MARKUS 3 - Allah Wene Fano Wene Hupla Inane

Allah faget weat werek kwelek, Yesus nen ap ekhe enggi fena wutwarek mene higiret fesikhe wene

¹ Hobuk he, at Yesus o it afuni Yahudi mene samban agarek oba kwisikhe. Kwisikhe hak he, o andoma ap ekhe enggi fena wutwarek mene welagaikhe.

² A'nogo were'ma kwisikhemo re, it ap fena inendawimo nen mel anggasukwa: ”Yogondak he, ninenggi sabit oba Allah faget weat werek kwelek, aren ap ari fano higisigin a? Lega. Higite halok he, ”Hat weak hilingiten, iluk wene oba fouwogo,” iluk ineil welagaukwa.

³ A'nogo ineil werek kwelek, at Yesus nen he, ap enggi wutwarek mene a'nogo mel yagatikhe: ”Hebe menla'luk he, tulem ya eme o,” iluk yagatikhemo,

⁴ menlasi lagaikhemo re, afuni omanogo mel yagaisasikhe: ”Ninenggi sabit oba Allah faget weat logolik he, fano higirinabigin a? Weak higirinabigin a. Telinabigin a? Inoasigin a,” iluk yagaisasikhemo re, inane lek kamo isukwa.

⁵ Kamo isukwama re, at Yesus eilenggen isilik lagaikhesik he, endawimo nen he: ”Inobabut lagi-lagorek yi ri!” iluk endawimo weak agaikhesik a'mage lagasikhe. A'mage lagasikhesik inoba uarogo re, ap a'nogo mel yagatikhe: ”Henggi pisat han o,” iluk yagatikhemo re, enggi pisat hasikhemo arat fano agaikhe.

⁶ Enggi a'nogo higiret fesikhemo re, it ap Farisi mene omanogo wulifukwasik weak-weagat Herodes agoromi inoba lagaukwasik he: ”Yesus ninggi'nogo wasuok,” iluk inom weim abok isukwa.

At Yesus i Galilea esanggoma were'ma afuni hokhorogoat oba andogotukwa wene

^7-8 A'nogo hilingi'luk, hobuk, at Yesus agoromi ane wanhi lagaukwa mene omanogo inomat he, i Galilea yenggelek a'nogo esanggoma lagaukwa. Lagaukwama re, afuni nen he, ”Yesus yi'nogo hilingiri'logo, ti'nogo hilingiri'logo,” iluk abok ugunem, it afuni o Galilea tonggwe mene hokhorogoat inesanggo holfuluk inombo'ne-inombo'ne lagunem, it afuni o Yudea tonggwe mene inom, o Yerusalem mene inom, o Idumea tonggwe mene inom, o i Yordan aik eliba mene inom, o Tirus Sidon mene inom, Yesus oba andogotukwa.

^9-10 A'nogo andogotukwama re, inebe hokhorogoat ou higirinafunem he, it ou inoba mene mondogaren, afuni ekhe hiil isilik-heal isilik Yesus inenggi fakfouwogeluk oba kwikhi lagaukwa andi nen, at Yesus nen, at agoromi ane wanhi lagaukwa mene omanogo mel yagaisasikhe: ”Afuni hokhorogoatma re, an nera'lu peterogo wesinogo nen he, e so endep mene ekhe nobagaluk logoni o,” iluk yagaisasikhe.

¹¹ Ou a'nogo higirinafu kwelek, it munggwarengge inobabut weak mene afuni inendawimo kwisukwasik welagaukwa mene nen Yesus ebe ineilenggen hasukwasik inelokhe sagaum po i lagaukwasik he, inane hokhorogo yagati logolik, mel ikhi lagaukwa: ”Allah amlogo re, hararo,” iluk yagaukwa.

¹² A'nogo yagatukwa meneat he, at Yesus nen mel isikhe: ”At Allah amlogo, iluk nabok yagaisogoin mondok lego,” iluk ane ninghogo wenagisasikhe.

Yesus nen ap inebe 12 nen inayonggo fesikhe wene

¹³ A'nogo wenagisaluk hobuk he, at Yesus ebe tom oba lagasikhe. Lagasikhesik he, ”Ap inebe andem noba wesuak,” iluk endawimo anggasikhe mene nek wolisasikhemo, oba lagasukwama re,

^14-15 inebe 12 nen menfisikhi logolik he, mel yagaisasikhe: ”Hit an ninom mondok logombigen he, fano wene yagaisigik, munggwarengge inobabut weak mene afuni inendawimo kwisukwasik were'ma, an nomame wokhisamo henegeisogo wulakfisigik, hilinginabik nikhi logobagaigen lakhinobagagin o,” iluk menfisasikhe.

