KISAH PARA RASUL 2 - Allah Wene Fano Wene Hupla Inane

Allah nen pogoroba nen Areagun inoba pelakfei wagaikhe wene

¹ Afuni Yahudi mene hari Pentakosta a'nogoba higit asi wagaikhemo logolik, it afuni inendawinggen Yesus oba himbirik welagaukwa mene inebe mondogat misi'mo andogorek were'ma,

² aremnogoat, sogoi uarek funha waga logolik ane ikherek andi hak, Allah nen pogoroba nen pelakfei wagaikhemo re, it afuni oloba hurek welagaukwa mene omanogo mondogat ane inesanggo holhukwa.

³ Inesanggo holhukwasik ineilenggen yethasukwa re, endu amulok mene ameli hangge fena melanget ha lagik, fena melanget ha lagik, ikherek andi hak, inebe lombok inoba labok ugunem ineilenggen hasukwa.

⁴ Ineilenggen a'nogo hugu kwelek, Allah Areagun it inebe mondogat inendawimo peterogo kwisikhe. Kwisikhesik he, Allah Areagun nen, ”At andi ane yi'nogo ikhi logouwak,” iluk anggasikhe higithogoat, it afuni ekhe inaneba uageluk yagaisugu kwelek elalinat ikhi lagaukwa andi.

⁵ O andi sambul he, afuni Yahudi mene Allah ane hologo hilingiti lagaukwa mene halok, o yi awi ti awi mondogaren Yerusalem andogosi wagaukwasik welagaukwa.

⁶ Were'ma re, sogoi ane isikhe a'nogo inesanggo holhukwasik afuni inebe hokhorogoat andogosi wagaukwa. Andogosi wagaukwasik were'ma, it Yesus agoromi omanogo nen it afuni o yi awi ti awi nen wagaukwa mene omanogo inaneba lombok ugunem, inesanggo holhukwasik ina'manggen lagaikhe.

⁷ Ina'manggen lagaikhesik fogerati logolik he, ”It wene yaganisili'lagwi mene yoma inebe mondogat he, inaiba o Galilea mene lek nogo? Galilea mene aro.

⁸ Meneat he, ninggi'nogo hilinglagama nen nit afuni ninaiba yi awi ti awi ta'lagagu mene ninaneba lombok ugunem ninesanggo holhi lago anggegep.

⁹ Nit ninebe re, ninaiba o Partia mene inom, Media mene inom, Elam mene inom, Mesopotamia mene inom, Yudea mene inom, Kapadokia mene inom, Pontus mene inom, Asia mene inom,

¹⁰ Frigia mene inom, Pamfilia mene inom, Mesir mene inom, o Libia Kirene higit a'lima mene inom, o Roma a'lima lagosik ninebe o kuluk hagat welagosik wago mene inom, ninom welago yi.

¹¹ Nit fena ebe Yahudi mene, nen it fena alek mene Yahudi mene ninoba kwi wagaukwasik Allah ane wanhukwasik ninom welagoat. Nen, afuni o Kreta mene inom, Arab mene ninom were'ma, it yi nen Allah omameba elalinat hilingitarek mene yaganisugunem, ninonggwarek ninaneba lombok ninesanggo holhi lago yi,” iluk,

¹² Inebe mondogat inobakheindok palagaukwasik it-it fogerati logolik he, ”Andi hilinglaga andi re, ebe ninggi'nogo mene he,” iluk isukwa.

¹³ Meneat he, it ekhe nen he, ”Lego. It yoma anggur enggen amusu nenggasigen lugulugwi palhasik ili'lagwi o,” iluk endo aga lagaukwa.

Allah ane Petrus nen yagaisasikhe wene

¹⁴ Inane a'nogo ugu kwelek he, at Petrus a'nogo Yesus agoromi inebe 11 nen omanogo inomat logolik, siakhogo menlagaikhe. Menlagaikhesik ane fakhogo mel yagaisasikhe: ”Hit Yahudi mene inom, hit ekhe yogondak ya o Yerusalem welagep mene mondogat inom, nerugwi nagaila'lak. An wene igin yi hinelu asuagen he, hinesanggo fanorogo holino o.

¹⁵ Yogondak o hubet jam 9 agama welagoma re, jam andi hanggeba anggur enggen amusu naluk lugulugwi palharek lek andi nen he, hiren, it yi re, anggur enggen amusu nenggasigen lugulugwi palhasik ili'lagwi, iluk anggikhi lagep andi re, le'ma aro.

¹⁶ We, at Yoel Allah ane yagaisikhi lagaikhe mene Allah nen yagatikhemo isikhe hagat hilinglaga o.

