KISAH PARA RASUL 26 - Allah Wene Fano Wene Hupla Inane

Paulus nen, ebe elelerogo wene Agripa yagatikhe wene

¹ At Agripa nen he Paulus mel yagatikhe: ”Wene hat honggwarek faget yagane'nogen iluk yagaheti o,” iluk yagatikhemo re, at Paulus enggi liakfesikhesik hai wati logolik mel yagatikhe:

² ”Agripa noe. Wene it ap Yahudi mene nen wene noba fili'lagwi andi, noba le'ma aro, iluk nebe elelerogo wene hat heilhanemat yogondak igin yi re, nendawimo nagaiyek anggikhi lagi o.

³ Nit afuni Yahudi mene hilingitorek mene andi inom, wene ninane hunogo tomok ogorek mene andi inom mondogat hat helu andi nen, nane harat yagahesigeluk nendawimo nagaiyek anggikhi lagi o. Halok, yagahetu kwelek, hendawimo puk agi'lek hesanggo hologo logoino, noe.

⁴ An nebe alageba nen afuni ninunggulenu misigat mene ninom o kota Yerusalem logolik nobabut eroba nen hilingiti lagagi mene andi, it afuni Yahudi mene mondogat inelu o.

⁵ Nit Allah awe a'ma kuluk logolik hilingiti lago wene andi, it ap ekhe Farisi mene inawene fisogo logolik, hesanggeat hilingitu kwelek, an enek he mondok ninghogo fisogo logolik hilingiti lagagi andi, it ap yoma endamat en inelu mondok werego. Halok iren he, andi eberogoat hilingiti lagaikhe meneat ikhe, iluk yagahesugun he a? Lek he a. Irenat ugun o.

⁶ Yogondak wene noba faga mene ero herasuogeluk menlagi yi re, at Allah nen he, yi'nogo fanothinabigin, iluk ninombalak wene warisasikhe wene andi, an nen, eberogoat fanotninabigin o, iluk nendawinggen at oba eberek welagi andi faget, wene noba faga mene ero herasuogeluk welago yi.

⁷ Attagat nit afuni Yahudi mene ninunggulenu lombok 12 yoma mondogat Allah nen he, yi'nogo fanothinabigin, iluk wene warisasikhe andi, ebe hilinginabuageluk, Allah oba himbirik logolik, linggene hubanggo, at fogeratu mondok welagaikharek. An ogo re, wene warisasikhe andi eberogoat hilingninabigin aro, iluk eberek welagi andi nenat, it ap Yahudi mene yi nen wene noba fili'lagwi yi, noe,” iluk at Agripa yagatikhesik,

⁸ hobuk it ap Yahudi mene yagaisikhi logolik he, ”Nagaila'lak. Hiren he, Allah nen afuni wa'lagaikharek mene eberogoat inelugerinabigin, iluk futfikhi lagep lek andi nenahalok,” iluk yagaisasikhesik, Agripa mel yagatikhe:

⁹ ”An attak he, Yesus aiba Nasaret mene enu andi lek asuageluk yi mene hilingitik ti mene hilingitik, hilingiti logogin aro, iluk nendawimo anggasigi.

¹⁰ A'nogo hilingiti logolik, attak o Yerusalem logolik, Allah againafuri inenggi hele wasigeluk isigimo re, it ap Allah eisewerek inogogwi kaindegen, i o, fano, iluk lisu palogo wo'netukwama, Allah againafuri inebe hokhorogoat inenggi hele warogo fisigik, inebe inoasuogeluk ugunem, i o, inoasuogat, iluk igik, ikhi lagagi.

¹¹ A'nogo ikhi logolik he, an o afuni Yahudi mene samban agarek kwe lombok kuluk, it inendawinggen Yesus oba himbirik welagaukwa mene hebisoageluk nane ninghogo yagaisigik, yi enggin ti enggin hilinginafik, ikhi logolik, na'mage hokhorogo lagakhi logolik he, it ekhe o yatmaat esanggo-esanggo andoma mene sikmuk isikhi lagagiat,” iluk yagatikhe.

At Paulus nen he, ”Yesus nen yi'nogo wolnafikhemo, nobabut hebelhigi o,” iluk yagatikhe wene

¹² ”A'nogo inoasigeluk isigimo re, it ap Allah eisewerek inogogwi kaindegen, fano, iluk lisu palogo wo'netukwama, o kota Damsyik lagagi andi.

¹³ Agripa noe. A'nogo o linggene ebekwe lagunem he, mo asinandi hangge fuk oba nen ombak-bak mondok hokho mene, an inom, ap ninom lagagu mene inom, pogoroba nen ninera'lukwe mondogat yararet hikhi logolik seleget ninabi pi wagaikhe.

¹⁴ A'nogo pi wagunem he, nit mondogat kweangma talorogo weing lagagumo, at ekhe nen ane yaganeti logolik, afuni Ibrani mene ninaneba mel ugunem nesanggo holhigi: Saulus, Saulus. Anat yi enggin ti enggin hilingnabigeluk mu'narek nikhi lagen andi nenahalok? Sapi wam sige tomuk enggat kabelek meneba ebe silhugunem, Nabit, iluk onggwaregen talogo warikherek andi hak, hat honggwaregen hebe a'nogoat weaget fakhikhi lagen o, iluk yaganetikhe.

¹⁵ A'nogo yaganetikhemo, an nen he, Eige, Noe. Hat sa, iluk yagatigi. Yagatunem Tuhan nen he, An Yesus o. Yi enggin ti enggin hilingnabigeluk mu'narek nikhi lagen mene a'nogo aro.

