KOLOSE 4 - Allah Wene Fano Wene Hupla Inane

¹ Nen, hit ap inogogwi kaindek mene yi, hit hinendawimo nen he, ”Nirogo, ninoe Enupogot ebe pogoroba werego,” iluk futfuluk he, hinagoromi hinamingmingengge mene andi, yi mene ti mene wogisagarek higithogoat wogisikhi logoino o.

”Samban yi'nogo ikhi logolik, hinobabut yi'nogo hilingiti logoino o,” iluk isikhe wene

² Samban he, Allah hai wati logolik, hinaberali agi'lek hundik-handigat ikhi logolik, hinebe hebelogo logoino o.

³ Samban ikhi logolik, nit faget he, mel ikhi logoino: ”Allah nineisena. Wene Kristus nen hilingitikhe wene, attak hendawimo hinago welagaikhe mene a'nogo, it Paulus lagen yagaisilik nikhi logouwageluk, kwe hurisan o,” iluk, samban nit faget ikhi logoino o. Wene andi fagerat nenggi hele warogo nobagagama welagi.

⁴ Wene andi, an nen yagaisagain higithogoat furogo yagaisikhi logoigen he, samban ikhi logoino o.

⁵ It afuni Allah ane inonggot mene faget he, hit hinendawimo mondok kagalek logolik: ”Nit Allah againafuri hilingisugun mene fanoasuak yabaat hilingiti logouwok,” iluk andi meneat hilingiti logoino o.

⁶ Hinane yi mene ti mene faget it ekhe yagaisikhi logolik, yi mene ti mene mayu folhunem enduk fano agarek hak: ”Wene andi fano o,” iluk wanuageluk, hinane liokhogo yagaisikhi logoino o. A'nogo yagaisugunem, it hinoba heinok wanhunem, wene onggo inebe lombok yagaisobagaigen, hinelurogo logoino o.

Wene wurep kobokhogo hai warinafikhe wene

⁷ At Tikhikus ninagot ninendawi mene, nit ninomat ninoe Enupogot amingmingengge logolik, at faget obabut hombunhogo hilingiterek mene nen wene an nabok hobuk yagahisa wesigin a'naga o.

⁸ Hiren he: ”It inebe a'nogo werek higi,” iluk, wene hinelu asimbik he, hinendawinggen hambuk uageluk, andi fagerat hinoba lakfei wesigin andi.

⁹ At inom wesuageluk, ninagot Onesimus, ebe ap hit mene obabut hombunsek ninendawi mene a'nogo, emberegat lakfisa wesigin andi. It wesimbik he, wene nit yoma hilingiti lago mene mondogat yagahisa wesugun o.

¹⁰ Aristarkhus an nemberek ninenggi hele warek welago mene nen hai wathinafik, Barnabas agailak Markus a'nogo nen hai wathinafik, aga o. At Markus faget wene attak yagahisasigi hagat, at ebe hinoba waga halok, fanorogo wanino.

¹¹ At Yustus, enu ekhe Yesus a'nogo nen, hai wathinafe aro. Inagap inenggalimo mene palek mene re, inebe henagan enek Allah awe a'ma logogun wene a'nogo ninomen yagaisikhi logolik lebetniugunem nendawimo fano ari'logo.

¹² At Epafras, Kristus Yesus amingmingengge ebe hit meneat a'nogo nen, hai wathinafe aro. Aren he, hit hinendawimo nen: ”Allah ane andi eberogoat,” iluk futfuluk he, hinendawinggen wurik asimbik hinebe mendegat logolik he, yi mene ti mene Allah endawimo anggikherek hak hilingitu logobagaigeluk samban hit faget ninghogo ugu mondogat welagarek.

¹³ A'nogo ikhi logolik, hit faget inom, afuni o Laodikia mene faget inom, Hierapolis mene faget inom, omamerogo hilingiri'logo iluk, an nen obabut palhirigen yagahisikhi lagi andi.

¹⁴ At Lukas, ebe dokter logolik ou higirinaferek mene ninendawi mene a'nogo nen hai wathinafik, at Demas nen hai wathinafik, aga aro.

¹⁵ It ninerugwi ninagaila'lak Allah againafuri o Laodikia welagaikharek mene andoma inom, he Nimfa a'nogo inom, Allah againafuri ekhe at awiba Allah wene faget andogotarek mene inom: ”Paulus lagen hai wathinafa,” iluk yagaisano o.

¹⁶ Wene lisu palogo lakfei wago mene andi, arat enu salhep halok he, it Allah againafuri o Laodikia andogori'lagwi mene inesanggo holuagen enu saluageluk lakfeino. Nen, it Laodikia mene inoba lakfigi a'naga, hit hinoba lakfei wagunem, enu salinoaro.

¹⁷ At Arkhipus a'nogo wene mel iluk yaga'no: ”Ninoe Enupogoren yabu at faget yi'nogo hilingi'no iluk hayonggo fikhe mene andi, wurep kobokhogo hilingi'no,” iluk yaga'no.

¹⁸ Nen ekhe yi re, an Paulus nonggwarek nenggi nen lisu palogo hai wathinafi o. Hiren he: ”Paulus enggi hele warek werek,” iluk noba eberek mondok logoino o. Allah obabut fano a'nogo nen fethinarek logouwago.