¹⁷ Aren he, mel isikhe: At Allah nen ikhi logolik he, O wurep oba an Nareagun andi, hokhorogoat afuni mondogat inoba pelakfei wesigin o. Pelakfei wagunem he, hinagainafuri alage yenggerugwi inom, en helimenggerugwi inom, iren an nane afuni yagaisigik, hinagoromi alage nen inabikanggo higik, hineisenalak yamanugwi nen inabiba higik, ikhi logogun o.

¹⁸ Andi sambul he, an namingmingengge mene, ap inom, hemi inom, an Nareagun hokhorogo inoba pelakfei wesigin o. Pelakfei wagunem he, iren an nane yagaisikhi logogun o.

¹⁹ Nen, afuni nen fogerati logouwageluk, elalin mene pogot po yiba nen hilingitik, wene futfouwageluk kweangma yoma hilingitik, ikhi logolik, yi mene ti mene oba, mep inom, endu inom, age endu hule hangge inom, hilingisigin.

²⁰ An Tuhan Allah hokhorogo hilingitunem afuni nen foge'nafu kwelek wesigin andi sambul oan wagi'lek werek kwelek he, o mo elokhonggen hunogoat mum agik, tugi elokhonggen mep agik, andi tak hilinglasigin o.

²¹ A'nogo hilinglagu kwelek he, hit afuni nen an hineisena Tuhan nenu hombuk palogo nayonggo fogoin mene halok inebe lombok telinabigin o, iluk Yoel en isikhe andi.

²² Mene re, hit Israel mene nerugwi nagaila'lak. An nane igin yi holini. Yesus aiba Nasaret mene a'nogo Allah nen ayonggo fesikhemo, ninom logolik, wene futfouwageluk hilingisu lek mene Allah nen enggi omamerogo elalinat hilingiti lagaikhe andi re, ebe Yesus nenat hilingiti lagaikhe. Halok he, Yesus Allah nen lakfei wagaikhemo, iluk enegat agaikhe andi hinelu.

²³ Mene re, at Allah elu logolik, endawimo nen, a'nogo hilingisuago, iluk anggasikhebaat, Yesus ebe hinenggiba fesikhemo, hiren ap inobabut weak mene inenggi waganogo, at ebe eba menfuluk watep andi.

²⁴ Watepma, at ebe heinet wati logolik wa'laga meneat he, afuni inenggi hele warogo fisagare'ma welagaikharek andi hak, at a'nogo warek mondok logogin lek andi nen he, inenggi hele fikhalogo wulakfisagarek andi hak, Allah nen eluget fikhe andi.

²⁵ At Yesus faget Daud en mel isikhe: An yi mene ti mene nen nabologet neanogo iluk neisena Tuhan ebe nera'lu were'ma, hundik-handigat neilenggen hugu mondok welagirek.

²⁶ Andi nen, nendawimo nagaiyek higik, naneba fogeratik, igirek. An noasumo nebe warek hobuk fano asigin, luk nendawimo nen menenei ebeti'lek katokhogo logogin.

²⁷ A'nogo logogin andi re, an nebe afuni wa'la'luk lagaikharek oba andoma mondok logouwageluk, haren heraknobagagik, An hat hamlogo hendawinggen hundik mene nebe yi fili asuageluk halolot nobagagik igin lek andi nen aro.

²⁸ Haren nineluk logogun andi mene yaganetik, hat hebe nemberek mondok welago andi nen inendawimo agaiyek agarek mene nendawimo peterogo wo'netik, ikhi lagen o, iluk Daud en Yesus faget isikhe andi.

²⁹ Mene re, nerugwi nagaila'lak. At ninomba Daud abok fakhogo yagahisak. At ebe wa'lagaikhemo, nit welagoba yoma kweang habulogo salhukwa mene, obuluk attak welagaikhesik yogondak werek andi.

³⁰ At Daud ebe Allah ane yagaisikhi lagaikhe mene andi nen he, Allah nen hombuk palogo wene mel iluk waretikhe mene eluat welagaikhe: Hat kain welagendek andi hak logouwageluk, ap haren tagongge mene ekhe hobali'mo menfagain o, iluk wene waretikhe.

³¹ A'nogo wene waretikhe mene andi ebe oan menfigi'lek werek kwelek, at Daud Allah nen hilingisigin mene elu logolik he, Kristus telinaferek mene a'nogo ebe wa'lasumo, Allah nen eluget fagain o, iluk wene aren mel isikhe: Allah nen at ebe afuni wa'la'luk lagaikharek oba andoma mondok logouwageluk herakfisagain lego. Nen, at ebe fili asimbik, lek asuageluk herakfisagain legaro, iluk isikhe andi.

³² A'nogo isikhe higithogoat, at Yesus Allah nenat eluget fikhemo, nit ya mondogat nineilenggen hogosik nineluat welago andi.

