KOLOSE 3 - Allah Wene Fano Wene Hupla Inane

¹ At Allah nen he, Kristus eluget fikhi logolik, hit hinomat hineluget hinafikhemo welagep andi nen, yi mene ti mene Kristus ebe pogoroba Allah era'lu enggi ebekwe kainat welagarek oba andoma mene hela louwogeluk, hinomamerogo hilingiti logoino o.

^2-3 Hinebe wa'lagagipsik he hobuk Kristus hinomat hineluk logogun mene Allah nen oan sele'mat figi'lek hinago werek andi nen, hinendawimo re, yi mene ti mene kweangma mene oba ebeti'lek logolik he, pogoroba mene faget enek, oba ebeti logoino o.

⁴ Ebetu were'ma, at Kristus ninebe hobuk nineluk mondok logouwageluk hilingninaferek mene a'nogo weinamhogo wagunem he, hit at hinomat weinam asumo foget hinabugun andi.

Hinobabut attak mene herakfisaluk he, ket mene wanino isikhe wene.

⁵ Andi nen he, hinobabut hinetogat logolik, hinendawimo nen yi namolo ti namolo anggikhi lagep mene andi mondogat watfisikhi logoino o. Hinobabut andi re, pailak hilingitarek mene andi inom, inendawimo nen namolo iluk anggagarek mene andi inom, inendawinggen nenggaresik inoba aigage lagaikherek andi inom, ineilenggen yerisaluk inendawimo nen namolo e anggagarek andi inom, tugwi kembuba himbirik hak, inendawimo nen: ”Yi mene ti mene an mene nek logoilep,” iluk anggagarek andi inom, hinobabut andi mene mondogat warogo herakfisikhi logoino o.

⁶ It afuni Allah ane holu inabit mene nen inobabut a'nogoat hilingitunem, Allah a'mage lagambik, weagerinabigin werego.

⁷ Hit attagat he andi mene fagerat hilingiti logolik, hinobabut a'nogoat hilingitu welagagip.

⁸ A'nogo meneat he, yogondak hit hinobabut ekhe yi mene mondogat herakfisanoat. Ina'mage lagaikherek andi inom, ina'makwe het-pet ikherek andi inom, it ekhe weagerinafarek andi inom, inambeba re inabok weak palhik, weak hilingitarek mene asegen abok igik agarek andi inom, herakfisikhi logoino o.

^9-10 Su attak mene nonggologo lakfisaluk he, hobuk ket mene labetarek hak, hit hinobabut attak hilingiti lagagip mene herakfisaluk, hobuk hinobabut ket mene wanhigip andi nen, hineranhogo wene ikhi logogubo. Hinobabut ket mene andi, Allah nenat elalhinafikhemo andi nen he, at onggwarek obabut hangge hilingla'luk he, ebe mondok furogo hinelu asuageluk, hobugalebat hilinghinabi'logo andi.

¹¹ A'nogo hilinghinafunem he ninebe mondogat ninoe Enupogot Kristus alegatma andi nen ninebe mondogat at ninom hundik welago andi nen, inunggulenu Yunani mene igik, Yahuri mene igik, agarek andi inom, inagap inenggalimo mene palek mene igik, palek lek mene igik, agarek andi inom, inane unggut palek mene igik, inebe Yali-Somagai mene igik, agarek andi inom, inamingmingengge mene igik, inale'ma mene igik, agarek andi inom, ikhi logogun lek mene welagep andi.

¹² Hit hinebe Allah nen wenagaisogo onggwarek faget fakhasikhesik he: ”An nonggwarek nagainafuri o,” iluk endawirogo welagarek andi. Halok he su ket mene labetarek hak, hinobabut yi mene wanino. Inebe inendawirinafarek mene andi inom, inobabut enago welagaikharek mene andi inom, inonggwaregen fogerakhigi'lek inendawinggen seberogo welagaikharek mene andi inom, inobabut liokhogo hilingitarek mene andi inom, inafe morogo welagaikharek mene andi inom, hinobabut andi mene wanino.

