MARKUS 11 - Allah Wene Fano Wene Hupla Inane

Yesus fogeratu kwelek o Yerusalem kwisikhe wene

¹ A'nogo lagaukwasik, at Yesus agoromi ane wanhi lagaukwa mene omanogo inom, okota Yerusalem kuogeluk horokhogo asi lagasukwasik, punu Zaitun a'ma o sili ekhe enu Betfage ekhe enu Betania andoma higit asi lagasukwasik he, at Yesus agoromi ane wanhi lagaukwa omanogo inebe pire ekhe wene warogo attagat lakfisasikhe.

² A'nogo lakfisikhi logolik he: ”O sili hinelokhoma a'li lani o. Arat lagep halok he, oan kwikhi logolik wam keledai eak afuni amboroba oan hu'lagunem woginarek lagi'lek mene hele kombi kelik were'ma hineilenggen hogoin a'naga. Nen, arat hineilenggen hegep halok he, kombi kelik andi fikhalogo waluk we'no.

³ A'nogo hele fikhalhunem, it afuni andoma mene ekhe nen he: Wam kombi fikhalhi lagep andi, nenahalok, iluk wene palhu halok he, mel yagaisano: Ninoe Enupogot a'nogo nen wam yi mene legen waluk louwogeluk fikhalhi lago. Aren wam yi ambotkwe weak-weagat lakfei wesigin o, iluk yagaisano,” iluk wene warogo lakfisasikhe.

⁴ Lakfisasikhemo lagaukwama re, wam isikhe mene a'nogo eak mene o ekhe ebekhalem kwe esanggoma wuri'no oloba kwagarek oba kombi kelik were'ma hasukwasik he, kombi fikhalhukwa.

⁵ Fikhalhunem he, it afuni andoma mendek welagaukwa mene nen he, mel yagaisasukwa: ”Wam keledai eak mene yi nenahalok kombi fikhalhi lagep,” iluk wene palhunem,

⁶ iren he, at Yesus nen, ”Wene yi'nogo yagaisano,” iluk isikhe hagat yagaisasukwama, iren he: ”I o,” iluk herakfisasukwa.

⁷ Herakfisasukwama re, wam keledai eak mene a'nogo Yesus oba waluk wagaukwasik he, inasu endakwe laberek mene nonggologo wam amboroba talogo fesukwama re, Yesus ebe wam amboroba hu'lagaikhe.

⁸ Amboroba hu'lagaikhesik lagunem it afuni hokhorogo omanogo fena inasu endakwe laberek mene nonggologo kwe ebekwe talogo filik lagik, it fena nen engga yabukwe mene pali lagaukwasik ebekwe talogo filik lagik, isukwa.

⁹ A'nogo fesukwasik laga logolik, at Yesus ebe tulemet fesukwasik, it ekhe attak agik, it ekhe ombo'ne hobuk agik, laga logolik he, inane hokhorogo mel ilik lagaukwa: ”Noe wa! wa!” iluk u hak, ”Hosana! Hosana!” ilik laga logolik, ”Nineisena Enupogot Allah nen lakhobagai wagama wagen yi, arenat fanothabuago.

¹⁰ Endamat ninomba Daud awe a'ma welagaukwa hak, Allah nen ninoe yi awe a'ma ninobagambik fanotninabuago. Allah esin pogoroba welagarek mene, neisena wa!” u hak, ”Hosana!” iluk a'mit suphogo,

¹¹ o Yerusalem kwisukwa. Kwisukwasik he, at Yesus ebe Allah awi wuri'mo kwisikhesik yi mene ti mene mondogat eilenggen penetu kwelek, o arat hubagaikhemo, agoromi inebe 12 nen omanogo inom o Betania wulibi wagaukwa.

Yesus nen e ara ero ekhe homan fesikhe wene

¹² O Betania wulibi wagaikhesik nogo iluk, ohealekwe kwikhi logolik he, Yesus sumburu nele agaikhe.

¹³ Sumburu aik fesikhemo re, e ara ero ekhe engga muli were'ma eilenggen yatma nen yethasikhe. Eilenggen yethasikhesik: ”Enggen ugu a? Lega,” iluk, ha lagaikhe mene re, o andem sambul he, e ara enggen itu le'ma andi nen he enggen lek engga nek mulire'ma ha lagaikhe, Lagaikhesik,

¹⁴ mel yagatikhe: ”Hat e yi re, huli yogondagen pikhit hobuk henggen afuni ekhe nen ninggi logoinogo, itun,” iluk yagatunem, it agoromi ane wanhi lagaukwa mene omanogo inesanggo holhukwa.

Yesus Allah awi wuri'mo kwisikhesik tegelhikhe wene

¹⁵ At Yesus lak o andoma nen o Yerusalem kwisukwa. Kwisukwasik he, at Allah awi wuri'mo kwisikhe hak he, it afuni andoma kwisukwasik logolik onggo wanhik, palhik, ikhi lagaukwa mene mugisogo-magisogo wulakfisigik, it ekhe uang e talek oba fesukwasik onggo awati lagaukwa mene inom, it ekhe e talogo inebe hurek logolik sue pel hangge mene onggo wanhi lagaukwa mene inom, e talek mene andi abel enden-fendenhogo potfisigik, ilik lagaikhe.

¹⁶ A'nogo hilingitikhesik he, afuni ekhe nen yi mene ti mene waluk Allah awi wuri'mo o sili obakhe sikhiphogo logoin lek iluk wene palhikhe.

