KISAH PARA RASUL 23 - Allah Wene Fano Wene Hupla Inane

¹ A'nogo menfesikhemo, at Paulus it ap Yahudi Allah faget wene ero pilingiti lagaukwa mene inebe andogetukwa omanogo, eilenggen lurogo inoba yerisikhi logolik he, ”Nogogwi nagoromi. An Allah eilhanem, attagaren huli yogondak huli hilingiti lagi andi re, weak hilingiti lagi, iluk nendawimo menenei ebeti lagi lek. We, wene nendawimo selek, fano hilingiti lagi, iluk anggikhi lagi,” iluk yagaisasikhesik he, ekhe igin ha'ma re,

² ap Allah eisewerek inoe kain mene enu Ananias nen he, it ap ekhe Paulus era'lu welagaukwa mene nen ambe lambukhogo wasuageluk yagaisasikhe.

³ Yagaisugunem, at Paulus nen, ap Allah eisewerek kain a'nogo yagati logolik, ”O hobat weak meneat he, elokhe fanorogo iluk amusu watarek andi hak, hagap oba nek fano hangge hendawinggen pire welagen andi re, Allah nen hat hoasigin aro. Haren, wene Allah nen komotninafikhe wene a'nogo fisogo logolik, wene andi higithogo hilingiti'lek, wene an noba fegepsik hagoromi nen an noasuageluk yagaisegen andi nenahalok,” iluk yagatikhe.

⁴ A'nogo yagatikhemo, it ap andoma welagaukwa mene nen he, ”Ap Allah eisewerek mene inoe kain yi hendawimo sebelfuluk wenageten andi nailo e,” iluk yagatukwa.

⁵ A'nogo yagatukwama, at Paulus nen he, ”I. Nagaila'lak. Allah ane lisu palogo fikhi logolik he, Hinogogwi kaindek kwelakhinarek welagaikharek mene andi hinendawimo sebelfisaluk wenagisagubo, iluk lisu palogo fesukwama werek meneat he, at ebe Allah eisewerek mene inoe kain werek iluk he an nonggotma igimo o,” iluk yagaisasikhe.

⁶ Hobuk at Paulus nen, it ap wene ero pilingiti lagaukwa mene omanogo inebe fena re, Saduki mene inane wanhi lagaukwa mene, nen, fena re, Farisi mene inane wanhi lagaukwa mene, were'ma eilenggen enegat futfisasikhesik he, ane hokhorogoat mel yagaisasikhe: ”Ap yi sani. Nogogwi nagoromi. An nebe Farisi mene. Ap Farisi mene nenat tagongge mene welagi. Logolik, afuni wa'lagaikharek mene hobuk Allah nen eberogoat inelugerinabigin iluk futfikhi lagi andi nen wene noba fagama yi,” iluk yagaisasikhe.

^7-8 It Saduki mene nen he, ”It afuni wa'lagaikharek mene Allah nen inelugerinabigin lek. Malaikat Allah nen yonggo pelakfisa wagarek mene inebe legat. Munggwarengge legat,” iluk ikhi lagaukwa. Nen, it Farisi inane wanhi lagaukwa mene nen he, ”Mondogat andi werek enego,” iluk fakhogo ikhi lagaukwa. A'nogo ikhi lagaukwa andi nen, at Paulus nen wene a'nogo yagaisugunem he, it Farisi inane wanhi lagaukwa mene inom, Saduki inane wanhi lagaukwa mene inom, inom it-it inane sagalhukwasik, inebe minggilogo huli-huli hilingitukwa.

⁹ Inane a'nogo hokhoat sagalhi logolik he, it ap Farisi mene Allah ane lisu palek inelu mene omanogo fena menlagaukwasik inane puk weak, it Saduki mene omanogo wenagisikhi logolik he, mel yagaisasukwa: ”Nit ninendawimo nen he, ap yi wene oba le'maat anggikhi lago. At amunggwarengge nen yagatemo ili'logo he a? Athe, malaikat Allah nen yonggo pelakfisa wagarek mene omanogo ekhe nen yagatemo ili'logo he a. A'nogo eberogoat yagatunem ili'logo meneat logogin,” iluk,

¹⁰ inane hokhoat sagalhi logolik, Paulus ebe fena nen litigik, fena nen litigik, wasinogo iluk, it ap tentara esa folhi lagaukwa mene inoe kain a'nogo nen, agoromi it ap omanogo inoba pisikhesik, Paulus ebe inanggele'ma nen telogo o tentara inawi hale'ma a'nogo waluk kuageluk yagaisasikhe.

