MARKUS 6 - Allah Wene Fano Wene Hupla Inane

Afuni o Nasaret mene nen, Yesus inendawimo nen inabiret fesukwa wene

¹ Hobuk he, at Yesus o andoma nen wulifikhesik he, onggwarek awi eroma lagaikhe. Lagunem he, agoromi ane wanhi lagaukwa mene omanogo ombo'ne lagaukwa.

² Lagaukwasik he, inenggi sabit oba Allah faget weat logolik, o afuni Yahudi mene samban agarek oba inebe hokhorogoat were'ma inoba kwisikhesik, wene yagaisasikhe. Yagaisugunem, it inebe hokhorogoat omanogo nen he, mel isukwa: ”Egi! Nailo e. Ap yi a'nogo hilingirik nikho andi re, koma nen yanggulhesik hilingiri'logo. Endawimo mondok kagalek andi, wene nena wene endawimo logolik yaganisili'logo. Enggi fagisugunem elalinat hilinginabi'logo andi, ninggi'nogo hilinginabi'logo.

³ At ebe re, he Maria eak o wuterek mene a'nogo lek? Agoromi ombo'ne mene re, Yakobus inom, Yoset inom, Yudas inom, Simon inom anggigi. Nen, erugwi re, nit ninom welago yoma lek?” iluk inendawimo inabiret fesukwa.

⁴ Inendawimo inabiret fesukwama, at Yesus nen he mel yagaisasikhe: ”It ap Allah ane yagaisagarek mene andi re, o yi awi ti awi lagunem, afuni ekhe nen agaukhogo yagaisagarek meneat he, o inonggwarek inaiba eroma lagunem it inogogwi inagaila'lak inom, inaiba misi'mo welagaikharek mene inom, iren enek he, agaukhogo yagaisagarek lego,” iluk yagaisasikhe.

⁵ A'nogo hilingitukwa andi nen, at Yesus o andoma logolik elalin mene ekhe hilingiti'lek kamo isikhe. We, afuni ou inoba mene inebe endebat enek enggi fagisasikhesik higirinafikhe.

⁶ Higirinafikhesik he, it afuni andoma mene nen at ebe inendawimo futfesukwa lek andi faget, at endawimo nen, ”Eige! nailo e,” iluk anggasikhesik he, hobuk o andoma silikwe ya kwigik ta kwigik wene yagaisilik nikhi lagaikhe.

Yesus nen, ap inebe 12 nen inayonggo fesikhesik lakfisasikhe wene

⁷ A'nogo yagaisilik nikhi logolik he, ap inebe 12 nen omanogo wolisasikhemo wagaukwama re, inebe pirendek wurethigik lakfisageluk inayonggo fisasikhesik he, munggwarengge obabut weak mene afuni inendawimo kuluk were'ma henegeisogo wulakfisilik loageluk at omame wogisasikhe.

⁸ Wogisasikhesik komorinafi logolik he, mel yagaisasikhe: ”Hit he, kwe henengge mene faget yi mene ti mene ekhe mondok waluk lagubo. We, sige tomuk enek waluk lano. Waluk laga logolik, sumburu inom, kwe henengge kino ilik su kwalugun mene inom, uang inom, ekhe mondok wanhubo.

⁹ We, hineisok oba sandal enek igisogo laga logolik he, hinebeba su pirendek labeti'lek misiktek laberogo lano,” iluk yagaisasikhesik ekhe mel yagaisasikhe:

¹⁰ ”Afuni inoba lambik he, o ya kwigik, ta kwigik, kwikhi logogubo. We, kugun oba andomaat logombik he, o ekhema louwogeluk halok andoma nenat wulibi wesimbik lano o.

¹¹ It afuni o ekhe nen hinebe wokhinafik, hinane holhik, igi'lek halok he, o andi nen wulibi waga logolik he, it o andoma mene inendawimo futfouwageluk he, hineisok a'makwe kweang ogoilong terogo herakfisaluk wulibi we'no,” iluk komorogo lakfisasikhe.

¹² It omanogo a'nogo lakfisasikhemo laga logolik he, afuni mel yagaisilik lagaukwa: ”Hit weak hilingiti lagep mene andi herakfisaluk hinobabut hebela'ni o,” iluk yagaisilik nikhi logolik,

¹³ munggwarengge inobabut weak mene hokhorogoat afuni inendawimo kuluk were'ma henegeisogo wulakfisigik, ou inoba welagaukwa mene inebe hokhorogoat enggen amusu inunggul oba pelagaisogo higirinabik, lagaukwa.

