MARKUS 10 - Allah Wene Fano Wene Hupla Inane

”Hemiap waganek mene lologo herakfisogoin mondok lego,” iluk yagaisasikhe wene

¹ At Yesus nen wene a'nogo yagaisaluk, o andoma hebisaluk, o Yudea pisikhesik, i Yordan aik eliba kwe wulifikhe. Wulifikhemo re, afuni hokhorogoat hobuk at oba andogosi wagaukwama re, wene hundik-handik yagaisikhi lagaikhe hagat yagaisasikhe.

² Yagaisugunem he, ap Farisi mene ekhe Yesus oba wagaukwaat. Wagaukwasik he, mel yagatukwa: ”Yesus. Aben he, hemi waganek mene lologo hebisogoin eloga? Elo'lega,” iluk obabut paluogeluk heinok wanhukwa.

³ Heinok a'nogo wanhukwama, at Yesus nen he mel yagaisasikhe: ”At Musa nen wene ninggi'nogo komothinafikhe nogo,” iluk isikhemo,

⁴ iren he, mel yagatukwa: ”At Musa nen, wene komotninafi logolik he, yi'nogo isikhe: Ap ekhe nen hemi waganek mene herakfisageluk halok he, he yi hebe nabit. Arat herakhobagagi o, iluk lisu palogo wogosimbik he, elok herakfisagain o, iluk yagaisasikhe,” iluk Yesus yagatukwa.

⁵ A'nogo yagatukwama, at Yesus nen he, mel yagaisasikhe: At Musa nen, ”A'nogo elok hilingiti logogun,” iluk, komorogo lisu palhikhe andi re, hit hinendawimo mondok puk logolik yagahisugunem hinesanggo holu mondok elo'lek andi nen, andi nenat yagaisasikhe.

⁶ A'nogo yagaisasikhe meneat he, eroba Allah nen elalinafikhe andi faget he, lisu mel iluk palek werek: Ap elalhik, he elalhik, elalinafikhe.

⁷ Andi nen, aben agaisa eisena herakfisaluk agwe emberek fano logolik he,

⁸ it andi, inebe pire meneat he, misigat logouwago, iluk isikhemo lisu palek werek andi nen he, hobuk it andi inebe pire fuk. Misigat agaikhasik werego.

⁹ At Allah nenat a'nogo emberek hunogo fisasikhesi'mo re, it afuni inonggwaregen minggilugun mondok lego,” iluk yagaisasikhe.

¹⁰ A'nogo yagaisasikhesik he, at agoromi ane wanhi lagaukwa mene omanogo inom aiba kwisukwasik, Yesus oba heinok wanhi logolik mel yagatukwa: ”Wene yagaisegen andi ebe ninggi'nogo faget senggerogo yaganisan,” iluk oba heinok wanhukwa.

¹¹ Heinok wanhukwama, at Yesus nen he mel yagaisasikhe: ”Ap sa nen, agwe waganek mene lologo herakfisaluk he, he hunogo mene ekhe wanhe halok he, agwe attak mene andi eil salogo, agwe hobuk mene emberek pailagat hilingisugun o.

¹² Nen, it hemi sa nen inaguni waganek mene herakfisaluk ap hunogo mene ekhe woginabi laga halok he, pailagat hilingitesik werego,” iluk yagaisasikhe.

”Yenggerugwi magendek mene andoma an noba wesuago,” iluk yagaisasikhe wene

¹³ At Yesus nen, wene a'nogo yagaisasikhesik were'ma, it afuni ekhe nen yenggerugwi magendek mene Yesus nen enggi fagisoageluk oba woginarek wagaukwa. Wagaukwama re, at agoromi ane wanhi lagaukwa mene omanogo nen wenagisasukwa.

¹⁴ A'nogo wenagisugunem, at Yesus eilenggen isasikhesik a'mage lagasikhesik he, mel yagaisasikhe: ”Afuni inobabut it yenggerugwi ari inobabut andi hangge hilinglasugun halok he, Allah nen awe a'ma fisikhere'ma andoma eisewerek asugun andi nen he, yenggerugwi magendek andoma an noba wesuago. Wene palu fugo.

¹⁵ Sa nen, yenggerugwi magendek mene Allah nen awe a'ma fisikherek wene andi waluk kwagarek andi hak kwigi'lek halok he, kwigin mondok lego, iluk eberogoat yagahisigi,” iluk yagaisasikhe.

