KISAH PARA RASUL 27 - Allah Wene Fano Wene Hupla Inane

At Paulus i soba o Roma wesuogeluk waluk wagaukwa wene

¹ Iren nit i soba o Italia lakninobagai wesuogeluk, wene arat palhukwasik he, ap tentara hokhorogo Kaisar agot esa folhi lagaukwa mene inoe kain enu Yulius nen Paulus inom, afuni inenggi hele warek mene ekhe inom, woginarek wesuageluk enggiba fesukwa.

² A'nogo inebe at enggiba fesukwama, e so ebe o Adramitium en waluk wagaukwasik were'ma, afuni o propinsi Asia e so kwikherek kwe lombok pelakfisaluk wesuogeluk ugunem, ap Aristarkhus, aiba o propinsi Makedonia kota enu Tesalonika mene ninom, e so andi elema kwisugusik wagagu.

³ Kwisugusik waga logolik, ohealekwe re, o Sidon wagagu. Wagagusik he, at Yulius a'nogo nen, Paulus ebe endawiratikhesik, mel yagatikhe: ”Hat yi mene ti mene ekhe lek halok he, hagaila'lagen wokhesuageluk inoba fa'larik lan o,” iluk yagatikhemo lagaikhe.

⁴ Lagaikhesik, hobuk wagaikhesik he, o andoma nen i agum ebene e soba waga logolik, sogoi ninelokhekwe nen laga lagaikhemo re, i alonggenma enu Siprus andi abel fenakwe re, sogoi kwe pale'ma fano iluk andikwe wagagu.

⁵ Andoma nen wagagusik he, o propinsi Kilikia nen pikhit propinsi Pamfilia higit andoma i uan mene andi aik yiba wulibi wagagusik he, o propinsi Likia kota enu Mira andi wagagu.

⁶ Andoma nen ap tentara mene inoe kain a'nogo nen e so ekhe o Aleksandria mene o Italia wesuogeluk ugunem hasikhesik he, nit wagagu mene a'nogoba nen, e so iren mene a'nogoba wo'ninarek kwisikhe.

⁷ Wo'ninarek kwisikhesik, hup hundik lingge hundik erogat ya nogolik waga lagagusik, wesugun higit agaikhe meneat he, o enu Knidus higit wagagu. Wagagusik, sogoi en kwe higithogo wesu lek hak agaikhemo, kwanirogo, i alonggenma enu Kreta andi abel fenakwe sogoi kwe palek fano iluk, Salmone ambisangma andi herakfisaluk pikhit wagagu.

⁸ Ninoba wiik-weakhogo waga lagagusik, o kota Lasea nen horogat andoma o ekhe enu, ”E so fanorogo kelogo fagarek oba,” andoma wagagu.

⁹ Andoma wagagusik, ninenggi hokhorogoat welagagu. Logolik, afuni Yahudi mene nen he, ”Nit weak hilingitorek mene Allah nen sebelogo legetfisaluk hobuk ninom fano ago,” iluk inendawimo ebethikhi sumburu ninggi'lek weat welagaikharek oba higit welagagusigenat, e soba fanorogo wesu legat, i la hak hilinglagaikhemo re, at Paulus nen he,

¹⁰ ”Nagaila'lak. An nendawimo nen he, nit e soba pikhit logoin halok, mondogat alomat lasugun o. Andi re, yi mene ti mene e so elema kwalek mene nek weak agik, e so ebe weak agik, igin fuk. Athe, afuni ninebe ninomat i la hagat anggikhi lagi o,” iluk yagaisasikhe.

¹¹ A'nogo yagaisasikhe meneat he, ap tentara inoe kain a'nogo nen Paulus ane oak sagalogo herakfisaluk, it ap yabu e soba hilingiti lagaukwa mene inoe kain andi inom, e so ebe waluk nikherek mene andi inom, emberek inane holhikhe.

¹² O salim oba e so fanorogo hele kelfuluk logou elo'lek andi nen he, it ap yabu e soba hilingiti lagaukwa mene inebe hokhorogo nen he, ”O kota enu Feniks logoin halok he, lambik, o salim oba o andoma fano logoin,” iluk wene palhukwa. Wene a'nogo palhukwa andi re, i alonggenma enu Kreta andoma, o Feniks i unggutmo andoma o mo korokhogo kwikherek higit abel ponggwe ambe palegat, manggwe ambe palegat were'ma re, e so hele kelfuluk fano welagaikharek andi nen isukwa.

O sogoi hokho mene laut oba wagaikhe wene

¹³ Nit andoma were'ma, sogoi i laut higiren erogat funha wagaikhemo, it ap yabu e soba hilingiti lagaukwa mene nen he, ”Nit louwogeluk ogo a'nogo arat horok aga,” iluk e so ago telik mene henogo waluk he, i alonggenma enu Kreta era'lukwe wagagu.