¹¹ A'nogo yagaisasikhemo waluk kwisukwama re, o andi sambul hubanggo, Tuhan Yesus Paulus era'lu menlasi kwisikhesik he, mel yagatikhe: ”Haren he, wene an faget o Yerusalem yoma fakhogo yagaisegen andi hak, hobuk o Roma andoma a'nogoat fakhogo yagaisa lagainat andi nen he, hendawinggen hambukhogo logoino o,” iluk yagatikhe.

Paulus ebe wasuogeluk weim abok isukwa wene

¹² Ohealekwe ap Yahudi mene inebe ekhe andoget fesukwasik he, Paulus ebe wasuogeluk weim abok ikhi logolik mel isukwa: ”Niren Paulus ebe wati'lek logolik, i inom, sumburu inom, ninggi'lek logombigen, arat wato halogen nouwogo,” iluk hombuk palogo wene palhukwa.

¹³ Weim abok a'nogo isukwa andi, ap inebe 40 nen, ekhe inomat logoligen isukwa.

¹⁴ A'nogo isukwasik, ap Allah eisewerek inogogwi kaindek omanogo inom, inaluendek omanogo inom, inoba lagaukwasik he, mel yagaisasukwa: ”At Paulus ebe oan wati'lek logolik, yi mene ti mene nogoin lek, iluk, hombuk palogo hak wago.

¹⁵ Halok he, hit ap wene ero pilingitarek mene hinomen he, at tentara inoe kain a'nogo nen, Paulus ebe hinoba waluk wesuageluk lisu mel iluk palogo lakfeino: Niren Paulus anema senggerogo wanuageluk ebe ninoba waluk we'nogeluk kino yagaheto, iluk lakfeino. A'nogo lakfoumo, aren eberogoat iluk hinoba waluk wesigeluk wagunem, nit Paulus ebe wasuogeluk ebekhalem salfembik logogun o,” iluk

¹⁶ weim abok a'nogo ugunem, at Paulus eak mene ekhe andoma logolik esanggo holhikhe. Esanggo holhikhesik, o tentara inawi hale'ma a'nogo lagaikhesik he, Paulus elurogo yagasi kwisikhe.

¹⁷ Elurogo yagasi kwisikhemo, at Paulus nen ap tentara mene kain ekhe ebe wolhasikhesik he, mel yagatikhe: ”Noe. Ap alage yi nen, hinoe kain a'nogo wene ekhe yagasigin werego. Halok, haren at oba waluk lan o,” iluk yagatikhe.

¹⁸ A'nogo yagatikhemo, aren ap alage a'nogo waluk he, ap tentara inoe kain a'nogo oba lagaikhesik mel yagatikhe: ”Paulus enggi hele warek werek a'nogo nen wolniikhesik he, alage yi nen wene at ekhe yagasigin mene werego, iluk hoba waluk wesuageluk nayonggo fikhemo waluk wagi yi,” iluk yagatikhe.

¹⁹ A'nogo yagatikhemo, ap tentara inoe kain a'nogo nen ap alage a'nogo enggi fak-fak waluk inale'ma lagaukwasik mel yagatikhe: ”Wene nena wene yaganesigeluk wagen. Yaganom,” iluk heinok wokhasikhe.

²⁰ Heinok wokhugunem, aren he, ”It ap Yahudi mene inane lambukhogo ikhi logolik, Paulus anema furogo wanuogeluk hangge, haren ohealekwe ebe waluk, it ap wene ero pilingitarek mene andogorek were'ma inoba lanogen iluk kino yagahesugun aga.

²¹ Mene re, haren wene it aga andi, hologo hilingitun. Ap inebe 40 nen, ekhe inomat, logoligen Paulus ebe wasuogeluk weim abok agasik elokhoma salek logogun aga o. Iren he, Paulus ebe wati'lek logolik, sumburu inom, i inom, ninggi'lek logombik, arat wato halogen nogoin o, iluk hombuk palhasik werek. A'nogo logolik, yogondak iren he, wene aren onggo ninggi'nogo yaganisagain, iluk yetharek werego,” iluk yagatikhe.