¹⁶ Inebe 12 nen menfisasikhe mene omanogo, inenu yi: Simon enu ekhe Petrus salhikhe mene a'nogo inom,

¹⁷ Zebedeus againafuri Yakobus agot Yohanes emberek inenu nit ninaneba unggunggu ane ikherek hangge u hak, it inaneba Boanerges salinafikhe mene inom,

¹⁸ Andreas inom, Filipus inom, Bartolomeus inom, Matius inom, Tomas inom, Alfeus amlogo Yakobus inom, Tadeus inom, Simon, ”O Kanaan yoma ninawiwerek mene halok enek logouwok,” iluk ikhi lagaikhe mene a'nogo inom,

¹⁹ Yudas Iskariot Yesus wasuageluk hobuk yonggo lagaikhe mene a'nogo inom, inebe andem menfisasikhe.

”At Yesus andi Beelzebul oba loukse'ma hilingirik nikho,” iluk isukwa wene

²⁰ A'nogo menfisasikhesik ambotkwe aiba pi wagaikhemo afuni hokhorogoat hobuk oba andogosi wagaukwama re, Yesus agoromi inom inamburu ninggi'nogo na heat hilinglagaikhe.

²¹ A'nogo hilinglagaikhemo, afuni ekhe nen he, ”At endawinggen samban etesik werego,” ugunem, it Yesus agaisalak inom, agoromi inom inesanggo holfuluk, at ebe wanuogeluk wagaukwa.

²² It wagu kwelek, it ap Allah ane lisu palek eisewerek mene o Yerusalem en lagai wagaukwasik he, mel isukwa: ”Beelzebul munggwarengge inobabut weak mene inoe kain a'nogo Yesus oba louksek werego. A'nogo were'ma andi nen he, at omameba munggwarengge at agoromi hak inobabut weak mene afuni inendawimo kwikhesik were'ma henegeisogo wulakfisili'logo o,” iluk isukwa.

²³ A'nogo isukwama, at Yesus nen afuni hokhorogo omanogo wolisasikhesik he, wene oba lirogo mel yagaisasikhe: ”Iblis afuni inendawimo kuluk were'ma, onggwaregen henegeisogo elok wulak fou hak nogo? Mondok elo'lego.

²⁴ Nen, ap kain enupogot misigat mene agoromi awe a'ma ferinarek welagarek mene it-it hulit fakhaluk weak logogun halok, misigat lambulogo logolik inomame welagaukwa hak logogun lek. Maben asugun o.

²⁵ Nen, ap ekhe againafuri inom hulit fakhaluk inom weak logogun halok he, ap misigat againafuri inom logolik fano welagaukwa hak logogun lek. Weak asugun aro.

²⁶ Andi hak, at Iblis onggwarek agoromi munggwarengge inobabut weak mene inom hulit fakhaluk inom weak a'lepma re, welagaikharek hak inomame logoilep lek. Arat lek a'lebo.

²⁷ Nen, ap ekhe omame hokho mene enggi hele warogo figi'lek he, aiba agarek yi mene ti mene inenggi abisak wani kugun elo'lego. Athe, enggi hele warogo fuluk enek he, elok wani ku hago,” iluk yagaisasikhesik wene ekhe mel yagaisasikhe:

²⁸ ”Nane eberogoat yagahisak. Afuni nen yi weak ti weak hilingiri'lagwi mene inom, inendawimo nen sebelfisaluk, inaneba nen inabok weak pali'lagwi mene inom, at Allah nen elok sebelogo legetfisagain meneat he,

²⁹ Allah Areagun andi inendawimo sebelfuluk abok weak palhu halok he, sebelogo legetfisagain lego. We, weak hilingisugun andi faget wene inoba mondok-mondok logogin o,” iluk yagaisasikhe.

³⁰ Wene a'nogo yagaisasikhe andi re, iren he, ”Yesus munggwarengge obabut weak mene endawimo kwikhesik werek,” iluk isukwa andi nen, yagaisasikhe andi.

Yesus agaisa inom agoromi inom oba wagaukwa wene

³¹ Wene a'nogo yagaisasikhesik were'ma, at Yesus agaisa inom, agoromi inom, wagaukwasik olulu mendek logolik, Yesus wulibi wesuageluk afuni inoba wene warogo kwelakfesukwa.

³² Kwelakfesukwama re, it afuni hokhorogo Yesus era'lu hurek welagaukwa mene nen mel yagatukwa: ”Yesus, yethan! Hat hagaisa inom, hagoromi inom, herakhabik wagaikhasik olulu werego,” iluk yagatukwa.

³³ Yagatukwama re, at Yesus nen he: ”An nagaisa nagoromi andi sani nogo,” iluk yagaisasikhesik he,

³⁴ afuni at era'lu hurek welagaukwa mene omanogo eilenggen isilik lagaikhesik he, mel yagaisasikhe: ”An nagaisa, nagoromi hit yi aro.

³⁵ Sa nen, at Allah endawimo anggikherek mene higithogo hilingiterek halok he, at andi an nagot, nerei, nagaisa, werego,” iluk yagaisasikhe.