KISAH PARA RASUL 4 - Allah Wene Fano Wene Hupla Inane

Petrus Yohanes emberek ap wene ero pilingitarek mene inoba woginarek lagaukwa wene

¹ It Petrus Yohanes emberegen wene a'nogo afuni omanogo oan yagaisugu were'ma aremnogoat, it ap Allah eisewerek mene inom, Allah awi wurik kagalek welagaukwa mene inoe kain mene inom, ap Saduki mene inom, inoba wagaukwa.

² Wagaukwasik he, it Petrus Yohanes emberegen wene afuni yagaisikhi logolik he, ”Yesus wa'lagasik eluk aga andi hak afuni wa'lagaikharek mene inelugerinabigin aro,” iluk yagaisikhi lagaukwa andi nen, it ap omanogo ina'mage lagasukwasik wenagisasukwa.

³ Ina'mage lagasukwasik inenggi hele warogo re, o arat hubagaikhemo, o hubet inanema wanuogeluk, o afuni hele warek fisagarek oba kwelakfisasukwasik ferinarek nogo isukwa.

⁴ A'nogo meneat he, it Petrus Yohanes emberek a'nogo oan kwelakfisigi'lek werek kwelek, afuni yagaisasukwama inesanggo holhukwa mene omanogo inebe hokhorogoaren, ”Wene andi eberogoat,” iluk wanhukwama re, it attak mene inom, hobuk mene inom, lambukhogo, ap enek inenggi wenaginafunem 5.000 hangge hilinglagaikhe andi.

^5-6 A'nogo hilingitukwasik, ohealekwe re, it ap kaindek omanogo inom, inaluendek omanogo inom, Allah ane lisu palek eisewerek mene omanogo inom, andogorogo re, it Allah eisewerek mene inoe kain Hanas inom, Kayafas inom, Yohanes inom, Aleksander inom, Allah eisewerek inoe kain mene againafuri ekhe inom, o Yerusalem andogotukwa.

⁷ Andogotukwasik he, Petrus Yohanes emberek a'nogo inoba woginarek wagaukwasik inebe tulem menfisasukwasik he, inanema wanhukwa. Inanema wanhi logolik he, ”Hiren ap eisok wut warek mene higitep andi re, nena mene omameba higitep. Nen sa enu hombuk palogo higitep,” iluk ikhi lagaukwama re,

⁸ at Petrus Allah Areagun endawimo peterogo welagaikhe mene a'nogo nen wene mel yagaisasikhe: ”Nogogwi kaindek lak inom, neisugwi lak inom, hinalabok.

⁹ Yogondak hiren he, Ap eisok wut warek mene andi nena mene omameba fano higitep nogo, iluk ninanema wanhi lagep yi.

¹⁰ Halok he, wene andi faget, hit mondogat inom, afuni inunggulenu Israel mene ekhe mondogat inom, hinelu asuageluk wene ero furogo yagahisak. At Yesus Kristus aiba Nasaret mene hiren eba menfuluk watepma Allah nen eluget fikhe mene a'nogo enuba ap yi fano agasik hineilhanem mendek fano werek yi.

¹¹ Attagat Allah aneba lisu mel iluk palogo fesukwa: Hit o helep mene wuti logolik, Helep yi weago, iluk herakfisegep meneat he, ubuleat ya'laga yi, iluk Yesus fagerat, lisu palogo fesukwa andi.

¹² At Allah nen, nit afuni kweangma yoma mene at ekhe nen telninabuageluk enu yaganisigi'lek andi nen he, alegat mene nen telninabigin elo'lego. We, at Yesus nen telninabuageluk, at alegat enu yaganisasikhe andi,” iluk yagaisasikhe.

¹³ It Petrus Yohanes emberek inailo lek logolik, wene fakhogo a'nogo yagaisugunem he, it ap omanogo nen fogerinafi logolik he, ”Ap yi sekolah yanggulhi'lek. We, inonggot meneat he, Yesus inom nikhi lagaikha mene a'nogo nen higi,” iluk futfisasukwa.

