KISAH PARA RASUL 18 - Allah Wene Fano Wene Hupla Inane

At Paulus o Korintus wagaikhesik logolik hilingiti lagaikhe wene

¹ A'nogo hilingitikhesik he, at Paulus o kota Atena andoma herakfuluk o kota Korintus wagaikhe.

² Ebe oan wagi'lek werek kwelek, ap kain Klaudius nen he, ”Afuni Yahudi mene inebe o kota Roma logogun lek. Mondogat hela wulibuago,” iluk wene palhikhemo re, ap Yahudi mene ekhe enu Akwila. Ebe o Pontus ta'lagaikhe mene. Agwe enu Priskila emberegat, o Italia nen it tak o Korintus kerat lagaukwasik were'ma, at Paulus hobuk wagaikhesik isa wagaikhe andi.

³ It Akwila Priskila emberegat inenggi onggo faget he, o wutu mene su kwati lagaukwa. At Paulus enggi onggo faget a'nogoat kwati lagaikhe andi nen he, it inoba wagaikhesik logolik, inomat kwati lagaukwa.

⁴ A'nogo kwatu inom logolik, hundik-handik Allah faget inenggi weat logolik samban uogeluk ugunem, o afuni Yahudi mene samban ikhi lagaukwaba kwisukwasik he, it afuni Yahudi mene inom, Yunani mene inom, Yesus ane wanuageluk inendawimo kagalhi lagaikhe.

⁵ Inendawimo kagalhunem he, it Silas Timotius emberek o Makedonia nen wagaukwama re, at Paulus hunogo mene ekhe hilingiti'lek, we, wene andiat yagaisikho mondok welagaikhe. It afuni Yahudi mene mel yagaisasikhe: ”Allah nen he, Kristus lakfei wesigin iluk wene wa'nisasikhe a'nogo re, ebe Yesus wagaikhe andi aro. An nelu,” iluk fakhogo yagaisikhi lagaikhe.

⁶ A'nogo yagaisugunem iren he, ”Weak ikhi lagen o,” iluk abok weak palhi lagaukwama re, at Paulus nen he, ”An wene noba lego,” iluk u hak, asu endakwe mene ololong horogo pelakfisikhi logolik he, mel yagaisasikhe: ”Hit hinonggwaregen nong akhegep halok he, hinoba lombogo. An noba lego. Huli yogondak huli nen, an afuni endakwe mene wene yagaisa lagain o,” iluk yagaisasikhesik,

⁷ it o andoma herakfisaluk wulifikhesik he, ap endakwe mene Allah ane wanhikhe mene enu Titius Yustus andi aiba lagaikhe. At aiba andi re, o it afuni Yahudi mene samban ikhi lagaukwaba era'luat wurik welagaikhe.

⁸ Ap Krispus, o afuni Yahudi mene samban ikhi lagaukwaba andi kain eisewerek welagaikhe mene ebe inom, againafuri inom, ”Wene andi eberogoat,” iluk inendawinggen Tuhan Yesus oba himbiret fesukwa. Himbiret fesukwama re, it afuni o kota Korintus mene ekhe inebe hokhorogoat wene holhukwasik he, ”Eberogoat,” iluk wanhi lagaukwama re, inom ima pelaginafukwa.

^9-10 A'nogo hilingitukwama, inenggi ekhe o hubanggo Tuhan nen Paulus abikanggoba wene mel yagatikhe: ”Hailo agun. An kwelakharek mondogat welagi. O yoma an nagainafuri inebe hokhorogoat were'ma re, afuni ekhe nen weagethabuogeluk yi'nogo ti'nogo ekhe hilinghabugun lego. Halok he, kamo igi'lek wene yagaisikhoat logoino,” iluk yagatikhe.

¹¹ A'nogo yagatikhe andi, satu tahun welagaikhesigen, tugi 6 en ekhe inom Paulus ebe o andoma kamo isikhesik logolik, Allah ane yagaisugu welagaikhe.

¹² O propinsi Akhaya andoma ap kain Galio gubernur logouwageluk menfesukwama were'ma, it afuni Yahudi mene inebe andoget fesukwasik, Paulus ebe wasuogeluk fakfesukwasik he, anema wanuageluk ap wene inoba figik, kotik, agarek mene inoba waluk lagaukwa.

¹³ Ebe waluk lagaukwasik, wene oba fikhi logolik he, mel isukwa: ”Ap yi nen he, wene Allah nen komotninafikhe wene a'nogo herakfisaluk, Allah ebe nek fogerati logolik he, hunogoat hilingiti logouwageluk inendawimo kagali'logo mene waluk wago o,” iluk yagaisasukwa.

¹⁴ A'nogo isukwama, at Paulus nen wene onggo igin ha'ma nen he, at Galio nen afuni Yahudi mene yagaisikhi logolik, ”Hit afuni Yahudi mene yi sani. Wene oba fegepsik waluk wagep yi re, nit pemerintah Roma mene ninane sebelogo fuluk weak hokhoat hilingitemo nen waluk we'lepma re, fanoat yaganesi wagep, iluk, hiren ugu kwelek nesanggo holek logoile.

