KISAH PARA RASUL 5 - Allah Wene Fano Wene Hupla Inane

At Ananias Safira emberegen weak hilingitukwa wene

¹ At Barnabas nen a'nogo fei wagaikhe meneat he, ap ekhe enu Ananias agwe Safira emberegen inanggweang ekhe eise were'ma it ekhe inoba onggo uang wanhukwa.

² Wanhukwasik he, Ananias andi agwe emberegen he, ”Yi'nogo hilingisuok,” iluk isukwa mene agwe a'nogo eluat werek kwelek he, agun nen uang omanogo fena inonggwarek faget fakhaluk he, fena nek it ap Yesus nen inayonggo fuluk lakfisasikhe mene omanogo inenggiba fei wagaikhe.

³ Fei wagaikhemo, at Petrus nen he, ”Ananias. Iblis nen hendawimo kagalhemo Allah Areagun lalogo kweang onggo fena minggilogo honggwarek faget fakhaluk wagen andi nenahalok.

⁴ Kweang andi haren it ekhe inoba onggo wanhi'lek werek kwelek, hat hanggweang meneat. Ma re, it ekhe wogisegenma onggo faga mene andi hat mene aro. Meneat he, hendawimo nen a'nogo kagalogo hilingiten andi nenahalok. Hane heranenat egen andi, nit afuni yaganisegen fuk. At Allah at yagateno,” iluk yagatikhe.

⁵ A'nogo yagatunem, wene andi, at Ananias esanggo holhikhesik he, erabisak talorogo hulambetikhesik ebe arat wa'lagaikhe. Wa'lagaikhemo re, it afuni inebe hokhorogoat wene hilinglagaikhe mene andi, inesanggo holhukwasik inailo hokhorogo agaukwa.

⁶ A'nogo wa'lagaikhemo, it ap alage mene kwisukwasik he, ebe warek a'nogo su yinggilogo waluk wulifukwasik, kweang habulogo sali lagaukwa.

⁷ Warek waluk wulifukwama, 3 jam hangge endebat were'ma nen, Ananias agwe wene hilinglagaikhe mene a'nogo onggorat welagaikhesigen onggothogo kwisikhe.

⁸ Kwisikhemo, at Petrus nen he, ”Kweang hit mene andi onggo re, yibaat wokhisaga nogo a? Senggerogo yaganom,” iluk yagatikhemo, aren he, ”I o. Andibaat wo'nisaga o,” iluk yagatikhe.

⁹ A'nogo yagatikhemo, at Petrus nen he, ”Hit hagun hemberegat, wene yi'nogo hilingisuok, iluk ikhi lagepsigen nineisena Allah Areagun obabut paluogeluk hilingitep andi nenahalok. Ap hat hagun ebe warek kweangma sali lagaikhasik, hat a'nogoat wokharek wulibuogeluk olilu kweba ineisok abolok ilik wagaikha ari o,” iluk yagatikhe.

¹⁰ A'nogo yagatu kwelek aremnogoat Safira a'nogo abisagat Petrus era'lu talorogo lagaikhesik ebe wa'lagaikhe. Wa'lagaikhesik were'ma, it ap alage omanogo kwisukwasik, ineilenggen hasukwasik he, ebe warek waluk agun warek sali lagaukwaba era'lu sali lagaukwa.

¹¹ Wene a'nogo hilinglagaikhemo re, it Allah againafuri mene mondogat inom, nen it afuni ekhe inesanggo holhukwa mene mondogat inom, inailo hokho agaukwa.

Yesus agoromi nen hilingisu lek mene elalin mene hilinginafi lagaukwa wene

¹² It ap Yesus nen inebe wenagaisogo inayonggo fuluk lakfisasikhe mene omanogo afuni hokhorogoat inom logolik he, wene afuni nen futfouwageluk hilingisu lek mene elalin mene hilinginafi lagaukwa. Hilinginafi logolik, it Allah againafuri inebe mondogat inendawinggen misigat logolik, inebe Allah awi wuri'mo solombon enu Salomo asolombonma andogoti lagaukwa.

