KISAH PARA RASUL 21 - Allah Wene Fano Wene Hupla Inane

Paulus nen o Yerusalem laga logolik hilingitikhe wene

¹ A'nogo hai wat-wat ikhi lagagusik he, it o andoma fisaluk nit i agum ebene e soba i alonggenma o enu Kos higithogo lagagu. Lagagusik, ohealekwe i alonggenmaat o enu Rodos lagagu. Andoma nen pikhit o Patara lagagu.

² Lagagusik, o andoma afuni e so ekheba o Fenisia louwogeluk were'ma, e so andi elema kwisugusik, ninom lagagu.

³ Laga logolik he, i alonggenma o enu Siprus andi ninenggi harekwe nineilenggen yethilik-hilik i agum ebene laga lagagusik, o propinsi Siria nen he, o kota Tirus wulifugu. Wulifugusik, andoma nen, sunggwe e so elema waluk lagaukwa mene wulabuogeluk isukwama re, nit e so elema nen andoma wulifugu.

⁴ Andoma wulifugusik, afuni Yesus ane wanhukwa mene heraginafugusik he, ninom ninenggi 7 nen welagagu. Logolik, iren he, ”Paulus. Hat o Yerusalem lagun o,” iluk Allah Areagun nen yagaisasikhemo komoratukwa.

⁵ Ninom welagagusigen he, logoin oba arat horok agaikhemo re, it inebe mondogat, inagagwi inom, inagainafuri inom, inomen, lakninobagauwogeluk, o kota andoma herakfisaluk wulifugu. Wulifugusik he, i aik oba andoma lagagusik ninebe mondogat nineindep awi yakfuluk, samban isugu.

⁶ A'nogo iluk, hai wat-wat ikhi lagagusik, it inambotkwe inaiba wagu kwelek, nit e so elema kwisugu.

⁷ Kwisugusik, o Tirus andoma nen i agum ebebe nen i soba o Ptolemais lagagu. Lagagusik, Allah againafuri o andoma mene hai warinafugusik, ninenggi misigat ninom welagagu.

⁸ Ninom welagagusik, ohealekwe re, o Kaisarea lagagusik, it ap inebe 7 nen attagat o Yerusalem en wenagaisogo fisaluk menfisasukwa mene omanogo ekhe fano wene yagaisilik nikhi lagaikhe mene enu Filipus were'ma, aiba kwisugusik ninom welagagu.

⁹ At Filipus a'logomi inebe 4 mene re, inebe silerik logolik, Allah ane yagaisikhi lagaukwa mene welagaukwa.

¹⁰ Nit o andoma ninenggi ekhe inom were'ma re, ap ekhe Allah ane yagaisikhi lagaikhe mene enu Agabus, o Yudea nen wagaikhe.

¹¹ Wagaikhesik, nit ninoba kwisikhesik he, alinggin Paulus ugu welagaikhe mene, aren nonggologo wanhikhesik he, onggwaregen enggi eisok hele homatikhesik mel isikhe: ”Allah Areagun en he, Ap alinggin yi eisewerek mene, ebe o Yerusalem lagunem he, ap Yahudi mene nen hele yi'nogo homakfembik, it ap endakwe mene inenggiba fogoin o, iluk yaganetemo,” iluk isikhe.

¹² A'nogo isikhemo, ninesanggo holhugusik he, it afuni o andoma mene ninomen he, ”Paulus noe. Hat o Yerusalem lagun o,” iluk ebe ninendawi nen endawinggen sebeluogeluk wene ekhe inom yagatugu.

¹³ Yagatunem, aren he, ”Hit le aga logolik, nendawinggen engginet fikhi lagep andi nenahalok? Ninoe Tuhan Yesus faget he, o Yerusalem andoma nen nenggi hele nek wasugun anggikhi lageba? Lego. Nenggi hele watik, nebe noatik, umo fano aro. A'nogo hilingnabugun elogat anggikhi lagi,” iluk yagaisasikhe.

¹⁴ A'nogo yaganisasikhemo, niren endawinggen sebelu elo'lek agaikhemo, ninane attak isugu mene a'nogo herakfisaluk, ”Halok he, ninoe Tuhan Yesus endawimo anggikhe mene andiat hilinglasuago o,” iluk yagatugu.

¹⁵ A'nogo yagatugusik, o andoma ninenggi hokhorogoat welagagusigen, yi mene ti mene tegelogo fesugusik, waluk o Yerusalem lagagu.