¹⁴ Futfisasukwasik, ap eisok fano hilingitukwa mene a'nogo, it Petrus Yohanes emberek inom mendek were'ma, ineilenggen isaluk he, it ap omanogo nen wene ninggi'nogo yagaisa heat hilinglagaikhemo re, yagaisigi'lek kamo isukwa.

^15-16 Kamo isukwasik he, Petrus Yohanes ap a'nogo inom, o wene ero pilingitarek oba nen wulakfisasukwasik, it-it wene ikhi logolik he, ”Ap inebe pire ari faget ninggi'nogo hilinginabuok anggegep. Iren hilingisu lek mene andi elalinat hilingitama re, afuni o Yerusalem welagaikharek mene mondogat inelu agaikha andi nen, niren he, a'nogo hilingiti'lek, ninonggot iluk labelugun he, elo'lek aga andi.

¹⁷ A'nogo meneat he, wene andi wialogo afuni mondogat inesanggo holik lanogo iluk he, Yesus enu hombuk palogo wene hobuk mondok yagaisagubo, iluk wene komorinabuok,” iluk isukwa.

¹⁸ A'nogo isukwasigen, emberegat wolisasukwama, inambotkwe kwisukwama re, mel yagaisasukwa: ”Hiren he, Yesus enu yagaisigik, Yesus enu hombuk palogo yanggulisigik, mondok ugubo,” iluk komorogo wenagisasukwa.

^19-20 A'nogo yagaisasukwama re, it Petrus Yohanes emberegen he, ”Allah eilhanem higithogo hilingisugun he, ki. Hiren, yi'nogo hilingisugun iluk egep mene andi hologo hilingisugun a? Athe, Allah nen, yi'nogo hilingisigin, ikherek mene andi hologo hilingisugun a. Hinendawimo ebe'ni. Nit he, nineilenggen higik, ninesanggo holhik, ogo mene andi, afuni ekhe yagaisigi'lek kamo ugun he, elo'lek andi nen he, yagaisikhi logogun aro,” iluk yagaisasukwa.

²¹ A'nogo yagaisasukwama, ap a'nogo elalinat hilingitukwa andi faget, afuni mondogaren Allah fogerati lagaukwa andi nen, wene ninggi'nogo inoba fou heat hilinglagaikhemo re, hobuk we komorogo wulakfisasukwa.

²² Ap eisok wut warek mene elalinat higitukwa andi re, ebe 40 tahun welagaikhesi'mo nen, fano hgitukwa andi.

Allah againafuri nen samban isukwa wene

²³ It Petrus Yohanes emberek a'nogo, ap kaindek omanogo nen inenggi hele fikhalogo wulakfisasukwama re, inerugwi inagaila'lak Allah againafuri mene ekhe omanogo were'ma inoba lagaukwa. Lagaukwasik, mel yagaisasukwa: ”It ap Allah ane eisewerek inogogwi kaindek omanogo inom, inaluendek omanogo inom, iren wene yi'nogo yaganisaga,” iluk pilingisogo yagaisasukwa.

²⁴ A'nogo yagaisasukwama inesanggo holhukwasik he, inom lambukhogo inendawinggen misigat logolik, Allah ayonggo fesukwa. Ayonggo fikhi logolik he, ”Tuhan nineisena. Nit hat hawe a'ma welago yi. Pogot elalhigik, kweang elalhigik, i laut hokho yenggelek mene elalhigik, yi mene ti mene pogoroba, kweangma, ima welagarek mene ekhe mondogat elalhigik, harenat isigin andi.

²⁵ Nit ninomba Daud a'nogo haren, at ayonggo fesiginmo re, Hareagun endawimo logolik, wene haren isigin mene aren mel isikhe: Yi afuni ti afuni endakwe mene ina'mage lagasukwasik he, inane uarek-puarek wene palha andi nenahalok? Nen, it afuni inunggulenu yi awi ti awi mene tulemat palha andi nenahalok?

