MARKUS 12 - Allah Wene Fano Wene Hupla Inane

Ap ekhe anggur yabu kwalogo welagaukwa mene oba lirogo yagaisasikhe wene

¹ At Yesus nen wene a'nogo yagaisasikhesik he, hobuk wene ekhe oba lirogo yi'nogo yagaisasikhe: ”Ap ekhe eabumo anggur awi yatikhe. Yatikhesik he leget wanhik, enggen sagalogo amusu keralhi logogun oba kweang habulhik, ineilenggen logogun oba sasangge talhik, isikhe. Isikhesik he ap ekhe kwalogo logouwageluk fisaluk he, ebe o yatma andoma lagaikhe.

² Lagaikhesik werek kwelek, enggen itunem palharek oba higit asi wagaikhemo re, ap eabu eisewerek mene a'nogo nen it ap kwalogo logouwageluk fisasikhe mene omanogo nen, anggur enggen ekhe palogo wogosuageluk amingmingengge mene ekhe inoba lakfei wagaikhe.

³ Lakfei wagaikhemo, it ap omanogo inoba wagaikhe mene re, enggen pelati'lek he ebe yei warogo weat ambotkwe lakfesukwa.

⁴ Lakfesukwama lagaikhemo re, hobuk amingmingengge mene ekhe inoba lakfisa wagaikhemo wagaikhe mene re, iren enggali warogo yei ungguloak tamuk-tamakhogo watukwa.

⁵ A'nogo hilingitukwama re, hobuk amingmingengge mene ekhe lakfei wagaikheat. Wagaikhemo re, ebe mondogat watukwa. Watukwama re, hobuk at amingmingengge mene ekhe inebe hokhorogoat it ap omanogo inoba lakfei wagaikhemo wagaukwama re, iren he, fena yei warogo lakfisigik, fena inebe mondok inoatik isukwa.

⁶ A'nogo felelenghogo inoatukwama re at eabu eisewerek mene a'nogo amlogo endawinggen hundik mene misigat andi nek agaikhemo re, aren he, ”An namlogo yiat inoba lakfoumo re, inane agaukhogo hai warogo wanugun o,” iluk anggasikhesik he, ebe hobuk inoba lakfei wagaikheat.

⁷ Lakfei wagaikhemo wagunem, it ap yabu kwalogo welagaukwa mene omanogo nen, it-it ikhi logolik he, mel isukwa: Elege ari eisena obali'mo yabu eisewerek asigin mene a'nogo ebe waga a'li. Halok yabu yi re nirat eisewerek asuogen he, ebe wasuogo, iluk isukwasik,

⁸ ebe fakfesukwasik warogore yabu anggur yabumo a'nogo abel endakwe fikhit hambokhogo wulakfisasukwa.

⁹ A'nogo hilingitukwa andi nen he, ap kain eabu eisewerek andi ninggi'nogo hilingisigin anggegep? At ebe wesimbik he yi'nogo hilingisigin, it ap andi anggur yabu a'nogo kwalogo logouwageluk ap hunogoat mene menfisagain aro.

¹⁰ Hiren Allah ane lisu yi'nogo palogo fesukwama enu salhi'lek welagagip nogo? Iren he: It ap tukang helep oba wutarek mene nen o ebe wuti logolik he, ”Helep yi weak,” iluk herakfisasukwa mene andi obuleat ya'lagama o.

¹¹ A'nogo hilinglaga andi, nineisena Allah Enupogorenat hilingite o, iluk nineilenggen hogosik he, Eige! Iluk fogerati lago, iluk lisu palogo fesukwa mene andi enu salhi lagep lek nogo? Salhi lagebaro,” iluk yagaisasikhe.

¹² A'nogo yagaisasikhemo iren he mel isukwa: ”Wene oba lirogo yaganisikhe andi nit fagerat yaganisikhe higi,” iluk futfesukwa. Futfesukwasik he Yesus ebe fakfouwogeluk isukwa meneat he, afuni hokhorogo omanogo inailo nen herakfisaluk pugulhukwa.

”Uang pemerintah faget kino ugunem wogisogoin a? Lega,” iluk Yesus oba heinok wanhukwa wene

¹³ Hobuk he, it ap kaindek omanogo nen he, Yesus eil warogo ane igin mene wene oba fouwogeluk, iren it ap Faresi mene ekhe inom, it ap Herodes werekwe mene ekhe inom, inomen he Yesus anema wanuageluk oba lakfisa wagaukwa.