¹³ Andogotunem he, it afuni hokhorogo omanogo nen fogerinafi lagaukwa. A'nogo meneat he, it afuni alek mene nen it inoba ku inailoat welagaukwa.

¹⁴ Werek kwelek he, it Allah againafuri hilinglagaukwa mene were'ma re, it ekhe ap inom, hemi inom, inendawimo nen he, ”Ninoe Tuhan Yesus eberogoat,” iluk inendawinggen at oba himbiret fuluk, it inom lambukhogo inebe mondok hokho aga lagaukwa.

¹⁵ A'nogo aga lagaukwama re, it afuni ou wanhi lagaukwa mene, fena e talek oba fisigik, fena lit talek oba fisigik, iluk he, Petrus wagunem afumak inoba higit aga halok se asuageluk, ebekhalem fisa waga lagaukwa.

¹⁶ A'nogo hilingitu kwelek he, it afuni ekhe inaiba Yerusalem esanggokwe mene a'lima nen waga logolik, it ekhe ou wanhi lagaukwa mene inom, munggwarengge inobabut weak mene inendawimo kwisukwasik were'ma sini'nuk aga lagaukwa mene inom, woginarek inoba waga lagaukwaat. Woginarek wagunem he, inebe mondogat fano higirinafi lagaukwa.

Yesus nen lakfisasikhe mene omanogo it afuni ekhe nen, yi enggin ti enggin hilinginafi lagaukwa wene

^17-18 A'nogo hilinginafunem, elugun oba re, it ap Allah eisewerek mene inoe kain mene agoromi inebe mondogat inom, it andi re, afuni Saduki mene inane wanhi lagaukwa mene nen, irat Yesus nen inebe wenagaisogo lakfisasikhe mene omanogo a'nogo hilingitunem inoba wene palhi lagaukwa. A'nogo wene palhi lagaukwasik, inebe fakfisasukwasik he, o afuni inenggi hele warogo fisagarek oba kwelakfisasukwa.

¹⁹ Kwelakfisasukwasik were'ma re, malaikat ninoe Tuhan yonggo pelakfisa wagarek mene omanogo ekhe hubanggo pi wagaikhesik he, o afuni inenggi hele warek fisagarek oba, kwe yagarek mene a'nogo meisak lambukhogo hilingitikhesik inebe woginarek wulibi wagaikhe.

²⁰ Woginarek wulibi wagaikhesik, aren yagaisikhi logolik he, ”Hit hinebe Allah awi wuri'mo lano o. Lambik andoma kwimbik mendek logolik he, wene fano wene hinebe hineluk logolik ket hunogoat hilingiti logogun wene andi mondogat yagaisa lano,” iluk yagaisasikhe.

²¹ A'nogo yagaisasikhemo re, inesanggo holfuluk, o wei ugu kwelek, Allah awi wuri'mo kwisukwasik wene yagaisikhi lagaukwa. A'nogo yagaisugu kwelek he, it ap Allah ane eisewerek mene inoe kain a'nogo agoromi inomen ap inaluendek Israel mene wene ero pilingiti lagaukwa mene mondogat, inayonggo fesukwasik inebe andoget fuluk inagoromi ekhe nen he, it Yesus nen inayonggo fuluk lakfisasikhe mene inenggi hele warek fisasukwa mene a'nogo woginarek wesuageluk, o fisasukwaba a'nogo lakfisasukwa.

