MARKUS 8 - Allah Wene Fano Wene Hupla Inane

Yesus nen afuni hokhorogo ap enek inebe 4.000 nen sumburu sik-pikhogo wogisasikhe wene

¹ A'nogo hilingitukwama nen inenggi endebat ekhe welagaukwasigen, afuni hokhorogoat hobuk Yesus oba andogosi wagaukwa. A'nogo wagaukwasik sumburu mondok lek agaikhemo re, nena mene na heat hilinglagaikhe. A'nogo hilinglagaikhemo re, at Yesus nen agoromi ane wanhi lagaukwa mene omanogo wolisasikhemo wagaukwama re, mel yagaisasikhe:

² ”Nagoromi yi sani. It afuni hokhorogo yoma ninom ninenggi henagan oba nogo ogosi'mo andi nen inamburu mondok lek agama, nena mene nogoin heat hilinglagama werek andi nen he, nendawi nen nendawinggen heiselhe.

³ It sumburu weat inaiba lakfisamo, it fena inaiba yatma nen wagaikhasi'mo re, ebekhalem lagunem ya ko igik ta ko igik lanogo,” iluk yagaisasikhe.

⁴ A'nogo yagaisasikhemo at agoromi ane wanhi lagaukwa mene omanogo nen he, mel yagatukwa: ”O leimo afuni inawi wurik mondok le'ma yoma, it inebe hokhorogo yoma sumburu roti inalabut ninghogo noageluk, ebe koma mene waganogo melagisogoin. Elo'lego,” iluk yagatukwama re,

⁵ aren he: ”Hit sumburu roti miren fisogo welagep,” iluk heinok wogisasikhemo re, iren he: ”Lego. We, ebe 7 nen fisogo welago,” iluk yagatukwa.

⁶ A'nogo yagatukwama, aren he, afuni hokhorogo andogorek welagaukwa mene omanogo kweangma hu'lasuageluk yagaisasikhe. Yagaisasikhesik sumburu roti 7 nen aremnogo enggim wanhikhesik he, Allah hai warogo re, enggi nen sumburu roti mene aremnogo kurogo afuni hokhorogo omanogo sumburisoageluk, agoromi ane wanhi lagaukwa mene omanogo wogisasikhemo sumburisasukwa.

⁷ Sumburisasukwasik he, ikan magendek mene we, endebat ekhe welagaikhemo, Yesus wogetukwama, Allah hai warogo a'nogo sumburisoageluk yagaisasikhe.

^8-9 A'nogo yagaisasikhemo re, iren sumburisasukwama nen he, inalabut ninghogo nasukwa. Afuni inebe hokhorogoat inenggi wenagaisogo re, 4.000 hangge nasukwasik, ando tindelogo fesukwama re, Yesus agoromi nen mul ugu 7 nen kwalogo fesukwa. A'nogo hilingitukwama nen, Yesus nen afuni omanogo inawilokwe lakfisasikhe.

¹⁰ Lakfisasikhesik aremnogoat, Yesus agoromi ane wanhi lagaukwa mene omanogo inomat e soba kwisikhesik e so warogo o Dalmanuta wulibi wagaukwa.

Ap Farisi mene nen elalin mene ekhe hilingisuageluk Yesus oba kino yagatukwa wene

¹¹ At Yesus lak o Dalmanuta wulibi wagaukwama re, ap Farisi mene ekhe Yesus inom wene ane ikhi logolik obabut paluogeluk, oba wagaukwasik he, mel yagatukwa: ”Hat hebe Allah nen lakhobagai wagama wagen halok he, niren futhobagauwogen haren elalin mene ekhe hilingisin he,” iluk yagatukwa.

¹² Yagatukwama re, at ane agaukwak a'ma isikhesik he, mel yagaisasikhe: ”Hit afuni o yogondak welagep yoma nen ikhi logolik he: Niren futhobagauwogen haren elalin mene ekhe hilingisin he, iluk yaganeti lagep yoma re, nenahalok. An nane eberogoat yagahisak: Futnobagauwagaluk an nen elalin mene ekhe hilingisigin mondok lego,” iluk yagaisasikhe.

¹³ A'nogo yagaisasikhesik he, it afuni omanogo o andoma herakfisaluk e soba kwisikhesik he, e so warogo hobuk i aik eliba wulifukwa.

