KISAH PARA RASUL 25 - Allah Wene Fano Wene Hupla Inane

At Paulus nen he, ”Wene noba faga andi, ap Kaisar en wene ero heragaisogo elugun wasuak,” iluk isikhe wene

¹ Ap Festus a'nogo menfesukwama, o Kaisarea andoma wagaikhesik he, enggi henagan welagaikhesigen, o Yerusalem lagaikhe.

² Lagaikhesik were'ma, it ap Allah eisewerek mene inogogwi kaindek omanogo inom, ap Yahudi mene inogogwi kaindek inenuwerek ekhe inom, inom oba kwisukwasik he, wene Paulus oba fikhi lagaukwa mene a'nogo yagatukwa. Yagati logolik, endawimo kagalogo hilingitukwa.

³ A'nogo yagatukwa andi re, at kain agoromi nen Paulus ebe waluk o Yerusalem wesuogeluk wagunem, ebekhalem wasuogeluk weim abok inane misigat lambukhogo isukwasigen, at yagati logolik, ”Hat hobabut fano nen, nit ninendawimo fanorogo Paulus ebe o Yerusalem yoma lakfei we'no,” iluk inane liokhogo kino yagatukwa andi.

⁴ A'nogo yagatukwa meneat he, at Festus nen he, ”At Paulus enggi hele warek o Kaisarea andomaat logouwak. Were'ma, an yoma welagi'lek weak-weagat lagain o.

⁵ Aren weak hilingisu lek mene hilingite halok, hit ap kaindek yoma nen wene oba fobagaigen iluk ninomat louwogo,” iluk yagaisasikhe.

⁶ A'nogo yagaisasikhesik, enggi 8 en he a? 10 nen he a, inom o Yerusalem welagaukwasigen, o Kaisarea wagaikhe. Wagaikhesik, ohealekwe re, o afuni wene inoba figik, kotik, ikhi lagaukwaba hu'lasi kwisukwasik, agoromi nen Paulus ebe waluk wesuageluk yagaisasikhe.

⁷ Yagaisasikhemo lagaukwasik ebe waluk wagaukwama re, it ap Yahudi mene o Yerusalem en wagaukwa mene omanogo Paulus ebe abel fena-fena haningisogo kwelakfesukwasik yi wene ti wene enggin mene hokhorogoat oba fesukwa. A'nogo meneat he, at weak ekhe hilingiti'lek andi nen he, ”Eberogoat weak yi'nogo hilingitunem nineilenggen hogo,” iluk yagasu lek hak agaikhe.

⁸ A'nogo lek agaikhemo, at Paulus nen ebe elelerogo mel yagatikhe: ”Wene Allah nen nit afuni Yahudi mene komotninafikhe wene a'nogo ekhe sagalogo herakfisaluk weak hilingitik, o Allah awi wurik a'nogo weagetfigik, ninoe kain Kaisar o Roma mene a'nogo anewak sagalogo herakfisaluk ekhe weak hilingitik mondok igi'lego,” iluk yagatikhe.

⁹ A'nogo yagatikhemo, at Festus nen he, afuni Yahudi mene inendawimo fanorogo iluk, Paulus mel yagatikhe: ”O Yerusalem andoma nen wene yi faget an neilhanem ero heratunem, eberogoat halok an nen elugun wasigen, ninom louwoga? Habira,” iluk yagatikhe.

¹⁰ Yagatikhemo, at Paulus nen he, ”An yogondak he, wene inoba figik, kotik, agarek oba yoma, ninoe kain Kaisar Roma mene enggiba welagi. Halok, wene noba faga mene yi, at were'ma andoma nenat ero heragaisogo elugun wasuak. An nen it Yahudi mene weak ekhe hilinginafi'lek andi, hat helu aro.

¹¹ An nen ekhe hilingisu lek mene hilingitik, weak hilingitunem inebe mondok inoatarek mene hilingitik, eberogoat ilema re, noasugun higirat. Noa'ni, iluk ile. Mene re, it ap yoma nen wene noba le'maat fili'lagwi andi nen, it ekhe nen, it ap yi inendawimo fanorogo iluk, an nebe it inenggiba nobagagun elo'lego. We, noe Kaisar nenat wene andi ero heragaisogo elugun wasuago,” iluk yagatikhe.

¹² A'nogo yagatikhemo, ap ekhe at Festus inom logolik, ”Yi'nogo hilingisuok, ti'nogo hilingisuok,” iluk inom ikhi lagaukwa mene inomen, ”Yi'nogo hilingisuok,” isukwasigen Paulus mel yagatikhe: ”Haren he, wene yi, ap Kaisar en ero heragaisogo elugun wasuago, iluk egen andi nen, Kaisar oba lakhobagagin aro,” iluk yagatikhe.

Ap Agripa he Bernike emberek wagaukwama Paulus faget yagaisasukwa wene

¹³ A'nogo isukwasik he, inenggi endebat were'ma nen, ap kain enupogot Agripa erei Bernike emberegat, ap Festus hai wasuogeluk oba o Kaisarea wagaukwa.

