogo yagatikhemo, aren he mel yagatikhe: ”Sa nen nit wena'nisili'logo lek halok he, at andi nit werekwe mene aro, halok wenagesugun lego. Sa nen an nenu hombuk palogo hilingisu lek mene elalinat hilingisimbik he, lagakhogo an nabok weak palugun lego,” iluk yagaisasikhesik, ekhe mel yagaisasikhe:

⁴¹ ”An nane eberogoat yagahisak. It afuni ekhe nen he, it Kristus agoromi mene, iluk, i hinagaisogo wokhisogoin halok he, Allah nen onggo wogisagain mene andi, heligi'lek nong asugun nogo? Wogisamo helogoin aro,” iluk yagaisasikhe.

Afuni nen it ekhe weak hilingisuageluk inendawimo kagalharek wene

⁴² A'nogo yagaisasikhesik he, ekhe mel yagaisasikhe: ”Sa nen yenggerugwi magendek yi hangge misigat ekhe endawinggen an noba himbirik were'ma obokhogo herak nobagauwageluk endawimo kagaligin oba an obokhogo heraknobagaikhe halok, at endawimo kagalhe mene andi helep hokho mene alonggopma hele kelogo re, i laut yenggele'ma lakfiselepma fano o.

^43-44 Hinenggi nen weagethinabu hak hilinghinafe halok he, hinenggi fena palogo lakfisaluk, hinenggi fena nek logolik afuni ineluk mondok welagaikhare'ma andoma kumo fano o. Mene re, hinenggi wuthogoat were'ma, hinebe wea'ma, [endu nagulagi'lek soborenggen wa'lagi'lek inoba fikho mondok welagare'ma] andoma lakfisamo weak iluk, hinenggi fena palogo lakfisano.

^45-46 Hineisogen weagethinabu hak hilinghinafe halok he, fena palogo lakfisaluk, hineisok fena nek logolik afuni ineluk mondok welagaikhare'ma andoma kumo fano o. Mene re, hineisok wuthogoat were'ma hinebe endu nagul agi'lek soborenggen wa'lagi'lek inoba fugu mondok welagare'ma andoma lakfisamo weago, iluk, hineisok fenakwe palogo lakfisano.

^47-48 Hineilenggen nen weagethinabu hak hilinghinafe halok he, hineilenggen fenakwe hemelogo lakfisaluk fenakwe nek logolik Allah awe a'ma kumo fano. Mene re, hineilenggen wuthogoat logogun halok, wea'ma endu nagul agi'lek soborenggen wa'lagi'lek inoba fugu mondok welagare'ma andoma lakfisamo weak iluk, hineilenggen fenakwe hemelogo lakfisano o.

⁴⁹ Wam Allah ware'luk, mayu folharek andi hak, afuni inebe lombok Allah faget fano horek logouwageluk endu oba wurigerinabigin.

⁵⁰ Mayu andi fano meneat he, aik lek aga halok, nena meneba aik weregerasugun anggegep. Lego. Mayu andi hinendawimo fisogo logolik, afuni ekhe hinom lambukhogo logoino,” iluk yagaisasikhe.