”Ap Farisi mene inom, Herodes inom, inawene re, enggen sumburu roti fisuageluk elonggoma pelafarek andi hangge,” iluk yagaisasikhe wene

¹⁴ I yenggelek a'nogo aik elikwe wulibuogeluk he, Yesus agoromi omanogo sumburu roti inonggora'luk misigat enek e so elema waluk wulifukwa.

¹⁵ Wulifukwasik he, Yesus nen komorinafi logolik mel yagaisasikhe: ”It ap Farisi mene inom, at Herodes inom, enggen sumburu roti fisuageluk elonggoma pelafarek a'nogo hangge werek andiba weagethinabinogo iluk, hinebe hebelogo logoino,” iluk komorinafikhe.

¹⁶ A'nogo komorinafikhesik he, it-it ikhi logolik, mel isukwa: ”Nit sumburu roti ninenggim lek andi nen ikhe higi,” iluk ikhi lagaukwama re,

¹⁷ at Yesus nen enegat futfisasikhesik he, mel yagaisasikhe: ”Hit-hit ikhi logolik, ”Nit sumburu roti ekhe lek andi nen ikhe,” iluk wene ikhi lagep andi nenahalok. Hit oan hinelu agi'lek futfigi'legat logolik, hinendawinggen kagale'lek nonghongsek welagep yoma ri!

^18-19 Hit he, hineilenggen werek meneat he, higi'legat, hinesanggo werek meneat he, holhi'legat, logolik ikhi lagep yoma ri! An nen sumburu roti ebe 5 nen kurogo afuni hokhorogoat 5.000 nen wogisigi a'nogo hinendawimo nen hinonggot ageba? Iren nenggasik tindelogo fagama mul ugu mene miren ambem peterogo kwalogo fegep nogo,” iluk yagaisasikhemo, iren he: ”12 nen kwalogo fogo anggigi,” iluk yagatukwama,

²⁰ aren he, ekhe mel yagaisasikhe: ”Nen, an nen sumburu roti ebe 7 nen kurogo afuni hokhorogoat 4.000 nen wogisigimo nenggasik tindelogo faga mene mul ugu mene miren ambem peterogo kwalogo fegep nogo,” iluk yagaisasikhemo, iren he, ”7 nen kwalogo fogo anggigi,” iluk yagatukwama,

²¹ aren he: ”Mene re, hit wene oan futfigi'lek welagep yoma ri!” iluk yagaisasikhe.

Yesus nen ap eilenggen mum o Betania nen mene fano hilingitikhe wene

²² Yesus agoromi inom wene a'nogo ilik-ilik he, o Betsaida wulifukwa. Wulifukwama re, it afuni o andoma mene nen he, ap ekhe eilenggen mum mene Yesus nen enggi fakhoageluk oba waluk wagaukwasik he, inane inelagaik ane yagatukwa.

²³ Yagatukwama re, aren ap andi enggi fagaisogo waluk o silimo nen leget endakwe wulifikhe. Waluk wulifikhesik he, wesi eilenggen oba fesikhesik enggi fakhikhi logolik mel yagatikhe: ”Yogondak heilenggen yi mene ti mene ekhe yethikhi lagen a? Lega,” iluk heinok oba wokhasikhemo re,

²⁴ at eilenggen yethasikhesik he, mel yagatikhe: ”Afuni lagunem isigi meneat he, e he a, anggigi,” iluk yagatikhemo re,

²⁵ at Yesus nen hobuk enggi eilenggen oba fakhasikhemo re, eilenggen tek isikhesik fano agaikhesik he, yi mene ti mene furogo hasikhe.

²⁶ Eilenggen furogo hasikhemo, at Yesus nen he, mel yagatikhe: ”O kota hobuk kwigi'lek pikhirat lan o,” iluk aiba lakfesikhe.