¹⁶ A'nogo yagaisasikhesik he, yenggerugwi magendek omanogo inebe lombok agoumo woginafikhesik enggi inunggul sebelogo, fanotfisikhi logolik, ”Allah obabut fano a'nogo nen fanothinafi logouwago,” iluk yagaisilik lagaikhe.

Ap ekhe enggi werek mene Yesus oba wagaikhe wene

¹⁷ Wene a'nogo yagaisaluk he, at Yesus o andoma nen kwe pikhit lageluk lagunem, ap ekhe fungusegat oba wagaikhe. Wagaikhesik eindep awi yagaisogo awe a'ma hu'lasi wagaikhesik he, mel yagatikhe: ”Guru noe. Wene yaganisikhi lagen andi, hat fano o. An nabulal-habulal hilingnabuagen he, an nobabut ninggi'nogo hilingiti logogin,” iluk yagatikhemo,

¹⁸ at Yesus nen he, mel yagatikhe: ”Hat fano o, iluk yaganeten andi ninggi'nogo nen yaganeten. Ap ekhe fano lego. We, at Allah alegat fano o.

¹⁹ Wene aren, ”Yi'nogo hilingi'no, ti'nogo hilingi'no,” iluk komotninafi logolik, mel isikhemo werek: Afuni inebe inoasugun lego. Pailak hilingisugun lego. Yogot wanugun lego. Hineranen inabok palugun lego. Lalinabugun lego. Hineisena hinagaisa inane hologo agaugwerinafi logogun o, iluk komotninafikhe wene a'nogo hat helu aro,” iluk yagatikhemo,

²⁰ aren he, mel yagatikhe: ”Noe. Wene yaganeten mene andi mondogat he, an nebe yenggerek oba nenat nesanggo hologo higithogo hilingitirek mene aro,” iluk yagatikhemo,

²¹ at Yesus eilenggen oba kwelakhasikhesik endawi agaikhesik he, mel yagatikhe: ”Hat he, wene misigat enek ekhe hilingiti'lek welagen o. Hat yoma nen lambik he, hangge yi mene ti mene andoma mondogat it ekhe inoba awasi lan o. Awasimbik he, onggo wokhesugun mene andi, it afuni ekhe inangge lek inelagaik mene andi sumburogo wogisano. A'nogo wogisegen halok he, hat pogoroba mene hokhoat eisewerek asigin o. Halok, a'nogo arat sumburogo wogisaluk he, an nombo'ne nikhi logoinogen we'no,” iluk yagatikhemo,

²² wene andi esanggo holhikhesik he, angge yi mene ti mene mondok hokhorogo welagaikhe andi nen he, elokhe age lagasikhesik he, endawimo weak a'luk lagaikhe.

²³ Lagaikhemo, at Yesus nen he, agoromi ane wanhi lagaukwa mene omanogo eilenggen isilik lagaikhesik he, mel yagaisasikhe: ”Afuni inangge hokhorogo werek mene re Allah awe a'ma fisikhere'ma andoma ninggi'nogo ku he aro,” iluk yagaisasikhemo re,

²⁴ wene yagaisasikhe andiba inailo agaukwa. Inailo agaukwama, at Yesus nen hobuk mel yagaisasikhe: ”Nagoromi. Allah nen awe a'ma fisikhere'ma andoma ninggi'nogo ku he aro.

²⁵ Wam unta hokho mene andi re, lisu enggetma kwelabumo elok kwigin meneat he, it afuni inangge hokhorogo werek mene andi Allah nen awe a'ma fisikhere'ma andoma ninggi'nogo kugun. Mondok elo'ego,” iluk yagaisasikhe.

²⁶ A'nogo yagaisasikhemo, it inailo hokho agaukwasik, it-it mel isukwa: ”Halok he, Allah nen afuni sani hak elok telinabigin he,” iluk isukwa.

²⁷ A'nogo ugunem, at Yesus eilenggen it inoba fesikhesik he, mel yagaisasikhe: ”Afuni nen hilingisugun mondok elo'lek meneat he, Allah nen hilingisu lek mene ekhe werek fuk. Aren yi wene ti wene mondogat hilingisu hagenego,” iluk yagaisasikhe.