²⁶ It inenupogot kweangma mene yoma menlagaukwasik, kaindek ekhe inom lambukhogo andoget fuluk, nineisena Tuhan Allah, iren he, Ebe ninabit. Amlogo Kristus ayonggo fesikhesik lakfei wagaikhe mene andi, ninabirat. Ninom weim yabuok, iluk andi fagerat hebelogo werek, iluk isiginmo ebe Daud en isikhe andi.

²⁷ A'nogo isigin hagat, at Herodes inom, Pontius Pilatus inom, afuni endakwe mene inom, afuni Israel mene inom, hat honggwarek hamlogo Yesus, nit afuni telninabuageluk menfesigin mene a'nogo, wasuogeluk eberogoat o yoma andogosi wagaikha andi faget isigin andi.

²⁸ Mene re, wene andi hat henggi omame werek mene nen, hendawimo nen he, A'nogo hilingisuak, iluk anggasigin obaat, a'nogo hilingita andi.

²⁹ Mene re, Nineisena. Nit ninoasuogeluk ili'lagwi andi heilenggen isan o. Nit hagoromi yoma wene haren isigin mene andi, ninailo lekhogo yagaisikhi logouwageluk homame wo'nisan o.

³⁰ Hat homame wo'nisugunem he, honggwarek hamlogo Yesus enuba hat henggibaat afuni ou higirinafik, wene futfouwageluk hilingisu lek mene elalin mene hilinginafik, igin andi, ebe niren higirinafi logouwageluk homame wo'nisan o,” iluk Allah ayonggo fesukwa.

³¹ A'nogo Allah ayonggo fikhi lagaukwama re, o it andogorek welagaukwaba andi abolok isikhe. Abolok ikhi logolik he, Allah Areagun inebe mondogat inendawimo peterogo kwisikhemo, wene Allah nen isikhe mene andi afuni inailo legat yagaisikhi lagaukwa.

Allah againafuri inagarek mene inebe mondogat sumburogo helikhi lagaukwa wene

³² It wene eberogoat iluk wanhukwa mene andi, inebe hokhorogoat he, inendawinggen misigat welagaukwa. Logolik he, inagarek yi mene ti mene mondogat, ”Yi an mene,” iluk igi'legat he, ”Ninebe mondogat ninagarek mene,” iluk, ikhi lagaukwa.

³³ A'nogo ikhi logolik he, it ap Yesus nen inebe wenagaisogo inayonggo fuluk lakfisasikhe mene omanogo nen, ”Ninoe Tuhan Yesus eluk agama nineilenggen arat hogo o,” iluk inane mondok omamerogo yagaisikhi lagaukwa. Yagaisugu kwelek he, Allah obabut fano a'nogo nen hokhorogo leberisikhi lagaikhe.

^34-35 A'nogo leberisugu kwelek he, inanggweang eisewerek welagaukwa mene inom, inawi wurik eisewerek welagaukwa mene inom, afuni alek mene inoba onggo uang wanhi lagaukwa. Waluk he, uang andi iren waluk ap Yesus nen inebe wenagaisogo inayonggo fuluk lakfisasikhe mene omanogo inenggiba fei waga lagaukwa. Fei wagunem he, it ekhe inangge lek mene inebe lombok higithogoat sumburogo helikhi lagaukwa. A'nogo hilingiti lagaukwa andi nen, it ekhe inelagaik agi'legat welagaukwa.

³⁶ A'nogo hilingiti logolik he, ap ekhe enu Yusuf. Unggulenu Lewi mene. Aiba o enu Siprus mene, it ap Yesus nen inebe wenagaisogo inayonggo fuluk lakfisasikhe mene omanogo nen, nit ninaneba enu inendawinggen sebelek iluk u hak, it inaneba enu Barnabas salhukwa.

³⁷ Ap andi anggweang were'ma re, it ekhe inoba onggo uang wanhikhesik he, uang andi waluk, it ap Yesus nen inebe wenagaisogo inayonggo fuluk lakfisasikhe mene omanogo inenggiba fei wagaikhe.