Petrus nen, ”Hat hebe Kristus aro,” iluk fakhogo Yesus yagatikhe wene

²⁷ A'nogo hilingitikhesik he, at Yesus agoromi ane wanhi lagaukwa mene omanogo inom, o andoma nen o kota Kaisarea ap Filipi nen hokhotfesikheba andoma era'lukwe o sili endep mene ekhe ebe lombok fa'larik louwogeluk lagai wagaukwa. Lagai waga logolik he, agoromi omanogo inoba heinok wanhi logolik he, mel yagaisasikhe: ”It afuni yoma nen, an nebe faget ikhi logolik he, sa ili'lagwi nogo,” iluk yagaisasikhemo re,

²⁸ iren he, mel yagatukwa: ”Afuni ekhe nen he, At ebe re, Yohanes ima pelaginafi lagaikhe mene a'nogo igik, it ekhe nen he, At ebe re, Elia igik, it ekhe nen he, At ebe re, ap Allah ane yagaisikhi lagaukwa mene omanogo ekhe igik, ili'lagwi,” iluk yagatukwa.

²⁹ A'nogo yagatukwama aren he: ”Iren a'nogo ili'lagwi meneat he, hiren he, an faget, sa anggikhi lagep nogo,” iluk yagaisasikhemo, at Petrus a'nogo nen he: ”Hat hebe re, Kristus nit telninabuageluk Allah nen lakfei wesigin iluk abok yaganisasikhe a'nogo aro,” iluk isikhemo re,

³⁰ aren agoromi mondogat yagaisikhi logolik: ”An nebe faget ikhe andi re, hiren afuni ekhe mondok yagaisagubo,” iluk komorinafikhe.

At Yesus nen he, ”Yi wene ti wene noba fembik noasugun o,” iluk yagaisasikhe wene

³¹ At Yesus nen a'nogo komorinafikhesik he, wene hobuk ekhe mel yagaisasikhe: ”An abat ta'lasi wagagi a'nogo re, it ap inaluendek inom, Allah eisewerek mene inogogwi kaindek inom, Allah ane lisu palek eisewerek mene inom, inomen an nebe inabit asimbik yi enggin ti enggin hokhorogoat hilingnabimbik, nebe noasugun o. Noasumo nebe nenggi pire warek logombik he, ekheba neluk asigin o,” iluk

³² agoromi omanogo fakhogo yagaisasikhemo re, at Petrus nen, Yesus ebe ale'ma waluk lagaikhesik he, mel yagatikhe: ”Ah! Haren a'nogo ugun o!” iluk komotikhemo re,

³³ at Yesus nen agoromi ane wanhi lagaukwa mene omanogo ekhe afe hebekhogo eilenggen yerisasikhesik he, Petrus mel iluk wenagetikhe: ”Hat Iblis higi. Allah endawimo anggikherek mene higithogo ebeti'lek, we, afuni nen anggagarek hak ebeti lagen yi ri! Hat hebe nelokhoma yoma logogun. Hela lan o,” iluk wenagetikhe.

³⁴ Wenagetikhesik he, afuni hokhorogo omanogo inom, agoromi ane wanhi lagaukwa mene omanogo inom, wolisasikhemo wagaukwama re, mel yagaisasikhe: ”At sa nen an nombo'ne nikhi logoigeluk halok he, obabut onggwarek faget hilingiterek mene andi, ”Nabit,” iluk herakfisaluk he, eba menfisaluk inoatarek mene andiat waluk he, an nombo'ne nikhi logoigeluk wesuago.

³⁵ Sa nen, ”An nebe neluk logogin namolo,” iluk ebe elele helagain halok he, wa'lasimbik nong akhagain o. Meneat he, sa nen, an nebe faget inom, fano wene yi faget inom, wa'lasigin halok he, ebe telagain o.

³⁶ A'nogo meneat he, sa nen, yi mene ti mene kweangma mene mondogat eisewerek asigin oba nen he. Ebe eluk mondok logogin mene a'nogo nong asigin halok, aren ikhi logolik, ”An ekhe elok saburogo fakhigi,” igin nogo? Mondok lego.

³⁷ Ebe nong asigin andi, obali'mo nena mene oba awasigin nogo. Elo'lego.

³⁸ Afuni yoma inobabut weak logolik Allah ebe inom lombokhogo welagi'lek, yi weak ti weak hilingiri'lagwi mene andi hinomat logolik, it ineilhanem sa nen, ”An Yesus agot, igik, an nane andi yagaisigik, u re, ambe enggali halok he, an abat ta'lasi wagagi a'nogo hobuk neisena fogeratu mondok welagaikharek hak hilingla'luk, it malaikat Allah onggwarek faget yonggo pelakfisa wagarek mene omanogo ninom wesimbik he.