¹³ Hit-hit ekhe nen ekhe weak hilinghinafunem, ambumet figi'lek hinafe morogo logolik, sebelogo legetfisikhi logoino. Hit weak hilingiti lagagip mene, ninoe Enupogoren sebelogo legetfisasikhe andi hak, hit-hit a'nogoat sebelogo legetfisikhi logoino o.

¹⁴ A'nogo hilingiti logolik, ebe esin hangge re, afuni inebe hinendawirogo logoino o. Inendawirogo welagaikharek mene andiba re, hinebe misiga'luk lambulogo logou hagat logogun andi.

¹⁵ At Allah nen Kristus ebe misigat mene hinom lambulogo hundik logobagaigeluk hinayonggo fesikhe andi nen, yi mene ti mene faget hilingisuogeluk hinendawimo nen he: ”Kristus nen ninom lambulogo ninobagasikhemo welago,” iluk, wene andiat esinet fikhi logolik he, higithogo hilingiti logoino o. A'nogo hilingiti logolik, Allah ebe hai wati logoino o.

¹⁶ Afuni inangge hokhorogo were'ma inalong welagaikharek hak, hit he, Kristus ane andiat hinendawinggenma ninghogo fakhaluk logolik he, hinendawimo kagalogoat, hit-hit wene komo-komo aga logolik, wene hiren yagaisigik, iren yagahisigik, ikhi logoino o. Yagaisikhi logolik he, Allah faget wuni Mazmur endawi watik, Allah fogeratarek awuni watik, Allah Areagun en hinendawimo kagalhunem, wuni felalogo watik, ikhi logolik he, hinendawinggenma nen Allah hai wati logoino o.

¹⁷ ”Nineisena Allah nen wo'nisikherek andi ebe Yesus nenat wo'nisikherego,” iluk, Allah hai wati logolik: ”Ninoe Enupogot Yesus awe a'ma logolik hilingiti lago,” iluk, yi mene ti mene mondogat hilingisuogeluk, hinane yi mene ti mene faget uogeluk, at Yesus enu hombuk palogo hilingiti logoino o.

Hemi ap yenggerugwi inawi misi'mo logolik hilingiti logogun wene

¹⁸ Hit hemi nerugwi. Ninoe Enupogot hinom hundik logolik hinobabut hilingisu higithogoat, hinaguni inawe a'ma logolik inane hologo hilingiti logoino o.

¹⁹ Nen, hit ap nagaila'lak. Hinagagwi inoba wiyik-weakhogo hilinginafi'legat hinendawirogo logoino o.

²⁰ Nen, hit yenggerugwi, nagoromi. Hineisugwi hinagaisawi lagen yi mene ti mene faget yagahisugunem, inane hologo hilingiti logogun halok ninoe Enupogot oba liok igin andi nen he, a'nogoat hilingiti logoino o.

²¹ Nen hit ap inaluendek yi, nagaila'lak. Hinagainafuri inendawimo weak asinogo iluk ina'mage liafi logogubo.

²² Hit inamingmingengge mene nerugwi nagaila'lak. Hinogogwi kweangma mene nen, yi mene ti mene hilingisuageluk ugunem, inebe ineilhanem halok inendawimo fanorogo hilingitik, inebe le'ma halok kamo igik, ikhi logogubo. Athe, ninoe Enupogot hinailorogo hinendawinggen misigat logolik, hinogogwi andi inane hologo hilingfisikhi logoino o.

²³ Yi mene ti mene hilingiti logolik hinendawimo nen he: ”Afuni faget hilingiti lago lego. We ninoe Enupogot fageraro,” iluk, hinendawinggen oba nen hilingiti logoino o.

²⁴ Hinebe re, ninoe Enupogot Kristus at awe a'ma logolik, at fagerat hilingiti lagep andi nen, hinendawimo nen he: ”Nit hilingiti lago andi faget onggo re, at Ninoe Enupogot Kristus nen eisewerek hinobagagin werego,” iluk hinendawimo futfuluk logoino o.

²⁵ Menere, at ninoe Enupogoren he, afuni inelokhonggen oba nek isaluk, ekhe elokhoma fisigik, ekhe ambotma fisigik, ikherek lek andi nen, sa nen weak hilingite mene faget, onggo wogosu hak he, weak hilingite mene andi higithogoat wene oba fagain werego.