²⁸ A'nogo yagaisasikhemo at Petrus nen he, mel yagatikhe: ”Mene re, nit hat hombo'ne nikhi logouwogeluk yi mene ti mene mondogat herakfisaluk wagosik nikhi lago mene yi nek he, ningginik,” iluk yagatikhemo,

²⁹ at Yesus nen he, mel yagatikhe: ”Nane eberogoat yagahisak. Sa nen, an endawi nen, wene fano wene yi amolo nen, awi wurik inom, oe agot inom, erugwi inom, agaisa eisena inom, againafuri inom, eabu siok inom, herakfisaluk waga halok he,

³⁰ andi ebe lombok obali'mo re, yogondak ya awi wurik inom, agaila'lak inom, erugwi inom, agaisa inom, againafuri inom, eabu siok inom, hokhorogoat 100 hangge wogetu kwelek he, afuni nen weagetfikhi logogun aro. Weagethinafu were'ma, hobuk o wurep oba hilinglasigin andi hilinglaga halok he, nabulal-habulal wogosigin aro.

³¹ A'nogo meneat he, it afuni hokhorogo attak agaikha mene andi hobuk asugun o, nen hobuk mene andi attak asugun o,” iluk yagaisasikhe.

”An noasugun o,” iluk enggi pireba yagaisasikhesigen, hobuk ekhe yagaisasikhe wene

³² Hobuk he, at Yesus a'nogo yagaisasikhesik he, agoromi ane wanhi lagaukwa mene inom o Yerusalem puogeluk, kwe ebekhalem pikhi logolik he, at Yesus kwe wanhikhemo it agoromi omanogo inailo agaukwasik fogeratukwa. Nen, it afuni ekhe inombo'ne pikhi logolik inailo agaukwaat. A'nogo inailo agaukwasik, pisukwa-pisukwa it ap inebe 12 nen omanogo inale'ma tegelogo woginarek pikhi logolik, aren he mel yagaisasikhe: ”An hobuk yi'nogo hilingnabugun, ti'nogo hilingnabugun,” iluk yagaisilik pisikhe.

³³ A'nogo yagaisikhi logolik he, mel yagaisasikhe: ”Nagoromi. Nit yogondak o Yerusalem pikhi lago. Arat pumo nen he, an abat ta'lasi wagagi a'nogo re aben yonggo lambik, an nebe it ap Allah eisewerek inogogwi kaindek inom, Allah ane lisu palek eisewerek mene inom, inenggiba nobagaumo ap ekhe nen noasuageluk wene noba fembik he, iren it ap endakwe mene inenggiba nobagagun o.

³⁴ A'nogo nobagaumo re, iren inane asegen yaganetik, wesi nobagagik, yei lambisok noatik, imbik he, nebe arat noasugun o. Noatunem he, nenggi pire warek logombigen, nenggi ekheba neluk asigin o,” iluk yagaisasikhe.

Yakobus Yohanes emberek Yesus ekhe kino yagatukwa wene

³⁵ Yesus nen wene a'nogo yagaisasikhesik were'ma re, ap Zebedeus againafuri Yakobus Yohanes emberek Yesus oba horokhogo wagaukwasik he, mel yagatukwa: ”Noe. Niren ekhe kino yagahetunem, haren hilingnisanogeluk hoba wago,” iluk yagatukwa.

³⁶ Yagatukwama, aren he, mel yagaisasikhe: ”An nen ninggi'nogo hilinghinabuageluk hinamolo nen wagep,” iluk yagaisasikhemo,

³⁷ iren he, mel yagatukwa: ”Hat hobuk Henupogot a'luk hilingitunem, afuni nen fogethafi logogun andi sambul he, ninom kainat logouwogen he, nit ekhe henggi ebekwe, nen ekhe henggi harekwe, logouwageluk menninobagainogeluk wago,” iluk yagatukwama,

³⁸ aren he, mel yagaisasikhe: ”Kino yaganetep andi re, wene ebe hinonggorat logolik yaganetebo. An yi enggin ti enggin hilingnabugun andi re, hit a'nogo hilinghinabugun elok anggegep?” u hak he: ”An nagai hinago nagain andi re, hit elok nogoin anggegep? Nen, ima pelaginafarek hak pelaknobagagun andi re, hit elok pelakhinobagagun anggegep?” iluk henarogo yagaisasikhemo,

³⁹ iren he: ”Elok nogoin o,” iluk yagatukwama, aren yagaisikhi logolik, ”An yi enggin ti enggin hilingnabugun andi hak, hit a'nogoat hilinghinabugun o. Nen, ima pelaginafarek hak, an pelaknobagagun andi re, hit a'nogoat pelakhinabugun o.

