KISAH PARA RASUL 8 - Allah Wene Fano Wene Hupla Inane

¹ At Stefanus ebe mondogat watukwa andi, at Saulus endawimo nen fano anggasikhe. At Stefanus ebe watukwa andi sambul he, it Allah againafuri o Yerusalem andogoti lagaukwa mene inebe yi enggin ti enggin weakhogo hilinginafu kwelek he, it ap Yesus nen inebe wenagaisogo inayonggo fuluk lakfisasikhe mene omanogo nek, o Yerusalem werek kwelek he, Allah againafuri ekhe inebe hokhorogo mondogat pugulogo re, o propinsi Yudea Samaria yi awi ti awi andoma mugusogo wulakfisasukwa.

Saulus nen Allah againafuri o Yerusalem mene yi enggin ti enggin hilinginafi lagaikhe wene

² A'nogo wulakfisasukwama, it afuni Allah ane hologo hilingiti lagaukwa mene ekhe nen he, Stefanus a'nogo ebe warek kweangma salhukwasik he, obaget le hokhorogo aga lagaukwa.

³ Allah againafuri a'nogo wulakfisikhi logolik, at Saulus a'nogo Allah againafuri mene weagerinabigeluk he, inawilokwe lombok ya kwigik ta kwigik nikhi logolik, ap inom, hemi inom, inenggi lisogo woginarek he, o afuni inenggi hele warogo fisagarek oba fisa laga lagaikhe.

At Filipus nen fano wene o Samaria yagaisa wagaikhe wene

⁴ A'nogo hilinginafu kwelek, it pugulogo lagaukwa mene omanogo o yi awi ti awi laga logolik he, fano wene a'nogo yagaisilik lagaukwa.

⁵ A'nogo yagaisilik laga logolik he, at Filipus o kota Samaria andoma wagaikhesik, wene mel yagaisasikhe: ”Allah nen he, ap ekhe telhinabuageluk lakfei wesigin, iluk wene wa'nisasikhe a'nogo, ebe lakfei wagama wagasik yi'nogo hilingite,” iluk abok yagaisikhi lagaikhe.

^6-7 Wene yagaisikhi logolik he, iren wene futfouwageluk munggwarengge inobabut weak mene afuni inebe hokhorogoat inendawimo kwisukwasik welagaukwa mene inane hokhorogoat ugu kwelek henogo wulakfisigik, it ekhe hokhorogoat ineisok wut warek mene inom, ineisok hambelek mene inom, higirinafik, elalinat hilinginafi lagaikhe. A'nogo hilinginafi lagaikhe andi nen, afuni omanogo inebe mondogat andogorek logolik, ineilenggen hasukwasik, inesanggo furogo holhi lagaukwa.

⁸ A'nogo hilinginafunem he, it afuni o Samaria mene andoma, inendawimo inagaiyek hokhorogo hikhi lagaukwa.

⁹ O Samaria andoma ap wesagun ekhe enu Simon welagaikhe. Fagearen at ebe wesagun logolik wesarogo hilingiti logolik he, ”Kain wesagun nebe anat,” iluk ugunem he, it afuni o Samaria mene nen, ”Egi! Nailo e,” iluk, at fogerati lagaukwa.

¹⁰ Fogerati logolik he, it afuni kain mene, kembu mene, mondogat at ane furogo inesanggo holhi lagaukwa. A'nogo holhi logolik, iren he, ”Allah omame mondok hokho iluk ili'lagwi a'nogo re, ebe yi aro,” iluk ikhi lagaukwa.

¹¹ Ap andi fageat andoma nen wesarogo hilingiti logolik he, inailot fugunem, at ane furogo inesanggo holhi lagaukwa andi.

¹² A'nogo meneat he, at Filipus nen fano wene Allah nen awe a'ma fisikherek wene andi yagaisigik, Yesus Kristus enu andi yagaisigik, fano wene andi ikhi lagaikhemo re, afuni omanogo nen he, ”Wene andi eberogoat,” iluk wanhu mene halok, ap inom, hemi inom, ima pelaginafi lagaikhe.

¹³ At Simon ebe ogo re, inomat, ”Wene andi eberogoat,” iluk wanhikhemo, ima pelakfesukwaat. A'nogo pelakfesukwasik he, afuni wene futfouwageluk, Allah omameba hilingisu lek mene elalinat hilingitunem he, at Simon andi Filipus ombo'ne mondok nikhi logolik, eilenggen hasikhesik he, ailo aga lagaikhe.

