KOLOSE 1 - Allah Wene Fano Wene Hupla Inane

Hai warinafikhe wene

^1-2 Hit Allah againafuri o Kolose andogoti lagep mene Kristus hinom hundik logolik, at faget hinobabut humbunhogo hilingiti lagep mene nerugwi nagaila'lak, an Paulus Allah endawimo anggasikheba Kristus Yesus nen nayonggo fuluk laknobagai wagaikhemo wagagi mene a'nogo, ninagot Timotius nemberegen wene yi lisu palogo hinoba lakfei wago andi. Nineisena Allah obabut fano a'nogo nen, fano mene wokhisigik, hinendawinggen hambuget hinafik, ikhi logouwago.

It Allah againafuri o Kolose mene inobabut hilingiti lagaukwaba, Allah hai watikhe wene.

^3-6 It ekhe nen hit yagaisikhi logolik he: ”Hit hinobagaget fano mene Allah nen wokhisagain mene pogoroba hinobagaikhemo werego,” iluk yagahisasukwama, hinendawinggen Kristus Yesus oba himbiret fuluk, hilingitunem, it ekhe nen he: ”It inendawinggen Kristus oba himbiret fuluk Allah againafuri ekhe mondogat inendawirogo hilingiri'lagwi,” iluk, hinabok ugunem ninesanggo holhosik he, hundik-handigat samban hit faget ikhi logolik, ninoe Enupogot Yesus Kristus eisena Allah at hai wati lago o. Hit wene fano wene, Allah obabut fano nen hilinginaferek wene a'nogo omanggum yagahisa wagaukwama, hinesanggo holhigipsik he, eberogoat iluk futfesigip andi huli, Allah nen fanothinabi'logo hak, fano wene andi o yi awi ti awi wialarik laga logolik, Allah nen afuni a'nogo fano hilinginabi'logoaro.

⁷ Fano wene andi, at Epafras ninagailak ninendawi mene nen yagahisugunem yanggulhigip andi. At ebere, Allah amingmingengge nit ninom higirat logolik, Kristus nen ayonggo fuluk, lakfei wagaikhemo, niren yagahisa hak ninobali'mo obabut humbunhogo logolik yagahisili'logo andi.

⁸ At ebe ninoba wagasigen he mel ikhe: ”It inobabut he, afuni ekhe inendawirinafarek andi mene, Allah Areagun en wogisugunem, afuni ekhe inendawirogo hilingiri'lagwi o,” iluk hinabok furogo yaganisa waga andi.

⁹ Hinabok a'nogo ugunem ninesanggo holhosik he, niren hit faget samban igik, Allah ayonggo figik, kamo igi'lek ugu mondogat welago. A'nogo ikhi logolik Allah Areagun en hinendawimo kagalhunem, hinendawimo mondok kagalogo wene futfuluk he, at Allah endawimo amolo anggikherek mene andi, hiren furogo hinelurogo logobagaigeluk ayonggo fikhi lagoaro.

¹⁰ A'nogo hinelu asimbik he, ninoe Enupogot endawimo fanorogo, at amolo anggikherek mene higithogo hilingiti logogunat. Yi mene ti mene awi yatunem ero hokho a'luk enggen iterek hak, hit Allah obabut ekhe inomat hinelu aga logolik, yi mene ti mene fano mene hilingiti logogun andi.

¹¹ Nineisena Allah omame hokho fogeratarek mene a'nogo nen hinomamet hinafunem, hit hinomamerogo mondok logobagaigeluk ayonggo fikhi lagiat. A'nogo hinomamet hinafunem yi mene ti mene enggin hinoba agu kwelek, hinendawimo puk agi'lek hinafe morogo logolik, hinendawimo hinagaiyek higik,

¹² nineisena Allah hai watik, ikhi logogun andi. At nineisena nen, at againafuri ekhe hinomat selek oba hinawi werek logouwageluk hilinghinafikhemo welagep andi nen, arat hai wati logogun andi.

¹³ Nit attak o mum oba weak mene nen awe a'ma hele warogo fetninarek were'ma, Allah nen hele fikhalogo wo'ninafikhesik he, amlogo endawi mene a'nogo fetninarek logouwageluk awe a'ma ninobagaikhemo welago.

¹⁴ Allah nen a'nogo hele fikhalogo telninafikhe andi, ebe re, at amlogo nenat hele fikhalogo telninafik, yi weak ti weak hilingiti lagagu mene andi, arenat horogo legetfisigik, isikhe andi.

”Ebe esin he, at Kristus aro,” iluk yagaisasikhe wene.