¹⁴ Mene re, horogat wagagu hak he, o sogoi eindep ane hokho mene o mo lagai wagarek higit abel ponggwe i aik oba higiren aninirogo mondok funha wagaikhe.

¹⁵ Funha wagunem he, e so unggul sogoi wagaikhe kwe higithogo wasu elo'legen, herakfisasugusik were'ma sogoi en kwanirogo wo'ninarek lagaikhe, andikwe higit waluk wagi'lek herakfisasugusik were'ma, sogoi en kwanirogo wo'ninarek wagaikhe.

¹⁶ Wo'ninarek wagaikhemo re, e so endep mene e so hokho mene nen lisogo waluk lagarek mene andi ninghogo ninggi'nogo hele homasu heat hilinglagaikhemo re, i alonggenma endep mene enu Kauda andi sogoi kwe pale'ma abel manggwe kwanirogo waga logolik, e so endep mene a'nogo hele lisogo elok homatukwa.

¹⁷ A'nogo homatukwasik, e so hokho mene oba fesukwa. Oba fesukwasik he, e so hokho mene a'nogo ebe ninghogo iluk kombi e so abel a'makwe legeisogo hele homatukwa. Homatukwasik, o Libia higit andoma i agum horokse'ma re, sogoi en ial enu Sirtis oba wula'lakhogo lanogo iluk, inailo nen, su sogoi en woginarek loageluk liafarek mene andi pelakfei wagaukwama re, sogoi en hesangge wo'ninarek wagaikhe.

¹⁸ A'nogo wagunem, sogoi en mondok foinalek lenggalek wo'ninarek wagunem, ohealekwe e so ebe se asuageluk yi mene ti mene elonggoma kwalek welagaikhe mene ekhe heiselogo ima pelakfisasukwa.

¹⁹ Pelakfisikhi lagaukwasik, ohealekwe re, it ap yabu e soba hilingiti lagaukwa mene nen, anggombi inom, yi mene ti mene ekhe inom, inonggwarek inenggi nen heiselogo pelakfisasukwaat.

²⁰ A'nogo pelakfisasukwasik, ninenggi hokhorogoat sogoi aninirogo foinalek lenggalek funha wagu mondogat kamo isikhemo, mo inom, hesagal inom, nineilenggen liakhigi'legat logolik, ninendawimo nen he, ”Nit attak he, fano wo'ninarek logoin anggikhi lago a'nogo, yogondak he, i logoin higi,” iluk ninendawimo weak agagusik kamo isugu.

²¹ A'nogo ninendawimo weak agagusik sumburu attagaren ninggi'lek weat were'ma re, at Paulus ebe inanggele'ma menlagaikhesik he, mel yagaisasikhe: ”Nerugwi nagaila'lak. O i alonggenma o Kreta nen, logoin lek, iluk komothinafi a'nogo, an nane holilepma re, yi mene ti mene weak agik, nong agik, ogo andi, ilo lego.

^22-24 Mene re, nerugwi nagaila'lak. An nebe eisewerek he, Allah atma re, an nen at fogeratirek mene nen, malaikat ekhe yogo hubanggo noba lakfei wagama re, nera'lu menlasi waga. Menlasi wagasik, mel yaganete: Paulus. Hailo lekhogo logoino o. Hat hobuk Kaisar oba lagain andi nen, afuni andoma mondogat hinom e soba laga lagep mene, at Allah obabut fano nen hat endawirogo hinomat telhinabigin o, iluk yaganete andi nen, nagaila'lak. Hinendawinggen hambukhogo logobagaigeluk, wene yi yagahisak. Ninebe ekhe i logoin lego. We, e so nek alomat lasigin.

²⁵ Andi nen he, nerugwi nagaila'lak. Allah nen yaganete andi hagat eberogoat hilinglasigin iluk, nendawinggen at oba himbirik welagi andi nen, hit hinendawinggen hambukhogo logoino o.

²⁶ Mene re, i alonggenma ekhe aik oba wula'lakhogo ninobagai lagain o,” iluk yaganisasikhe.

²⁷ I Adria yenggelek i agum ebene sogoi en wo'ninarek wagu kwelek, ninenggi 13 en nogo isugusik, ekheba o hubenggen tulem hangge it ap yabu e so elema hilingiti lagaukwa mene omanogo inendawimo nen he, ”I aik oba horogat asi wago higi,” iluk anggasukwa.

²⁸ A'nogo anggasukwasik he, ”I agum uan a? Horoga,” iluk ilirengge helep kelogo pelakfesukwama re, 40 meter uanat welagaikhe. A'nogo pelakfuluk, horok andoma wagagusigen, ilirengge hobuk pelakfesukwa mene re, 30 meter endep horogat hangge welagaikhe.