Yohanes ima pelaginafi lagaikhe mene a'nogo ebe watukwa wene

¹⁴ Yesus agoromi nen a'nogo hilinginabik lagunem he, at Yesus enu afuni o yi awi ti awi andoma inelu agaukwasik abok ugunem, at kain enupogot Herodes esanggo holhikheat. A'nogo ugunem it afuni ekhe nen he, mel ikhi lagaukwa: ”Yohanes ima pelaginafi lagaikhe mene ebe watama wa'laga a'nogo eluk agasik nikho higi. A'nogo eluk agasik andi nen he, hilingisu lek mene elalinat hilingirik nikho andi,” igik,

¹⁵ nen, it ekhe nen he: ”Lego. Andi at Elia ebe aro,” igik, it ekhe nen he: ”Lego. It ap attak Allah ane yagaisikhi lagaukwa mene nen yagaisikhi lagaukwa hagat yagaisilik nikho andi re, at ebe it andi mene ekhe weinam agasik nikho,” igik, ebe Yesus meneat a'nogo ikhi lagaukwa andi.

¹⁶ A'nogo ugunem abok at Herodes esanggo holhikhesik he, mel isikhe: ”Lego. At Yohanes ima pelaginafi lagaikhe mene a'nogo alonggop tekhogo watimo wa'laga a'nogo hobuk eluk agasik nikho andi aro,” iluk isikhe.

^17-18 A'nogo isikhe andi re, fageat at Herodes nen agot Pilipus agwe enu Herodias andi wanhikhemo re, at Yohanes nen he, mel yagati lagaikhe: ”Haren hagot agwe wanu lek mene wanhen andi waganek logogin elo'lego,” iluk, hobugalep enggali warogo yagati lagaikhe andi nen, aren ap inayonggo fesikhemo Yohanes ebe fakfei lagaukwasik waluk wagaukwasik he, enggi hele warogo o inenggi hele warogo fisagarek oba kwelakfesukwa.

^19-20 Kwelakfesukwama were'ma re, at he Herodias nen Yohanes ane yelogo fesikhesik, at Herodes nen wasuageluk endawimo kagalhi lagaikhe meneat he, at Herodes endawimo nen he, mel anggikhi lagaikhe: ”At Yohanes ebe Allah nen lakfei wagaikhemo logolik obabut higit hilingiri'logo,” iluk obabut palogo ebe agaugwerati logolik wasigin elo'lek agaikhemo, ebe elele waganogo fisogo welagaikhe. Fisogo logolik, ane holhi logou amolo nen holhi lagaikhe meneat he, holhi logolik, menenei hokhorogo ebeti lagaikhe.

²¹ A'nogo ebetu were'ma re, at Herodes ebe ta'lagaikheba higit asi wagaikhemo re, pesta hokho isago nouwogeluk, agoromi pemerintah mene kaindek inom, ap tentara inogogwi inom, ap inenuwerek o Galilea tonggwe mene inom, inom isago nouwogeluk inayonggo fesikhemo andogotukwa andi sambul, at he Herodias endawimo nen he, ”An nen Yohanes ane yue yelogo fuluk wasuak anggikhi lagi a'nogo fanoasuak yiba wasuak,” iluk anggasikhe.

²² A'nogo anggasikhesik, pesta hilingiti logolik seni isago nunggunem, at eak silerik mene kwelakfesikhemo kwisikhesik endawi ouwak foinak lenggakhogo lagagik, pigik, fano mondok watikhemo, at Herodes ebe inom, ap kwisukwa mene omanogo inom, inendawimo inagaiyek agaukwa. Inendawimo inagaiyek agaukwasik at kain enupogot Herodes andi nen he, mel yagatikhe: ”Haren nena mene kino yaganeten halok wokhesigin aro.

²³ O yoma an kain logolik ferinarek welagimo re, haren, ”Yi mene namolo, egen halok he, heirogo minggilogo fenakwe wokhesigin aro,” iluk Allah enu hombuk palogo yagatikhe.

²⁴ Yagatikhemo re, at hele silerik a'nogo wulifikhesik agaisa oba lagaikhesik mel yagatikhe: ”An nen nena mene kino ik,” iluk yagatikhemo re, aren he, mel yagatikhe: ”At Yohanes ima pelaginaferek mene a'nogo unggul palogo wokhesuagen he, kino yaga'no,” iluk yagatikhe.

²⁵ A'nogo yagatikhemo re, aremnogoat, at kain enupogot a'nogo oba lagaikhesik he, mel yagatikhe: ”Neisena, at Yohanes ima pelaginaferek mene a'nogo unggul palogo lemesak oba earogo yogondak yaat wo'ne'nogo. An andiat namolo,” iluk yagatikhemo,

²⁶ at kain Herodes a'nogo endawimo mondok weak agaikhe. A'nogo weak agaikhe meneat he, ”An nen nagoromi ninom seni isago ninggi logolik ineilhanem, Allah enu hombuk palogo eberogoat wokhesigin o, iluk abok yagatiri'mo re, herakfisagain lek. Wogosigin aro,” iluk endawimo anggasikhe.