¹⁴ Lakfisa wagaukwama wagaukwasik he, mel yagatukwa: ”Noe. Hat hobabut he, wene eberogo mene nek ikhi logolik, afuni inelokheba nek isaluk, ekhe helokhoma fisigik, ekhe hambotma fisigik egendek lek. We inebe hailo legat logolik he, ”Allah endawimo nen afuni yi'nogo hilingiti logouwak, iluk anggikherek mene nek eberogoat mene yagaisikhi lagen andi re nit ninelu o. Halok he, nit Yahudi mene hilingitorek higithogo, uang pemerintah faget, kain Kaisar wogosugun eloga? Elo'lega,” iluk heinok wanhukwama,

¹⁵ aren he, ”Inane lagokhogo yaganeta,” iluk inobabut enegat futfisasikhesik he mel yagaisasikhe: ”An nobabut paluogeluk egep andi nenahalok? Uang perak yabu inenggi misigam faget hilingitunem inenggi onggo wogisagarek a'nogo mene ekhe neilenggen hagen he wani lani o,” iluk yagaisasikhemo,

¹⁶ waluk wagaukwama re, at Yesus nen yagaisikhi logolik: ”Yi sa ebe hilingik nen sa enu palek werek anggegep,” iluk yagaisasikhemo iren he: ”Ari at Kaisar,” iluk yagatukwama,

¹⁷ at Yesus nen mel yagaisasikhe: ”Kaisar mene halok he, Kaisar at wogotik, Allah mene halok he Allah at wogotik, ikhi logoino o,” iluk yagaisasikhemo re, iren he, ”Egi! Ninailo e,” iluk fogeratukwa.

Ap Saduki mene nen, afuni wa'lasimbigen ineluk asugun mene faget Yesus oba heinok wanhukwa wene

¹⁸ Hobuk he, it ap Saduki mene nen, ”Afuni wa'lasimbik ineluk asugun lek,” iluk agarek mene ekhe Yesus oba wagaukwa. Wagaukwasik at oba heinok wokhikhi logolik yi'nogo yagatukwa:

¹⁹ ”Ninoe at Musa nen yi'nogo yaganisikhi laga: Ap ekhe againafuri le'ma agwe sogwe hebisaluk ebe wa'laga halok, obali'mo omalik ekhe taginabuageluk he, he sogwe andi re ap andi agorat wanuago, iluk yaganisikhi laga mene lisu palogo fikhemo werego.

²⁰ A'nogo isikhe mene were'ma re ap inebe 7 nen ineisena misiget tago welagaukwa. Logolik inoe manggusa mene andi agwe wanhikhesik againafuri taginafi'lema wa'lagaikheat.

²¹ Wa'lagaikhemo re agot ombo'ne mene nen, he sogwe andi wanhikhesik, againafuri taginafi'le'ma wa'lagaikheat.

²² A'nogoat it ap inebe 7 nen andi inagainafuri'lema wa'larik enek wagaukwama re, hobuk wurep kobokhogo re he andi ebe wa'lagaikheat.

²³ Halok it ap inebe 7 nen andi re he misigat mene andi wilik wagaukwasi'mo re, hobuk Allah nen inelugerinafunem it andi ineluk aga logolik, he andi sa hak agwe asigin anggegen?” iluk Yesus oba heinok wanhukwama,

²⁴ aren he mel yagaisasikhe: ”Hit he, Allah ane lisu palek andi inom, at omame andi inom, hinong got logolik, hinane weak egep andi.

²⁵ Afuni warek mene inelugerinabigin oba nen, it malaikat pogoroba mene welagaikharek andi hanggeat logogun o.

²⁶ Afuni wa'lasumo Allah nen inelugerinabigin, iluk wene Musa nen lisu palhikhe mene a'nogo enu salhi'lek welagep nogo? At Musa e panggi alok mene eroma lagaikhesi'mo, Allah nen mel yagatikhe: Abraham inom, Isak inom, Yakub inom, ineisena Allah Anaro, iluk yagatikhemo lisu palhikhe mene a'nogo enu salhi'lek welagep nogo? Enu salhi lagep aro.

²⁷ At Allah re, afuni warek mene ineisena fuk. Ineluk mene ineisena o. A'nogo meneat he, hit hinane weak mondok egep andi,” iluk yagaisasikhe.

”Allah nen komotninafikhe wene esin he, pire andem aro,” iluk yagaisasikhe wene

²⁸ Wene a'nogo inom ugu were'ma, it ap Allah ane lisu palek eisewerek mene omanogo misigat ekhe wagaikhesik esanggo hologo welagaikhesik, endawimo nen mel anggasikhe: ”It ap yi Yesus oba heinok wokhagama re, aren wene onggo higithogo yagaisikhe higi,” iluk endawimo anggasikhesik mel yagatikhe: ”Noe. Wene Allah nen komotninafe wene a'nogo wene ebe hokho esin he ki isikhe anggegen,” iluk Yesus oba heinok wanhikhe.

²⁹ Heinok oba wanhikhemo at Yesus nen mel yagatikhe: ”Wene andi esin he Musa nen mel isikhe: Hit ap Yahudi mene yi hinesanggo holini! Nineisena Enupogot he, Allah alegaro.

³⁰ Halok he, inendawinggen inom, hinobabut inom, hinebe inom, hinomame inom, misigat a'luk hineisena Allah Enupogot ebe andiat hinendawinggen hundik logoino o,” iluk yagaisasikhe mene, wene ebe esin he, andi aro.

³¹ Nen, wene andi a'ma hak he, mel isikhe anggigi: ”Hinonggwarek hinebe hinendawinggen hundik welagep andi hak he, it afuni ekhe hinom welagep mene andi hinendawinggen hundik logoino o,” iluk wene ero pire andemat esin o. Wene komotninafikhe mene ekhe weregat meneat he, esanggoma hak enego” iluk yagatikhe.