²² A'nogo lakfisasukwama, it a'nogo lagaukwa re, it ap Yesus nen inayonggo fuluk lakfisasikhe mene a'nogo inenggi hele warek fisagarek oba inebe le'ma lagaukwa. Inebe legen inambotkwe wagaukwasik he, it ap omanogo mel yagaisasukwa:

²³ ”O afuni inenggi hele warek fisagarek oba a'nogo, kwe ninghogo yagarek werek kwelek, hele warek mene inebe wulibinogo iluk, ap kweba kagalek welagaikharek mene omanogo inebe were'ma lago. Lagosik, ninebe kogo menere, it ap hele warek omanogo inebe mondok le'ma isogo,” iluk yagaisasukwa.

²⁴ Yagaisasukwama re, it ap Allah awi wurik kagalek welagaukwa mene omanogo inom, Allah ane eisewerek inogogwi kaindek omanogo inomen he, ”It ap Yesus nen inayonggo fuluk lakfisasikhe mene omanogo ninggi'nogo hilinglagaikhama nen aga,” iluk inobakheindok palagaikhesik he, ”Hobuk ninggi'nogo hilinglasigin he,” iluk inendawinggen fitukwa.

²⁵ A'nogo inendawinggen fitu were'ma, ap ekhe wagaikhesik he, ”Ap yi sani. Hit ap inenggi hele warogo fisegep a'nogo re, Allah awi wuri'mo mendek logolik, afuni hokhorogoat wene yagaisili'lagwi o,” iluk yagaisasikhe.

²⁶ A'nogo yagaisikhi lagaikhemo re, at ap kain Allah awi kagalek welagaikhe mene a'nogo agoromi inom lagaukwasik he, it ap Yesus nen inayonggo fuluk lakfisasikhe mene omanogo woginarek wagaukwa. Mene re, woginarek wesuogeluk inendawimo nen he, ”Afuni hokhorogo nenat Yesus agoromi elele waganogo nit helep oba ninoasinogo,” iluk inailo nen inane ninghogo woginarek wagi'lek. We, liokhogo woginarek wagaukwa.

²⁷ Woginarek wagaukwasik, ap wene ero pilingiti lagaukwa mene omanogo inanggele'ma tulem menfisasukwa. A'nogo fisasukwasik he, at ap Allah ane eisewerek inoe kain a'nogo nen he, wene mel yagaisasikhe:

²⁸ ”Hiren ap andi enu hombuk palogo nen wene yagaisagubo, iluk niren fanorogo komothinafo a'nogo meneat he, hiren wene andi wialogo yagaisikhi lagepma re, afuni o Yerusalem mene yoma mondogat inelu aga andi re, ap wata mene andi re, wene nit ninoba fouwogeluk ikhi lagep higi,” iluk yagaisasukwa.

²⁹ A'nogo yagaisikhi lagaukwama re, it Petrus lak, Yesus nen inayonggo fuluk lakfisasikhe mene omanogo nen he, ”Nit he, afuni mene inane hologo hilingiti'lek, Allah ane andiat hologo hilingisugun o.

³⁰ Hiren Yesus ebe fakfegepsik eba menfuluk watep a'nogo, at Allah ninombalagen awe a'ma kuluk fogerati lagaukwa mene a'nogo nenat ambotkwe eluget fikhemo werego.

³¹ Eluget fikhemo werek andi, afuni Israel mene weak hilingiri'lagwi mene andi herakfisaluk inobabut hebelasumo re, Allah nen it weak hilingitarek mene andi sebelogo legetfisageluk, Yesus ebe eluget fikhesik he, at ebe ninoe Enupogot logolik telninafi logouwageluk era'lu enggi ebekwe menfikhemo werek andi.

³² A'nogo hilingite iluk nit nineilenggen furogo hogosigen, eberogoat, iluk yagahisikhi lago. Afuni Allah ane hologo hilingitorek mene halok, at Areagun wo'nisikherek andi ninom enat wene andi yagahisikhi lago,” iluk yagaisasikhe.

³³ A'nogo yagaisasikhemo re, it ina'mage hokhorogo lagasukwasik ap Yesus nen wenagaisogo inayonggo fuluk lakfisasikhe mene omanogo inoasuogeluk isukwa.