¹⁴ A'nogo hilingitukwama, afuni nen he, ”Afuni o Samaria mene Allah ane wanha o,” iluk ikhi lagaukwama, it ap Yesus nen inebe wenagaisogo inayonggo fuluk lakfisasikhe mene omanogo, o Yerusalem logolik, inesanggo holhukwasik he, Petrus Yohanes emberek afuni Samaria mene inoba lakfisa wagaukwa.

^15-16 Lakfisa wagaukwama wagaukwasik he, afuni o andoma mene nen he, ”Allah ane eberogoat,” iluk wanhukwa mene, ninoe Enupogot Yesus enu hombuk palogo ima nek kerat pelaginafukwama, Allah Areagun oan inoba pi wagi'lek welagaikhe andi nen, Allah nen Areagun wogisoageluk ayonggo fesukwa.

¹⁷ A'nogo Allah ayonggo fikhi logolik, inenggi inoba sebelhunem he, Allah nen Areagun wogisasikhemo helasukwa.

¹⁸ A'nogo helasukwama, at Simon eilenggen isasikhesik he, endawimo nen he, ”Afuni re, it ap Yesus nen inebe wenagaisogo inayonggo fuluk lakfisasikhe mene nen, inenggi inoba sebelinafunem enek he, Allah Areagun wogisa hak higi,” iluk anggasikhesik he, Petrus Yohanes emberek onggo wogisageluk, uang inoba waluk wagaikhe.

¹⁹ Waluk wagaikhesik, mel yagaisasikhe: ”An nenggi afuni ekhe inoba sebelhunem, Allah nen Areagun a'nogoat wogisugunem helikhi logouwageluk, an ninomat eisewerek asuogen, hit hilingiti lagep andi awene yagane'ni o,” iluk kino yagaisasikhe.

²⁰ A'nogo yagaisikhi lagaikhemo, at Petrus nen he, ”Hat hendawimo nen he, Allah obabut fano nen wo'nisikherek mene andi, onggo fuluk eise asugun, anggegen a? Elo'lego. A'nogo anggegen andi nen, hat hauang ari alomat lakhigik, hebe alomat lakhigik, uago.

²¹ Allah eilhanem hendawimo mondok weak ebeti lagen andi nen, nit hilingiti lago andi, hat ninom eise asugun lego.

^22-23 Hat hobabut he, it ekhe inoba pou ikhi lagen andi, wam amise awi ale weak andi hangge hendawimo peterek werek. Were'ma, weak hilingisigeluk hendawimo ebeti lagen andi nen, hele hangge warogo fetharek werek andi, hobabut futfigi. Weak hilingisigeluk egen andi, herakfisaluk, hobabut hebela'no. Hebelasumo re, hat hendawimo anggegen andi ninoe Tuhan Yesus sebelogo legetfisoageluk ayonggo feino o,” iluk yagatikhe.

²⁴ A'nogo yagatikhemo, at Simon nen he, mel yagatikhe: ”Hit egep andi hak, an noba asinogo nen he, an faget Tuhan ayonggo feino o,” iluk yagaisasikhe.

²⁵ A'nogo yagaisasikhemo, it Petrus Yohanes emberegen he, wene fano wene furogo yagaisikhi lagaukwasik, o andoma nen he, fano wene andi, o Samaria o sili yi awi ti awi hokhorogoat yagaisilik, inambotkwe o Yerusalem lagaukwa.

Filipus nen ap kain o Etiopia mene wene yagatikhe wene

²⁶ O kota Yerusalem lagaukwasi'mo re, malaikat Tuhan en yonggo pelakfisa wagarek mene ekhe Filipus oba pi wagaikhesik wene yagati logolik he, ”Hat hebe siakhogo, o Yerusalem en o Kasa i ambutmo higit pagarek kwe, afuni inebe lekwe andi nen pino o,” iluk yagatikhemo re, siakhogoat pisikhe.

²⁷ Pisikhe hak he, ap ekhe awi Etiopia mene ebe owali waganek mene ambotkwe aiba pigeluk ebekwe pikhi lagaikhe. Ap andi re, he o Etiopia mene kain enu Kandake andi nen, at mene yi mene ti mene fisogo logouwageluk, enggiba fesikhemo re, kain welagaikhe mene. At ebe kain logolik he, Allah awe a'ma kwisikhesik, samban o Yerusalem i lagai wagaikhe. Lagai wagaikhesik he,

²⁸ hobuk ambotkwe aiba pigeluk, kereta wam kuda nen lisogo waluk lagarek a'nogo meneba hu'lagaikhesik pikhi logolik he, wene Allah ane at Yesaya nen yagaisikhi lagaikhesik, lisu palhikhe mene andi enu salik-salik pisikhe.