²⁹ A'nogo welagaikhe andi nen he, iren, ”E so helep oba wula'lakhogo feinogo,” iluk he, telik logouwageluk, e so ago enggin mene 4 oba e so alelekwe nen hele kelogo i elonggoma ial oba pelakfesukwa. Pelakfesukwasik he, ”O weak-weak wei inige,” iluk ikhi lagaukwa.

³⁰ A'nogo ikhi logolik, it ap yabu e soba hilingiti lagaukwa mene omanogo e soba nen heise wulibuogeluk he, it ekhe mel yagaisasukwa: ”Niren e so ago enggin mene e so unggulkwe nen hele kelogo pelakfei logoin,” iluk ineranenat isukwasik, e so endep mene hele kelogo ima pelakfesukwa.

³¹ Ima pelakfesukwama, at Paulus nen he, ap tentara mene inoe kain a'nogo inom, agoromi omanogo inom, yagaisikhi logolik he, ”It ap yoma e so hokho mene yiba logogun lek halok he, hit hinebe mondogat telogoin lek higi,” iluk yagaisasikhe.

³² A'nogo yagaisasikhemo, iren he, e so endep mene a'nogo kombi kelik welagaikhe mene tekhogo lakfisasukwama i lagaikhe.

³³ O wei igeluk ugu kwelek, Paulus nen it mondogat sumburu noageluk mel yagaisasikhe: ”Hit hinendawimo nen he, nit ninggi'nogo hilinglasugun, iluk hinendawimo menenei ebeti logolik hinenggi 14 nen sumburu ninggi'lek weat welagep andi.

³⁴ Mene re, hit hinebe ekhe i lagik, hinoba endebat ekhe weak agik, igin mondok lego. Halok he, fano telobagaigen he, sumburu ekhe nobagaik iluk yagahisigi,” iluk yagaisasikhe.

³⁵ A'nogo yagaisasikhesik, sumburu roti mene ekhe enggim wanhikhesik he, it mondogat ineilhanem Allah hai warogo, at tak kurogo nasikhe.

³⁶ At tak nasikhemo, it inendawinggen siok isukwasik he, inebe mondogat sumburu naluk lagaukwa.

³⁷ E so andiba re, ninebe hokhorogoat 276 en mene wagagu.

³⁸ Ninalabut ninghogo nasugusik he, e so ebe se asuageluk gandum enggen e so elema kwalek welagaikhe mene heiselogo ima pelakfisasukwa.

E so i aik oba wula'lak isikhesik weak agaikhe wene

³⁹ O wei isikhemo re, it ap yabu e soba hilingiti lagaukwa mene omanogo nen, i aik oba ineilenggen yethasukwa meneat he, o koma heat inonggot agaikhe. Inonggot agaikhesik ineilenggen yethasukwa re, i unggutmo ial talek were'ma yethasukwasik, mel isukwa: ”E so ebe andoma yakfei logoin eloga? Elo'lega. Walhouwok,” iluk isukwa.

⁴⁰ A'nogo isukwasik, e so ebe andem logouwageluk e so ago enggin mene pelafukwa mene a'nogo, kombi tekhogo ima pelakfesukwa. Pelakfesukwasik e so ago ekhe, e so unggul hebelhi lagaukwa mene andi fikhalogo nen, sogoi en e so unggulkwe higithogo i aikwe waluk loageluk, su e so unggulkwe mene liakfesukwa.

⁴¹ Liakfesukwama, sogoi nen waluk he, ial horogat tale'ma andoma e so a'nogo yakfei lagaikhe. Yakfei lagaikhemo, e so unggulkwe ninghogo wula'lak isikhemo re, alelekwe, i ha'labu nen wati logolik endebat weaget figik, endebat weaget figik, mondok weaget fesikhe.

⁴² A'nogo hilinglagaikhemo re, it ap tentara omanogo nen, it inenggi hele warek mene omanogo heise kume wulibinogo iluk he, inebe inoasuogeluk isukwa.

⁴³ A'nogo inoasuogeluk isukwa meneat he, it inoe kain a'nogo nen Paulus teligeluk he, ”A'nogo hilingisugun lego,” iluk wene palhikhe. Wene palhikhesik he, ”Kume hinelu mene tak pokharogo ima pimbik i aik oba wulibi lani o.

⁴⁴ Nen, hit fena re e kagalek yoma inom, e so mesalek mene yoma inom, hinenggi fakhigik, waluk, inombo'ne wulibi lani o,” iluk yaganisasikhe. Yaganisasikhemo, a'nogoat ninebe mondogat telogo i aik oba fano wulifugu.