MARKUS 5 - Allah Wene Fano Wene Hupla Inane

Ap Gerasa mene munggwarengge obabut weak mene endawimo kwisikhesik were'ma, Yesus nen henegeisogo wulakfisasikhe wene

¹ A'nogo fogeratukwama, at Yesus agoromi inom i enu Galilea yenggelek a'nogo aik eliba afuni o Gerasa mene inaiba wulifukwa.

² Wulifukwasik he, at Yesus e so elema nen aik oba wulifunem andemat, ap ekhe omoula afuni warek fisagarek oba nen wulibi wagaikhesik, Yesus oba wagaikhe. Ap andi munggwarengge obabut weak mene endawimo kwisikhesik.

^3-4 Afuni warek fisagarek oba mondok were'ma, afuni ekhe nen hundik-handik hele posiemanggen heleba enggi hele homatik, eisok hele homatik, homati lagaukwa meneat he, enggi hele tekhogo lakfisigik, eisok hele fikhalogo lakfisigik, ugunem he, hobuk yi hele ti hele posiemanggen hele inomat walhasukwasigen, nena mene heleba homasu heat hilinglagaikhemo, ebe fakfuluk sa nen fisogo logouheat elo'lek aga lagaikhe.

⁵ A'nogo logolik, linggene hundik, hubanggo hundik, afuni warek fisagarek oba kwigik, punubene lagik wagik, ikhi logolik he, ane ngai-wai ikhi logolik, onggwaregen helep oba tung-tanghogo warugunem amep suluk-sulukhogo warikhi lagaikhe.

⁶ A'nogo hilingiti lagaikhe mene, Yesus lagaikhe andi sambul, ebe yatma andoma logolik, eilenggen Yesus yethasikhe. Eilenggen yethasikhesik he, at oba fungusek wagaikhesik, eindep awi yagaisogo,

^7-8 ”Yesus Allah Enupogot amlogo yi, ninggi'nogo hilingnabigeluk wagen,” iluk yagatikhemo, at Yesus nen he, ”Munggwarengge hobabut weak mene yi, ap yi endawimo nen henegeisogo wulibi lan o,” iluk yagatunem, at a'nogo ane hokhorogo ikhi logolik, ”Eige. Nabire. Allah oage. Weagetnafun,” iluk ane hokhorogo isikhe.

⁹ Ane hokhorogo isikhemo re, at Yesus nen he: ”Hat henu sa,” iluk heinok oba wanhikhemo re, aren he, mel yagatikhe: ”Ninebe hokhorogoat welago andi nen he, nenu esa hokhorogo u hak, nenu Legiun,” yagatikhe.

¹⁰ A'nogo yagatikhesik he, Yesus nen it munggwarengge inobabut weak mene andi o andoma nen yatma lakfisanogo iluk, ane liokhogo Yesus yagatikhe.

¹¹ Andi sambul o andoma tom alema wam hokhorogoat inamisang wanhi lagaukwa.

¹² Wanhu were'ma, it munggwarengge inobabut weak mene omanogo nen he, Yesus mel yagatukwa: ”Nit wam elonggoma kwalasi louwogen, andoma lakninobagain o,” iluk inane liokhogo yagatukwa.

¹³ A'nogo yagatukwama, aren he, ”I o. Lani,” isikhemo re, it munggwarengge inobabut weak mene omanogo henegeisogo wulibi lagaukwasik, wam elonggoma kwalasi lagaukwama re, wam hokhorogo omanogo kat oba andoma nen lurogo pisukwasik he, i yenggele'ma i lagaukwa. Wam i lagaukwa andi re, inebe 2.000 hangge mondok hokhorogoat i lagaukwa.

¹⁴ I lagaukwama re, it wam kwalogo welagaukwa mene inailo agaukwasik fungusek yonggo afuni o sili hokhoma yagaisigik, endepma yagaisigik, yagaisilik lagaukwa. Yagaisilik lagaukwama re, it afuni nen he: ”Ninggi'nogo hilinglagama nen aga,” iluk, ineilenggen houwogeluk Yesus oba wagaukwa.

¹⁵ Wagaukwa re, ap attagat munggwarengge inobabut weak mene esa hokhorogo endawimo kwisukwasik welagaukwa mene a'nogo, ebe hebelagaikhesik, asu laberogo hurek were'ma ineilenggen hasukwasik, inailo agaikhe.

