MARKUS 1 - Allah Wene Fano Wene Hupla Inane

Yohanes nen ima pelaginafi logolik hilingiti lagaikhe wene

¹ Fano wene, Yesus Kristus, Allah amlogo nen hilingiti lagaikhe wene yagahisak.

² Wene andi re, eroba re, at Yesaya Allah ane yagaisikhi lagaikhe mene a'nogo nen lisu palogo fesikhe hagat hilinglagaikhe. A'nogo lisu palhi logolik mel isikhe: ”At Allah nen he, Namlogo e. Hat hobuk kwe lagainkwe, hanggwe yakhafi logouwageluk ap ekhe ayonggo fuluk attagat lakfigimo o.

³ At ebe o leimo afuni le'ma andoma ane kweti logolik he: Eiga! Ninoe Enupogot wesiginkwe, kwe fanorogo yatik, kwanirek mene higithogo yatik, ikhi logoni o, iluk wolisili'logo,” iluk isikhemo re, at Yesaya nen lisu palogo fesikhe andi.

⁴ Wene lisu palek werek andi higithogoat, at Yohanes ebe o leimo afuni le'ma wagaikhe andi. Wagaikhesik he, ima pelaginafik, wene yagaisigik, ikhi logolik, mel ikhi lagaikhe: ”Wene hinoba mene Allah nen sebelogo legetfisoageluk he, hit weak hilingiti lagep mene andi herakfisaluk hinobabut hebela'ni. Hinobabut hebelasumo, an nen ima pelakhinafi logogin o,” iluk yagaisikhi lagaikhe.

⁵ A'nogo yagaisugunem he, it afuni o propinsi Yudea ekhe mondogat mene inom, o kota Yerusalem mene inebe mondogat inom, at oba andogosi waga lagaukwa. Andogosi wagaukwasik he, yi weak ti weak hilingiti lagaukwa mene fakhogo herakfisugunem, aren i Yordan ima pelaginafi lagaikhe.

⁶ Andoma pelaginafi logolik wam unta esi mene igisogo asu laberigik, agap mene nonggologo fanorogo hilingisogo alinggin ikhigik, ikhi lagaikhe. A'nogo ikhi logolik, amburu pulue mene ninggik, kin amusu enggama mene ninggik, ikhi lagaikhe.

⁷ Ariginhi logolik, mel yagaisikhi lagaikhe: ”An nebe yenggerek nomame lek mene wagi yi, ap kain omame hokho mene hobuk wesigin o. At ebe kain omame hokho andi nen he, at eisok agut yelik mene an nen neindep awi yakfulugen fikhaligin he, elo'lego.

⁸ Nen, an nen, we, ima pelakhinafi lagi meneat he, at ebe wesimbigen he, ima pelakhinabu hak, Allah Areagun hinoba pelakfei wesigin o,” iluk yagaisikhi lagaikhe.

Yohanes nen Yesus ima pelafikhe wene

⁹ At Yohanes nen wene a'nogo yagaisugunem he, Yesus o Galilea tonggwe enu Nasaret en oba pisikhemo re, i Yordan ima pelafikhe.

¹⁰ Ima pelafikhemo aik oba wulibi wesigin ha'ma re, Allah Areagun pogot healogo sue pel hangge ot oba labok i pi wagunem eilenggen hasikhe.

¹¹ Eilenggen hugu kwelek aremnogoat, Allah ane pogoroba nen mel isikhe: ”Hat hebe an namlogo nendawinggen hundik mene. Hat faget nendawimo nagaiyek hakhigirego,” iluk ane pelakfei wagaikhe.

Iblis nen Yesus endawimo kagaligeluk waga lagaikhe wene

¹² Allah ane pelakfei wagu kwelek aremnogoat, Allah Areagun en he, Yesus o leimo afuni le'ma waluk lagaikhe.

¹³ Waluk lagaikhemo re, o leimo afuni le'ma andoma enggi 40 hari werek kwelek, Iblis nen endawimo kagaligeluk oba waga lagaikhe. O andoma re, paik aiba were'ma malaikat Allah pogoroba nen yonggo pelakfisa wagarek mene omanogo ekhe pi wagaukwasik he, kwalogo welagaukwa.

Yesus o Galilea wagaikhesik Simon lak inayonggo fesikhe wene

¹⁴ Hobuk he, Yohanes a'nogo enggi hele warogo fesukwama, at Yesus o Galilea tonggwe lagai wagaikhesik he, Allah ane fano wene a'nogo yagaisilik nikhi lagaikhe.

