KISAH PARA RASUL 19 - Allah Wene Fano Wene Hupla Inane

Paulus o Efesus wagaikhesik hilingitikhe wene

¹ At Apolos o Korintus andomaat werek kwelek he, at Paulus a'nogo o propinsi Galatia inom, Pergia inom, abel ambolkwe andoma nen lagokhogo waga lagaikhesik, o kota Efesus wagaikhe. Wagaikhesik, afuni Yesus ane wanhukwa mene ekhe were'ma inoba kwisikhe.

² Inoba kwisikhesik mel yagaisasikhe: ”Hit hinendawinggen Yesus oba eberogoat himbiret fesigip mene andi re, Allah Areagun wanhigipsik welageba? Lega,” iluk yagaisasikhe. Yagaisasikhemo, iren he, ”Allah Areagun werek iluk ugunem, ninesanggo holhi'legen wanhi'lek welago,” iluk yagatukwa.

³ A'nogo yagatukwama, at Paulus nen yagaisikhi logolik he, ”Halok he, hit ima pelakhinafukwa andi, wene ki wene wanhigipmo pelakhinafukwa,” iluk yagaisasikhemo, iren he, ”Yohanes nen ima pelaginafi lagaikhe a'nogo wene wanhugumo ima pelakninafukwa,” iluk yagatukwa.

⁴ A'nogo yagatukwama, at Paulus nen he, ”Yohanes nen ima pelaginafi lagaikhe andi, it afuni nen, weak hilingiti lago mene arat herakfisogosik ninobabut hebelago, iluk ugu halok pelaginafi lagaikhe. A'nogo pelaginafi logolik he, mel yagaisikhi lagaikhe: An nombo'ne ap ekhe wesigin. Halok hinendawinggen at oba himbiret fuluk logoino o, iluk ebe Yesus fagerat yagaisikhi lagaikhe andi,” iluk yagaisasikhe.

⁵ A'nogo yagaisasikhemo it inesanggo holhukwama re, ninoe Enupogot Yesus enu hombuk palogo hobuk ima pelaginafukwaat.

⁶ Pelaginafukwama, at Paulus nen enggi inunggul sebelhunem he, Allah Areagun inoba pi wagaikhemo, iren he, wene it ekhe inane inonggot meneba elalinat igik, Allah ane it ekhe yagaisigik, ikhi lagaukwa.

⁷ It a'nogo ikhi lagaukwa andi re, ap inebe 12 mene nen ikhi lagaukwa.

⁸ A'nogo isukwama re, at Paulus o afuni Yahudi mene samban ikhi lagaukwaba kwisikhesik ailo lekhogo logolik he, wene Allah nen awe a'ma fisikherek wene a'nogo futfuluk wanuageluk, inendawimo kagalogo, wene aren yagaisigik, iren onggo at yagatik, ikhi logolik he, tugi henagan welagaikhe.

⁹ A'nogo Logolik yagaisikhi lagaikhe meneat he, it andi fena inendawinggen omame a'luk, wene andi inendawimo sebelfuluk he, afuni ekhe hokhorogo ineilhanemat, Yesus ombo'ne lagaikharek wene andi abok weak palhukwa. Abok weak palhukwama, at Paulus, it herakfisaluk, it fena Yesus ane wanhukwa mene nek woginarek wulifikhe. Woginarek wulifikhesik he, o hokho wuri'mo ap Tiranus nen yi wene ti wene yagaisikhi lagaikheba andi kwisukwasik, hundik-handik enggi ekhe kamo igi'lek wene aren yagaisigik, iren onggo yagatik, ikhi lagaukwa.

¹⁰ A'nogo ugu mondok werek kwelek 2 tahun were'ma nen, it afuni o propinsi Asia andoma, Yahudi mene inom, Yunani mene inom, mondogat wene Fano wene a'nogo inesanggo holhukwa.

Ap enu Skewa againafuri nen hilingitukwa wene

¹¹ At Paulus nen afuni nen hilingisu lek mene elalinat hilinginafi lagaikhe andi, ebe re, Allah nenat hilinginafi lagaikhe.

¹² Hilinginafunem he, su at Paulus amunggut tetungge mene he a, asu ebe mene elokhonggen weak asinogo iluk endakwe labeti lagaikhe mene he a, afuni nen waluk, it ou wanhi lagaukwa mene inoba fei lagunem he, ou fano agik, munggwarengge inobabut weak mene inendawimo kwisukwasik welagaukwa mene henogo wulifik, ikhi lagaikhe.

¹³ A'nogo hilingitu kwelek, it afuni Yahudi mene ekhe inebe wesagun logolik, munggwarengge inobabut weak mene afuni inendawimo kuluk were'ma henogo wulakfisilik nikhi lagaukwa mene nen he, Tuhan Yesus enu hombuk palogo wulakfisouwogeluk walhasukwaat. Walhikhi logolik, iren, munggwarengge obabut weak mene yagati logolik he, ”At Yesus, Paulus nen yagaisilik nikho mene andi enu hombuk palogo, henogo wulibi lan o, iluk yagaheti lago,” iluk yagatukwa.

