KISAH PARA RASUL 22 - Allah Wene Fano Wene Hupla Inane

¹ ”Nogogwi nagoromi. Wene yi an noba le'ma o, iluk nonggwarek nebe elelerogo yagahisagain yi re, hinesanggo fanorogo holino,” iluk ugunem,

² iren he, ”Nit afuni Ibrani mene ninaneba yaganisili'logo,” iluk inane mondok igi'lek kamo isukwa. Inane igi'lek kamo isukwama re, aren he, mel yagaisasikhe:

³ ”An he, ap Yahudi mene, nebe o propinsi Kilikia o kota Tarsus ta'lagagi meneat he, o Yerusalem yoma nen kulnafukwama nalue agagi. Nalue agagimo, ap kain Gamaliel nen wene Allah nen ninombalak komorinafikhe wene a'nogo furogo yaganeti lagaikhe. Yaganetunem, an nen hit yogondak Allah faget hinomamerogo hilingiti lagep andi hagat hilingiti lagi.

⁴ Hilingiti logolik he, afuni Yesus ane wanhukwasik ombo'ne yi'nogo laga lagaukwa mene halok inoasigeluk muginarek laga logolik ekhe inoatigiat. It ekhe hemi inom, ap inom, inenggi hele warogo woginarek, o inenggi hele warek fisagarek oba fisikhi lagagiat.

⁵ A'nogo hilingiti lagagi andi nen, ap Allah eisewerek mene inoe kain ebe inom, inaluendek inom, inebe mondogaren surat palogo ninagaila'lak Yahudi mene o Damsyik werek mene inoba waluk loageluk wo'netukwa. Wo'netukwama, it afuni Yesus ane wanhukwasik ombo'ne laga lagaukwa mene o andoma were'ma inenggi hele warogo woginarek, o Yerusalem yoma fisa wagunem, wene inoba figik, inebe inoatik, uageluk laknobagasukwama andi nen he, it inelu. Halok, irenat, eberogoat ikhe, iluk yagahisogoin werego,” iluk yagaisasikhe.

At Paulus nen he, ”Yesus nen yi'nogo wolneasikhemo nobabut hebelhigi,” iluk yagaisasikhe wene

⁶ ”An o kota Damsyik horogat lagain ha'ma re, o linggene misik sambul ferekhogoat aremnogo pogoroba nen ombak-bak yararet hikhi logolik an noba seleget nabi pi wagaikhe.

⁷ Pi wagunem he, an nebe kweangma talorogo nelokhe sagaum weing lagagi. Weing lagagimo, at ekhe nen ane yaganeti logolik he, Saulus, Saulus. Anat yi enggin ti enggin hilingnabigeluk mu'narek nikhi lagen andi nenahalok, iluk yaganetikhe.

⁸ A'nogo yaganetikhemo, an nen he, Eige. Noe. Hat sa, iluk yagatigimo, aren he, An Yesus, nawi Nasaret mene, yi enggin ti enggin hilingnabigeluk mu'narek nikhi lagen mene a'nogo aro, iluk yaganetikhe.

⁹ Yaganetunem he, it ap an ninom lagagu mene nen, selek andi ineilenggen hasukwa meneat he, ane an yaganetikhe mene andi, inesanggo holhukwa lek.

¹⁰ Inesanggo a'nogo holhi'lek werek kwelek, an nen he, Noe. An ninggi'nogo hilingisik, iluk yagatunem, aren he, hebe menlasimbik he, o Damsyik kwino. Kwimbik were'ma, haren Allah amolo mene mondogat hilingisigin mene faget ap ekhe nen yagahesigin a'naga o, iluk yaganetikhe.

¹¹ A'nogo yaganetikhemo, selek a'nogo nen neilenggen sili-pabuk isikhesik mum agaikhe. Mum agaikhemo re, it ap ninom lagagu mene omanogo nen nenggi fagaisogo wo'narek o Damsyik kwisukwa.

¹² Kwisukwama, o Damsyik andoma ap ekhe enu Ananias. Wene Allah nen komotninafikhe wene a'nogo fisogo logolik higithogo hilingitunem, it afuni Yahudi mene o Damsyik mene mondogaren inane agaukhogo yagati lagaukwa.

¹³ At ebe an noba wagaikhesik, nera'lu mendek logolik he, Saulus, nagailak. Heilenggen fenggen lame o, iluk yaganetunem, aremnogoat an neilenggen fenggen lagagisik, at ebe furogo hasigi.

¹⁴ Hugunem, aren he, At Allah ninombalagen fogerati lagaukwa mene a'nogo nen he, at endawimo anggikherek mene helu agik, at amlogo obabut higit mene Yesus andi heilenggen higik, at ane ambeba nen ugunem hesanggo holhik, inogeluk, hebe wenakhafesik hayonggo fikhe andi.

¹⁵ Halok, heilenggen higik, hesanggo holhik, egen mene andi re, afuni mondogat fakhogo yagaisikhi logoino.

¹⁶ Mene re, hat yogondak ekhe inom logogin lek. Hebe menlasimbik he, hat weak hilingiti lagen mene Allah nen sobalhafik, it ekhe nen ima pelakhafik, uagen he, Yesus enu hombuk palogo Allah ayonggo feino, iluk yaganetikhe,” iluk yagaisasikhe.