^15-16 Allah ebe nineilenggen hogorek lek meneat he at ebe higit he Yesus andi aro. At Allah nen, yi mene ti mene pogoroba mene inom, kweangma mene inom, nineilenggen hogorek mene inom, hogorek lek mene inom, elalhikhe andi. Nineilenggen hogorek lek mene ekhere, malaikat inomame hokho logolik inawe a'ma ferinarek were'ma inane hologo welagaikharek mene andiat. Allah nen a'nogo mondogat elalhikhe andi ebere, at Kristus nenat, onggwarek fagerat elalhikhe andi nen, yi mene ti mene mondogat andi, esanggoma hak werek kwelek, esin he, Allah amlogo manggusa mene Kristus andi aro.

¹⁷ At Allah nen yi mene ti mene oan elalhi'lek werek kwelek at Kristus ebe welagaikhesik he, yogondak yi mene ti mene obali'mo lombok werek andi. Arenat fisogo were'ma fano werego.

¹⁸ Nit Allah againafuri ninoe kain at Kristus logolik, ninebe nineluget ninaferek andi nen, at ebe enggi eisok hak welagorek. Yi mene ti mene esanggoma hak werek kwelek, at Allah nen: ”Esin he, an namlogo manggusa meneat logouwak,” iluk, at ebe wa'lagaikhemo nen, eluget fesikhe andi.

¹⁹ At Allah nen: ”An nendawimo namolo re, an nobabut netok mondok welagirek andi hak, an namlogo a'nogoat nemberek higit mondogat logouwago,” iluk, endawimo anggasikhe higithogoat welagarek.

²⁰ Yi mene ti mene kweangma mene inom, pogoroba mene inom, mondogat Allah inom weak agaukwasik, weim palek hangge were'ma, at Allah onggwarek inom lambulogo fisasikhe andi ebere, Yesus eba menfuluk watukwama amep wulagaisogo wa'lagaikhe andiba lambulogo fisasikhe andi.

²¹ Attak he, hit hinendawimo weak wene ebeti logolik, hinobabut weak hilingiti lagagip andiba, Allah hinom heksek logolik weim palek hak welagagip.

²² A'nogo meneat he, hit hinebe at Allah onggwarek faget fakhaluk, at eilhanem enekhogo wene hinoba legengge fano tegelek logouwageluk, amlogo ebe wa'lagaikhe andiba, onggwarek hinom lambulogo hinobagasikhemo welagep andi.

²³ Halok he, fano wene hinesanggo holhigipsik he, hinendawimo nen: ”Hobuk fano asigin,” iluk, anggasigip mene andi, hinendawinggen abolok iluk kobokhogo herakfisigi'lek ninghogoat fisogo logoino. Fano wene andi, aren o yi awi ti awi afuni inebe mondogat yagaisasikhe wene andi yagaisilik nikhi logouwageluk, an Paulus nayonggo fesikhe andi.

Paulus nen Allah againafuri faget hilingiti lagaikhe wene

²⁴ An yogondak ya re, at Kristus nen he: ”Allah againafuri mondogat an nebe aro,” iluk nit faget yi enggin ti enggin hilik-hilik wa'lagaikhe andi, ekhe higi'lek mene obali'mo an nebe hit faget yi enggin ti enggin hilingnabi'lagwi andi nen nendawimo nagaiyegeti lagi.

²⁵ An he, Allah nen hit faget at againafuri mene mondogat inamingmingengge logouwageluk nayonggo fesikhemo, wene Allah nen isikhe wene andi mondogat yagaisilik nikhi logou hagat yagaisilik nikhi lagi andi.

²⁶ Wene andi, o endamat eroba nen yi tahun ti tahun hilinglaga logolik, afuni ekhe ti'larik-ta'larik wagu kwelek, Allah nen afuni yagaisigi'lek ineilmasirogo at endawimo hinago welagaikhe. Meneat he, yogondak nit at againafuri mene halok, sele'ma fakhogo yaganisasikhe andi.

²⁷ At Allah endawimo nen he, it afuni endakwe mene mondogat fano mondok hilinginabigin wene andi esin fogerasu meneat anggasikhesigen endawimo hinago welagaikhe mene, at againafuri halok sele'ma fakhogo yagaisageluk isikhe. Wene hinago mene andi ebere, Kristus hit hinendawimo werek halok, hobuk Allah nen fanothinafunem fogethinabugun andi aro.

²⁸ Andi nen, niren he, wene Kristus abok andi fakhogo afuni mondogat inebe lombok yagaisilik laga lago. A'nogo yagaisikhi lago andiba, inebe lombok Kristus inom hundik logolik, inendawinggen wurik asumo Allah ba woginarek wesuogeluk, ninendawimo eberek mondok logolik, komorinafik, wene yagaisigik, ilik laga lago andi.

²⁹ An wene andi faget katokhogo hilingisigeluk, at Kristus omame a'nogo an nendawimo logolik, nomamet nafu kwelek, ninghogo nomamerogoat hilingiti lagi andi.