⁴⁰ Meneat he, hat ekhe an nenggi ebekwe, nen, ekhe nenggi harekwe ninom kain logouwogeluk, an nen menhinobagagin elo'lego. We, attak at Allah endawimo nen It tak menfisagain, iluk anggasikhe mene werego,” iluk yagaisasikhe.

⁴¹ A'nogo yagaisugunem he, at Yesus agoromi ane wanhi lagaukwa mene fena inebe 10 nen inesanggo holhukwasik he, ina'mage Yakobus Yohanes emberek inoba fesukwa.

⁴² Ina'mage a'nogo inoba fesukwama re, at Yesus nen inebe mondogat andogosuageluk wolisasikhemo andogotukwama mel yagaisasikhe: ”Nagoromi. It afuni endakwe mene inogogwi pemerintah mene nen, hit hinogogwi kaindek he, niraro, iluk, inane ning-nanghogo yagaisigik, nen, it ap kaindek andi nen, set kwil-kwalhogo yagaisigik, agarek andi hinelu.

^43-45 Mene re, hiren it hilingitarek andi hak a'nogo hilingiti logogun mondok lego. An abat ta'lasi wagagi a'nogo re, hit afuni nen lebe'niikhi logobagaigeluk wagagi lego. Athe, an hit lebethisikhi logolik, hinebe hele homago hak welagep mene andi hinebe hokhorogoat hele fikhalhinabigeluk anat noasuageluk wagagi andi. Andi nen he, hit ekhe sa nen, ”An inoe kain asigin,” iluk anggugu halok he, hinagorat asuak. Nen, hit ekhe sa nen, ”An nenuwerek asigin,” iluk anggugu halok he, at ebe hit mondogat hinamingmingengge asuago,” iluk yagaisasikhe.

Bartimeus eilenggen mum mene higitikhe wene

⁴⁶ At Yesus ebe inom, agoromi ane wanhi lagaukwa mene omanogo inom, wene a'nogo ilik pisukwa-pisukwa re, o Yeriko sili lekwe nen enda'ma wulifunem he afuni fena inebe hokhorogoat inombo'ne wulifukwa. Wulifunem, ap Timeus amlogo enu Bartimeus eilenggen mum mene yi mene ti mene ambe kino weak ikhi lagaikhe mene andi ebekhalem hurek were'ma wulifukwa.

⁴⁷ Wulifunem afuni nen he: ”Yesus awi Nasaret mene a'nogo weri'logo o,” iluk isukwama, at ap a'nogo esanggo holhikhesik he, ane hokhorogo Yesus mel yagatikhe: ”Yesus Daud en tagongge mene noe a! Hendawi nean o,” iluk yagatikhemo,

⁴⁸ it afuni hokhorogo omanogo nen he, ”Hane o,” iluk wenagetukwa meneat he, hobuk ebenagaik ane hokhorogo mel yagatikhe: ”Daud en tagongge mene noe a! Hendawi nean o,” iluk yagatikhemo,

⁴⁹ at Yesus ebe menlagaikhesik he, afuni omanogo mel yagaisasikhe: ”Wesuagen wolhani o,” iluk yagaisasikhemo, iren he, wolhikhi logolik he, mel isukwa: ”Yesus nen wolhabi'logo andi nen he, hendawimo hagaiyek a'luk menlasimbik lano o,” iluk yagatukwa.

⁵⁰ A'nogo yagatukwama re, asu endakwe laberek mene nonggologo lakfisaluk he, uare'ma fesakhogo menlagaikhesik he, Yesus oba wagaikhe.

⁵¹ Wagaikhemo, aren yagati logolik: ”An nen ninggi'nogo hilinghabuageluk yaganeten,” iluk heinok wokhasikhemo re, ap eilenggen mum mene a'nogo nen he, mel yagatikhe: ”Noe. Neilenggen fano hilingnabinogeluk yagaheti o,” iluk yagatikhemo,

⁵² at Yesus nen he, mel yagatikhe: ”Hendawinggen noba eberogoat himbiret fegen andibaat fano agen o. Halok he, lan o,” iluk yagatu kwelek aremnogoat eilenggen mum mene a'nogo fano agaikhesik he, Yesus ebekwe lagunem ombo'ne inomat lagaukwa.