MARKUS 2 - Allah Wene Fano Wene Hupla Inane

Ap enggi eisok wut warek mene Yesus nen higiret fesikhe wene

¹ At Yesus enggi endebat o andoma welagaikhesik he, hobuk o Kapernaum kwi wagaikhe. Kwi wagaikhesik oloba kwisikhemo afuni nen he: ”At ebe oloba werego,” iluk ugunem inesanggo holhukwa.

² Inesanggo holhukwasik he, afuni inebe hokhorogoat andogosi wagaukwa. Wagaukwama re, oloba peterogo solombonkwe inom pete isikhemo re, fano wene a'nogo yagaisasikhe.

³ Yagaisugunem he, ap ekhe enggi eisok wut warek mondok welagaikhe mene ap inebe 4 en, e yerogo waluk Yesus oba wagaukwa.

⁴ Waluk wagaukwasik he, Yesus oba waluk kuogeluk isukwa mene re, afuni peteregen, ninggi'nogo ku heat hilinglagaikhemo o tum oba lagasukwasik, Yesus ebe welagaikhe higithogoat tum talogo nen, ap enggi eisok wut warek mene a'nogo alit nogo ikhi lagaikhe meneba earogo pelakfesukwa.

⁵ A'nogo pelakfesukwama, at Yesus eilenggen hasikhesik he, mel isikhe: ”Ap yi inendawinggen an noba eberogoat himbiret fagasigen waluk wagaikha higi,” iluk, eilenggen enegat isaluk he, ap enggi eisok wut warek mene a'nogo mel yagatikhe: ”Namlogo e. Hat weak hilingiti lagen mene re, an nen arat sebelogo legetfisigi o,” iluk yagatikhe.

⁶ A'nogo yagatikhemo, it ap Allah ane lisu palek eisewerek mene ekhe andoma hurek logolik he, it-it inendawimo nen he:

⁷ ”Ap yi wene ikhe andi, nenahalok ikhe. Nit afuni weak hilingiti lago mene andi, it afuni ekhe nen elok sebelogo legetfisgoin nogo? We, at Allah alegaren elok sebelogo legetfisikherek meneat he, at yi nen Allah endawimo sebelfikhesik enu weagetfili'logo,” iluk inendawimo anggasukwa.

⁸ A'nogo anggasukwama, at Yesus nen it inendawimo anggasukwa mene enegat futfisasikhesik he, mel yagaisasikhe: ”Hit hinendawimo a'nogo anggikhi lagep andi nenahalok.

⁹ An nen ap enggi eisok wut warek mene yi, wene yagasigin he, se hak he ki anggegep. Hat weak hilingiti lagen mene andi arat sebelogo legetfisigi, iluk yagati andi se hangge mene yagati anggegeba? I a, athe, ”Hebe menlasimbik he, halit talogo nogo ikhi lagen mene yi helaluk lan o, iluk yagasigin andi se hak anggegeba. Lego. Hebe menla'luk lan,” iluk yagasumo enggin aro.

¹⁰ Enggin meneat he, an abat ta'lasi wagagi a'nogo kweangma yoma logolik, afuni yi weak ti weak hilingitarek mene an enat sebelogo legetfisikhi logouwageluk, Allah nen eisewerek nobagaikhe mene andi futfanobagaik,” iluk yagaisasikhesik, ap enggi eisok wut warek mene a'nogo mel yagatikhe:

¹¹ ”Hebe menlasimbik he, halit talogo nogo ikhi lagen mene ari helaluk he, haiba lan o,” iluk lakfesikhe.

¹² A'nogo lakfesikemo re, ap a'nogo menlagaikhesik he, alit a'nogo aremnogoat helaluk it afuni omanogo mondogat ineilhanem wulifikhe. A'nogo hilingitikhemo, it afuni omanogo mondogaren he, mel isukwa: ”Eige! Nailo e. Nit yoma attagat afuni ekhe nen yi'nogo ekhe hilingitunem hogorek lek mene hilingite yi ninailo e,” iluk Allah fogeratukwa.

Yesus nen Lewi ayonggo fesikhemo ombo'ne lagaikhe wene

¹³ A'nogo hilingitikhesik hobuk he, at Yesus i Galilea yenggelek a'nogo esanggoma lagaikhe. Lagunem he, afuni hokhorogo at oba andogosi lagaukwama re, wene yagaisasikhe.

¹⁴ Yagaisasikhesik laga logolik he, ap Alfeus amlogo enu Lewi, kantor uang pemerintah faget kino iluk wanharek oba hurek were'ma eilenggen hasikhesik he, ”An nombo'ne eme o,” iluk yagatikhemo menlagaikhesik he, ombo'ne lagaikhe.

¹⁵ Lagaikhesik, at aiba Yesus emberek kwisukwasik, afuni it ap uang pemerintah faget kino iluk wanhi lagaukwa mene ekhe inebe hokhorogoat inom, it ekhe weak hilingiti lagaukwa mene inom, Yesus ombo'ne lagaukwama andi nen he, at Yesus ebe inom, at agoromi ane wanhi lagaukwa mene omanogo inom, sumburu nouwogeluk hu'lagunem, it inom nouwogeluk hu'lagaukwaat.