¹⁶ Laga logolik, it afuni o Kaisarea mene Yesus ane wanhukwa mene ekhe ninomat lagagu. Ninom lagagusik, iren wo'ninarek, ap ekhe enu Manason, aiba ero o Siprus mene, Yesus ane attagaren wanhikhesik o Yerusalem were'ma, aren wo'ninabimbikk aiba logouwageluk, wo'ninarek kwisukwama andoma ap pogat welagagu.

Paulus o Yerusalem lagaikhesik at Yakobus oba kwisikhe wene

¹⁷ O Yerusalem arat lagunemen he, it Allah againafuri andoma mene nen inendawimo inagaiyek oba wo'ninafukwa.

¹⁸ A'nogo wo'ninafukwama, ohealekwe at Paulus ninomat, at Yakobus houwogeluk kwisugu hak he, it ap Allah againafuri kwelaginarek welagaukwa mene inebe mondogat inom were'ma kwisugu.

¹⁹ Kwisugusik he, hai warinafugusik, at Paulus nen he, ”Afuni endakwe mene faget yi'nogoat hilinginafi lagi, ti'nogoat hilinginafi lagarik wagi, andi ebe re, Allah nenat hilinginafi laga,” iluk wene pilingisogo yagaisasikhe.

²⁰ Yagaisasikhemo, Allah hilingitikhe mene andi fogeratukwa. Fogeratukwasik, Paulus yagati logolik he, ”Paulus nagailak. Afuni Yahudi mene inebe 1.000 hangge nek fuk. Mondok hokhorogoat inendawinggen Yesus oba himbiret fagasik werego. Logolik he, wene Allah nen komotninafikhe wene a'nogo it mondogaren fisogo logouwogeluk inomamerogo hilingiri'lagwi andi hat helu anggigi.

²¹ A'nogo hilingiti logolik, hat habok inesanggo holha. Haren, afuni Yahudi mene it endakwe mene inanggele'ma welagaikharek mene andi yagaisikhi logolik he, wene Musa nen yaganisasikhe wene a'nogo herakfisaluk he, hinagainafuri inagap inenggalimo mene palhi'lek herakfisigik, afuni Yahudi mene hilingitarek mene a'nogo hilingiti'legat, herakfisigik, ikhi logoino o, iluk yagaisili'logo, iluk habok inesanggo holha o.

²² Holhasi'mo nen, yogondak hat hebe wagendik welagen yi, inesanggo holugun aro. Halok he, ninggi'nogo hilingisugun anggegen?

²³ Niren komothabugun mene andi, higithogo hilingisumo fano. Ap inebe 4 en Allah enu hombuk palogo, nit yi'nogo hilingisugun, iluk, aga mene yoma ninom welago.

²⁴ Halok, haren it inebe woginabimbik he, it hinomat hinoba horogo, it inesi felelenghogo paluageluk, onggo haren feino. A'nogo hilingisumo re, it ap Yahudi mene nen he, at Paulus abok holhi lago a'nogo le'maat higi. At onggwaregen wene Allah nen komotninafikhe wene a'nogo fisogo logoligat a'nogo hilingiti lagama, iluk, it mondogat inelu asugun andi.

²⁵ Mene re, it afuni endakwe mene inendawinggen Yesus oba himbiret fagasik werek andi faget, wene attagat palhugusik lisu palogo lakfesugu anggigi. Lisu a'nogo palogo lakfikhi logolik he, tugwi kembu oba himbirik logolik anggo waretarek mene andi kurik nogoin lek. Mep nogoin legat. Yi mene ti mene alonggop perelogo warek mene andi nogoin legat. Pailak fakfisogoin legat, iluk wene palhugusik lisu palogo lakfesugu anggigi,” iluk yagatukwa.

²⁶ Yagatukwama, at Paulus nen ap inebe 4 en aremnogo woginarek he, ohealekwe inoba horogo, inomat Allah awi wuri'mo kwisukwa. Kwisukwasik aren he, ”Ninenggi yiba ninoba horogo Allah faget logombik he, huli yiba nen it yoma inebe lombok faget Allah anggo waresugun,” iluk enggi wenagaisogo yagaisasikhe.

Paulus Allah awi wuri'mo nen enggi hele watukwa wene

²⁷ Enggi wenagaisogo yagaisasikhe a'nogo 6 en arat welagaukwasik, inenggi ekhe 7 meneba arat agu kwelek, it ap Yahudi mene ekhe o propinsi Asia nen wagaukwasik, Paulus ebe Allah awi wuri'mo were'ma ineilenggen hasukwa. Ineilenggen hasukwasik he, Paulus fakfouwageluk afuni hokhorogoat inanggele'ma menfesukwasik, inomen ebe fakfesukwa.