¹⁶ Mene re, hebe menlame. An nebe helokhoma menlasi wagi yi. Hat hebe an namingmingengge kwimbik logolik, yogondak heilenggen neegen mene inom, hobuk nebe helokhoma menlagunem neagain mene inom, afuni ekhe yagaisikhi logoinogen iluk, hayonggo figi andi.

^17-18 Afuni Yahudi mene inom, it endakwe mene inom, hoasuogeluk ugunem, an nen telhafi logogin o. It endakwe mene ineilenggen mum werek andi fenggenogo selegerinafik, inebe o mum oba werek andi inelokhe hebelogo selek oba fisa wagik, Iblis enggiba werek andi, Allah enggiba fisa wagik, inogen iluk inoba lakhobagagin o. Lakhobagaumo, it inendawinggen an noba himbiret foumo re, it weak hilingiri'lagwi mene andi, at Allah nen sebelogo legetfisigik, An nagainafuri iluk, inebe woginafik, igin o, iluk yaganetikhe,” iluk yagatikhe.

At Paulus hilingirik nikhi lagaikhe mene faget yagaisasikhe wene

¹⁹ A'nogo yagatikhesik, ekhe mel yagatikhe: ”Andi nen, Agripa noe. Allah nen Yesus nelokhoma menlasuageluk lakfei wagaikhe mene andi, ane hologo hilingiti logoigeluk nomamerogo hilingitu mondok welagi.

²⁰ Wene andi, attak it afuni Yahudi mene o Damsyik andoma welagaukwa mene yagaisasigi. Hobuk o Yerusalem lambik logolik, it andoma mene yagaisigik, o propinsi Yudea mene mondogat yagaisigik, isigisik, it endakwe mene yagaisilik nikhi lagi. A'nogo yagaisilik nikhi logolik he, weak hilingiti lagep mene herakfisambik hinobabut hebelasimbik hinelokhe Allah wogo'no o. Hinelokhe Allah wogosimbik he, hinobabut afuni inobabut hebela'luk hilingitarek hagat hilingiti logoino o, iluk yagaisikhi lagi.

²¹ Yagaisikhi lagi andi nenat, an Allah awi wuri'mo kwigirik were'ma, it ap Yahudi mene nen nebe faknobagaluk noasuogeluk isukwa andi.

²² Noasuogeluk isukwa meneat he, Allah nen fetnarek mondok were'ma, an yogondak yoma mendek logolik hit ap kaindek inom, hinagoromi inom, wene an nen yagahisikhi lagi yi. Wene yi re, attagaren, it ap Allah ane yagaisikhi lagaukwa mene nen inom, at Musa nen inom, hobuk yi'nogo hilinglasigin, iluk isukwa meneat yagahisikhi lagi o.

²³ Iren he, Kristus telinaferek mene a'nogo ebe wa'lasimbik At tak eluk asimbik he wene selegerinabigin wene andi, afuni Yahudi mene yagaisigik, endakwe mene yagaisigik, igin o, iluk isukwasik lisu palogo fesukwa andi hagat an nen ikhi lagi o,” iluk yagatikhe.

²⁴ At Paulus ebe elelerogo wene a'nogo isikhesik ekhe inom igin ha'ma nen he, at Festus nen ane hokhorogoat he, ”Paulus. Lugulugwi palhen higi. Haren yi wene ti wene hokhorogoat yanggulhi lagen andi nen lugulugwi paluageluk hilinghafemo higi,” iluk yagatikhe.

²⁵ A'nogo yagatikhemo, at Paulus nen he, ”Festus noe. An lugulugwi palhirik ikhi lagi lego. We, fano logolik wene eberogoat yagahisikhi lagi o,” iluk isikhesik,

²⁶ ”Agripa noe. Wene yi mondogat hat helu andi nen, an hat heilhanem nailo lekhogo ikhi lagi. Wene andi, o hinagoma hilinglagi'lek. We, weinama hilinglagaikhe andi nen, wene andi ekhe hat honggot welagen, iluk nendawimo anggikhi lagi lego.

²⁷ Agripa noe. Wene it ap Allah ane yagaisikhi lagaukwa mene nen isukwa andi, eberogoat iluk anggikhi lagen lek nogo? Eberogoat iluk anggikhi lagen aro. An nelu,” iluk yagatikhe.

²⁸ A'nogo yagatikhemo, at Agripa nen he, ”An nebe yogondak ya weak-weagat Kristen mene asuageluk, haren hilingnabigin iluk anggikhi lagen a? Elo'lego,” iluk yagatikhe.

²⁹ A'nogo yagatikhemo, at Paulus nen he, ”Yogondak ya he a? Logombigen he a. Hat inom, hit ekhe nane yogondak holhi lagep mene hinebe mondogat inom, an nenggi hele warek welagi yi hangge nek hinoba agi'lek, we, an welagirek hagat hilinglasubagaigen iluk Allah ayonggo fikhi lagi o,” iluk yagatikhe.

³⁰ A'nogo yagatikhemo re, at enupogot Agripa a'nogo inom, at kain gubernur Festus a'nogo inom, he Bernike a'nogo inom, it ekhe inom hurek welagaukwa mene mondogat inom, inebe menlagaukwasik,

³¹ olulu wulifukwa. Wulifukwasik he, it-it ikhi logolik, ”Ap andi re enggi hele watik, ebe watik ugun andi re aren weak ekhe hilingiti'le'ma aro,” iluk isukwa.

³² A'nogo isukwasik, at Agripa nen Festus yagati logolik he, ”Paulus nen he, Wene noba faga mene yi, at Kaisar nen ero heragaisogo elugun wasuago, iluk igi'lek logoilepma re, niren enggi hele fikhalilo,” iluk yagatikhe.