¹⁴ Wagaukwasik inenggi ekhe inom andoma were'ma, at Festus a'nogo nen he, wene Paulus faget Agripa mel yagatikhe: ”Ap Feliks nen ap ekhe enggi hele warek herakfesikhe mene yoma werek.

¹⁵ Werek kwelek, an o Yerusalem lagimo, it ap Yahudi mene Allah eisewerek inogogwi kaindek inom, inaluendek inom, inom noba wagaikhasik he, an nen ap andi wene oba fembik ebe wasuageluk yaganeta.

¹⁶ Yaganeta menere, an nen onggo mel yagaisigi: Nit afuni Roma mene hilingitorek he, ap ekhe wene oba fugunem, it wene oba fogoin mene nen ap andi ebe yagatunem, aren onggo it yagaisigi'le'ma re, inebe inoasuageluk wogisogoin lek, iluk yagaisigi.

¹⁷ A'nogo yagaisigirik, inebe ninom yoma wagosik, ninenggi welagi'legat he, ohealekwe nagoromi nen ap andi o afuni wene inoba figik, kotik, agarek oba waluk wesuageluk yagaisigi.

¹⁸ A'nogo yagaisigimo, lagaikhasik ebe waluk wagaikhama, at ebe tulem menfuluk, it ap omanogo menlagaikhasik he, mondok weak hilingite mene wene oba fogoin anggigi mene a'nogo oba figi'lek.

¹⁹ We, iren ineisena Allah oba himbirik logolik inane hunogo tomok agarek mene faget wene ekhe oba figik, ap ekhe enu Yesus andi, ebe wa'lagaikhe meneat he, at Paulus nen he, hobuk ambotkwe eluk agaikhesik werego, iluk ane ninghogo ili'logo andi nen wene oba figik, aga o.

²⁰ Wene a'nogo oba faga mene andi, an wene andi faget futfigi'lek. Nonggot agama re, an nen Paulus mel yagati: O Yerusalem lambigen he, wene yi ero heragaisogo, an nen elugun wasigen, louwoga? Habira, iluk yagati.

²¹ Yagatimo, at Paulus nen he, wene yi at Kaisar en ero heragaisogo elugun wasuagen nenggi hele waregat heraknobagainogo, iluk ikhemo, an nen nagoromi mel yagaisigi: At Kaisar oba lakfogoin aga halok, lakfoumo re, enggi hele waregat fisogo logoino, iluk yagaisigimo werego,” iluk yagatikhe.

²² Yagatikhemo, at Agripa nen he, ”Ap andi ane an nesanggo lombok holigin namolo o,” iluk yagatikhemo, at Festus nen he, ”Halok he, ohealekwe halok ane hesanggo holinogo,” iluk yagatikhe.

²³ Yagatikhemo, ohealekwe ap Agripa inom, he Bernike inom, emberek fogerinafu kwelek, it ap tentara inogogwi kaindek inom, ap o andoma mene inenuwerek mene inom, inom o wene inoba figik kotik agarek oba a'nogo kwisukwa. Kwisukwama, at Festus nen agoromi nen Paulus ebe waluk wesuageluk yagaisasikhe.

²⁴ Yagaisasikhemo lagaukwasik ebe waluk wagaukwama, at Festus nen he, ”Agripa noe. Nen, hit ap ekhe ninoba kwi wagep mene yoma inom, nerugwi nagaila'lak. Ap yi hineilenggen hegep yi re, it afuni Yahudi mene o Yerusalem en, yoma nen, inebe mondogaren, an yaganeti logolik he, ap yi eluk logogin lek. Wasugun o, iluk inane hokhorogoat ili'lagwi.

²⁵ Iren a'nogo ili'lagwi meneat he, an nen wene andi ero herati mene re, aren weak ekhe eberogoat hilingitunem, wene inoba fuluk inebe inoatarek mene ekhe hilingitunem higi lek. Meneat he, at onggwaregen he, wene yi ap Kaisar en ero heragaisogo elugun wasuak, iluk ikhemo, Kaisar oba lakfeigeluk igi andi o.

²⁶ Mene re, wene at oba faga mene andi ero heratunem, an nen futfigi'lek nonggot agama wene andi faget lisu palogo ninoe kain Kaisar oba ninggi'nogo lakfogoin heat agama nen he, nerugwi nagaila'lak. Hit mondogat inom, ebe esin hangge noe Agripa inom, hinomen wene Paulus oba faga mene andi, ero heratunem, an fut fembik lisu furogo palogo lakfagain iluk nendawimo anggigirigen at ebe hinoba waluk wagi yi.

²⁷ A'nogo hilingiti andi re, wene ero heragaisogo nen, yi'nogo hilingitemo, iluk lisu furogo palhi'le'ma, at enggi hele warogo lakfogoin he, elo'lek anggigirigen at ebe waluk wagi andi,” iluk yagaisasikhe.