¹⁵ Yagaisilik nikhi logolik he, mel ikhi lagaikhe: ”O Allah awe a'ma hinobagagin a'nogo arat horogasi waga o. Halok he, hit weak hilingiti lagep mene herakfisaluk hinobabut hebelogo fano wene yi eberogoat iluk futfeni o,” iluk yagaisilik nikhi lagaikhe.

¹⁶ Yagaisilik nikhi logolik he, i Galilea yenggele'ma esanggokwe laga logolik, Simon agot Andreas emberek hundik-handigat ikan at wanhi lagaukwa andi nen he, ikan wanuogeluk su ikan su ima pelafunem eilenggen yerisasikhe.

¹⁷ Eilenggen yerisasikhesik he, mel isikhe: ”Ikan wanhi lagep andi hak, afuni a'nogoat woginabik nikhi logobagaigen, yagahisagen an nombo'ne we'ni o,” iluk yagaisasikhe.

¹⁸ Yagaisasikhemo re, aremnogoat inasu ikan su andoma herakfisaluk he, at ombo'ne lagaukwa.

¹⁹ Ombo'ne lagaukwama horogat lagaukwasik he, Yesus eilenggen yethasikhe hak he, ap Zebedeus againafuri Yakobus agot Yohanes emberek inom e so elema logolik inasu ikan su tegelhunem eilenggen yerisasikhe.

²⁰ Eilenggen yerisaluk he, aremnogoat wolisasikhe. Wolisasikhemo re, ineisena inom ap onggo wogisageluk inayonggo fesikhe mene inom, e so elema fisaluk he, Yesus ombo'neat lagaukwa.

Ap ekhe munggwarengge obabut weak mene endawimo kwisikhesik were'ma Yesus nen henegeisogo wulakfesikhe wene

²¹ It omanogo Yesus ombo'ne lagaukwasik o Kapernaum kwisukwa. Kwisukwasik he, inenggi sabit oba Allah faget weat logolik, o afuni Yahudi mene samban agarek oba kwisikhesik, at Yesus nen wene yagaisasikhe.

²² Yagaisugunem it afuni omanogo nen he, mel isukwa: ”Ap Allah ane lisu palek eisewerek mene nen yaganisagarek hangge ili'logo lego. We, aren he, wene ebe eisewerek mene nen u hak ili'logo andi, nailo e,” iluk fogeratukwa.

²³ A'nogo fogerati lagaukwa andi sambul he, ap ekhe munggwarengge obabut weak mene endawimo kwisikhemo welagaikhe mene, it afuni Yahudi mene samban agarek oba inoba kwisikhe. Kwisikhesik he, ane hokhorogo mel isikhe:

²⁴ ”Yesus aiba Nasaret mene yi! Haren ninggi'nogo hilingninabigeluk wagen. Nit weagetninabigeluk wagen a? Hat hebe re, Allah onggwarek faget menhobagaikhesik lakhobagai wagama wagen andi, an nen futhobagagi o,” iluk ane hokhorogoat yagatikhe.

²⁵ A'nogo yagatikhe meneat he, at Yesus nen wenagati logolik, ”Hane. Ap yi endawimo nen henegeisogo wulibi lan o,” iluk yagatikhemo re,

²⁶ munggwarengge obabut weak mene a'nogo ap a'nogo endawimo nen wilibigeluk ikhi logolik, ap a'nogo oak lei'leiget hikhi logolik ane kwerik wulifikhe.

²⁷ Wulifikhemo re, it afuni omanogo nen mel isukwa: ”At ane ikhe andi ningginik. Wene andi ket hunogoat wene eiseweregen yaganisili'logo higi. Aren munggwarengge obabut weak mene wenagisugunem he, at ane inesanggo hologo hilingiri'lagwi andi nailo e!” iluk fogeratukwa.

²⁸ A'nogo fogeratukwama re, at Yesus abok waluk o Galilea tonggwe yi awi ti awi weak-weagat wialik lagaukwa.

Yesus nen Simon agwe agaisa inom, afuni fena hokhorogoat inom, ou higirinafikhe wene

²⁹ At Yesus inom, Yakobus Yohanes emberek inom, agoromi ekhe inom, o afuni Yahudi mene samban agarek oba nen wulibi wagaukwasik he, Simon inom, Andreas inom, inaiba lagaukwa.

³⁰ Inaiba lagaukwasik he, oloba kwisukwa re, Simon eamalhe oba ou aganhan hokhorogo logolik wengik were'ma kwisukwa. Kugunem aremnogoat he, iren he: ”He yi yi'nogo nen werego,” iluk Yesus yagatukwa.