²⁷ A'nogo anggasikhesik, ap tentara mene afuni inenggi hele warek ferinarek welagaukwa mene ekhe mel yagatikhe: ”Yohanes ima pelaginaferek mene a'nogo alonggop tekhogo wasimbik unggul palogo waluk we'no,” iluk lakfesikhe. Lakfesikhemo re, o inenggi hele warek fisagarek oba lagaikhesik he, Yohanes ebe alonggop tekhogo watikhesik unggul palhikhe.

²⁸ Palhikhesik, ungguloak palek lemesak oba earogo hele silerik a'nogo wogosi wagaikhe. Wogetikhemo aren he, agaisa wogosi lagaikhe.

²⁹ A'nogo hilingitukwama, afuni nen he, ”Yohanes a'nogo watama warek werek,” iluk isukwama, it Yohanes agoromi ane wanhi lagaukwa mene omanogo inesanggo holhukwasik ebe warek a'nogo wani wagaukwasik he, omoula warek fisagarek oba fei lagaukwasik were'ma nen, at Herodes en Yesus abok holhikhesik, ”Yohanes eluk agasik nikho higi,” iluk isikhe andi.

Yesus nen afuni inebe 5.000 mene sumburu sik-pikhogo wogisasikhe wene

³⁰ It ap Yesus nen inayonggo fesikhesik lakfisasikhe mene omanogo inambotkwe at oba andogosi wagaukwasik he, mel yagatukwa: ”Niren yi'nogo hilingito, ti'nogo hilingito. Wene yi'nogo yagaisogo, ti'nogo yagaisogo,” iluk mondok pilingisogo yagatukwa.

³¹ A'nogo yagatunem, afuni hokhorogo andoma lagik, wagik, ugunem he, sumburu ninggi'nogo na heat hilinglagaikhemo re, at Yesus nen agoromi mel yagaisasikhe: ”Set endebat halok walobagaigen he, o afuni inebe le'ma ninale'ma kenghogo louwogo,” iluk yagaisasikhe.

³² A'nogo yagaisasikhesik he, at ebe inom inalegat e so warogo, o afuni inebe le'ma lagaukwa.

³³ Lagunem he, it afuni hokhorogoat ineilenggen yerisaluk he: ”It a'nogo andi higi,” iluk futfisasukwa. Futfisasukwasik he, it inawi sili lombok mondogaren i aik ebene fungusek attagat inelokhoma andogosi lagaukwasik were'ma, it Yesus lak omanogo hobuk lagaukwa.

³⁴ Lagaukwasik he, at Yesus e so elema nen inoba wulifikhesik, eilenggen afuni hokhorogo omanogo yerisasikhesik endawirinafi logolik, mel isikhe: ”It yoma wam domba konharek hak, ap kon inabu mene inebe legen werek yi, nendawilage,” iluk yi wene ti wene hokhorogoat yagaisasikhe.

³⁵ Yagaisugu kwelek, o liok isikhemo re, at agoromi ane wanhi lagaukwa mene omanogo oba wagaukwasik he, mel yagatukwa: ”Nit o yoma afuni inebe le'ma werek kwelek, o arat liok ikhe yi.

³⁶ Halok he, afuni yoma re, inamburu inonggwarek faget onggo paloagen o yoma esanggokwe o sili hokhokwe endepkwe lakfisan o,” iluk yagatukwa.

³⁷ A'nogo yagatukwama, at Yesus nen he, ”Hirenat melagisani o,” iluk yagaisasikhemo, iren he, mel yagatukwa: ”Eige! Afuni nen yabu inenggi misigamat faget hilingitunem, inenggi onggo wogisagarek andi hangge mene, niren uang perak mene ebe 200 nen waluk he, sumburu roti onggo palogo afuni yigini'mo elok melagisoageluk ikhi lagen? Elo'lego,” iluk yagatukwa.

³⁸ A'nogo yagatukwama, aren he, mel yagaisasikhe: ”Hit sumburu roti mene miren werek. Hineilenggen kwelakhani o,” iluk yagaisasikhemo re, it ineilenggen kwelakhasukwasik he, ”Sumburu roti mene 5 nen. Nen, ikan he, pire,” iluk yagasi wagaukwa.

