MARKUS 4 - Allah Wene Fano Wene Hupla Inane

”Ap ekhe awi feik lakfilik lagaikhe,” iluk oba lirogo yagaisasikhe wene

¹ Hobuk he, at Yesus i Galilea yenggelek a'nogo esanggoma logolik wene yagaisasikhe. Yagaisugunem afuni inebe esa hokhorogoat oba andogosi wagaukwama re, it inebe i aik oba fisaluk he, at ebe ima e soba hu'lasi kwisikhe.

² Hu'lasi kwisikhesik he, wene yi mene ti meneba lithigik, wene hokhorogo yagaisasikhe. Yagaisikhi logolik, ekhe mel yagaisasikhe:

³ ”Hinesanggo holini. Ap ekhe yabu waganogo awi yaterek mene awi feik lakfeigeluk wulifikhe.

⁴ Wulifikhesik, feik lakfilik lagunem he, enggen ekhe kwe ebekhalem pilik lagaikhe. Pugunem he, sue wagaukwasik he, felelenghogo mondok nasukwa.

⁵ Nen, enggen ekhe re, helep oba kweang endebatma pilik lagaikhe mene re, kweang endebatma andi nen he, weak-weak fulelhikhe.

⁶ Fulelhikhe meneat he, o mo lakfei wagaikhemo re, omanggen yati'legen he, sawet agaikhesik pugagaikhe.

⁷ Nen, enggen ekhe re, panggi were'ma pilik lagaikhe mene re, panggi andi mene hokho aga logolik he, awi fano mene yago a'nogo palogo pelafikhemo kanggil agaikhesik he, enggen iti'lek kamo isikhe.

⁸ Nen, enggen ekhe re, kweang muli fanoma pilik lagaikhe mene re, fulelhikhesik ebe hokho agaikhesik he, enggen itikhe. Ero ekhe enggen 30 nen itikhe. Ero ekhe enggen 60 nen itikhe. Ero ekhe enggen 100 nen itikhe,” iluk yagaisasikhesik he,

⁹ ekhe mel yagaisasikhe: ”Hit hinesanggo holugun halok he, fanorogo holini o,” iluk yagaisasikhe.

Yesus nen he, ”Wene oba lithigik yagahisigi andi re, ebe yi faget,” iluk yagaisasikhe wene

¹⁰ A'nogo yagaisasikhesik, at Yesus alegat were'ma, hobuk it inebe 12 nen omanogo inom, it ekhe Yesus wene yagaisugunem inesanggo holhukwa mene inom, oba wagaukwasik he, mel yagatukwa: ”Haren wene oba lirogo yaganisegen a'nogo, ebe ninggi'nogo mene faget yaganisegen,” iluk oba heinok wanhukwa.

^11-12 Heinok wanhukwama aren he, mel yagaisasikhe: ”Allah nen awe a'ma fisikherek wene andi, at endawimo hinago welagaikhe mene, wene hit enek he hinelu asubagaigeluk fakhogo yagahisagain anggasikhe meneat he, it afuni endakwe mene andi nek he, at Allah nen he: It weak hilingiri'lagwi mene andi herakfisaluk inobabut hebelasumo, an nen sebelogo legetfisanogo iluk he, it ineilenggen hikhi logogun meneat he, furogo futfikhi logogun lego. Nen, inesanggo holhi logogun meneat he, fanorogo holhi logogun legaro, iluk isikhe andi higit asuageluk, wene yi mene ti mene oba lithigik, yagaisikhi lagi andi o,” iluk yagaisasikhe.

At Yesus nen, ”Ap ekhe enggen feik lakfilik lagaikhe, iluk yagahisigi a'nogo re, ebe yi'nogo,” iluk yagaisasikhe wene

¹³ At Yesus nen a'nogo yagaisasikhesik, hobuk mel yagaisasikhe: ”Hit he, wene oba lirogo yagahisigi a'nogo futfigi'lek hinonggot welagep halok he, hobuk wene yiba litik, tiba litik, yagahisugunem he, ninggi'nogo futfembik hinelu asigin.