³³ At ebe Allah nen eluget fikhesik, era'lu kain logouwageluk menfikhemo werego. Logolik, Allah nen, Nareagun wokhisagain, iluk wene wa'nisasikhe hagat Yesus wogetemo, aren hokhorogoat nit ninoba pelakfei wagama re, nit hilingitunem hineilenggen nisigik, hinesanggo holhik, ikhi lagep andi.

^34-35 Mene re, at Daud ebe pogoroba lagagi'lek. Meneat he, aren mel isikhe: Nineisena Tuhan nen he, an noe Tuhan yagati logolik he, Afuni hat hinom weak mene omanogo, heisogen al perelogo fisanogen, an nen oan hawe a'ma fisa wagi'lek werek kwelek, hat an nera'lu nenggi ebekwe hebe kain logoinok, iluk at Allah nen yagatikhe, iluk, at Daud onggwaregen isikhe andi.

³⁶ At Yesus ebe re, hiren eba menfuluk watepma, at Allah nen he, Hinoe Enupogot Kristus ebe yiat, iluk menfikhe andi. Halok he, hit afuni Israel mene mondogaren he, Wene andi eberogoat, iluk hinelurogo logoino,” iluk yagaisasikhe.

³⁷ A'nogo yagaisasikhemo, inesanggo holhukwasik, wene andiba inendawinggen abolok isikhemo re, iren Petrus inom, it ekhe Yesus nen wenagaisogo inayonggo fuluk lakfisasikhe mene ekhe inom, yagaisikhi logolik he, ”Nagaila'lak. Nit ninobabut ninggi'nogo hilingisu,” iluk yagaisasukwa.

³⁸ A'nogo yagaisasukwama, at Petrus nen he, ”Weak hilingiti lagep mene andi herakfisambik hinobabut hebela'ni o. A'nogo hebelasumo re, weak hilingiti lagep mene andi, Allah nen sebelogo legetfisoageluk hinebe lombok Yesus Kristus enu hombuk palogo ima pelakhinabumo re, Allah Areagun andi wokhisagain o.

³⁹ At Allah nen, Nareagun wokhisagain, iluk wene watnisasikhe andi re, hit hinebe inom, hinagainafuri inom, it ekhe inaiba yatma mene andoma inom, hinebe nineisena Tuhan Allah nen, we'ni o, iluk wolhisili'logo mene halok, mondogat faget wene hirat wathisasikhe o,” iluk yagaisasikhe.

⁴⁰ Wene ebe a'nogo uanat ikhi logolik he, ”Afuni inobabut weak hilingiri'lagwi mene yoma, Allah nen wene inoba fagain mene andi, herakfisaluk hinonggwaregen telano o,” iluk komorinafikhe.

⁴¹ A'nogo komorinafikhemo re, it wene wanhukwa mene halok ima pelaginafukwa. Andi sambul inebe 3.000 hangge ima pisukwasik he, hobuk inom lambukhogo welagaukwa.

⁴² Inom lambukhogo fanoat logolik he, it ap Yesus nen wenagaisogo inayonggo fuluk lakfisasikhe mene omanogo nen wene yagaisugunem hundik-handigat inesanggo holhik, sumburu inom kurogo ninggik, samban inom igik, ikhi lagaukwa.

Allah againafuri inendawinggen Yesus oba himbiret fesukwasik hilingiti lagaukwa wene

⁴³ Afuni nen wene futfouwageluk, it ap Yesus nen inebe wenagaisogo inayonggo fuluk lakfisasikhe mene omanogo nen hilingisu lek mene elalinat hokhorogo hilingitunem he, afuni inebe lombok inailo aga lagaikhe.

⁴⁴ It afuni ekhe wene eberogoat iluk wanhukwa mene halok inom misigat fano logolik, inagarek yi mene ti mene faget, ”Nit ninom misigat ninagarek mene,” iluk lambukhogo fisogo welagaukwa.

⁴⁵ A'nogo logolik he, it ekhe nen, inanggweang inom, inagarek inom, onggo uang waluk he, uang andi it Allah againafuri mene omanogo inebe lombok sumburisikhi logolik, it ekhe lek mene higithogoat sumburisikhi lagaukwa.

⁴⁶ A'nogo hilingiti logolik he, inenggi ekhe kamo igi'lek hundik-handigat Allah awi wuri'mo andogotik, inendawimo inagaiyek hikhi logolik, inendawinggen sebelek logolik inailokwe sumburu inom kurogo ninggik, ikhi lagaukwa.

⁴⁷ A'nogo hilingiti logolik, iren Allah fogeratu were'ma, it afuni mondogaren, ”It fano,” iluk fogerinafi lagaukwa. Fogerinafu were'ma re, at Tuhan nen he, enggi ekhe kamo igi'legat, afuni ekhe telogo Allah againafuri inom misigat lambulogo fisikhi lagaikhe.