Allah nen afuni endakwe mene wene fano wene yagaisa loageluk, Paulus ayonggo fesikhe wene

¹⁷ A'nogo yagaisasikhesik, ekhe mel yagaisasikhe: ”A'nogo yaganetikhemo, an hobuk o Yerusalem wagagisik he, Allah awi wuri'mo samban ugunem, Areagun nendawimo kwisikhemo nabikanggo hasigi.

¹⁸ Nabikanggoba Tuhan nen yaganeti logolik, Haren, heilenggen an neegen mene andi inom, hesanggo holhen mene andi inom, afuni o yoma mene fakhogo yagaisugunem, hane inesanggo holugun mondok lego. Halok he, o Yerusalem yoma nen weak-weak wulibino, iluk yaganetikhemo, nabikanggo oba hasigi.

¹⁹ A'nogo yaganetikhemo, an nen he, Noe. An o samban agarekwe yi awi ti awi kwilik laga logolik he, afuni inendawinggen hat hoba himbirik welagaukwa mene halok, inenggi hele watik, yei inoatik, hilingirik nikhi lagagi a'nogo, it mondok inelu o.

²⁰ At Stefanus, wene hat faget fakhogo afuni yagaisikhi lagaikhe mene a'nogo ebe watunem, an nebe andoma mendek logolik, Hweing! Fano wata, iluk, it ap watukwa werek inasu nonggolek kwalogo welagagi andi, it ineluaro, iluk yagatigi.

²¹ A'nogo yagatunem, Tuhan nen he, it afuni endakwe mene yatma andoma inoba lakhobagagin andi nen he, lan o, iluk yaganetikhe,” iluk yagaisasikhe.

²² Paulus nen a'nogo yagaisilik wagunem, it omanogo inesanggo fano holek welagaukwasigat he, huli andem oba ugunem inane hokhorogoat mel isukwa: ”Ap obabut yiginik he, kweangma eluk logogin lek. Wasuogo!” iluk

²³ inonggwarek inasu nonggologo lakfisigik, kweang age palogo liakfisigik, isukwa.

²⁴ A'nogo ugunem he, ap tentara esa folhi lagaukwa mene inoe kain a'nogo nen, agoromi yagaisikhi logolik, ”Paulus ebe o tentara inawi hale'ma andi waluk kwimbik he, afuni Yahudi mene nen inane hokhorogo wene oba fili'lagwi andi, wene ero ninggi'nogo hilingitemo nen iluk yei wasimbik wene ero hera'no,” iluk yagaisasikhe.

²⁵ A'nogo yagaisasikhemo, iren ebe yei wasuogeluk hele warogo fesukwama, at Paulus nen he, ap tentara mene kain ekhe andoma mendek were'ma mel yagatikhe: ”Hiren, ap ekhe o Roma awiwerek meneat he, wene oba figi'le'ma yei tak wasugun nogo?” iluk yagatikhe.

²⁶ Yagatunem, kain a'nogo nen yonggo ap tentara esa folhi lagaukwa mene inoe kain a'nogo oba lagaikhesik he, ”Hat ninggi'nogo hilingisigeluk egen mene nogo. Ap yi ebe o Roma awiwerek mene aro,” iluk yagatikhe.

²⁷ Yagatikhemo re, ap tentara kain a'nogo Paulus oba wagaikhesik he, ”Hat hebe o Roma hawiwerek mene a? Yaganom,” iluk yagatikhemo, aren he, ”Nen, an nawiwerek mene aro,” iluk yagatikhe.

²⁸ A'nogo yagatikhemo, ap tentara mene inoe kain a'nogo nen he, ”An onggo hokhorogoat palogo nen nawiwerek agagisik welagi,” iluk yagatikhemo, at Paulus nen he, ”An o Roma nawiweregat ta'lagagi mene aro,” iluk yagatikhe.

²⁹ A'nogo yagatikhemo re, irat yei wasuogeluk isukwa mene omanogo nen weak-weak hekhogo herakfesukwa. A'nogo herakfesukwama, ap kain a'nogo endawimo nen he, ”Paulus ebe o Roma awiwerek mene werek kwelegat, enggi hele watimo yi nailo e,” iluk ailo hokho agaikhe.

Paulus ebe it ap Yahudi mene wene ero pilingiti lagaukwa mene inoba waluk lagaikhemo yagaisasikhe wene

³⁰ Ohealekwe, it ap tentara esa folhi lagaukwa mene inoe kain a'nogo nen, ”It afuni Yahudi mene nen ap yi wene ninggi'nogo mene oba fili'lagwi. Wene furogo nelu asu mene,” iluk wene ero herasuogeluk, it ap Allah eisewerek inogogwi kaindek omanogo inom, ap Yahuri mene Allah faget wene ero pilingiti lagaukwa mene omanogo inom, andogesuageluk inayonggo fesikhemo andogetukwama re, Paulus enggi hele fikhalogo fesukwasik it inoba waluk lagaikhesik he, inelokhoma menfesikhe.