²² A'nogo yagatikhemo, ap tentara inoe kain a'nogo nen ap alage a'nogo mel yagatikhe: ”Haren he, wene a'nogo arat fakhogo at yagati, iluk it ekhe yagaisagun o,” iluk komorogo ambotkwe lakfesikhe.

Paulus ebe o Kaisarea ap Feliks oba lakfei wagaukwa wene

²³ A'nogo hilingitikhesik ap tentara esa folhi lagaukwa mene inoe kain a'nogo nen he, ap kaindek at awe a'ma welagaukwa mene inebe pire wolisasikhesik he, mel yagaisasikhe: ”Hiren ap tentara mene inebe 200 nen inom, wam kuda oba inebe hurek logolik weim yafarek mene inebe 70 nen inom, sikhe sigeba inoatarek mene inebe 200 nen inom, inom hokhorogoat andogerinabimbik he, yogondak hubanggo jam 9 o Kaisarea lobagaigen iluk wendeberogo fisano o.

²⁴ Wendeberogo fisaluk, at Paulus ebe telogo wam kuda oba hut fembik, ap kain Feliks gubernur a'nogoba waluk lobagaigen he, wam kuda at faget ekhe fisano aro,” iluk yagaisasikhe.

²⁵ A'nogo yagaisasikhesik, lisu mel iluk palogo fesikhe:

²⁶ ”Kain gubernur Feliks noe. An Klaudius Lisias nen lisu yi palogo hoba lakfei wagi andi.

²⁷ Ap andi ap Yahudi mene nen fakfuluk wasugun ha'ma nen he, afuni nen, at ebe o Roma awiwerek mene, iluk yaganetama, an nen nagoromi tentara mene inayonggo figirik woginarek lagarik ebe telhi o.

²⁸ Ebe telhirik, ninggi'nogo hilingitemo nen wene oba fili'lagwi, iluk nelu asigen iluk he, ap it mene Allah faget wene ero pilingiri'lagwi mene inoba waluk lagi.

²⁹ Waluk lagarik, ero herato mene re, at ebe wasugun hangge hilingiti'legat. Nen, enggi hele wasugun hangge, hilingiti'legat higi. We, wene iren oba faga andi re, it Yahudi mene hilingitarek mene fagerat oba fagama o.

³⁰ Mene re, afuni nen, ap Yahudi mene nen Paulus ebe wasuogeluk weim abok agama o, iluk yonggo yaganesi wagaikhama nen, ebe hat hoba lakfei wagi andi. Lakfei wagarik he, hobuk it ap wene oba fili'lagwi mene werek, hat heilhanem i wesuageluk komorogo lakfisa wagiat andi o,” iluk at Feliks nen lisu palhikhe.

³¹ Palhikhemo re, agoromi tentara mene omanogo nen Paulus ebe waluk wesuageluk inayonggo fesikhe hagat waluk wagaukwa. O andi sambul hubanggo, at Paulus waluk he, o Antipatris wagaukwa.

³² Waluk wagaukwasik he, it wam kuda oba wagi'lek mene nen he, ”Hit wam kuda amboloba hurek wagep mene halok, Paulus ebe waluk lani,” iluk lakfisaluk he, it sugulogo inambotkwe o kota Yerusalem o tentara nen inawi hale'ma a'nogo lagaukwa.

³³ Lagaukwama, it waluk wagaukwa mene omanogo o Kaisarea wagaikhasik he, lisu palek a'nogo ap kain gubernur wogetukwasik he, Paulus ebe inom wogetukwa.

³⁴ Wogetukwama, lisu palek enu salhikhesik he, Paulus oba heinok wokhikhi logolik, ”Hat hawi ero koma nogo,” iluk heinok wokhasikhemo, aren he, ”An nawi o propinsi Kilikia mene,” iluk yagatikhe.

³⁵ A'nogo yagatikhemo, aren he, ”Halok he, ap wene hoba fili'lagwi mene andi inebe hobuk wagaikha halogen hanema wanigin o,” iluk yagatikhesik, at agoromi nen, Paulus ebe o hokho at Herodes wutikheba andi kwelakfesukwasik kagalek logouwageluk yagaisasikhe.