¹⁶ Inailo agaikhemo re, it afuni ekhe wene a'nogo hilinglagunem ineilenggen hasukwa mene nen he, mel yagaisasukwa: ”Ap yi munggwarengge obabut weak mene endawimo kwisikhesik welaga a'nogo yi'nogo hilingite. Nen, wam omanogo ti'nogo hilingite,” iluk wene pilingisogo yagaisasukwa.

¹⁷ A'nogo yagaisasukwama, iren he, mel yagatukwa: ”Yesus. Hat hebe nit were'ma yoma logogin lek. Ale'ma lan o!” iluk inane liokhogo yagatukwa.

¹⁸ Yagatukwama re, at Yesus e so elema kwigin ha'ma re, at ap munggwarengge obabut weak mene endawimo kwisikhesik welagaikhe mene a'nogo nen he, mel yagatikhe: ”Nemberek nikhi logouwogen he, louwogo,” iluk ane elagaik ane yagatikhemo,

¹⁹ at Yesus nen he, mel yagatikhe: ”Lego. Haiba lano o. Lambik he, ninoe Enupogot a'nogo nen endawitnafesik he, yi'nogo hilingnafe, iluk hogogwi hagoromi yagaisa lano,” iluk komorogo lakfesikhe.

²⁰ Lakfesikhemo re, o kota 10 nen wurik were'ma lagaikhesik mel yagaisilik nikhi lagaikhe: ”Yesus nen yi'nogo hilingnafe, ti'nogo hilingnafe,” iluk yagaisilik lagaikhemo re, it inebe mondogaren he, ”Ninailo e,” iluk fogeratukwa.

Yairus a'logo inom, he ekhe amep lagu mondok welagaikhe mene inom, Yesus nen higirinafikhe wene

²¹ A'nogo hilingi'luk he, Yesus i yenggelek a'nogo aik yikwe e so warogo wulibi wagaikhe. Wulibi wagunem, afuni esa hokhorogoat at oba i esanggoma andogosi wagaukwa.

²² Andogosi wagaukwasik were'ma re, o afuni Yahudi mene samban agarek oba inogogwi kain welagaukwa mene ekhe enu Yairus wagaikhesik, Yesus eilenggen yethasikhesik, awe a'ma eindep awi yagaisogo hai wati logolik he, mel yagatikhe:

²³ ”Yesus noe. An na'logo ebe oan mene oba ouen wa'lasigiluk ugu kwelek wagi. Haren henggi fakhamo ebe fano asimbik eluk logouwagen, nemberek louwogeluk hayonggo wagi o,” iluk ane elagaik ane yagatikhe.

²⁴ A'nogo yagatikhemo emberek lagaukwa. Lagunem he, afuni mondok hokhorogo Yesus ombo'ne laga logolik peterogo agap oba te'merogo lagaukwa.

²⁵ Lagaukwama re, andoma he ekhe amep lagu mondok werek kwelek 12 tahun hilinglagaikhe.

²⁶ Amep lagu mondok logolik he, dokter lagen hilingisuageluk yi dokter ti dokter inayonggo fesikhesik, ou onggo wogisugunemen he, at angge mondogat legetfesikhe meneat he, amep a'nogo palagi'lek hobuk ebenagaigat laga lagaikhe.

^27-28 Amep a'nogo lagu mondok logolik, Yesus abok esanggo holhikhesik, endawimo nen he mel anggasikhe: ”An at asu nenggi fakhamo, namep yi palasigin o,” anggasikhesik lagaikhesik, Yesus ombo'ne horokhogo laga logolik, asu enggi fakhasikhe.

²⁹ Enggi fakhugu kwelek aremnogoat, amep a'nogo eroba nen palagaikhemo, endawimo nen he: ”I. An ou weagat welagi a'nogo, higitnafe higi,” iluk endawimo futfesikhe.

³⁰ A'nogo hilingitu kwelek aremnogo re, at Yesus omame hokho meneba afuni fano higirinabik nikho mene a'nogo omame lek agunem enegat hasikhesik aren ikhe logolik he: ”Sa nen an nasu enggi senhikhe nogo,” iluk, afuni hokhorogo omanogo inoba heinok wogisasikhe.