²⁹ A'nogo salik pugu kwelek he, at Allah Areagun nen Filipus yagati logolik he, ”Kereta andi pugunem agap fakha lambik oba horokhogo lan o,” iluk yagatikhe.

³⁰ A'nogo yagatikhemo, at Filipus fungusegat oba pisikhe hak he, ap a'nogo nen wene Allah ane Yesaya nen yagaisikhi lagaikhesik, lisu palogo fesikhe mene a'nogo enu salhunem he, esanggo holhikhe. Esanggo holhikhesik he, mel yagatikhe: ”Noe. Enu salhi lagen andi, wene ebe futfikhi lagen a? Lega,” iluk yagatikhemo,

³¹ aren he, ”Wene andi ebe sa nen furogo yaganesumo nen futfagain,” iluk yagatikhesik he, ”Hat nemberek puogen, ya hu'lasi lagaime o,” iluk yagatikhe.

³² Yagatikhemo, oba hu'lasi lagasikhesik eilenggen yethasikhe hak he, ap a'nogo lisu mel iluk palek were'ma enu salhunem hasikhe: At ebe re, domba wam wasuogeluk waluk lagaikharek andi hak waluk lagaikha o. Waluk lagaikhasik domba eak esi paluogeluk ugunem, ane legat kamo ikherek andi hak, at andi ane ekhe igi'lek kamo ikhe o.

³³ At enggali watik, elele wanhi'lek weaget figik, ikhi lagaikha andi. A'nogo ikhi logolik, watunem wa'lagasik ebe kweangma yoma welagi'lek andi nen, afuni ekhe nen aren tagongge mene faget inabok ikhi logogun legaga o, iluk lisu palogo fesikhemo were'ma enu salhi lagaikhe andi.

³⁴ A'nogo enu salhi lagaikhesik he, ap a'nogo nen Filipus mel yagatikhe: ”Wene yi, at ap Allah ane yagaisikhi lagaikhe mene andi nen isikhe andi re, at onggwarek faget isikhe a? Athe, ap ekhe faget isikhe a. Haren wene ebe furogo yaganom, nagailak,” iluk yagatikhe.

³⁵ A'nogo yagatikhemo re, at Filipus nen fano wene Yesus hilingiti lagaikhe wene yagasigeluk, wene ero lisu palek andiba nen pilingisogo yagarik pisikhe.

³⁶ Yagarik mondok ebekwe pikhi logolik he, i were'ma pisukwasik, at ap kain a'nogo nen he, ”I werek yi han. An ima pelaknabigin anggikhi lagi. I a? Athe, ki mene oan welagi anggegen,”

³⁷ [iluk yagatikhemo, at Filipus nen he, ”Noe. Hendawinggen misigat logolik, Yesus oba himbiret fegendik egen halok he, ima pelakhabigin aro,” iluk yagatikhemo, at ap a'nogo nen he, ”At Yesus Kristus andi, eberogoat Allah amlogo aro, iluk nendawimo anggigi,” iluk yagatikhe.]

³⁸ A'nogo yagatikhesik he, amingmingengge mene nen kereta hangge kuda nen lisogo waluk pisikhe mene andi aremnogo menfouwageluk yagatikhesik he, Filipus emberegat i esanggoma pisukwasik, ap a'nogo ima pelakfikhe.

³⁹ Ima pelakfikhesik, aik oba wulibi wagunem, at Allah Areagun nen he, Filipus a'nogo hambokhogo waluk o hunogoma fei wagaikhemo re, ap kain a'nogo nen Filipus ebe hobuk eilenggen hasikhe lek. A'nogo hasikhe lek meneat he, endawimo agaiyek hilik-hilik kwe pigeluk pisikhe kwe a'nogo pisikhe.

⁴⁰ Nen, at Filipus Allah Areagun nen waluk o Asdod andoma fei wagaikhemo logolik, afe hebel lagaikhesik, o andoma nen he, o sili mondogat olokwe ya kwigik ta kwigik, wene fano wene yagaisilik, o kota Kaisarea lagai wagaikhe.