³⁹ Yagasi wagaukwama, aren he mel yagaisasikhe: ”Afuni yoma inebe pumbuk muli fanoma aroma enggi palhigik hu'larik loagen yagaisani o,” iluk agoromi yagaisasikhemo re,

⁴⁰ iren afuni hokhorogo omanogo yagaisasukwama inebe enggi palik lagaukwa. Enggi palek ekhe re, afuni inebe 100 nen, nen, enggi palek ekhe re, 50 nen, enggi palik lagaukwa andi.

⁴¹ A'nogo arat hu'larik lagaukwama re, at Yesus nen sumburu roti mene 5 nen aremnogo inom, ikan pire aremnogo inom, enggim wanhikhesik he, eilenggen pogoroba liakhasikhesik, Allah hai warogo roti aremnogo kurogo re, agoromi ane wanhi lagaukwa mene nen afuni hokhorogo omanogo sumburisoageluk wogisasikhe. Nen, ikan pire aremnogo a'nogoat it mondogat sumburisoageluk kurogo wogisasikheat.

⁴² Sumburisasukwama re, it inebe mondogat inalabut ninghogo nasukwa.

⁴³ A'nogo nasukwasik he, roti minggilik fena inom, ikan fena minggilik inom, tindelogo fesukwama re, Yesus agoromi nen andogorogo mul ugu mene 12 nen ambem peterogo kwalogo fesukwa.

⁴⁴ Sumburu roti mene nasukwa andi re, ap enek he, inebe 5.000 nen nasukwa.

Yesus eisok i agum ebene filik wagaikhe wene

⁴⁵ A'nogo arat nasukwama nen he, at Yesus nen at agoromi ane wanhi lagaukwa mene omanogo mel yagaisasikhe: ”An afuni hokhorogoat yoma lakfisagen he, hit tak e so elema kwimbik he, i aik elikwe o Betsaida wulifi logoni o,” iluk ane ninghogo yagaisasikhe.

⁴⁶ A'nogo yagaisasikhemo, wulibi wagu kwelek, at Yesus nen it afuni omanogo arat lakfisaluk he, at samban igeluk punuba lagasikhe.

⁴⁷ Lagasikhesik he, at alegat punuba werek kwelek, at agoromi omanogo e so warogo i yenggelek a'nogo tulem asi wagaukwa hak, o arat hubagaikhe.

⁴⁸ O hubagaikhesik he, hubanggo re, sogoi inelokhe kwe nen funha lagaikhemo re, it e so aninirogo watunem, Yesus eilenggen yerisa wagaikhe. Eilenggen yerisa wagaikhesik he, o hil mogolhu kwelek, at eisok i agum ebene filik lagaikhesik inoba wagaikhesik he, inera'lukwe kwanirogo pikhit wesigeluk hak isikhe.

^49-50 A'nogo ugunem he, it mondogaren at eisok i agum ebene filik wagunem ineilenggen yethaluk munggwat healuk ina'manggen lagaukwasik inailo nen inane ngai-wai isukwa. A'nogo ugunem aremnogoat, at Yesus nen he, mel yagaisasikhe: ”Nagoromi, hina'manggen lagup. An nebeat waga lagi. Halok, hinailo agubo,” iluk yagaisasikhe.

⁵¹ A'nogo yagaisasikhesik he, e so elema inoba kwisikhemo re, sogoi a'nogo palagaikhe. Palagaikhemo, iren he: ”Egi! Nailo e,” iluk hokhorogo fogeratukwa.

⁵² A'nogo fogeratukwa andi re, attak roti sik-pikhogo wogisasikhe a'nogo futfigi'lek inendawimo puk logolik, hobuk sogoi palagaikhemo fogeratukwa andi.

Yesus nen afuni o Genesaret mene ou higirinafik he wene

⁵³ A'nogo hilingitikhesik, at Yesus lak o Genesaret, i yenggelek a'nogo aik yikwe wulibi wagaukwasik he, e so a'nogo e telogo hele homagaisogo fesukwa.

⁵⁴ E telogo fuluk wulibi wagunem aremnogoat, it afuni andoma mene nen Yesus ebe arat futfesukwa.

⁵⁵ Futfesukwasik he, fungusek o yi awi ti awi andoma lagaukwasik he, it ekhe nen: ”Yesus o andoma werek,” iluk, ugunem inesanggo holfuluk, afuni inoba ou mene e yerogo Yesus oba woginarek waga lagaukwa.

⁵⁶ At Yesus ebe o sili hokhoma kwigik, endepma kwigik, igawila kwigik, ugunem he, it afuni nen it ekhe inoba ou mene woginarek o silimo fisa waga lagaukwa. Fisa wagunem iren he, ”Yesus, hasu we wurep enek ninenggi fakhogoin o,” iluk inane inelagaik ane yaga'luk, iren at asu inenggi fakhugunem inebe mondogat inoba fano aga lagaukwa.