²⁸ Fakfesukwasik he, ”Ap Israel mene a! Nit werekwe a'ni a! Ap yi nen afuni o yi awi ti awi yagaisilik nikhi logolik he, nit afuni Israel mene nen hilingitorek mene andi weak iluk, alek mene yagaisigik, wene Allah nen komotninafikhe wene a'nogo weak iluk, alek mene yagaisigik, o Allah awi wurik yi abok weak igik, ilik nikho mene a'nogo ebe yi ara! Yogondak ap Yunani mene woginarek Allah awi wuri'mo kwi wagasik, o Allah onggwarek awi wurik weaget fikhe a'nogo yi a!” iluk inane hokhorogo pak silakhogo wenagetukwa.

²⁹ Wene a'nogo isukwa andi re, at Paulus attagat ap Trofimus, o Efesus mene andi, emberegat o kota Yerusalem andoma nugunem ineilenggen isasukwa andi nen he, at ebe waluk Allah awi wuri'mo kwi wagasik healuk anggasukwasik isukwa andi.

³⁰ Inane a'nogo hokhorogo pak silak ugunem, o kota andoma inane hokhorogoat sagalik lagaukwama re, afuni fungusegat andogosi wagaukwasik, Paulus ebe fakfesukwasik, Allah awi wuri'mo nen enggi lisogo enda'ma wulakfei wagaukwasik he, Allah awi wuri'mo kwe yagatukwa.

³¹ A'nogo waluk wulifukwasik, Paulus ebe wasuogeluk ugu kwelek, it ekhe nen ap tentara Roma mene esa folhi lagaukwa mene inoe kain mene andi oba lagaukwasik he, ”O Yerusalem yoma wene ekhe wo'lagama. Afuni inebe mondogat inane hokhorogo sagali'lagwi o,” iluk yonggo lagaukwa.

³² Yonggo lagaukwama, aren he, agoromi tentara mene kaindek inom, inagoromi inom, woginarek afuni inane sagalhi lagaukwaba andoma fungusegat lagaikhe. Lagaikhemo, ineilenggen hasukwasik, ”Tentara inoe kain a'nogo agoromi woginarek waga,” iluk inailo nen Paulus yei wati lagaukwa mene a'nogo herakfesukwa.

³³ Herakfesukwama ap tentara inoe kain a'nogo ebe Paulus oba horokhogo lagaikhesik, ebe fakfuluk he, agoromi nen posie omanggen pireba enggi hele wasuageluk yagaisasikhe. Yagaisasikhesik he, ”Ap yi sa nogo. Ninggi'nogo hilingitemo,” iluk heinok wanhikhe.

³⁴ Heinok wanhunem, inane hunogo tomok ilik lagaukwa. A'nogo ikhi logolik inane weak sagalhukwama, wene ero senggerogo ninggi'nogo heat hilinglagaikhemo, ap tentara inawi hale'ma waluk loageluk yagaisasikhe.

³⁵ Yagaisasikhemo, kwe pelare'ma waluk lagaukwasik, afuni hokhorogo omanogo ina'mage nen wasinogo iluk he, it ap tentara nen ebe hambokhogo wanu hak agaikhemo, wanhukwa.

³⁶ A'nogo waluk lagunem, afuni hokhorogo omanogo inombo'ne laga logolik he, ”Ap ari wasuogo,” iluk inane hokhorogo ilik-ilik lagaukwa.

Paulus nen, ebe elelerogo yagaisasikhe wene

³⁷ Paulus o tentara inawi hale'ma a'nogo waluk kuogeluk ugunem, aren ap tentara inoe kain a'nogo yagati logolik he, ”An wene ekhe yagahesigin eloga? Elo'lega,” iluk ugunem, aren he, ”Eige! Hat nit afuni Yunani mene ninane helu hiigi.

³⁸ An nendawimo nen he, hat ap Mesir mene ekhe attagat menlagaikhesik, ap afuni inoare mene inebe mondok hokhorogoat 4.000 mene woginarek o leimo afuni le'ma wulifikhe a'nogo hat he a, anggigi mene re, hat lek hiigi,” iluk yagatikhe.

³⁹ A'nogo yagatunem, at Paulus nen he, ”Lego. An nebe ap Yahudi mene. Nawi ero o propinsi Kilikia o kota esin hak enu Tarsus andi aro. An yogondak afuni yoma wene ekhe yagaisageluk yagaheti o,” iluk yagatikhe.

⁴⁰ A'nogo yagatikhemo re, aren he, ”I o. Ekhe yagaisan,” iluk isikhemo at Paulus ebe kwe pelaba mendek logolik, ”Hinane,” iluk enggi map isikhemo re, inane lek agaukwama, it afuni Ibrani mene inaneba mel yagaisasikhe: