MARKUS 7 - Allah Wene Fano Wene Hupla Inane

”Hinambu hinombalak hilingiti lagaukwa higithogo hilingiti lagep,” iluk yagaisasikhe wene

¹ Hobuk he, it ap Farisi mene inom, it Allah ane lisu palek eisewerek mene ekhe inom, o Yerusalem en Yesus oba andogosi lagai wagaukwa.

² Lagai wagaukwasik logolik, it Yesus agoromi ane wanhi lagaukwa mene omanogo ekhe, afuni inenggibene sobalharek andi hak sobalhi'lek sumburu hesanggeat nunggunem he, ineilenggen isasukwa.

³ Ineilenggen a'nogo isasukwa andi re, afuni Farisi mene inomat, Yahudi mene ekhe inomat, inebe mondogat he, inambu inombalak inawene fisogo logolik, inenggibene sobalhi'lek sumburu nogoin mondok lek, iluk ikhi logolik ineilenggen isasukwa andi.

⁴ Wene a'nogo fisogo logolik, yi mene ti mene onggo palogo waluk wagaikharesik he, inebene sobalhi'lek sumburu nenggarek mondok lek. Ekhe re, wene attagat mene andi fisogo logolik he, iwak endep-endebengge mene sobalhik, hokhondek mene sobalhik, iwak ekhe alek mene sobalhik, agarek andi.

⁵ A'nogo agarek andi nen he, it Farisi mene inom, Allah ane lisu palek eisewerek mene inom, inomen, Yesus mel yagatukwa: ”Yesus. It ap hat hagoromi hane wili'lagwi mene yoma nen, ninambu ninombalak hilingiti lagaukwa higithogo hilingiti'lek hesanggeat hilingiti logolik inenggibene sobalhi'lek sumburu hesanggeat nili'lagwi andi nenahalok,” iluk yagatukwa.

⁶ A'nogo yagatukwama, aren he, mel yagaisasikhe: ”Hit hinagap oba nek fano hangge, hinendawinggen pire logolik hilingiti lagep andi faget he, at Yesaya nen Allah ane yagaisikhi logolik, wene mel isikhe andi re, hit faget higithogo isikhe higi: Allah nen he, It afuni yoma re, we, inambeba nen an fogetnafi logolik, inendawinggen an noba ebeti'lek yatma eberik lili'lagwi.

⁷ Wene afuni inane meneat he, an nen isigi mene hak yagaisili'lagwi andi nen he, we tulemat an fogetnabi'lagwi o, iluk isikhemo Yesaya nen lisu palogo fesikhemo werek andi, hit fagerat isikhe o.

⁸ Wene a'nogo isikhe hagat, wene Allah nen komotninafikhe wene a'nogo sagalogo hebisaluk he, afuni inawene ninghogo fisogo welagebo,” iluk isikhe.

⁹ A'nogo yagaisasikhesik, wene ekhe mel yagaisasikhe: ”Hit hinendawinggen mondok kagalek yi nailo e! Hinambu hinombalak hilingiti lagaukwa mene andi ninghogo fisogo logouwogeluk he, wene Allah nen komotninafikhe wene andi sebelogo herakfisikhi lagep andi fano higi,” iluk inenggali watikhe.

¹⁰ Inenggali watikhesik he, wene ekhe yagaisikhi logolik, mel isikhe: ”At Musa nen he hineisena hinagaisalak agaugwerinafi logoino o,” iluk isikhesik he, ekhe mel isikhe: Sa nen eisena agaisa abok weak palhe halok he, at andi ebe mondogat wasigin o, iluk komotninafikhe meneat he,

¹¹ hiren he, mel yagaisikhi lagep: At ekhe nen eisena hea, agaisa hea, yagati logolik, ”An nangge yi mene ti mene hat wokhesu meneat he, Allah faget fisigiri'mo iluk u hak, Ibrani ninaneba, korban iluk yagaisikhi logouwageluk yagaisikhi lagep andi re,

¹² hobuk ineisena inagaisalak wogisogoin mene wogisogoin lek iluk wene palu hagat ikhi lagebo.

¹³ A'nogo ikhi lagep andiba, hinambu hinombalak hilingiti lagaukwa wene wanhigipsik he, Allah ane sebelogo herakfisikhi lagep andi. Andi hak, wene ekhe hokhorogoat hilingiti lagep mene werek aro,” iluk yagaisasikhe.

”Afuni wene inendawimo nen kagalogo lagai wagunem agarek andi, weagerinaferek ebe andiat,” iluk yagaisasikhe wene

¹⁴ At Yesus nen, wene a'nogo yagaisasikhesik he, hobuk afuni hokhorogoat omanogo wolisasikhemo wagaukwama, ekhe mel yagaisasikhe: ”An wene igin yi, hit mondogat futfobagaigen he, hinesanggo fanorogo holini o.

¹⁵ Afuni re, yi mene ti mene inambeba nen inalabutmo pelafarek mene andi nen, weagerinaferek he lego. Wene inendawimo nen kagalogo lagai wagunem agarek mene andi nek he, weagerinaferego.

¹⁶ Hinesanggo holugun halok he, fanorogo holhi logoni o,” iluk yagaisasikhesik,

¹⁷ afuni hokhorogo omanogo enda'ma fisaluk, at Yesus oloba kwisikhemo re, at agoromi ane wanhi lagaukwa mene omanogo nen he, mel isukwa: ”Wene oba lirogo yaganisegen andi, ebe ki mene faget yaganisegen,” iluk oba heinok wanhukwa.

¹⁸ Heinok wanhukwama re, aren he, mel yagaisasikhe: ”Hit ogo re, it hinom higirat wene andi futfigi'lek welageba? Yi mene ti mene inambema kwelafu halok inalabutmo pelafunem weagerinabigin lego, iluk futfigi'legat welagep higi.