³¹ Yagatukwama re, he a'nogo era'lu horokhogo lagaikhesik he, enggi fagaisogo menfesikhe. Menfugunem he, oba ou aganhan a'nogo legagaikhe. Ou legagaikhemo re, arenat leberisikhi lagaikhe.

³² A'nogo leberisugu were'ma, hu'mokwe mo ubukhogo lagaikhesi'mo nen, it afuni nen he, it ekhe ou wanhi lagaukwa mene inom, munggwarengge inobabut weak mene inendawimo kwisukwasik welagaukwa mene inom, woginarek Yesus oba wagaukwa.

³³ Wagu kwelek he, afuni ekhe o andoma mene mondogat he, olulu andogosi wagaukwaat.

³⁴ Andogosi wagaukwama re, it yi ou ti ou wanhi lagaukwa mene inebe hokhorogoat fano higirinafik, munggwarengge inobabut weak mene inebe hokhorogoat afuni inendawimo kwisukwasik were'ma henegeisogo wulakfisigik, isikhe. Ugunem he, it munggwarengge inobabut weak mene omanogo nen at ebe futfesukwa andi nen he, ”Hinane ugubo,” iluk wene palhikhe.

Yesus nen o sili ekhema fano wene yagaisilik lagaikhe wene

³⁵ A'nogo higirinafi lagaikhesik he, nogo isikhesik o wei igeluk ugu kwelek o wigik eluk a'luk wulifikhe. Wulifikhesik he, o leimo afuni le'ma lagaikhesik samban ikhi lagaikhe.

³⁶ A'nogo i lagaikhemo re, it Simon agaila'lak inom hobuk Yesus herarik lagaukwa.

³⁷ Herarik laga lagaukwasik, ebe were'ma heratukwasik, mel isukwa: ”Afuni mondogaren, herakhabi'lagwi o,” iluk yagatukwa.

³⁸ Yagatukwama aren he, mel isikhe: ”Ninera'lukwe o sili ponggwe-manggwe yoma wene fano wene yagaisilik lageluk wagi andi nen he, yagaisilik louwogen we'ni o,” iluk yagaisasikhe.

³⁹ Yagaisasikhesik he, o Galilea tonggwe afuni Yahudi mene samban agarek oba kwe kwisikhesik he, wene fano wene a'nogo yagaisigik, munggwarengge inobabut weak mene afuni inendawimo kwisukwasik were'ma henegeisogo wulakfisigik, ilik laga lagaikhe.

Yesus nen ap ekhe oumo henanggo hangge mene higitikhe wene

⁴⁰ A'nogo higirinabik lagunem he, ap ekhe oumo henanggo hangge inailo mene oba welagaikhe mene Yesus oba wagaikhesik he, eindep awi yagaisogo, hai wati logolik he, mel yagatikhe: ”Noe halabok e. Hat fano higi'nabigin anggegen halok he, elok fano higi'nabigin aro,” iluk ane elagaik ane yagatikhe.

⁴¹ Yagatikhemo re, at Yesus nen, at ebe endawi agaikhesik he, enggi fakfesikhesik mel isikhe: ”An nen fano higithabigeluk ikhi lagi. Halok he, hoba fano ame o,” iluk yagatikhe.

⁴² Yagatu kwelek, aremnogoat oumo henanggo hangge a'nogo legagaikhesik oba fano agaikhe.

⁴³ Fano agaikhemo re, at Yesus nen ebe lakfeigeluk ane ninghogo komorati logolik,

⁴⁴ mel yagatikhe: ”Yesus yi'nogo higitnafe iluk, afuni ekhe mondok yagaisagun o. We, ap Allah eisewerek mene eilenggen heowagen oba lambik, mel hilingi'no. At Musa nen ikhi logolik he, ”Afuni inoba fano arik, Allah faget ekhe fisano,” iluk isikhe higithogoat, ”Oba fano agama, iluk futhobagauwagen, Allah faget ekhe inobagai lano,” iluk yagatikhe.

⁴⁵ A'nogo yagatikhe meneat he, at a'nogo nen afuni hesanggeat yagaisikhi logolik he: ”Yi'nogo higitnafe o,” iluk abok fano wialarik lagaikhe andi nen he, at Yesus o kota yi awi ti awi andoma kwilik ebe weinamhogo nikhi logogin elok legagaikhemo re, leimo afuni le'ma lagaikhesik welagaikhe. A'nogo welagaikhe meneat he, afuni o yi awi ti awi andoma nen oba andogosi waga lagaukwa.