¹⁶ A'nogo nunggu were'ma, it ap Farisi Allah ane lisu palek inelu mene ekhe nen ineilenggen kwelagisasukwa. It ekhe weak hilingiti lagaukwa mene inom, it ap uang pemerintah faget kino iluk wanhi lagaukwa mene inom, Yesus inom sumburu nunggunem ineilenggen kwelagisaluk, it ap Yesus agoromi ane wanhi lagaukwa mene omanogo mel yagaisasukwa: ”At Yesus ap uang pemerintah faget kino iluk wanharek mene inom, it ekhe weak hilingitarek mene inom, inom misi'mo sumburu nili'lagwi andoma nenahalok,” iluk yagaisasukwa.

¹⁷ A'nogo yagaisugunem at Yesus esanggo holhikhesik he, mel yagaisasikhe: ”It afuni inoba fano mene, dokter lagen higirinabuageluk inayonggo fogoin nogo? Lego. We, inoba ou werek halogat dokter lak inayonggo fogoin o. Andi hak, an afuni fano hilingitarek mene inayonggo feigeluk wagagi fuk. We, afuni weak hilingitarek mene andi inayonggo feigeluk wagagi o,” iluk yagaisasikhe.

Samban uogeluk sumburu ninggi'lek welagaikharek wene

¹⁸ Hobuk inenggi ekhe sambul he, at Yohanes imapelaginafi lagaikhe mene a'nogo agoromi ane wanhi lagaukwa mene inom, it ap Farisi mene inagoromi inane wanhi lagaukwa mene inom, samban uogeluk he, sumburu ninggi'lek weat welagaukwa. A'nogo werek kwelek, it afuni fena Yesus oba wagaukwasik he, mel yagatukwa: ”Yesus. It Yohanes imapelaginafi lagaikhe mene a'nogo agoromi ane wili'lagwi mene inom, it ap Farisi mene inagoromi inane wili'lagwi mene inom, samban uogeluk sumburu ninggi'lek werek kwelegat he, hat hagoromi hane wili'lagwi mene andoma nek he, a'nogo hilingiti'lek sumburu nili'lagwi andi nenahalok,” iluk yagatukwa.

¹⁹ A'nogo yagatukwama, at Yesus nen he, mel yagaisasikhe: ”Ap ekhe agwe ikhikhi logolik, at erugwi agaila'lak inayonggo fagain mene inom logolik wam inom, sumburu inom, ninggi'lek weat logogun nogo? Lego. Ap andi inom logolik, a'nogo ninggi'lek weat logogun lek.

²⁰ Meneat he, ap andi erugwi agaila'lak fisaluk ebe waluk logoin oba weregaro. A'nogo waluk lamo andem sambul enek he, it andi inenggi ekhe sumburu ninggi'lek logogun aro,” iluk yagaisasikhe.

²¹ A'nogo yagaisasikhesik ekhe mel yagaisasikhe: ”Afuni nen, su attak laberi'lagwi mene tilip ikhe halok, su kain ket meneba finggin kwatarek lek. A'nogo kwatu halok he, su kain ket mene a'nogo hesimorogo lagaikhi logolik su andi hokhorogoat tilip-tilip lagain o.

²² Andi hak he, afuni nen anggur enggen perelogo amusu ket mene iwak wam agap endamat hilingik meneba hinatarek lek. A'nogo hinatu halok he, amusu andi nen iwak andi suphogo re, amusu kweisalogo alomat lagik, iwak yenggalagik, inogo iluk he, anggur enggen perelogo amusu ket mene iwak ket meneba hinatarego,” iluk yagaisasikhe.

Afuni Yahudi mene Allah faget weat werek kwelek, Yesus agoromi gandum enggen palogo nilik lagaukwa wene

²³ Afuni Yahudi mene inenggi sabit oba Allah faget weat welagaikharek a'nogoba ekhe sambul he, at Yesus ebe inom, agoromi ane wanhi lagaukwa mene omanogo inom, inom gandum yagokwe laga logolik, agoromi nen gandum enggen palik-palik lagaukwa.

²⁴ Palik lagaukwama re, it ap Farisi mene nen he, Yesus mel yagatukwa: ”Yethan! It yi ninenggi sabit oba Allah faget weat logolik he, ”A'nogo hilingisugun lek, iluk wene palek werek meneat he, nenahalok palik wagaikha,” iluk wenagetukwa.

²⁵ A'nogo wenagetukwama re, at Yesus nen mel yagaisasikhe: ”Ap Daud agoromi ombo'ne lagaukwa mene inom sumburu inaik fesikhemo ebe legen he, aren hilingitikhe mene Allah aneba lisu palek a'nogo hiren enu salhi'lek welagep nogo? Enu salhi lagebaro.

²⁶ At Daud en he, ap Abyatar it ap Allah eisewerek mene inoe kain logolik Allah awi wuri'mo Allah faget hilingitunem oba kuluk he, sumburu roti Allah faget fisagarek mene hesanggeat nogoin mondok lek. We, it Allah eisewerek mene nek nogoin, iluk wene palek meneat he, at Daud en nasikhesik he, agoromi ombo'ne lagaukwa mene omanogo wogisasikhemo nasukwaat, iluk lisu palek werek a'nogo enu salhi'lek welagep nogo?” iluk yagaisasikhesik wene ekhe mel yagaisasikhe:

²⁷ ”Allah nen he hinenggi sabit oba an faget weat logoino, isikhe andi re, wene andi esinet feigeluk inebe weinamerinafikhe fuk. We, afuni inebe esinet fisaluk he, hinenggi sabit oba an faget weat logoino,” iluk inebe fagerat isikhe andi.

²⁸ A'nogo isikhe andi nen, ninenggi sabit oba Allah faget weat welagorek andi, eisewerek he, an abat ta'lasi wagagi nebe yi aro,” iluk yagaisasikhe.