KISAH PARA RASUL 6 - Allah Wene Fano Wene Hupla Inane

Ap inebe 7 nen Allah againafuri ekhe leberisikhi logouwageluk menfisasukwa wene

¹ Andi sambul he, afuni Yesus ane wanhukwa mene inebe hokhorogoat hilinglagaukwama re, it afuni inebe Yahudi meneat he, inane re, Yunani mene inane ikhi lagaukwa mene nen he, mel isukwa: ”Afuni hundik-handigat yi mene ti mene sumburisikhi logolik he, hemi sogwe nit mene halok halolot fisili'lagwi andi nenahalok,” iluk, it Yahudi inawiwerek mene inom wene palhukwa.

² Wene a'nogo palhukwama, it ap inebe 12 Yesus nen inayonggo fuluk lakfisasikhe mene omanogo nen, afuni Yesus ane wanhukwa mene inebe mondogat andogosuageluk wolisasukwa. Wolisasukwama wagaukwama re, inebe misi'mo andoget fuluk logolik, iren he, mel yagaisasukwa: ”Nit Allah ane yagaisikhi lago andi herakfisaluk, yi mene ti mene sumburisikhi logogun he, weago.

³ Halok, hiren he, ap ekhe Allah Areagun inendawimo peterek logolik, inendawinggen mondok kagalek hilingitunem, inobabut enegat isikhi lagep mene halok, inebe 7 nen heraginabini o. Heraginafep halok, iren yi mene ti mene a'nogo sumburisikhi logouwageluk, niren menfisogoin o.

⁴ Menfisamo, it a'nogo hilingitu kwelek, niren he, samban igik, wene ebe wene andiat yagaisigik, ikhi logogun,” iluk yagaisasukwa.

⁵ Wene a'nogo ikhi lagaukwama, it afuni Allah againafuri omanogo inebe mondogaren he, ”A'nogo egep andi fano,” iluk isukwasik inebe heragaisogo fisasukwa. A'nogo fisasukwa andi ekhe re, Stefanus, endawinggen Allah oba himbirik mondok were'ma Allah Areagun endawimo peterogo kwisikhesik welagaikhe mene inom, Filipus inom, Prokhorus inom, Nikanor inom, Timon inom, Parmenas inom, Nikolaus o Antiokhia mene Allah ane wanhikhesik, Yahudi mene hangge hilinglagaikhe mene andi inom,

⁶ inebe 7 andem heragaisogo fisaluk he, it ap Yesus nen inayonggo fuluk lakfisasikhe mene omanogo inoba fisa wagaukwa. Fisa wagaukwama re, iren inenggi inunggul oba sebelogo samban isukwa.

⁷ A'nogo hilingiti lagaukwama re, Allah ane hokho aga logolik, afuni o Yerusalem mene Yesus ane wanhukwa mene inebe hokhorogoat hilinglagaukwa. A'nogo hilinglagunem, it ap Allah ane eisewerek mene omanogo inebe esa hokho nen, wene andi wanhukwasik inendawinggen Yesus oba himbiret fesukwaat.

Wene Stefanus oba fesukwa wene

⁸ At Allah obabut fano nen wogisikherek mene a'nogo, Stefanus hokhorogo wogetikhemo omame hokho welagaikhe. Logolik he, afuni nen wene futfouwageluk hilingisu lek mene hokhorogo elalinat hilinginafi lagaikhe.

⁹ Hilinginafi lagaikhemo re, it ap Yahudi mene o Kirene mene inom, Aleksandria mene inom, inebe afuni ekhe inamingmingengge welagaukwasik hobuk inale'ma a'luk samban misi'mo ikhi lagaukwa mene inom, it afuni Yahudi mene ekhe o propinsi Kilikia mene inom, Asia mene inom, inomen at Stefanus ane ugunem menlagaukwasik he, anema lagik-lagokhogo wanhukwasik wenagetukwa.

¹⁰ A'nogo wenagetukwa meneat he, at Stefanus Allah Areagun endawimo kwisikhesik logolik, wene higirat kagaukhogo ugunem, it inane onggo ninggi'nogo yagasu heat hilinglagaikhe.

¹¹ Onggo ninggi'nogo yagasu heat hilinglagaikhemo re, iren, ap ekhe nen wene at oba fouwageluk inendawimo kagalhukwa. A'nogo inendawimo kagalhi logolik, mel yagaisasukwa: ”Hiren he, mel ino. At yi nen Musa abok weak palhik, Allah abok weak palhik, ugunem nit ninesanggo holho, ino,” iluk inendawimo kagalhukwa.

¹² A'nogo inendawimo kagalhukwama, iren afuni ekhe inendawimo kagalhik, ap inaluendek omanogo inendawimo kagalhik, ap Allah ane lisu palek inelu mene omanogo inendawimo kagalhik isukwama, it mondogat menlagaukwasik at Stefanus ebe fakfuluk, it ap wene ero pilingiti lagaukwa mene omanogo inoba waluk lagaukwa.

¹³ Waluk lagaukwasik he, ap ekhe nen ineranen wene Stefanus oba fouwageluk menfisasukwa. Menfisasukwama, iren ikhi logolik he, ”Ap yi nen Allah onggwarek awi wurik yi abok weak palhik, wene Allah nen komotninafikhe wene a'nogo abok weak palhik, kamo igi'lek ugu mondok welagarego.

¹⁴ Nen, aren ili'logo mene ekhe re, Yesus aiba Nasaret mene a'nogo nen, Allah awi wurik yi meisalogo fesukwasik he, wene at Musa nen ninombalak yagaisasikhemo, nit hilingiti lago mene a'nogo, hobuk hunogoat hilingisin o, iluk ugunem ninesanggo holho o,” iluk isukwa.

¹⁵ A'nogo ikhi lagaukwama, it ap wene ero pilingiti lagaukwa mene omanogo inebe mondogat inom hurek logolik he, ineilenggen at Stefanus oba lurogo yethugunem he, at elokhonggen malaikat Allah nen yonggo pelakfisa wagarek mene omanogo inelokhonggen hangge hilinglagaikhemo ineilenggen hasukwa.