¹⁵ Mene re, wene yi hit hinonggwarek hinane faget inom, hinenu faget inom, hit hilingiti lagep mene faget inom, oba fegepsik waluk wagepma re, hit hinoba lombogen halini o. Wene ariginik mene, an nen pilingisigin lego. Nabit,” iluk yagaisasikhe.

¹⁶ A'nogo yagaisasikhesik he, o wene inoba figik, kotik, agarek oba andoma nen mugusogo wulakfisasikhe.

¹⁷ Wulakfisugunem, it afuni ekhe mondogaren he, ap enu Sostenes, o afuni Yahudi mene samban agarek oba eisewerek kain welagaikhe mene andi, ebe fakfesukwasik he, o wene inoba figik, kotik, ikhi lagaukwaba andoma ebe yei watukwa. A'nogo watu kwelegat he, at Galio a'nogo nen elele wanhi'lek obakhe nene kamo isikhe.

Paulus ambotkwe o Antiokhia lagaikhe wene

¹⁸ At Paulus enggi hokhorogoat Allah againafuri o kota Korintus mene inom andoma welagaukwasigen he, hobuk it o andoma hai warogo fisaluk, he Priskila agun Akwila emberek inomat woginarek he, imakwe i agun ebene nen i soba o Siria lowuogeluk isukwa. Isukwasik, o kota Kengkrea lagaukwasik andoma logolik, ”An Allah nemberek hundik welago, iluk nesi uan-awan logouwageluk herakfagain,” iluk herakfesikhesik welagaikhe mene re, ”Huli yi huli arat,” iluk felelenghogo palhikhe.

¹⁹ Esi a'nogo palhikhesik, o andoma nen o Efesus lagaukwa. Lagaukwasik he, it Akwila Priskila emberek andoma fisaluk he, o afuni Yahudi mene samban agarek oba kwisukwasik he, it Yahudi mene andoma welagaukwa mene, wene aren inendawimo kagalogo yagaisugunem, iren onggo yagatik, iren at yagatunem, aren onggo yagaisigik, ikhi lagaukwa.

²⁰ A'nogo ikhi lagaukwasik, iren he, ”Hat yoma henggi hokhorogoat ninom logombigen lanogo,” iluk fakfouwogeluk isukwa meneat he, aren he, ”Nabit,” isikhe.

²¹ A'nogo isikhesigat he, lageluk ikhi logolik, mel yagaisasikhe: ”Hit egep andi Allah nen fano iluk anggikhe halok he, an hobuk hinoba wesigin o,” iluk o Efesus andoma nen i agum ebene nen e soba o Kaisarea lagaikhe.

²² O Kaisarea lagaikhesik he, Allah againafuri o Yerusalem mene hai warinafi lagaikhesik he, hobuk ambotkwe o Antiokhia wagaikhe.

²³ O Antiokhia wagaikhesik welagaikhesigen he, hobuk o propinsi Galatia inom, Frigia inom, waga logolik andoma it afuni Yesus ane wanhukwa mene inendawinggen ago watfisilik nikhi lagaikhe.

Apolos o Efesus logolik wene yagaisikhi lagaikhesik, hobuk o Korintus wagaikhesik hilingiti lagaikhe wene

²⁴ Ap Yahudi mene ekhe enu Apolos. Ebe o Aleksandria nen ta'lagaikhe mene, o Efesus wagaikhesik welagaikhe. Awenenggak katokhogo nek ikhi logolik he, Allah ane lisu palek a'nogo elu mondok welagaikhe.

²⁵ Were'ma re, it ekhe nen he, ninoe Yesus ombo'ne lagaikharek wene andi yagatukwama wanhikhesik he, ima pelaginafarek wene andi, Yohanes nen ima pelaginafi lagaikhe andi nek elu welagaikhe. A'nogo meneat he, Yesus ane omamerogo yagaisigik, higithogo yagaisigik, ikhi lagaikhe.

²⁶ Yesus ane wanhikhesik he, o it afuni Yahudi mene samban ikhi lagaukwaba kuluk, ailo lek logolik, wene fakhogo yagaisikhi lagaikhe. Yagaisugunem he, it he Priskila agun Akwila emberek inesanggo holhukwasik, ebe waluk inaiba lagaukwasik he, Allah nen at ombo'ne laga logouwageluk endawimo anggikherek wene andi furogo yagati lagaukwa.

²⁷ Yagati lagaukwama re, o Akhaya wesigeluk isikhemo, Allah againafuri o Efesus mene nen, wene lisu palogo it o Akhaya mene Yesus ane wanhukwa mene inoba lakfikhi logolik, mel isukwa: ”Apolos hinoba waga andi fanorogo wanino,” iluk lisu palogo wogetukwama waluk lagaikhe. Lagaikhesik he, it afuni o Akhaya mene Allah obabut fano nen wene eberogoat anggaluk wanhukwa mene hokhorogoat leberisikhi lagaikhe.

²⁸ Leberisikhi logolik, it Yahudi mene inom afuni ineilhanem wene palhi logolik he, awenenggak katoksek andi nen, it inane mabenetfisaluk, at ane omame agaikhesik he, Allah ane lisu palek a'nogoba yagaisikhi logolik he, ”Allah nen he, Kristus telinaferek mene lakfei wesigin iluk wene wa'nisasikhe a'nogo, ebe Yesus lakfei wagaikhe andi aro,” iluk fakhogo yagaisikhi lagaikhe.