KISAH PARA RASUL 3 - Allah Wene Fano Wene Hupla Inane

Petrus Yohanes emberek ap eisok wut warek mene fano higitukwa wene

¹ Inenggi ekhe sambul he, jam 3 oba, mo hea i lageluk ugu kwelek, Petrus Yohanes emberek, afuni Allah awi wuri'mo samban ikhi lagaukwa hak uogeluk ugunem, inoba lagasukwa.

² Lagasukwa hak he, ap ekhe agaisa alabutmo nen eisok wut warek mondok ta'lagaikhesik welagaikhe mene, kwe ambe pale'ma enu Eil Amulit Fano iluk ikhi lagaukwaba andoma fei wagaukwama were'ma hasukwa. Afuni nen ap andi inenggi ekhe kamo igi'lek hundik-handigat afuni ekhe Allah awi wuri'mo kugunem he, yi mene ti mene ambe kino weak yagaisikhi logouwageluk, kwe ambe pale'ma andoma yerogo fei waga lagaukwa.

³ O andi sambul fesukwama hurek were'ma re, Petrus Yohanes emberek Allah awi wuri'mo kuogeluk ugunem, eilenggen isasikhesik he, iren yi mene ti mene ekhe wogosuageluk kino yagaisasikhe.

⁴ Kino yagaisasikhemo re, it emberegen ineilenggen oba lourogo fikhi logolik he, at Petrus nen, ”Heilenggen yet nisan,” iluk yagatikhe.

⁵ Yagatikhemo re, at ap andi endawimo nen he, ”Iren yi mene ti mene ekhe wo'nesugun higi,” iluk eilenggen inoba welagaikhe.

⁶ Eilenggen inoba were'ma re, at Petrus nen mel yagatikhe: ”Uang emas inom, perak inom, an nenggimo mondok lego. We, an werek mene ekhe wokhesigin. Andi re, hebe menla'luk kwe nikhi logoinogeluk, Yesus Kristus aiba Nasaret mene enu hombuk palogo yagaheti o,” iluk yagatikhe.

⁷ A'nogo yagatikhesik he, enggi ebekwe fagaisogo menfesikhe. Menfugunem he, ap a'nogo eisok wut ware'ma re, eisok agut inom, angguli inom, aremnogoat omame agaikhe.

⁸ Omame agaikhesik he, siakhogo menla'luk, kwe nikhi lagaikhesik he, Petrus Yohanes emberek inom Allah awi wuri'mo kwisukwa. Kwikhi logolik he, ap a'nogo nen Allah fogerati logolik, ya muluget higik, ta muluget higik, kwisikhe.

⁹ A'nogo kugunem he, afuni mondogat ineilenggen hasukwa.

¹⁰ Ineilenggen hasukwasik he, at ebe enegat futfesukwasik, ”Allah awi wuri'mo kwe ambe pale'ma enu Eil Amulit Fano agarek oba olilu kweba andem hurek logolik he, yi mene ti mene wogeti logouwageluk kino ikherek mene a'nogo ebe yi. Egi! Ninggi'nogo nen fano aga. Ninailo e,” iluk fogeratukwa.

Petrus nen komorinafikhe wene

¹¹ Ap a'nogo Petrus Yohanes emberek inombo'ne mondok nikhi lagaikhesik Allah awi wuri'mo nen wulibi wagaukwasik, o solombon enu Salomo asolombonma iluk ikhi lagaukwaba andi wulibi wagunem he, afuni mondogaren fogerarik inoba andogotukwa.

¹² Andogotukwama re, at Petrus eilenggen isasikhesik he, mel yagaisasikhe: ”Hit afuni Israel mene yi sani. Ap yi kwe nikho yi, nit ninonggwarek ninomameba hilingitik, ninobabut fano Allah ane hologo hilingiti lagoba, hilingitik, ogoma hangge, hit fogeratik, hineilenggen lurogo nisigik, ikhi lagep oma nenahalok?

¹³ Nineisena Allah andi, Abraham inom, Ishak inom, Yakub inom, ninombalak ekhe inom, ineisena Allah andi nenat he, amlogo Yesus esinet fesikhe andi. Mene re, hiren, it ekhe nen wasuageluk inenggiba fegepma re, at Pilatus nen enggi hele fikhalogo wulakfeigeluk ugunem, hiren he, Ap andi ninabiro, iluk egep a'nogo.