¹⁴ Ap ekhe enggen feik lakfilik nikherek mene iluk yagahisigi andi ebe re, Allah aneat yagaisilik nikharek andi aro.

¹⁵ Nen, awi feik ekhe ebekhalem lakfesikhe andi ebe re, it afuni ekhe nen Allah ane inesanggo holharesi'mo nen, Iblis fageat wagaresik he, wene inendawinggenma yago mene andi henegeisogo waluk lagarego.

¹⁶ Nen, awi feik ekhe helep oba lakfesikhe andi ebe re, it afuni ekhe nen Allah ane andi inesanggo holharesik he, inendawimo inagaiyek hikhi logolik he, weak-weagat wanharek.

¹⁷ A'nogo weak-weagat wanharek meneat he, wene andi inendawinggenma omanggen yati'legen endebat were'ma nen, afuni ekhe nen Allah ane andi faget, yi enggin ti enggin inoba figik, weagerinafik, ugunem he, inendawimo fageat pugagaikharesik he, wene andi herakfisaluk wulifarek andi aro.

¹⁸ Nen, awi feik ekhe panggi hokhorogo anggele'ma lakfesikhe andi ebe re, it afuni ekhe Allah ane andi inesanggo holharesik enat he,

¹⁹ inendawimo nen, ”Yogondak ya faget ninggi'nogo hilingisigin he,” iluk, menenei ebetik, ”Nagarek hokhorogo logoilebe,” iluk inendawimo ebeti logolik, inonggwaregen laligik, inendawimo nen yi mene ti mene ekhe inamolo anggigik, agarek andi nen he, wene andi inendawimo kanggil agaresik he, enggen iterek lek andi aro.

²⁰ Nen, awi feik ekhe kweang muli fanoma lakfesikhe andi ebe re, it afuni ekhe Allah ane andi inesanggo holiluk wanharesik he, wene andi inendawimo enggen iterego. Ero ekhe nen enggen 30 itik, ero ekhe nen enggen 60 itik, ero ekhe nen enggen 100 itik, iterek andi aro,” iluk yagaisasikhe.

Yesus nen, ”Esage ibilogo iwak elema hinagaisogo fogoin lek,” iluk oba lirogo isikhe wene

²¹ At Yesus nen a'nogo yagaisasikhesik he, hobuk mel isikhe: ”Afuni nen esage ibilogo re, iwagen elema hinagaisogo figik, nogo agare'ma figik, uogeluk ibilharek nogo? Lego. We, ibilogo re, selek oba fouwogelugat ibilharek.

²² Yi mene ti mene hinago werek andi, weinam asuagelugat hinago werego. Nen, yi wene ti wene sebelek werek andi, fakhogo weinam asuagelugat sebelek werego.

²³ Andi nenat, sa nen esanggo holigin halok he, fanorogo holuago,” iluk yagaisasikhesik,

^24-25 wene ekhe mel yagaisasikhe: ”Wene yagahisikhi lagi andi, fanorogo futfikhi logoino o. Sa nen wanhesik fisogo werek halok, hobuk Allah nen ekhe inom wogetik, nen, sa nen wanhi'lek, we, endebat fisogo logogin halok, telogo heligik, igin andi nen he, hiren afuni ekhe wanuageluk ilirengge walfuluk wogisikhi lagep andi hak, hiren wogisogoin higithogoat, Allah nen ilirengge walhogo wokhisaluk he, ekhe inom wokhisagain aro,” iluk yagaisasikhe.

Yesus nen awi fulelherek mene oba lirogo yagaisasikhe wene

²⁶ Yesus nen wene a'nogo yagaisasikhesik, ekhe mel yagaisasikhe: ”Allah awe a'ma fisikherek andi re, ap ekhe nen eabumo enggen awi feik lakfikherek hangge o.

²⁷ Eabumo feik lakfuluk he, o hubagunem nogo igik, wei ugunem eluk agik, ugu kwelek he, awi a'nogo fulelheresik he, hokho agarek. A'nogo hokho ari'logo meneat he, ninggi'nogo hokho ari'logo he, ninonggot welagorek.