¹⁴ A'nogo hilingiti logolik, ap Yahudi mene ebe ap Allah eisewerek mene inoe kain enu Skewa andi, againafuri ap inebe 7 nen welagaukwa mene nen a'nogoat walhasukwa.

¹⁵ Walhugunem, at munggwarengge obabut weak mene nen he, ”Yesus andi ebe, an nelu. Nen, Paulus andi ebe, abok holhirek meneat. Mene re, hit yi sani he. An nonggoro,” iluk yagaisasikhesigen,

¹⁶ ap munggwarengge obabut weak mene endawimo kwisikhesik welagaikhe mene a'nogo inoba pok harogo labok i lagaikhesik he omame agaikhesik, it mabenetfisasikhe. Mabenetfisikhi logolik, inasu tilip-talaphogo yei mep wulagaisogo inoatikhe. Inoatikhemo re, at aiba nen inalfulukwangge heise wulifukwa.

¹⁷ Heise wulifukwama re, afuni nen, ”It a'nogo hilingita o,” iluk isukwama, it afuni Yahudi mene inom, Yunani mene inom, o kota Efesus welagaukwa mene mondogat inesanggo holhukwa. Holhukwasik he, inailo agaukwasik, Yesus enu ekhe inom fogerati lagaukwa.

¹⁸ Nen, it afuni inendawinggen Yesus oba himbiret fesukwa mene halok inebe wagaukwasik he, weak hilingiti lagaukwa mene afuni hokhorogo ineilhanem fageti lagaukwa.

¹⁹ Nen, it ap wesagun logolik wesarogo hilingiti lagaukwa mene inebe hokhorogoaren inaruesingga wesa mene uang perak hokho mene 50.000 hanggeba onggo palhukwasik fisogo welagaukwa mene andogorogo afuni mondogat ineilhanem endu nolhukwaat.

²⁰ A'nogo hilingitukwama re, Tuhan Allah ane andi hokho agik, omame agik, ikhi lagaikhe.

Afuni o Efesus mene nen, inane hokho sagalhukwa wene

²¹ A'nogo hilingitukwama, at Paulus endawimo nen anggikhi logolik he, ”O propinsi Makedonia lagaikhesigen he, o propinsi Akhaya wesimbigen pikhit, o Yerusalem lagain,” iluk endawimo anggasikhesik he, ”Lambik hobuk nambotkwe wesimbik, o kota Roma neilenggen ha lagain aro,” iluk isikhe.

²² A'nogo isikhesik he, at amingmingengge mene inebe pire, Timotius inom, Erastus inom, emberek o propinsi Makedonia lakfisa wagaikhesik, at alegat enek o propinsi Asia welagaikhe.

^23-24 Andem sambul he, o kota Efesus andoma ap ekhe enu Demetrius. Yi mene ti mene perak mene hilingiti lagaikhe. Hilingiti logolik su kembu ebe he mene enu Artemis. Ebe awi hokho andoma wurik werek kwelek, perak mene ekhe magendek mene hokhorogoat hilingisogo fikhi lagaikhe. A'nogo hilingisogo fugunem, afuni nen onggo fikhi lagaukwama, it Demetrius agoromi inambugunweak hilingiti lagaukwa mene inomat hokhorogo saburikhi lagaukwa andi nen, afuni Yesus ane waluk ombo'ne lagaikharek wene andi faget o Efesus andoma inane hokhoat sagalhukwa.

²⁵ A'nogo hilinglagaikhe andi, at Demetrius nen, agoromi inom, it ekhe perak mene a'nogo inambugunweak hilingiti lagaukwa mene inom, inayonggo fesikhe. Inayonggo fesikhemo andogotukwama, aren he, ”Nagaila'lak. Nit a'nogo hilingiti lago andiba fano saburikhi lago, iluk hinelu.

²⁶ Mene re, yogondak at Paulus andi hilingiri'logo mene, hineilenggen tomok higik, hinesanggo holhik, ikhi lagep. Aren he, afuni inenggi nen su kembu hilingitarek andi re, ebe walhasikhe mene lego, iluk yagaisugunem, afuni hokhorogoaren, wene andi eberogoat, iluk wanha andi, horok o kota Efesus yoma mene nek fuk. O propinsi Asia mondogat hangge wanhama aro.

²⁷ Andi nen, nit a'nogo hilingiti lago mene yi ninabok weak palugun o. Mene re, nit ninabok enek weak palugun fuk. Ninombalo esin Artemis awi hokho wurik yi re, lek meneat anggikhi logolik, Artemis afuni o propinsi Asia mene mondogat inom, o yi awi ti awi mene inom, inomat he, at awe a'ma kuluk logolik fogerari'lagwi mene andi sebelogo legetfogoin o!” iluk yagaisasikhe.