³⁴ Inoasuogeluk isukwa meneat he, ap ekhe it Farisi mene inawene fisogo logolik, it inom wene ero pilingiti lagaukwa mene enu Gamaliel. At andi wene Allah nen komotninafikhe wene a'nogo yagaisugunem, afuni mondogaren, ”At fano,” iluk inane agaukhogo yagati lagaukwa mene. At andi menlagaikhesik he, mel yagaisasikhe: ”Ap inenggi hele warek mene yi, elama faget enda'ma logouwagen wulakfisani,” iluk yagaisasikhe.

³⁵ A'nogo yagaisasikhemo, wulakfisasukwama nen, aren wene mel yagaisasikhe: ”Hit ap Israel mene nagaila'lak. Ap omanogo ninggi'nogo hilinginabugun anggegep. Hinendawimo fanorogo ebet fulugen hilingisugun o.

³⁶ Attagat ap ekhe enu Teudas menlagaikhesik he, kain an aro, iluk isikhemo, ap hokhorogoat inebe 400 hangge at awe a'ma kwisukwasik ombo'ne nikhi lagaukwa. A'nogo meneat he, at ebe watukwama, agoromi at awe a'ma kwisukwasik ombo'ne nikhi lagaukwa mene andi pugulik-pagalik isukwama re, aren, yi'nogo hilingisuok, iluk ikhi lagaikhe wene andi legat agaikhe.

³⁷ Lek agaikhemo re, hobuk kaindek pemerintah mene nen afuni inebe inenggi wenaginabuogeluk ugunem he, ap ekhe aiba Galilea mene, enu Yudas menlagaikhe. Menlagaikhesik, afuni hokhorogoat inendawimo kagalhikhemo re, at awe a'ma kwisukwasik ombo'ne nikhi lagaukwaat. Mene re, at ebe watukwaat. Watukwama, agoromi awe a'ma kwisukwasik ombo'ne nikhi lagaukwa mene omanogo pugulik-pagalik isukwaat andi.

^38-39 Ma re, wene yogondak yi faget he, an nen wene ekhe komothinabik. Hiren ap andi yi'nogo ti'nogo ekhe hilinginafup. Wene iren yagaisikhi logolik hilinginabi'lagwi andi, ero afuni nen halok he, wene andi lek asigin o. Meneat he, wene andi ero Allah at halok he, hiren it mabenet fisogoin elo'lek asigin o. A'nogo elo'lek agunem he, hiren Allah hinom weim yabugun hangge hilinglasinogo nen he, herakfisani o,” iluk inendawinggen sebelhikhe.

⁴⁰ Inendawinggen sebelhikhemo, it ap Yesus nen inayonggo fuluk lakfisasikhe mene omanogo wolisasukwama kwisukwama re, yei inoatukwasigen, ”Yesus andi enu hombuk palogo, wene hobuk a'nogo yagaisikhi logogubo,” iluk komorogo wulakfisasukwa.

⁴¹ Wulakfisasukwama, it ap wene ero pilingiti lagaukwa mene omanogo herakfisaluk wulifukwasik, it-it ikhi logolik he, ”Allah nen he, hit Yesus enu faget afuni nen, hit weak, iluk wenakhisamo elok, iluk endawimo anggikhe higithogoat wena'nisaga andi fano,” iluk inendawimo inagaiyek agaukwasik wulifukwa.

⁴² Wulifukwasik, it a'nogo nen Allah awi wuri'mo kwigik, afuni inawilokwe kwigik, ikhi logolik, ”Allah nen he, ap ekhe nen afuni telhinabuageluk ayonggo fuluk lakfei wesigin, isikhe a'nogo, ebe Yesus andi aro,” iluk Yesus nen hilingitikhe wene, fano wene a'nogo kamo igi'lek hundik-handigat yagaisilik nikhi lagaukwa.