KOLOSE 2 - Allah Wene Fano Wene Hupla Inane

¹ An nen he, hit inom, it afuni o Laodikia mene inom, it ekhe hokhorogoat inom, an nebe hinonggot mene faget nomamerogo hilingiti lagi mene andi, hit hinelurogo logobagaigeluk yagahisigi andi.

² Hit hinendawinggen ago warogo logolik, hit-hit hinom hundik nendawi-hendawirogo logobagaigeluk a'nogo hilingiti lagio. Hit a'nogo logolik he: ”Wene andi eberogoat,” iluk, futfuluk menenei mondok ebeti'lek logolik, wene Allah endawimo hinago welagaikhe wene andi furogo hinelu asuguno. Wene andi re, Kristus ebe aro.

³ Allah endawimo wenggelek logolik, yi wene ti wene mondok elu mene andi re, at endawimo hinago welagaikhe meneat he, Kristus alegaren fakhogo yaganisikherek.

⁴ It ekhe ineranhogo meneat he, inane eberogo wene hak lalhinabinogo iluk yagahisigi andi.

⁵ An nebe yatmaat welagi meneat he, nendawinggen hit hinoba lakfei wagarik, ninom andoma welago mene hak logolik, hinendawinggen Kristus oba himbiret fuluk eberogo anggikhi lagep a'nogo, ninghogo fisogo logolik hilingitunem, neilenggen hisikhi logolik he, an nendawimo nagaiyegeti lagi o.

Kristus ninom hundik logolik, ninendawinggen wurikhogo logogun wene

⁶ Hiren he: ”Kristus Yesus ninoe Enupogot aro,” iluk ebe helasigip andi nen, hinom hundik mondok logoino o. A'nogo logolik, hinobabut he, wene yagahisasukwa higithogoat,

⁷ e omanggen kweangma ninghogo yaterek andi hak, hinomanggen Yesus oba ninghogo yakfuluk logolik he, o anduli ninghogo pelakfuluk o ebe amboloba wutarek hak, hinendawinggen Kristus oba himbiret fesigip mene a'nogo, hinenggi pukhogo fisogo logolik, Allah hai wato mondok logoino o.

⁸ A'nogo ugu were'ma, afuni ekhe inendawimo wenggelek mene hak, wene we mene ineranhogoat yagahisikhi logolik, lalhinabinogo iluk he, hinobabut hebelogo logoino o. Wene andi re, Kristus nen isikhe mene higithogo ili'lagwi fuk. We, afuni ta'larik-ta'larik wagu kwelek, inombalagen he: ”O yoma yi mene ti mene himbirengge re, munggwarengge inobabut weak mene andi aro,” iluk ikhi lagaukwa mene higithogoat lalhinabi'lagwi andi.

⁹ Mene re, Allah ebe abirengge mondogat Kristus endawimo were'ma at ebe afuni higirat ta'lasi wagaikhesik welagaikhe andi.

¹⁰ Malaikat pogoroba mene inom, munggwarengge obabut weak mene inom, inawe a'ma ferinarek were'ma inane holharek mene, Kristus ane holugun andi nen, hit ogo re, at hinom hundik logolik, hinendawinggen katokhogo wurik agepsik welagep andi.

¹¹ Hit at hinom a'nogo hundik welagep andi nen, afuni inenggi nen inagap inenggalimo mene palinafarek hak palhinafukwama palek welagep fuk. Lego, we at Kristus nenat hinobabut hinetogat logolik weak hilingiti lagagip mene andi korogo wokhasikhemo, hinagap hinenggalimo mene palek logou hak welagep andi.

¹² At Kristus wa'lagaikhemo ebe warek salhukwa hak, hit ima pelakhinafi logolik, hinom hundigat salhinafukwao. Nen, at hinom hundik warek were'ma, Allah omameba eluget fesikhe, iluk, hinendawinggen at omameba himbiret fesigip andi nen, ima nen yegelogo liakhinafunem he, at hinom hundigat hineluget hinafikhe o.

¹³ Hit attak he, hinagap endakwe faget hinenggalimo mene a'nogo palek lek, weak hilingitu mondok logolik he, hinebe warek hangge were'ma, at Allah nen nit weak hilingiti lagagu mene sebelogo legetfisasikhesik he, Kristus hinom hundigat were'ma hineluget hinafikhe andi.