³² A'nogo yagaisasikhemo at Allah ane lisu palek eisewerek mene a'nogo nen he, mel yagatikhe: ”I noe. Wene higirat egen higi. At Allah ebe misigat, Ekhe re lek,” iluk eberogoat egen.

³³ Halok he, at Allah anggo warogo ebe abirengge endumo noletik, yi mene ti mene at faget fisigik, ikhi logogun elo'lek hak, mene re, ninendawinggen inom, ninebe inom, ninomame inom, misigat a'luk, at Allah ebe ninendawinggen hundik logolik he, it afuni ekhe ninom welagorek mene ninonggwarek ninebe hangge ninendawinggen hundik logogun andi esin aro” iluk yagatikhemo,

³⁴ At Yesus endawimo nen he: ”Ap yi endawinggen werek mene nen ikhe higi,” iluk anggasikhesik he, mel yagatikhe: ”Hat he, Allah awe a'ma horogat kwigin welagen higi,” iluk yagatikhemo it afuni omanogo nen hobuk Yesus oba wene heinok wanu inailo agaikhe.

”At Kristus andi ebe sa anggegep,” iluk yagaisasikhe wene

³⁵ A'nogo hilingitukwama re, hobuk at Yesus nen Allah awi wuri'mo wene yagasikhi logolik mel yagaisasikhe: ”It ap Allah ane esewerek mene omanogo nen he, Kristus Allah nen ayonggo fuluk lakfei wesigin isikhe a'nogo, ebe Daud en tagongge mene o, iluk ili'lagwi andi re, ninggi'nogo iluk ili'lagwi anggegep?

³⁶ At Daud Allah Areagun endawimo logolik, onggwaregen mel isikhe: Allah Enupogoren an noe Enupogot yagati logolik he, afuni hat hinom weak mene omanogo heisogen al perelogo fisanogen, an nen oan hoba fisa wagi'lek werek kwelek, hat an nera'lu nenggi ebekwe hebe kain logoinogo, iluk Allah nen Kristus yagatikhe, iluk Daud en isikhe.

³⁷ At Daud onggwaregen Kristus ebe faget, an noe Enupogot, iluk isikhe meneat he, hiren he Kristus andi Daud en tagongge mene o, iluk ninggi'nogo nen ugun anggegep? A'nogo ugun elo'lego,” iluk yagaisasikhe.

”It ap Allah ane lisu palek eisewerek mene nen weagethinabinogo,” iluk yagaisasikhe wene

³⁸ Afuni hokhorogo omanogo inendawimo inagaiyek anggugu kwelek he, at Yesus nen wene mel yagaisasikhe: ”It Allah ane lisu palek eisewerek mene andi nen weagethinabinogo iluk, hit hinobabut hebelogo logoino o. It inendawimo inamolo nen hilingiri'lagwire yi. Inasu uan mene laberaluk pasar onggo wanhare'ma andoma afuni nen inane agaukhogo hai warinabuageluk lagik,

³⁹ o afuni Yahudi mene samban agarek oba tulem healogo hu'lasi kwigik, afuni seni hokho isago nunggunem it ap kaindek hu'lagaikharek oba healogo hu'lagik, ikhi logou inamolo welagaikharek andi.

⁴⁰ A'nogo logolik, hemi sogwe mene inawi wurik inom, inangge inom, sebelikhi logoligat he, afuni nen inesanggo holiluk, It fano, anggoageluk samban uan-awan lithaluk lagaikharek a'nogo hilingiti'lek logoilepma re, Allah nen wene endebat inoba fuluk logoilep. Mene re, a'nogo hilingitarek andi nen, wene enggin mene inoba fuluk weagerinabigin o,” iluk yagaisasikhe.

It afuni inenggi werek mene inom, he sogwe enggi lek mene inom, inomen uang Allah faget fesukwa wene.

⁴¹ Wene a'nogo yagaisasikhesik he, ap Yesus ebe hu'lagaikhesik hurek logolik, peti uang Allah faget elonggoma fisagarek mene teik fena were'ma re, afuni hokhorogo nen uang fuluk lagunem yerinarek welagaikhe. Afuni inenggi werek mene hokhorogo nen uang hokhorogoat filik lagaukwa.

⁴² A'nogo filik lagaukwa meneat he, at he sogwe angge lek mene ekhe wagaikhesik he, uang sen mene misigat fou hak he, endep mene pire fuluk lagaikhe.

^43-44 A'nogo fuluk lagunem he, at Yesus nen agoromi ane wanhi lagaukwa mene omanogo wolisasikhemo wagaukhama re mel yagaisasikhe: ”It afuni mondogat andi inangge hokhorogo oba loukhogoat faga andi re, endebat hangge aro. Meneat he, at he sogwe enggi lek mene andi nek he, amburu onggo palogo nagain mene mondogat fikhe andi nek he, mondok hokho meneat fikhe o, iluk eberogoat yagahisigi,” iluk yagaisasikhe.