²⁸ Yagaisasikhemo ina'mage hokhorogo lagasukwasik he, ”Nit afuni o Efesus mene ninombalo Artemis hokho andi aro,” iluk inane hokhorogo ugu mondok welagaukwa.

²⁹ A'nogo ikhi logolik, inane sagalhunem, afuni o kota Efesus andoma mene fungusegat andogosi waga logolik he, ap o propinsi Makedonia mene inebe pire, Paulus inom nikhi lagaukwa mene, inenu Gayus inom, Aristarkhus inom, inebe fakfisasukwasik kweang wagane'ma woginarek kwisukwa.

³⁰ Woginarek kwisukwama, Paulus ebe hobuk inombo'ne afuni inebe hokhorogoat andogore'ma andoma kwigeluk isikhe meneat he, it afuni Yesus ane wanhukwa mene nen, ”Hat kugun,” iluk wene palhukwa.

³¹ Nen, ap kaindek o propinsi Asia mene ekhe Paulus inom hundik welagaukwa mene nen he, ”Kweang wagane'ma andoma helokhe fei kugun o,” iluk it ekhe nen endawinggen sebeluageluk wene warogo oba lakfisasukwaat.

³² Nen, afuni andogotukwa mene omanogo, inebe hokho kwe wene ebe inonggorat andogosi wagaukwa andi nen, ”Nenahalok andogosi wago heat,” iluk it ekhe nen inane yi'nogo igik, it ekhe nen ti'nogo igik, inane hokhoat sagalhukwa.

³³ Inane a'nogo sagalhu kwelek, it ap Yahudi mene nen he, ap Aleksander afuni hokhorogo ineilhanem menfei wagaukwama re, it afuni hokhorogoat omanogo nen he, ”Wene ero, at higi,” iluk inendawimo anggasukwa. A'nogo anggugunem at Aleksander nen he, ”An wene noba le'ma o,” iluk afuni omanogo yagaisageluk enggi siagun warisasikhe meneat he, it inendawimo nen he,

³⁴ ”Ap yi Yahudi mene,” iluk ebe fut fesukwasik he, inane misigat lambukhogo, hokhorogoat mel isukwa: ”Nit afuni o Efesus mene yoma esin he, ninombalo Artemis andi aro,” iluk inane hundik-handigat 2 jam hangge ugu mondok welagaukwa.

³⁵ A'nogo ikhi lagaukwama re, at ap wene halhunem lisu palhi lagaikhe mene nen, it afuni hokhorogo omanogo inane legetfesikhe. Legetfesikhesik he, mel yagaisasikhe: ”Hit afuni o Efesus mene yi sani. Ninombalo Artemis hokho andi awi wurik andi inom, helep horek mene pogoroba nen pi wagaikhe mene afuni-afuni ilirengge hilingiti lagaukwa andi inom, nit afuni o Efesus mene yoma fisogo welagorek andi sani inonggot nogo? Afuni o yi awi ti awi mondogat inelu nego.

³⁶ Afuni ekhe nen, wene andi lek mene aro, iluk sagalugun lek. Halok he, hit yoma nen hinendawinggen lek hak yi'nogo ti'nogo ekhe hilingiti'lek, hinabolok legat logogun o.

³⁷ It ap yi nen, yi mene ti mene ninombalo su kembu awiba mene ekhe inenggi abisak wani kwigi'legat, su kembu ebe andi abok palhi'legat, werek kwelegat he, woginarek wagep yi ri!

³⁸ At ap Demetrius ebe inom, agoromi inambugunweak hilingitarek mene inom, inomen he, wene ap ekhe oba fagain werek halok he, inenggi ekhe sambul wene inoba figik kotik agarek oba nen, it gubernur lak ineilhanem wene inoba fogoin werego. Halok he, at ekhe nen wene at ekhe oba figik, at ekhe nen wene at ekhe oba figik, andoma nenat ugun werego.

^39-40 Hinebe andogosi wagepsik hinane hokhorogoat sagalhep yi, it ekhe nen, nena wene faget andogosi wagepsik ikhi lagep, iluk wene hinoba fugu halok he, hiren ninggi'nogo ugun. Wene ero le'ma yi ri! Iren he, weak hilingisuageluk inendawimo kagalhi lagep, iluk wene hinoba fogoin o. Andi nen he, hiren ekhe hilingisuageluk anggegep halok he, afuni mondogat inayonggo fuluk andoget fembik, wene inoba figik, kotik, agarek andi sambul wene higiretfogoin o,” iluk yagaisasikhe.

⁴¹ A'nogo yagaisasikhesik he, afuni andogotukwa mene omanogo pugulogo lakfisasikhe.