¹⁴ Wene at Allah nen komotninafikhe wene a'nogo, niren herakfisaluk weak hilingitu mondok welagagu mene andi, palegengge ninoba welagarek andi hak yi wene ti wene enggin mene ninoba were'ma, Yesus ebe eba menfuluk wati logolik posiemanggen warogo fesukwa andiba, Allah nen wene andi wurep kobokhogo arat legetfesikhe.

¹⁵ At Kristus ebe e andiba wa'laga logolik Iblis agoromi kaindek inomame werek mene inom mabenet fisaluk he, afuni nen selei mene inom weim yafi logolik inomame a'luk, inebe ineluk hele warogo afuni ineilhanem woginarek wagaikharek hak, at Kristus nen sele'ma inenggali watikhe andi.

¹⁶ Andi nenat, it afuni ekhe nen he: ”Sumburu, i, yi mene nenggarek mene ti mene nenggarek lek mene,” igik, ”Mo yiba pugu halok, tiba lagagu halok, yi'nogo hilingisu mene,” igik, ”Tugi folelhu halok, yi'nogo hilingisu mene,” igik, ”Inenggi Allah faget weat logolik, yi'nogo hilingisu mene,” igik, ugu kwelek, hit hesangge hilingitunem wene andi mene faget wene hinoba fogoin lek.

¹⁷ Afuni inebe oan wagu kwelek inafumak tak inelokhoma wagarek hak, Kristus ebe oan wagi'lek werek kwelek, wesigin iluk wene mondogat andi mene tak hilingiti lagaukwa meneat he, ebe re, Kristus aro.

¹⁸ Nen, it ekhe nen he, inobabut inetogat logolik tulemat fogerakhikhi logoligat he, mel agarek andi: ”Nit afuni ninebe kembu. We kaindek he, malaikat Allah nen yonggo pelak fisa wagarek mene andiat. Halok he, inawe a'ma logolik fogerinafi logogun, iluk an nabikanggo higirek mene nen yagahisikhi lagi andi,” iluk ineranhogoat Kristus hinom hundik mene wulak hinobagauwogeluk yagahisili'lagwi andi re, ”Eberogoat,” iluk hinendawimo anggagubo.

¹⁹ Ninebe yi ninunggul inom hundik were'ma, ninenggi nineisok enggalim ninomanggen oba hunogo ninobagasikhemo, ninamburu nunggunem amusu ninoak elekwe lagunem, ninebe hokho agorek hak, nit Allah againafuri Kristus ninom hundik were'ma, at Allah nenat hokhot ninobagaikherek andi. Meneat he, it andi a'nogo ninoe kain Kristus inom hundik welagaukwasigenat he, hobuk kobokogo lakfisasukwa andi nen, inane holhubo.

Kristus ninom hundigat wa'lagosik, ninomat nineluk logolik hilingiti logogun wene

^20-21 Hit Kristus hinom hundik logolik wa'lagagip andi nen, munggwarengge obabut weak mene kweangma yoma enggi fisogo welagarek mene a'nogo nen hinebe hele warogo fethinarek were'ma, Allah nen hele fikhalhinafikhe andi. Meneat he, hit hinobabut it ekhe kweangma inobabut inetogat logolik hilingitarek hagat hilingiti lagep andi nenahalok? It andi nen he, ”Yi mene ti mene ekhe hinenggi ninghogo fakfigik, uphogo fakhigik, ekhe enduk mikhigik, ugubo,” iluk komorinafunem nenahalok hologo hilingiti lagep?

²² Wene andi afuni nenat, yi mene ti mene nunggunem lek agarek mene fagerat: ”Yi'nogo hilingiti logouwok,” iluk wene palek hagat komorinafik, yagaisigik, ili'lagwi andi.

²³ It andi ineranenat afuni yagaisikhi logolik he: ”Malaikat inawe a'ma logolik fogerinafik, hinendawimo nen he, nebe kembu, iluk igik, inendawinggen fano asuageluk, inenggi inesanggo inelha palagarek hak, inagap oba wiik-weakhogo hilingitik, ikhi logouwago,” iluk wene inendawimo wenggelogo fano higithogo yagaisili'lagwi andi. Mene re, inoba aigage lagagunem, wene andiba nen inendawinggen sebelu lek hago.