KISAH PARA RASUL 9 - Allah Wene Fano Wene Hupla Inane

Saulus obabut hebelhikhe wene

¹ A'nogo hilingitu kwelek, at Saulus a'nogo a'mage lagasikhesik he, afuni ninoe Yesus ane wanhukwa mene omanogo inoasigeluk weim abok endawimo logolik, it ap Allah eisewerek inoe kain mene oba kwisikhesik mel yagatikhe:

² ”Noe. An o Damsyik lambik he, it afuni ekhe Yesus ane wanhi logolik ombo'ne nikho mene ekhe werek halok, hemi inom, ap inom, heraginabimbik he, inenggi hele warogo woginarek o Yerusalem yoma fisa wesigen he, it afuni Yahudi mene o kota Damsyik andoma o samban agarek kwe lombok andogori'lagwi mene faget surat ekhe palogo wo'nom o,” iluk yagatikhe.

³ A'nogo yagatikhemo, wogetikhemo re, waga lagaikhesik, o kota Damsyik andoma horokhogo kwigin ha'ma re, ferekhogo aremnogoat pogoroba nen ombak-bak yararet hikhi logolik at oba seleget fei wagaikhe.

⁴ Fei wagunem he, at Saulus a'nogo kweangma talorogo weing lagaikhe. Weing lagunem he, at ekhe ane koma nen heat yagati logolik he, ”Saulus. Saulus. Anat yi enggin ti enggin hilingnabigeluk mu'narek nihki lagen andi nenahalok,” iluk yagatikhe.

⁵ A'nogo yagatikhemo, at Saulus nen he, ”Noe. Hat sa,” iluk yagatikhemo, aren he, ”An Yesus. Haren yi enggin ti enggin hilingnabigeluk mu'narek nikhi lagen mene a'nogo aro.

⁶ Hebe menla'luk he, o kota ari lambik kwino. Kugunem ap ekhe nen, hat yi'nogo hilingi'no, iluk yagahesigin mene werego,” iluk yagatunem,

⁷ it ap at inom wagaukwa mene omanogo inesanggo holhukwasik he, ”Ap ebe ki nen ane ikhe,” iluk ineil etukwa mene re, ebe legen ina'manggen lagaikhesik inane u elo'lek agaikhemo kamo isukwa.

⁸ A'nogo werek kwelek, at Saulus a'nogo menlagaikhesik, eilenggen fenggen lagaikhe meneat he, yi mene ti mene eilenggen yetha mondok elo'lek agaikhe. A'nogo elo'lek agaikhemo, enggi fagaisogo o Damsyik waluk kwisukwa.

⁹ Waluk kwisukwama, enggi henagan logolik he, yi mene ti mene eilenggen higi'legat, sumburu inom, i inom, ninggi'legat mondok welagaikhe.

¹⁰ Werek kwelek, o Damsyik andoma ap ekhe Tuhan Yesus ane wanhikhe mene enu Ananias welagaikhe. Were'ma, Tuhan nen he, abikanggoba mel yagatikhe: ”Ananias,” iluk ane fakhugunem, aren he, ”Wu! Noe. Nebe yi welagi,” iluk isikhe.

¹¹ Isikhemo re, at Tuhan nen he, mel yagatikhe: ”Hebe siakhogo menlasimbik he, kwe enu Higitkwe andikwe nen lano. Lambik he, o ap Yudas were'ma kwi lambik, haren he, ap enu Saulus, aiba Tarsus mene a'naga, yoma werega? iluk heinok wogisano. At ebe samban ili'logo a'naga.

¹² Samban a'nogo ugunem, at abiba hugunem en he, Hat Ananias hebe re, at oba kwi lagendik, eilenggen fenggen lasuageluk henggi oba sebelhunem, abiba hikhesik werek a'naga,” iluk yagatikhe.

¹³ A'nogo yagatikhemo, at Ananias nen he, ”Noe. Afuni nen he, ap andi nen, hat hagainafuri o Yerusalem mene yi enggin ti enggin hilinginabi'logo, iluk inebe hokhorogoaren ugunem abok nesanggo holhiri'mo nen,

¹⁴ yogondak he, o yoma wesimbik, afuni hat henu hombuk palogo hayonggo fili'lagwi mene halok mondogat, inenggi hele wasuageluk he, it ap Allah eisewerek inogogwi kaindek omanogo nen yagatama wagasik werek andi,” iluk yagatikhe.

¹⁵ A'nogo yagatikhe meneat he, at Tuhan nen he, ”Lan o. Aren he, afuni endakwe mene inom, inogogwi kaindek mene inom, afuni Israel mene inom, an nenu yagaisilik nikhi logouwageluk, an nen ap andi ebe heragaisogo ayonggo figimo o.

¹⁶ A'nogo ayonggo figiri'mo re, aren nenu a'nogo yagaisilik nugunem, at yi enggin ti enggin hikhi logogin obaat hikhi logogin mene, an nen yagasigin werego,” iluk yagatikhe.