¹⁹ Nenggarek mene andi re, inendawinggenma kwikherek lek. We, pikhit inalabut elonggoma puluk he, inamise inom pikhit wusi lagaikharego,” iluk isikhe andi, yi mene ti mene hesanggeat ninggi logogun. Wesa lego, iluk isikhe andi.

^20-22 Wene a'nogo yagaisikhi logolik, ekhe mel yagaisasikhe: ”Wene inendawimo nen kagalogo lagai wagunem wulafarek andi nenat inebe weagerinaferego. A'nogo inendawimo nen weak mene ebeti logolik hilingitarek he, yi: helimenggerugwi pailak fakfisigik, yogot wanhik, afuni inoatik, ap inagagwi mene pailak fakfisigik, inendawimo nen, afuni ekhe inagarek mene an mene nek logoilep, iluk anggigik, yi weak ti weak ekhe hilingitik, lalinafik, inenggali lek hilingitik, wene palhik, inabok wiik-weakhogo palhik, inonggwaregen fogerakhigik, inendawinggen lek hilingitik, agarek andi.

²³ Yi weak ti weak andi, mondogat inendawimo nen kagalogo lagai wagunem wulafarek andi nenat inebe weagerinaferego,” iluk yagaisasikhe.

He Siro-Fenisia mene endawinggen Yesus oba himbiret fesikhe wene

²⁴ At Yesus nen wene a'nogo yagaisaluk o andoma nen he, o Tirus lagai wagaikhesik oloba kwisikhesik, afuni mel yagaisasikhe: ”It ekhe inonggot logouwagen he, ”At wagasik, ebe o andoma werek, iluk yagaisagubo. An nabit,” iluk wene palhikhe meneat he, ebe ninggi'nogo hinago logou heat hilinglagaikhe.

^25-26 A'nogo hilinglagaikhemo were'ma, at he ekhe eak munggwarengge obabut weak mene endawimo kwisikhesik were'ma, Yesus abok aremnogoat esanggo holhikhesik he oba wagaikhe. He andi re, ebe Yahudi mene lek, we awi ero Siro-Fenisia andoma mene, Yesus awe a'ma eindep awi yagaisogo hu'lasi wagaikhesik he, mel yagatikhe: ”An neak munggwarengge obabut weak mene endawimo kwisikhesik weregen, haren henegeisogo wulakfisanogen iluk hayonggo wagi o,” iluk yagatikhe.

²⁷ Ayonggo fesikhemo at Yesus nen he, mel yagatikhe: ”Sumburu re, yenggerugwi tak inalabut ninghogo nogoin. Yenggerugwi inamburu mene wilik he, mene noageluk wogosugun elo'lego,” iluk yagatikhe.

²⁸ A'nogo yagatikhemo, at he a'nogo nen he, mel yagatikhe: ”I noe. Eberogoat egen. Mene re, yenggerugwi nen sumburu e meja talek oba ninggi logolik enggen weagarogo nen pelakfugunem he, mene meja a'ma logolik ninggeregaro,” iluk isikhemo re,

²⁹ at Yesus nen he, mel yagatikhe: ”Hane higit egen andiba nen, munggwarengge obabut weak mene heak endawimo nen he, arat henegeisogo wulifemo werek andi. Halok haiba lan o,” iluk yagatikhe.

³⁰ A'nogo yagatikhemo, at he a'nogo aiba lagaikhesik kwisikhemo re, munggwarengge obabut weak mene eak endawimo nen henegeisogo wulifikhemo re, nogo ikherek oba wengik fano were'ma ha lagaikhe.

At Yesus nen ap ekhe esanggo tagum logolik anenggut lugulugwi mene fano higitikhe wene

³¹ A'nogo hilingitikhesik he, hobuk he, at Yesus o Tirus andoma nen lagokhogo o Sidon kwe wagaikhesik he, o andoma nen o enu kota 10 nen wurik elikwe yethigik, yikwe yethigik, tulemkwe nen i Galilea yenggele'ma pisikhe.

³² Pisikhemo re, it afuni andoma mene nen he, ap ekhe esanggo tagum mene anenggut lugulugwi mene oba waluk wagaukwasik enggi fakhoageluk inane inelagaik ane Yesus yagatukwa.

³³ Yagatukwama re, afuni hokhorogoat andem fisaluk ap esanggo tagum mene a'nogo ale'ma waluk lagaikhe. Waluk lagaikhesik he, at Yesus enggi tum ap a'nogo esanggo elema te'metfuluk he, wesi enggiba yugulogo ap a'nogo ameliba fesikhe.

³⁴ A'nogo fesikhesik eilenggen pogoroba liakhasikhesik he, ambenguluk, nit ninaneba: ”Hane inom, hesanggo inom hu'lasuak,” u hak he, it inaneba: ”Efata,” iluk yagatikhe.

³⁵ A'nogo yagatu kwelek aremnogoat, esanggo a'nogo houwak igik, anenggut lugulugwi a'nogo higit agik, isikhesik he, ane fano isikhe.

³⁶ Ane fano agaikhemo re, at Yesus nen afuni omanogo yagaisikhi logolik he ”Hiren afuni ekhe mondok yagaisagubo,” iluk hobugalep komorinafu kwelegat he, iren hobuk inane ebenagaik hokhorogo yagaisikhi lagaukwa.

³⁷ A'nogo yagaisugunem he, iren hokhorogo fogerati logolik he, mel ikhi lagaukwa: ”Aren, yi mene ti mene fano nek hilingiti logolik, afuni higirinafunem he, inesanggo tagum mene hutik, inesanggo holhik, inane lek mene inane fano agik, ili'lagwi andi nailo e!” iluk hokhorogo fogeratukwa.