¹⁷ Wene palhikhesik, it afuni omanogo komorinafi logolik, mel yagaisasikhe: ”At Allah nen ikhi logolik he, An nawi wurik yi faget afuni nen ikhi logolik he, Yi afuni ti afuni inunggulenu lombok samban ikhi logogun oba o, iluk ikhi logogun, isikhe mene lisu palek werek a'nogo lek? A'nogo iluk lisu palek werek meneat he, hiren he, it ap afuni inagarek inenggi abisak telogo helagarek mene inawi hak wurogo fisikhi lagep yi ri!” iluk inenggali warogo komorinafikhe.

¹⁸ Komorinafunem, it ap Allah eisewerek inogogwi kaindek inom, Allah ane lisu palek eisewerek mene inomen wene andi inesanggo holhukwasik he, Yesus wasuogeluk weim abok isukwa. Weim abok isukwa andi re, Yesus nen wene yagaisugunem afuni hokhorogoat at ane holfuluk fogerati lagaukwa andi nen, at ebe inailo agaukwasik he, wasuogeluk isukwa andi.

¹⁹ A'nogo ugu kwelek, o arat hubagaikhemo re, Yesus agoromi inom o Yerusalem en wulibi wagaukwa.

Yesus nen e ara ero oba lirogo yagaisasikhe wene

²⁰ Yesus agoromi inom a'nogo wulibi wagaukwasik nogo iluk hubet ohealegat inambotkwe e ara a'nogo eroma higit kwikhi logolik, ineilenggen yethasukwa re, omanggen inom mondok pugagaikhemo hasukwa.

²¹ Hasukwasik, Yesus nen e ara yagatikhe mene a'nogo, at Petrus endawimo ebetikhesik he, mel yagatikhe: ”Noe. E ara homan fegen a'nogo arat pugagama yi heilenggen han o,” iluk yagatikhemo,

²² at Yesus nen he, it mel yagaisasikhe: ”Hit he, hinendawinggen Allah oba eberogoat himbiret fembik logoino.

²³ Sa nen endawimo menenei uan horok ebeti'lek, we, An igin mene yi higithogoat hilinglasigin o, iluk endawinggen Allah oba eberogoat himbiret fuluk, Tom yi sanokhogo i laut yenggele'ma pokhogo hela pin o, iluk igin halok he, at igin mene higithogoat Allah nen hilingisigin o, iluk eberogoat yagahisigi.

²⁴ A'nogo hilingiterek andi nen he, hiren yi mene ti mene Allah kino yagati logolik, hinendawimo nen, Arat wo'nisikhemo, iluk anggegep halok wokhisagain aro, iluk yagahisigi.

²⁵ Hit ekhe menla'luk samban ikhi logolik he, weak hilingitep mene nineisena Allah pogoroba mene nen sebelogo legetfisoageluk, afuni nen hit weagethinafa mene hiren wene inoba fuluk welagep halok he, andi sebelogo herakfisano.

²⁶ [A'nogo meneat he, hiren wene inoba fuluk welagep mene andi sebelogo legetfisigi'lek hinendawimo weak welagep halok he, hit weak hilingitep mene andi nineisena Allah pogoroba mene nen sebelogo legetfisagain lek aro,]” iluk yagaisasikhe.

”Yesus, hat nena mene eisewerek agendik hilingiti lagen,” iluk anema wanhukwa wene

²⁷ At Yesus nen wene a'nogo yagaisaluk he, hobuk o Yerusalem kwisukwa. Kwisukwasik he, at Yesus Allah awi wuri'mo a'nogo o silikwe lagik, wagik, ugunem he, it ap Allah eisewerek mene inogogwi kaindek omanogo inom, Allah ane lisu palek eisewerek mene omanogo inom, inaluendek omanogo inom, inom oba wagaukwa.

²⁸ Wagaukwasik he, mel yagatukwa: ”Hat nena mene eisewerek agendik, yi hilingitik, ti hilingitik, ikhi lagen. Nen, ap sa nen, Yi'nogo hilingiti logoino, iluk eisewerek logouwageluk menhobagaikhemo hilingiti lagen,” iluk yagatukwama,

²⁹ at Yesus nen he: ”An ogo re, heinok misigat ekhe wokhisagat. Heinok wokhisugunem hiren senggerogo yaganetep halok he, an nen ogo re, andi mene eisewerek agarik hilingiti lagi o, iluk, fakhogo yagahisagain aro.

³⁰ A'nogo meneat he, at Yohanes nen afuni ima pelaginafi lagaikhe a'nogo re, Allah pogoroba mene nen yagatikhemo pelaginafi lagaikhe a? Athe, afuni kweangma mene nen yagatukwama pelaginafi lagaikhe a. Yagane'ni ta!” iluk yagaisasikhemo,

³¹ it-it ikhi logolik he, mel isukwa: ”Niren he, Allah pogoroba mene nen yagatikhemo pelaginafi lagaikhe, iluk yagasumo re, aren he, Halok he, hiren Yohanes ane eberogoat iluk futfigi'lek welagep andi nenahalok, iluk nit yaganisanogo,” isukwasik he,

³² it afuni mondogaren, ”Yohanes andi Allah aneat yaganisikhi lagaikhe,” iluk ebe futfikhi lagaukwama andi nen he, afuni inailo nen mel isukwa: ”Niren he, Afuni nen yagatukwama pelaginafi lagaikhe, iluk yagasumo, elok legaro,” iluk isukwasik he,

³³ hobuk Yesus mel yagatukwa: ”Wene andi nit ninonggoro,” iluk yagatukwama, at Yesus nen he, mel yagaisasikhe: ”Halok he, an nen ogo re, Andi mene eisewerek agarik hilingiti lagi, iluk hit yagahisagain legaro,” iluk yagaisasikhe.