¹⁷ A'nogo yagatikhemo, at Ananias a'nogo lagaikhesik he, oloba kwisikhesik, enggi Saulus oba fakhikhi logolik he, mel yagatikhe: ”Saulus, nagailak. Tuhan Yesus, hat o yoma wesigeluk kweba wagunem, helokhoma menlagama, heilenggen hegen mene a'naga nen, hat heilenggen fenggen lagik, Allah Areagun hendawimo peterogo kwi wagik, uageluk laknobagai wagama wagi o,”

¹⁸ iluk yagatunem aremnogoat, at eilenggen mumen sebelek welagaikhe mene nonggologo pisikhemo re, eilenggen fano agaikhe. Fano agaikhesik, ebe menlagaikhemo re, ima pelakfesikhe.

¹⁹ Ima pelakfesikhemo re, sumburu nasikhesik omame agaikhe. At Saulus a'nogo o Damsyik logolik, afuni Yesus ane wanhukwa mene inom inenggi endebat welagaukwa.

At Saulus nen wene afuni o Damsyik mene yagaisikhi lagaikhe wene

²⁰ A'nogo welagaukwa andem sambul he, o it afuni Yahudi mene samban ikhi lagaukwaba kwisikhesik, wene Yesus faget yagaisikhi logolik he, ”At Yesus andi, ebe Allah amlogo aro,” iluk yagaisikhi lagaikhe.

²¹ Yagaisugunem he, it afuni inesanggo holhi lagaukwa mene andi, inebe mondogat inailo agaukwasik he, ”Ap yi o Yerusalem logolik, afuni mondogat at Yesus andi enu hombuk palogo ayonggo fili'lagwi mene inebe mondok wolelenggen tagalogo legetfisageluk hilingiti laga a'nogo ebe yi lek nogo? Ebe yiat anggigi. At yoma wagasik he, it Yesus enu hombuk pali'lagwi mene andi, inenggi hele warogo, it ap Allah eisewerek inogogwi kaindek mene inoba woginarek lageluk waga lek nogo? Nailo e,” iluk fogerati lagaukwa.

²² Fogeratu kwelek he, at Saulus nen, ane omamerogoat inendawimo kagalhi logolik, mel yagaisikhi lagaikhe: ”Allah nen he, ap ekhe telhinabuageluk lakfei wesigin, iluk wene wa'nisasikhe a'nogo ebe re, Yesus andi aro,” iluk fakhogoat yagaisugunem, eberogoat agaikhemo re, it afuni Yahudi mene o Damsyik welagaukwa mene andoma nen onggo nena u heat inane lek kamo isukwaat.

²³ A'nogo logolik, inenggi hokhorogoat welagaukwasigen, Saulus ebe wasuogeluk weim abok hinagaisogo isukwa.

²⁴ A'nogo isukwa meneat he, it afuni ekhe nen Saulus husumbi yagatukwama at elu agaikhe. A'nogo elu werek kwelek, ap omanogo nen at ebe ebekwe leget pa'leget ambe pale'ma wulafunem he, wasuogeluk hubanggo linggene kagalek mondok welagaukwa.

²⁵ Kagalek werek kwelek, it afuni Saulus ane wanhi lagaukwa mene nen he, o hubanggo ekhe sambul, at ebe mul ugu mene elonggoma kwalfesukwasik he, leget pa'leget uan waganek oba anggwe ekhe ponggwe folelek were'ma wulakfesukwasik he, kombi kelogo leget afane enda'kwe pelakfesukwa.

At Saulus o Yerusalem pisikhemo hilingitukwa wene

²⁶ A'nogo pelakfesukwama, at Saulus o andoma nen o kota Yerusalem pisikhesik he, it afuni ekhe Yesus ane wanhi lagaukwa mene inom misi'mo lambukhogo logouwogeluk walhasikhe meneat he, it mondogaren, ”At eberogoat Yesus ane wanhesigen ili'logo,” iluk futfigi'legen, at ebe inailo welagaukwa.

²⁷ A'nogo werek kwelek, at Barnabas nen Saulus ebe wanhikhesik waluk he, it ap Yesus nen inebe wenagaisogo inayonggo fuluk lakfisasikhe mene omanogo ekhe inoba lagaikhe. Waluk lagaikhesik he, mel yagaisasikhe: ”Ap yi re, kwe ebekwe laga logolik, ninoe Yesus eilenggen hasikhemo, aren wene yi'nogo yagatemo nen, at ebe o Damsyik logolik, ailo legat Tuhan Yesus enu hombuk palogo wene fakhogo yagaisikhi laga mene waluk wagi o,” iluk pilingisogo yagaisasikhe.

²⁸ A'nogo yagaisasikhemo, at Saulus it inom lambul agaukwasik o Yerusalem yi awi ti awi nikhi logolik he, ailo legat Tuhan Yesus enu hombuk palogo wene fakhogoat yagaisikhi lagaikhe.

²⁹ Yagaisikhi logolik he, it ekhe inebe Yahudi meneat he, inane Yunani mene inane ikhi lagaukwa mene wene yagaisugunem iren heinok wanhunem, onggo yagaisigik ugunem he, ebe wasuogeluk walhikhi lagaukwa.