¹⁴ Athe, Allah nen lakfei wagaikhemo obabut higithogo hilingiti laga meneat he, hiren Pilatus yagati logolik, Ap andi ebe ninabiro. Ap ekhe afuni inoare meneat he, andiat enggi hele fikhalogo wo'nisan o, iluk kino yagatep anggigi.

¹⁵ Nineluget ninaferek mene ero ebe at meneat he, hiren watepma Allah nen he, ebe eluget fikhemo, nit nineilenggen eberogoat hogosigen yagahisikhi lago o.

¹⁶ Ap eisok wut warek welaga mene yi nen he, Yesus andi eberogoat, iluk enu hombuk palogo, endawinggen at oba himbiret fikhe andiba, ap yi hineilenggen hikhi lagepma re, ebe hinelu mene a'nogoat omame aga yi. Endawinggen a'nogo Yesus oba himbiret fikhe andiba, hit hineilhanemat mondok fanot fikhemo yi.

¹⁷ Mene re, nerugwi nagaila'lak. Hit hinogogwi kaindek hinom Yesus faget hilingitep andi, hinonggot logolik hilingitep andi, an nelu o.

¹⁸ Fageat Allah nen he, An nen telhinabigin mene Kristus hinoba lakfei wesigin andi, ebe yi enggin ti enggin oba fembik wasugun aro, iluk wene watnisasikhe mene andi, ebe it ap at ane yagaisikhi lagaukwa mene omanogo inebe mondogaren ikhi lagaukwa andi hagat hilinglasuageluk hilinglaga andi.

^19-20 Andi nen he, hit weak hilingiti lagep mene andi, nineisena Tuhan Allah nen sebelogo legetfisaluk, hinendawinggen faget hineilenggen fanorogo hilinghinabi wagik, aren he, Kristus hinebe telhinaferek mene hinoba lakfei wesigin, iluk wene warisasikhe a'nogo ebe Yesus andiat hinoba hobuk lakfei wagik, uagen he, hinobabut hebelasimbik hinelokhe Allah wogo'no o.

²¹ Yogondak ya re, Yesus ebe pogoroba logogin obaat logogin o. Logombigen, huli Allah nen yi mene ti mene mondogat ket mene hilinglasigin andi huliat pi wesigin o, iluk fageat it ap inebe Allah faget logolik at ane yagaisikhi lagaukwa mene omanogo nen isukwa hagat hilinglasigin o.

²² At Musa nen he, mel yagaisasikhe: Nineisena Tuhan Allah ane yagahisikhi logouwageluk, ap hit mene ekhe an mennobagasikhe andi hak, hobuk menfagain a'naga. Menfoumo re, aren yi wene ti wene yagahisagain mene andiat hinesanggo mondok fanorogo holhi logoino o.

²³ Sa nen wene aren yagahisagain mene andi esanggo holhi'lek halok he, Allah nen, at againafuri inanggele'ma nen lisogo wulakfisambik weagetfagain o, iluk yagaisasikhe.

²⁴ It ap attak Allah ane yagaisikhi lagaukwa mene omanogo, huli at Samuel andi huli nen he, it hobuk Allah ane yagaisikhi lagaukwa mene inomat, inebe mondogaren he, wene nit o yogondak ya logolik hilingiti lago mene faget ikhi lagaukwa.

²⁵ Allah nen wene wa'nisasikhe mene it ap attak at ane yagaisikhi lagaukwa mene omanogo nen yagaisikhi lagaukwa andi, hit fageraro. Nen, Allah nen nit ninombalak wene warogo woginafikhe andi, hit fageraro. At Allah nen Abraham yagati logolik he, Haren tagongge mene andiba afuni kweangma mene yoma yi afuni ti afuni inunggulenu lombok fanorinabigin o, iluk wene waretikhe.

²⁶ Allah nen he, wene andi waretikhe hak, hit weak hilingiti lagep mene hinebe lombok hinambotma herakfisoageluk amlogo ebe fanothinabigin mene hit tak hinoba pelakfei wagaikhe andi,” iluk komorinafikhe.