³¹ Wogisasikhemo re, at agoromi ane wanhi lagaukwa mene omanogo nen he, mel yagatukwa: ”Eige! Noe. Nit ninebe hokhorogoat hera'lukwe horokhogo waga lago yoma heilenggen nisikhi logoligat he, Sa nen fa'niikhe, iluk ikhi lagen?” iluk yagatukwa.

³² A'nogo yagatukwa meneat he, at Yesus nen, ”Sa nen fa'niikhe,” iluk, ebe futfeigeluk eilenggen lagakhogo isilik lagaikhe.

³³ Isilik lagunem he, at he a'nogo endawimo nen he: ”An nen fakhigimo hilingnafe a'nogo nen ili'logo higi,” iluk futfesikesik he, ailo agaikhesik, oak lei'leik ikhi logolik, Yesus awe a'ma eindep awi yakfesikhesik he, ”An a'nogo welagerigen he, yi'nogo hilingiti o,” iluk mondogat pilingisogo yagatikhe.

³⁴ Yagatikhemo, at Yesus nen he, mel yagatikhe: ”Na'logo e. Hendawinggen noba eberogoat himbiret fegen andi nen fano agen o. Halok he, hendawimo fanorogo lan o,” iluk lakfesikhe.

³⁵ A'nogo yagatu kwelek aremnogoat, o afuni Yahudi mene samban agarek oba inoe kain a'nogo aiba nen agoromi yonggo wagaukwasik he, mel yagatukwa: ”Noe. Ha'logo a'nogo arat wa'lagama nen wago. Halok he, ninoe kain wene yaganisikherek mene ari, tulemat hemberek louwogeluk oba weagasugun nogo? Lego,” iluk yagatukwa.

³⁶ Yagatukwama re, at Yesus nen, it inane esanggo holhikhesigat he, inane sagalogo herakfisaluk kain a'nogo mel yagatikhe: ”Hendawimo menenei ebetun o. Hendawinggen an noba himbiret fembik nemberek louwogo,” iluk yagatikhesik he, lagaukwa.

³⁷ Lagaukwasik, afuni inebe hokhorogoat yagaisikhi logolik, ”Ninombo'ne wesugun lek. We, it Petrus inom, Yohanes agot Yakobus emberek inom enek ninom logoin o,” iluk inom lagaukwa.

³⁸ Lagaukwa hak he, kain a'nogo aiba afuni hokhorogoat logolik he, inane mondok hokhorogo ngai-wai inabel tagalhi logolik were'ma lagaukwa.

³⁹ Lagaukwasik, at Yesus ebe oloba kwisikhesik he, mel yagaisasikhe: ”Hit he, le ngai-wai aga lagep andi nenahalok. Helenggerek andi wa'lagi'lek, we, nogo ili'logo,” iluk yagaisasikhe.

⁴⁰ A'nogo yagaisasikhemo re, it afuni omanogo nen endo hokhorogo agaukwa. Endo hokhorogo agaukwama, aren he, inebe mondogat felelenghogo olulu wulakfisasikhe. Wulakfisasikhesik he, it helenggerek a'nogo eisena agaisa inom, Yesus agoromi inom lagaukwa mene omanogo inom, it enek woginarek o hulu senggelek helenggerek a'nogo welagaikheba kwisukwa.

⁴¹ Kwisukwasik, enggi fakhasikhesik he, nit ninaneba, ”Hele yi, na'logo. Menla'nogen iluk yagaheti lagi o,” iluk u hak, it inaneba: ”Talita kum,” iluk yagatikhe.

⁴² A'nogo yagatu kwelek aremnogoat, helenggerek a'nogo ebe ta'lagaikhesik oba nen, mo lagagik, pigik, ugu kwelek, 12 tahun hilinglagaikhe andi nen he, ebe menlagaikhesik, o hulukwe lagik, wagik, isikhe. A'nogo hilingitikhemo, it afuni omanogo ineilenggen hasukwasik, ”Eige! Nailo e,” iluk hokhorogo fogeratukwa.

⁴³ A'nogo fogeratukwa meneat he, at Yesus nen he, mel yagaisasikhe: ”An hilingitunem hineilenggen neegep mene andi, afuni ekhe mondok yagaisagubo,” iluk komorinafikhesik he: ”Hele ari sumburu ekhe noagen wogo'ni o,” iluk yagaisasikhe.