³⁰ Wasuogeluk walhugu kwelek, it Allah againafuri it-it inerugwi inagaila'lak inom misigat mene ekhe nen, Saulus ebe o Kaisarea waluk wagaukwasik he, andoma nen o Tarsus lagai wesuageluk lakfei wagaukwa.

³¹ A'nogo hilingitukwama hobugen he, it afuni Allah againafuri o propinsi Yudea mene inom, Galilea mene inom, Samaria mene inom, weagerinafi'lek fano liokhogo welagaukwa. Were'ma, Allah Areagun en leberisugunem inendawinggen wurik agik, Tuhan Allah oba inailorogo welagik, ikhi logolik he, inebe hokhorogo sik-pik ikhi lagaukwa.

Petrus nen ap Eneas ou higitik, he Dorkas wa'lagaikhe mene eluget figik, isikhe wene

³² Nen, at Petrus nen Allah againafuri mene o ya kwigik ta kwigik eilenggen isilik laga lagaikhe. A'nogo laga lagaikhesik enggi ekhe sambul he, it Allah againafuri o Lida welagaukwa mene eilenggen isa pisikhe.

³³ Pisikhesik he, ap ekhe enu Eneas. O fagearen eisok wut warek mondok logolik he, mo lagagik pigik ugu kwelek 8 tahun wengik mondogat welagaikhe mene, a'nogoat were'ma, eilenggen hasikhe.

³⁴ Eilenggen hasikhesik he, mel yagatikhe: ”Eneas nagailak. Yesus Kristus nen higithafe o. Halok, menlasimbik he, halit talogo nogo ikhi lagen mene ari yinggilogo fein o,” iluk yagatu kwelek, aremnogoat siakhogo menlagaikhe.

³⁵ Menlagaikhemo re, it afuni o Lida inom, Saron inom, welagaukwa mene mondogaren ineilenggen hasukwasik he, ”Eberogoat,” iluk inobabut hebel lagaukwasik inendawinggen Tuhan Allah oba himbiret fesukwa.

³⁶ O Yope andoma, he ekhe enu Paik enu mene, afuni Yunani mene inaneba enu Dorkas u hak, it inaneba Tabita iluk ikhi lagaukwa mene welagaikhe. At he andi, Tuhan Yesus ane wanhikhesik, yi mene ti mene fano hilingiti logolik, afuni inenggi lek inelagaik mene leberisugu mondok welagaikhe.

³⁷ A'nogo hilingitu were'ma, andem sambul ou wanhikhesigen ebe wa'lagaikhemo re, ebene sobalogo o henambo fei lagasukwa.

³⁸ A'nogo fei lagasukwasik werek kwelek, o Yope andoma nen, o Lida andi horogatma re, it afuni ekhe nen, ”Petrus ebe o Lida wagasik werego,” iluk ugunem, it afuni Yesus ane wanhukwa mene omanogo inesanggo holhukwasik he, it ap inebe pire Petrus ayonggo loageluk, mel yagaisasukwa: ”Hit lambik he, Petrus mel yaga'no: Halele abirogo welagi'lek ninom weak-weak louwogo, iluk yaga'no,” iluk liakfisa wagaukwama lagai wagaukwasik, yagatukwama, at Petrus nen he,

³⁹ ”I o. Halok he, puok,” iluk inom pisukwa. Pisukwasik he, Petrus ebe waluk henambo inom lagasukwa. Henambo lagasukwasik were'ma, it hemi sogwe mene at oba horokhogo andogosi wagaukwasik, le aga logolik he, su elonggoma mene inom, endakwe uan mene inom, he Dorkas eluk oba inom logolik, igisasikhe mene inukhasukwa.

⁴⁰ Inukhasukwama re, at Petrus nen inebe mondogat wulakfisasikhesik eindep awi yagaisogo samban isikhesigen, elokhe hebekhogo warek a'nogo wogetikhesik he, ”Tabita. Menlame o,” iluk yagatikhe. Yagatunem, aremnogoat eilenggen fenggen lagaikhesik he, Petrus ebe eilenggen hasikhesik menlagaikhesik alele yamukhogo hu'lagaikhe.

⁴¹ Hu'lagaikhemo, at Petrus nen enggi fagaisogo menfesikhesik he, it Allah againafuri ekhe inom, hemi sogwe mene omanogo inom, wolisasikhemo kwisukwama re, ”At ebe eluk aga yi,” iluk wogisasikhe.

⁴² Wogisasikhemo re, wene hilinglagaikhe mene andi, it afuni o Yope andoma mene inebe mondogat inelu agaukwasik he, inebe hokhorogoat inendawinggen ninoe Enupogot Yesus telninaferek mene oba himbiret fesukwa.

⁴³ A'nogo himbiret fesukwama, at Petrus a'nogo o Yope andoma logolik he, ap Simon paik agap wam agap nonggologo iring iti lagaikhe mene aiba emberek inenggi hokhorogoat welagaukwa.