²⁸ Awi andi yabumo yatunem en, attak-attak ebe tak erabusak fulelheresik he, hobuk enggen iteresik, wurik agarek andi.

²⁹ Wurik agunem he, ”Enggen palugun oba arat horogasi waga, iluk, enggen palharek mene waluk ebe weak-weagat palharego,” iluk yagaisasikhe.

Kibi-kibi enggen oba lirogo yagaisasikhe wene

³⁰ A'nogo yagaisasikhesik he, hobuk ekhe mel isikhe: ”Allah awe a'ma fisikherek andi nena mene hangge ugun. Nen, nena mene oba lirogo ugun.

³¹ Andi ebe re, kibi-kibi enggen hangge o. Ap ekhe nen kibi-kibi awi feik lakfesikhe. Yi mene ti mene enggen awi andi mage meneat he, kibi-kibi awi andi nek he mondogat mage o.

³² A'nogo meneat he, kibi wundat inom, ekhe mene inom, yatunem, fulelheresik he, obakhe endebat hak lagaikherek. Meneat he, kibi-kibi andi nek he, feik lakfugunem obakhe mondok hokhoat lagaikheresik he, enggi hokho talogo engga hokho agunem, sue tarogo nikherek mene we'luk he, kuna'ma andoma awi elok wusi wagarek andi hangge aro,” iluk yagaisasikhe.

³³ It afuni nen wene futfogoin higithogo futfouwageluk, yi mene ti mene hokhorogoat oba lithigik yagaisikhi lagaikhe.

³⁴ It afuni ekhe yagaisageluk halok he, wene oba lithigik enek yagaisikhi lagaikhe meneat he, at agoromi ane wanhi lagaukwa mene omanogo nek he, inom inale'ma logolik, wene ebe weinamat fakhogo yagaisikhi lagaikhe.

Yesus nen sogoi inom, i ha'labu inom, hambuget fesikhe wene

³⁵ A'nogo yagaisikhi lagaikhesik, o hu'mokwe at Yesus nen agoromi omanogo mel yagaisasikhe: ”Nit i aik eliba wulibuogo,” iluk yagaisasikhemo,

³⁶ iren he, e so Yesus welagaikheba a'nogo were'ma oba kwisukwasik he, afuni hokhorogo omanogo andoma fisaluk, at ebe waluk wulifukwa. It wulifu kwelek he, afuni ekhe r so ekheba ambine wulifukwaat.

³⁷ A'nogo wulifunem, sogoi aninirogo funha wagaikhemo re, i ha'labu foinalogo liafi logolik, kweisalogo e so elema kwisikhemo ambem hetok igeluk isikhe.

³⁸ A'nogo ugu kwelek he, Yesus ebe e so elema su inunggul legeisogo nogo agarek meneba unggul legeisogo nogo ugunem agoromi omanogo nen eluget hasukwa. Eluget hikhi logolik he, mel yagatukwa: ”Noe. Nit i logoin yoma ninebe hendawi lega?” iluk yagatukwa.

³⁹ Yagatukwama, at eluk agaikhesik he, sogoi a'nogo wenagati logolik, ”Habolok legame,” isikhesik, i a'nogoba re, ”Hane legame,” iluk yagatikhemo re, sogoi palagik, i ha'labu mondok hambuk igik, isikhe.

⁴⁰ A'nogo hilingitikhemo re, at Yesus nen he, mel yagaisasikhe: ”Hit nenahalok hinailo nen ikhi lagep. Hinendawinggen an noba oan eberogoat himbiret figi'lek welageba?” iluk yagaisasikhemo re,

⁴¹ inailo hokho agaikhe. Inailo hokho agaikhesik he, it-it ikhi logolik mel isukwa: ”Egi! Ap yi sa anggegep. Sogoi inom, i ha'labu inom, at ane ugunem hologo legaga andi, nailo e!” iluk fogeratukwa.